Nag̓apaawatan Na Tanira Ta Mupia Ang Para Indi Makayanan Ta Patalang Ta Duma (2:1-5)
2
Pati yamu,
kumus sakëpamu ra ka tung katëngdanan ang naang ipinagpiar yang Dios tung yëën,
gustuu kang makdëkan mi kung ya pa ag̓arig kadërëp yang pagpaawatu ang basi pa ra ilëm mataw̓anganamu ra ka yëën pati yang mga tumatalig duun tung Laodicëa asta yang kadaklan ang mga tumatalig asan tung mga kabiw̓init-binitan yang banwa mi ang indi pa ka pangaita tung yëën.
2 Yang pag̓asikarung pagpaawat ay ug̓ud këmtël da ta mupia yang mga isip ming tanan ëkël tung pagbërëgkës-bëgkësan ming paggërëgmaan.
Yang sam bilug kang pag̓asikaru ay ug̓ud mamarësmësan mi ra kang pisan yang nag̓adapatan yang bitala yang Dios,
kung unu pa ëngëd ay palaksu yang planu nang inëgtëman na pa rin ang tukaw ang pagkatapus ipinagpabunayag na ra numanyan ang ya ra ka man yang natëtëngëd tung ni Jesu-Cristo.
3 Ay ultimu ilëm tanyay sarang ang magpaëyang ta ipagkabuskad yang mga painu-inu mi ug̓ud mamarësmësan ming pisan yang palaksu yang planu nang atia ang yay maning pa tung sasang manggad ang durug kaimpurtanting maëklan.
4 Yang nag̓ipagsambitu tung mga bag̓ay ang atia tung numyu ay ug̓ud indiamu ra makayanan ta patalang yang dumang mga manigtulduk ëkël tung mga katadlëngan nirang durug kakaingganya.
5 Ya ra kay natëngëran na ang nag̓apaawatanamu yëën ta mupiang nag̓apasanag̓an ang nunut da ka ta pag̓arampuënung madërëp,
kipurki maskin andawaw ka man asan ang pagpadag̓ën-dag̓ën tung numyu,
piru ëkël tung kagaëman yang Espiritu Santong pagtinir tung yatën,
katimbang nang asanaw ka ëngëd tung numyu ay pirmiamu ka man ang nag̓adëmdëmanu.
Yang pagparaawatënung naa nunut da ka ta kasadyaan yang isipu natëtëngëd nag̓askëanu ra ang yamu asan pagsarasaan da ta matinlu ig mabakëd ka yang pagtaralig̓ën mi tung ni Jesu-Cristo.
Kaministiran Ang Pausuyan Nira Yang Mga Ug̓aling Magkabag̓ay Ang Urusuyun Yang Sasang Taung Pagpalalang Da Tung Ni Jesu-Cristo (2:6-7)
6 Kapurisu,
kumus pinanangëd mi ra ka man yang ipinagtulduk tung numyu natëtëngëd tung ni Jesu-Cristo ang tanya ray Ginuu ming pagkalalangan tung numyu,
kaministiran ang yang ug̓aling pausuyan ming kaldaw-kaldaw,
ya ra yang mga ug̓aling magkabag̓ay ang urusuyun yang kumpurming pagpalalang tung anya.
7 Bilang idayun mi ëngëd yang pagparanangërën mi tung ipinagtulduk ni Epapras
epapras tung numyu ang nunut da ka ta pagturumanën mi.
Pati yang pagparasalamatën mi tung Dios idayun mi ra ka.
Nag̓apaamanan Na Tanira Ang Indi Ëngëd Magpaëkël Yang Mga Isip Nira Tung Dumang Sistimang Nag̓itulduk (2:8-15)
8 Mangamanamu ra ëngëd ta mupia nusias maëklanamu ra ta dumang papanangërën tung dumang pag̓irintindiën tung Dios ang bëlag kang lag̓i tama ig anday kaayënan na.
Ay kipurki yang nag̓itulduk nirang atia,
duun da ilëm ngaëklay nira tung bitalang nag̓ipagngël yang mga mamaëpët nira.
Yang nag̓adapatan na natëtëngëd ka ilëm tung mga riglamintung natauan nirang pangkaliw̓utanën ka ilëm ang indi pagkatunu tung kamatuuran ang nag̓itulduk natëtëngëd tung ni Jesu-Cristo.
9-10 Ayw̓at mag̓intindiamu pa asan,
sindu tung tinanguni mismu ni Jesu-Cristo nga këën yang kabilug̓an yang pagkadios yang Dios ig kumus idinamayamu ra yang Dios tung anya ang yay landaw ang pisan ta kagaëman kay tung maskin unu pang klasiay ta mga taung atiang indi nag̓aita,
yang nag̓abtangan ming atiang baklu may pagkakumplitu na ra tung pagtërëlëngën yang Dios.
11 Pariu ra asan tung sasang inubra ni Jesu-Cristo tung numyung atiing nagtalig̓amu ra tung anyang nagpakigkapulit.
Yang inubra nang atii tung numyu midyu magkaanggid-anggid tung pagburuatën ta tanda yang mga masigkanasyunung mga Judio tung tinanguni yang mga ana nirang mga lalii.
Katulad tung sasang mulang lalii ang yang sang parti tung tinanguni nang yag puputus ang ya ëkbay ang iplëk,
yamu ya ka.
Ipinaluasamu ra ka ni Jesu-Cristo tung pagkaputus mi tung dating pagkatau ming mapinagpanadili ang kuntra tung kalëlyag̓an yang Dios.
Yang inubra na rang atia tung mga sadili mi,
bëlag̓an buat-buat ta tau ig bëlag ka tung tinanguni mi ubraay na ang katulad tung nag̓aubra tung mga mamulang atia,
kung indi,
yang kinaisipan mi mismu ya ray inubra nang inimaklu.
12 Yang inubra nang atia tung numyu,
yang pisan ay pinananglitan ming nagpabënyag.
Ay atiing yamung ipinadalëm da tung wai,
asan da nga pananglitay mi ang atiing pag̓apatay ni Jesu-Cristo,
nagkasira-siraanamu ra kang napatay kag ipinalg̓ud tung lëyang.
Utru si,
atiing yamung binangun da,
asan da ka nga pananglitay mi ang atiing pagpabungkaras yang Dios tung anya,
nagkasira-siraanamu ra kang binwi si kang uman.
Nagkamaninganamu ra ta maning tia ay natëtëngëd itinalig mi ra kang lag̓i yang mga sadili mi tung Dios ang talagang kayananamu ra anyang imakluën ang katulad ka tung binuat na tung ni Ginuung Jesus ang tanya pinabungkaras nang pinaliit tung mga minatay.
13 Kipurki atiing indiamu pa nag̓apagtalig tung ni Ginuung Jesus,
yamu maning pa tung sasang patay.
Indiamung pisan kuminiknël ang nagtuman yang mga katuw̓ulun na,
kung indi,
ya ra ilëm maglampasay mi.
Ay ya pa ag̓ari,
pag̓aëklanamu pa yang natural ming mapinagpanadili.
Piru maskin pang maning tia,
simanyan,
kumus iginapilamu ra anya tung ni Jesu-Cristo,
maning pa tung nagkasira-siraanamu ra kang binwi na si kang uman bilang pinaëyanganamu ra anya ta ipagpangabui ming baklu.
Kidispuis pa,
yang pagpagapil nang atii tung numyu,
ya kay pagpatawad na tung numyu tung tanan ang paglalampasën ta tung mga katuw̓ulan na.
14 Yang kaalimbawaan yang pagpatawad na tung yatën,
maning pa tung may sasang bawdukumintung isinulat na ang duun napabtang yang tanan ang nag̓ipakusalak na tung yatën,
ang pagkatapus ya ray maning pa tung idinamay nang ilinansang tung krus ang pinaglansangan tung ni Jesu-Cristo ang para duun dang pisan nga parëng.
15 Dispuis pa,
ëkël tung pinagtalus ni Jesu-Cristong nagpakugmatay,
duun da nga kapasay yang Dios ta këtël yang mga taung atiang indi nag̓aita ang may mga kagaëman nira.
Pagkatapus ipinabistu na ra ka nganing ang tanira dinëëg na ra ka man.
Yang kaalimbawaan na,
maning pa tung sasang iniral ang nandëëg da tung gira ang pagkatapus yang mga kuntrariung ipinampabiag na yay nag̓apampaguyuran na ang para ipailala na tung publiku ang tanira tung tarampakan da yang kakay na.
Nag̓ipaprusigir Nang Pamatuy-patuyan Da Ilëm Nira Yang Nag̓ipausuy Yang Duma Ang Mali (2:16-19)
16 Padayunanu ra kanay yang gustuung ipaaman tung numyu.
Mamatuy-patuyamu ra ilëm tung kumpurming pagsaway tung numyu asan natëtëngëd indiamu pagtuman yang mga riglamintung nag̓apapaktëlan nira.
Sasa ra asan tung mga palanganën.
May asan kang indiamu ka pagsilibra tung mga pistang atiang pag̓ipagsilibra ta mga Judio tung takun-takun ubin tung kada lumati yang bulan.
May asan da kang indiamu ka pag̓usuy tung mga aramlig̓an nira tung mga Sabadu.
17 Indi mi ilëm intindiën yang mga riglamintung mga maning tia ay kipurki yang kaalimbawaan nira,
maning pa tung ulung ka ilëm.
Yang may ulung tia,
taa ra yang kabilug̓an na.
Kuminaw̓ut da yang kalibrian ang ipinakdul da ni Jesu-Cristo tung numyu.
18 Purisu mamatuy-patuyamu ra ilëm tung maskin tinu pa asan ang pagpakusalak tung numyu natëtëngëd indiamu unu pag̓intindi tung Dios ang katulad tung mga papanaw ang atiang nag̓apapaktëlan nira.
Pariu ra asan ang indiamu unu puiding mag̓ampu tung Dios ang diritsyu,
kung indi,
magparanëkamu unu tung mga angil ang ya ra unu ay magparalun tung Dios yang nag̓aingaluk mi.
Ayw̓at saptën mi yang taung pagtulduk ta maning tia sindu anday dumang nag̓apatiëlan na yang nag̓itulduk na,
ya ra ilëm yang mga milagru ubin yang nag̓ipadakat tung panëlëng na.
Ya ka nganing ay pagdakulan yang kulu na,
maskin anda ka man ang pisan ay natëngëran nang magkatama.
Ay ya pa ag̓ari,
yang palaksu yang pag̓irisipën na,
pag̓aëklan pa yang dating pagkatau nang mapinagpanadili.
19 Yang taung maning tia,
namalpas da tung ni Ginuung Jesus ang ya ra kay natëngëran na ang pati yang matuud ang nag̓itulduk natëtëngëd tung anya,
ipinlëk na ra ka.
Ay ti Ginuung Jesus yay maning pa tung sasang kulu.
Katulad tung kulu ta ang yay pag̓ërëkëlën tung kabilug̓an yang tinanguni ta ang may mga ulaan kag kaulatan nang pagsurugpat-sugpatan,
tanya kay pag̓ërëkëlën tung kabilug̓an yang tanan ang mga tumatalig ang salëgsa-salëgsang pundaan ang yay maning pa tung tinanguni na taa tung katanëkan ug̓ud mag̓umintu rang mag̓umintu ang uyun tung pinagplanu kang lag̓i yang Dios.
Nag̓apaamanan Na Ang Indi Ëngëd Mag̓usuy Tung Mga Riglamintung Pangkaliw̓utanën (2:20-23)
20 Kumus maning pa tung nagkasira-siraanamu ra ka ni Jesu-Cristong napatay,
katulad ka tung sasang taung napatay ra ang liw̓ianu ra tung tanan ang ipaubligar da rin tung anya,
liw̓ianuamu ra kang indi mi ra dapat ang ubligarën yang mga riglamintung mga maning tiang pangkaliw̓utanën ka ilëm.
21 Ayw̓at magpasuituamu pa tung mga riglamintung nag̓ipatuman ta duma tung numyu?
Katulad da asan ang indiamu unu magpëg̓ës tung sasang bag̓ay,
ay panliitan unu ta malain.
Asan da kang indiamu unu mamangan ta sasang palanganën,
ay giradu unu.
Asan da kang maskin tung pagdëën ilëm unu tung dumang bag̓ay,
indiamu ra ka unung magdëën.
22 Yang indi mi ipagpasuitu asan,
ay yang tanan ang atiang nag̓ibawal nira,
pulus ilëm mga bag̓ay-w̓ag̓ay tung kaliw̓utan ang anday pagnatisan nira.
Pagkatapus magamit ta ra nganing,
taklib da ka ilëm.
Ayw̓at mag̓usuyamu pa tung mga riglamintung mga maning tiang pulus tulduk ta tau ang inimu-imu ka ilëm nira ang ya ray gustu nirang ipausuy nira tung numyu?
23 Kung tung bag̓ay,
agbantug̓un ta mga tau ang talagang matuud ka unu yang nag̓itulduk ang atia,
ay natëtëngëd yang kumpurmi unung pag̓usuy tung mga riglamintung atia,
paglua rang durug katinuuën ig durug ka unug kapinagparanëk yang pagturuuën na tung mga angil,
ig pagpapinitinsia pa nganing unu ta maayën tung tinanguni na.
Piru tung pagkamatuud,
anda ëngëd ang pisan ay kakuinta-kuinta na yang nag̓abantug nirang atia.
Kung indi,
anday dumang pakaw̓utun yang mga taung pamag̓usuy,
asan da ka ilëm magpaguyud ang mas pa tung dating pagkatau nirang mapinagpanadili ang kuntra tung nag̓auyunan yang Dios.