Nag̓apaprusigir Na Tanira Ang Pabilug̓an Nira Yang Kumpurming Unu Pay Nag̓auyunan Ni Jesu-Cristo Ang Duun Da Tung Langit (3:1-4)
3
Numaan padayunanu ra kanay yang gustuung ipausuyu tung numyua.
Kumus maning pa tung nagkasira-siraanamu ra ni Jesu-Cristong binwi si kang uman yang Diosb ang asanamu ra ka nga paëyangay na ta ipagpangabui ming baklu,
ya ray ipagkaministiran mi ang pirming sikarën ming tumanën yang kumpurming nag̓auyunan ni Jesu-Cristong yag kakarung tung tëpad yang Dios ampir tung tuu na duun tung langit.
2 Bilang yang kumpurming uyun tung anya,
ya ray pagamënan mi ta mga isip mi,
bëlag̓an yang mga ubra-ubrang malalain ang yay kadagmitan ang nag̓abuat ta kadaklan ang mga tau taa tung kaliw̓utan ang naa.
3 Yang mga ubra-ubrang mga maning tia indi mi ra ëngëd balikan kipurki pinablag̓an mi ra yang dating sistima mi ang katulad ka tung sasang taung napatay ra ang pinablag̓an na ra ka yang dating sistima nang atiing bui pa rin.
Kung indi,
yang baklung sistimang uyun tung ni Jesu-Cristo ya ray prusigiran mi gatëd simanyan yang kaalimbawaan mi maning pa tung pagkasira-siraanamu ra ni Jesu-Cristo duun tung katalungaan yang Dios ang yang pangultimung pagpangabui mi taluk pa.
4 Kung kaw̓utun da nganing yang uras ang ti Jesu-Cristo ipabistu ra ka ëngëd yang Dios tung publiku ang ya ka man ay pinangapunglan yang pangultimung pagpangabui mi,
pati yamu magkasiraanamu ra kang ipabistu na ang duruamu rag kasusulaw ang tëlëngan ang katulad ka tung anya.
Nag̓asambit Na Yang Mga Ubra-ubrang Dapat Dang Tabtaw̓ën Nira (3:5-11)
5 Kapurisu kumus maning da ka man tia yang mabtangan mi tung uri,
tabtaw̓ën mi ra ëngëd yang pag̓urubraën ming mga malalain ang katulad ka tung sasang taung napatay ra ang natabtab da ka yang pag̓urubraën na.
Pariu ra asan tung pangumbaw̓ay may pangunlalii.
Asan da ka ta paggaramitën yang pagkalalii nira ubin pagkabaw̓ay nira ang baliskad tung natural kang lag̓i nirang disti pa tung primiru.
Asan da ka ta isip nang indi ra tëmëgka ang indi na buatën yang malain.
Indiamu ra ka mag̓amluk tung mga kaayënan ang pangkaliw̓utanën ka ilëm.
Ay kipurki kung mag̓amlukamu,
katimbang nang ya si ay nag̓ipakli mi tung Dios ang nag̓apalusuan ta gëgma mic.
6 Sipurki yang mga buat-buat ang mga maning tia talagang ya ray ipagsintinsia yang Dios tung kalainan tung mga taung mabinatukun tung anya.
7 Pati yamu,
maning kang pisan tia yang mga ubra-ubra mi tan taa atiing pagsaranyug̓anamu pa rin yang mga kaarumanan ming pamagbuat ta mga maning tia.
8 Piru simanyan,
ta numyu,
pati yang dumang mga ubra-ubrang naang sambitënung mga malalain ka,
tabtaw̓ën mi ra kang ipamlëk.
Bilang indiamu ra ka masilag ubin magdëmët.
Indiamu ra ka magtima ta mga malalain ang buatën tung mga masigkatau mi.
Indiamu ra ka magliw̓ak tung nira,
indi mi ra ka duminarën.
9 Indiamu ra ka magburuklian.
Yang tanan ang atiang nagkarasambitu,
lipatën mi rang luw̓us ay kipurki atiing pagtalig mi yang mga sadili mi tung ni Jesu-Cristo,
tinalyuran mi rang binutwanan yang dating pagkatau mi pati yang dating mga ubra-ubra ming duun maniël atii kanay.
10 Kag yadwa pa,
pinaëyanganamu ra ka ta pagkatau ming baklu ang ya ray ag̓imakluën dang ag̓imakluën yang Dios ug̓ud mas pang mag̓atuamu rang mag̓atu tung anyang nagpaëyang.
Yang katuyuan na tia ay ug̓ud mas pang magtinlu rang magtinlu yang kaampiran mi tung anya.
11 Purisu yang linuaan na,
bëlag̓an dang impurtanti kung tinu pay Judiong may tandang binuat tung tinanguni na u kung bëlag man.
Maskin dayuan ubin bëyënganën man,
maskin kirëpën,
maskin suiltu man,
pantay-pantay ra ilëm tung pagtërëlëngën yang Dios.
Kung indi,
yang sulaminti ilëm ang impurtanti,
ya ra ti Jesu-Cristong pagpakigkapulit tung nirang tanan sasa may sasa.
Nag̓asambit Na Ka Yang Mga Pag̓urubraën Ang Magkabag̓ay Kang Maita Tung Nira (3:12-17)
12 Kumus pinagpilikamu ra yang Dios ang ipinagpablag tung mga aruman mi ang para mag̓ing mga tauanamu ra anyang sadili ig kumus nag̓agëgmaanamu ka anya ta duru,
yang ug̓aling dapat ang maita tung numyu,
ya ra taa.
Kaministiran mainildawënamu ang durug ka nëëman,
mapinagparanëkamu ka ang tung katamtaman ilëm yang pagpabëtang mi tung mga sadili mi,
mapinasunairënamu kang mapinarurusun tung mga aruman mi ang yamu pirmi kang mauray.
13 Mag̓aragwantaanamu kang magparatawaran kung tinu pay may kasiit ta kinaisipan tung aruman na.
Katulad tung pagpatawad ni Ginuung Jesus tung numyung anday kundisiun ang iningaluk na,
ya kay suarën ming magparatawaran.
14 Landaw ra tung tanan ang maggërëgmaanamu ta ustu ay kipurki kung maggërëgmaanamu,
asanamu ra magbërëgkës-bëgkësan ta maëlët.
15 Yang pag̓uruyunan ming magpurutul ang atiang ipinagpaëyang ni Jesu-Cristo tung numyung sam pundaan,
ya ray buatën ming sasang pitik ang yay dapat ang pausuyan mi tung tanan ang pag̓urubraën mi.
Ay kipurki ya ra kang lag̓i ay katuyuan nang nagbëtëng tung mga isip ming magpatapnay tung ni Ginuung Jesus ang yamu magsarasaan dang sam pundaan ang maning pa tung sa nga tinangunianamu ra ilëm.
Ig kidispuis pa,
pirmiamu ra kang magpasalamat tung Dios maskin unu pay mapanawan mi.
16 Kaministiran ang yang bitalang ibinutwan ni Jesu-Cristo tung yatën,
yay pirming ipabalay mi tung mga isip ming pasërëw̓ën ta maayën ang para yay mag̓ing pitik ang pausuyan mi tung tanan ang pag̓irisipën mi kag pagburuatën mi.
Yang pagpabalay ming atia,
ipapanaw mi tung pagsaragpun-sagpun ming magpurutul ang asanamu ra magturulduk-tuldukan ig magparaaman-amanan tung mga matitinlung pasais ming pagbitala ang matakuamu kang mamalpas.
Ipapanaw mi ka tung pagkarantaën mi ta sari-saring klasi ta karantaën,
mag̓ing mga karantaën ang atiang napabtang da kang lag̓i tung kasulatand,
mag̓ing dating mga karantaën ming pagdayaw,
mag̓ing mga kantang baklu kang nag̓ipaëyangay yang Espiritu Santo tung mga isip mi.
Kung unu pay magkantaën mi,
kaministiran ang tëdëk ang pisan tung mga pupusukun mi ig matinlu kang lag̓i yang pamëtang-bëtang yang mga sarabiën na ang yay uyun ang pisan tung Dios ang ya kay nag̓apagngëlan mi.
17 Kung papagbilug̓unu ra yang gustuung ianing tung tanan ang atiang nagkarasambitu tung sam bulus ang atiae,
maskin unu pay ibitala mi,
maskin unu pay buatën mi,
luw̓us dang ëklan mi tung magkabag̓ay ang dapat buruatën yang kumpurming pangërëngan tung ni Ginuung Jesus ig nunut da kang pirmi ta pagpasalamat mi tung Ama tang Dios ëkël tung anyang pagpakakngang pagpakigkaw̓ut.
Nag̓apaprusigir Na Tanira Sigun Tung Mga Ug̓aling Dapat Ang Maita Tung Magkarasawa, Tung Mag̓arana, May Tung Mag̓arag̓alën (3:18–4:1)
18 Ta yamung mga baw̓ay,
pirmiamung magparanëk ang magpalalang tung kasawa mi kipurki yay magkabag̓ay ang pisan tung pagkarapulitan mi ni Ginuung Jesus.
19 Pati yamung mga lalii,
maalën mi ëngëd ta maayën yang mga kasawa mi,
indi mi ëngëd dëg̓a-rëg̓aën.
20 Yamung mga mamula,
magpanangëramu rang pirmi tung mga ginikanan mi,
ay yang pagpanangëd mi tung nira yay nag̓auyunan ang pisan yang Dios ig ya kay magkabag̓ay tung numyung kumpurming pagkinapulitay ra ni Ginuung Jesus.
21 Pati yamung mga ginikanan,
kapin da ëngëd yamung mga tatay,
indi mi masyadung pagpalbatan yang mga ana mi ang anda ray pamatëng-patëng mi ay muya asan da nga paluw̓ayay mi yang nëëm nirang asta maplëkan da ta ipagbuat nira ta matinlu.
22 Yamung mga kirëpën,
magpanangëramu ra kang pirmi tung mga ag̓alën mi taa tung katanëkan,
maskin unu pay ituw̓ul nira tung numyu.
Indiamu ra ëngëd mag̓usuy tung dumang kirëpën ang yang pagpakirëpën nira nag̓apadërëpan ilëm nira kung tanira nag̓abantayan yang ag̓alën nira.
Kung indi,
dapat talagang tëdëk tung pupusukun mi yang pagparanangërën mi tung nira natëtëngëd tung panggalang mi tung ni Ginuu ta.
23 Maskin unu pay buatën mi,
padërëpan mi ta mupiang ubraën ang bilug ang pisan tung mga isip mi ang katimbang nang ti Ginuung Jesus mismu yay pangag̓alënan mi,
bëlag̓an da ilëm tau.
24 Kipurki nag̓askëan mi ra ka ang tung uri,
ti Ginuung Jesu-Cristo mismu yay magbalës tung numyung magpakdul yang pinangakuan na.
Ay ya pa ag̓ari,
tanya ëngëd yang panirbian mi.
25 Ug̓aring,
kumpurming tinu pay pagpadayun tung pagburuatën nang malalain,
bëlsën da ka yang Dios ang sukat ang pisan tung mga buat-buat na ang tanya ka man andang pisan ay pinilikan.