4 Pati yamung mga ginikanan,

kapin da ëngëd yamung mga tatay,

indi mi lalangan yang mga ana mi ta bëlag dang sukat ang pagkalalangan ang muya ya ray makanayan ta ikaërëp nira tung numyung ipagsungun.

Kung indi,

ëklan mi tung matinlung pasais yang pagparadakulun mi tung nira.

Isipën ming pirmiang kung alimbawa ti Ginuung Jesus din ay ginikanan nira,

kung ya pa ag̓ari yang mga pasais nang manuldukan kag magdisiplina tung nira ang may kanunut na kang gëgma.

5 Yamung mga kirëpën,

magpanangëramu ra kang pirmi tung mga ag̓alën mi taa tung katanëkan ang tëdëk yang paggaralangën mi tung nira ang nunut da ka ta pangaman mi ang muya magkamaliamu pa ang katimbang nang ti Jesu-Cristo mismu yay pangag̓alënan mi.

6 Indiamu ëngëd mag̓usuy tung dumang kirëpën ang yang pagpakirëpën nira nag̓apadërëpan ilëm nira kung tanira nag̓abantayan yang ag̓alën nira.

Kung indi,

ta numyu,

yang pagpabëtang mi tung mga sadili mi yamu maning pa tung mga kirëpënamu ni Jesu-Cristo mismung pagtuman yang kalëlyag̓an yang Dios ang bilug tung mga isip mi.

7 Ëklan mi tung matinlung kinaisipan yang pagpakirëpën mi tung nira ang katimbang nang bëlag̓an ilëm yang sasa ka ilëm ang masigkatau mi yang nag̓apakirëpënan mi,

kung indi,

kapin pa ëngëd ti Ginuu ta mismu.

8 Sipurki nag̓askëan mi ra ka ang sasa may sasa tung yatën,

maskin kirëpën,

maskin ag̓alën,

kumpurming unu pay nag̓abuat tang matinlu,

balësanita ka ëngëd ni Ginuu ta ta matinlu ka.

9 Pati yamung may mga kirëpën,

ya ka.

Yang pag̓ërëkëlën mi tung nira,

kaministiran ang ëklan mi ra ka tung magkatama ang magkapariu ka tung nag̓ianingu tung nira nungayna.

Purisu ustu ra tiang pagpamalëg mi tung nira.

Kipurki nag̓askëan mi ra ka ang ta yamu pati yang mga kirëpën mi sam bilug ilëm yang pangag̓alënan mi duun tung langit.

Ang pagkatapus tung anya,

andang pisan ay pinilikan,

kung indi,

pantay-pantay ilëm.

10 Ya ra taa yang pagtapusanung bitala.

Anday dumang pangkëlan mi ta këtël ming magprusigir,

suluminti ilëm ti Ginuu ta ang yay may kagaëman ang durug puirsa.

11 Tëlëngan mi ra ilëm yang sasang sundalu.

Baklu ra magpasubu tung gira,

magpasangkap da kanay ang anday kulang tung tinanguni nang para riparasiun da.

Yamu ya ka,

magpasangkapamu ra ka tung tanan ang gustu yang Dios ang ipasangkap na tung numyu ug̓ud kayanan ming panguntiëlan ig batukan yang mga planung malain ni Satanas ang durug dalëm yang sag̓usut na tung yatën.

12 Ya ray dapat ang buatën mi ay kipurki yang nag̓abatukan mi ëngëd bëlag̓an yang mga masigkatau mi,

kung indi,

ya ra yang tanan ang mga taung indi nag̓aita ang sari-saring klasing nag̓apanuw̓ul ni Satanas^c.

Tanira arabubwat ta kagaëman ang yay pamagkërëmkëmën tung duma-rumang lugar tung bilug ang kaliw̓utan.

Ya kay pamag̓ërëkëlën tung makiklëp ang naang nag̓atiniran ta kadaklan ang mga tau taa tung kaliw̓utan ig pamagtukud ka ta sari-saring mga malalain ang para tag̓aman da nirang ranggaën yang planu yang Dios ang gustu nang ipapanaw tung yatën.

13 Purisu ya ray natëngëran na ang dapat magpasangkapamu ra ëngëd tung tanan ang gustu yang Dios ang ipasangkap na tung numyu ug̓ud kung mamagpakigsangsang da nganing tung numyu yang mga kabatuk ming atia,

mapanguntiëlan mi ra ta ustung batukan ang maskin ariënamu pa nira,

mabakëd pa ka ëngëd yang paniël-tiël mi.

14 Kaministiran ang magpakbungamu ra tung sasang sundalu ang baklu ra manalunga tung mga kabatuk na,

magpasangkap da kanay ang para simpan dang magbatuk.

Katulad tung anyang magtakëd ta akës tung awa na ang para mabtik dang mag̓ulag,

yang maning pa tung iakës mi,

ang yamu pirming mag̓usuy tung pitik yang kamatuuran ang liit tung Dios ang nunut da ka ta pamitala ming pulus matuud.

Katulad ka tung sundalung magsapin ta lakub na tung dëbdëb na,

yang maning pa ilakub mi ang yamu pirming magbuat ta pulus magkatama.

15 Katulad ka tung sundalung magsuut ta sandalyas tung kakay na ang para mabakëd da yang paniël-tiël nang manalunga tung mga kabatuk na,

yamu ya ka.

Ang para magbakëd da ka yang paniël-tiël ming pagbatuk,

pabilug̓an mi ëngëd ta mga isip mi yang nag̓adapatan yang Matinlung Balita kung ya pa ag̓ari yang pagpaulik yang Dios tung rilasyun ta tung anyang naglain da^d.

16 Katulad tung sundalung maggamit ta kalasag ang ipanagang na tung tanan ang nag̓ipagdali tung anya,

yang maning pa tung ipanagang mi ang yamu pirming magtalig ta bug̓us tung ni Jesu-Cristong yay masarang ang magmanada tung numyu.

Asan da ilëm mapugdaw yang panuksu ni Satanas tung numyu ang yang kaalimbawaan na,

maning pa tung mga dëldëg ang mag̓apuyan ang nag̓ipagpamanak na tung numyu.

17 Katulad tung sundalung may tudung nang makgat ang nag̓isuklub na tung kulu na ang para indi dultan ta matarëm,

yang maning pa tung isuklub mi tung mga kulu mi ya ra yang kasiguruan yang mga isip mi ang yamu pinakdulan da ka man yang Dios ta kalibrian ming durug bakëd.

Katulad tung sundalung may sabling durug tarëm ang ipagsibat na tung mga kabatuk na,

yang maning pa tung sabli ang ipagsibat mi tung mga kabatuk ming atia,

ya ra yang bitala yang Dios ang yay nag̓ipagpadëmdëm yang Espiritu Santo tung numyu.

18 Tung pagpasangkap mi tung tanan ang atiang nag̓ipasangkap yang Dios tung numyu,

ëklan mi tung pag̓arampuën mi ang yamug pagpataw̓ang ëngëd ang pirmi tung Dios.

Maskin unu pay mapanawan mi,

luw̓us dang ipag̓ampu mi tung anyang kumpurming unu pay ipaisip yang Espiritu Santo tung numyung ipag̓ampu.

Ya ra ka nganing ay ipagpaabtik ming ipagpadërëp tung pag̓arampuën mi ang indiamu ëngëd magpaluw̓ay.

Pati yang kadaklan ang mga kaarumanan ming mga tumatalig,

indi mi ëngëd paglipatan ang ipag̓ampu ang parariuamu ka man ang binuat yang Dios ang mga tauan nang sadili.

19 Kapin da ëngëd yuu,

iampuayaw ka numyu ang pasanag̓anaw yang Dios ta mga matitinlung bitalaënu ang mabalur ka yang isipung magpaintindi tung mga tau tani natëtëngëd tung planung ipinagpabunayag na ang ya ra ka man yang kamtangan yang Matinlung Balita.

20 Ya ra ka nganing ay natëngëran na ang yuung pangërëngan tung anya yuu ra nga këdkëray ta kadina tani.

Purisu ya ra nganing ay nag̓ipag̓paampuu tung numyu ang pirming paktëlën ni Ginuu ta yang isipu ug̓ud indiaw ëngëd manalaw ang magpakigtalunga tung mga tau tani ang katulad ka tung dapat ang buatënu.

21 Buinu,

ang para pati yamu maskëan mi ra ka kung ya pa ag̓ari yang pagkarabëtangënu tani,

atia ra ti Tikiko ang pinapag̓ëkëlu yang sulat ang atia.

Ya ray magbaw̓alitaën tung numyu.

Tanya sasa kang putul tang nag̓amaalu ta duru ig sasa kang pagpaturuw̓ulun ka tung ni Ginuu tang talagang matalig̓an ta.

22 Ya ra ka man taa yang ipinagpangayu asan tung numyu ay ug̓ud maintindian mi ra ka kung unu pay pagkarabëtangën yamën ang tanan tani ang para asan da ka nga paktëlay na yang mga isip ming pagkëba-këba natëtëngëd tung yamën^e.

23 Buinu,

mga kaputulan ang kumpurming pinangaw̓utan da yang sulat ang atia,

nag̓ipag̓ampuamu ra yëën tung Ama tang Dios durua tanira ni Ginuung Jesu-Cristo ang paëyanganamu ra nirang pirmi ta pag̓uruyunan ming matinlu.

Kapin da ëngëd ang ipaëyang na tung numyu ang maggërëgmaanamung magpurutul ang tëdëk tung mga isip mi ang nunut da ka ta pagtaralig̓ën ming mabakëd.

24 Dispuis pa,

yang nag̓ipag̓ampuu pa ang yamung tanan asan ang kumpurming tëdëk yang paggërëgmaën na tung ni Ginuung Jesu-Cristo ang indi ëngëd magrusaw,

mas pang maispirinsiaan na yang kanëëman yang Dios ang pagpadag̓ën-dag̓ën tung anya.