Naa ra yang sulat ang nagdasun tung Primirung TESALONICA. Yang ëlaan nira tung pagsurulatën puiding mga ënëm ka ilëm ang bulan. Puiding ipinagpasulat ni Pablo atiing duun pa tung Corinto ang asan da tung anyang nangabalik da na Silas ni Timoteo ang ya ray pinapag̓ëkël na yang primirung isinulat na. Ay may nabalitaan na tung nira ang midyu mali yang pag̓irintindiën yang duma natëtëngëd tung paglëkat ni Ginuung Jesu-Cristo. Ay may nagngël da nirang balita ang kinaw̓ut da unu yang uras ang ipagsintinsia ni Ginuung Jesus (2:2). Tung pag̓impisaan yang sulat, dakulu yang pagpasalamat ni Pablo tung Dios natëtëngëd mas pang nagbakëd yang pagtaralig̓ën nira tung ni Ginuung Jesus pati yang paggërëgmaan nirang magpurutul nadulangan da ka asta yang pag̓aragwantaën nira tung mga pinitinsia (1:3-4). Pagkatapus nagpaintindi ka tung nira kung unu pay pakaw̓utun na tung uri yang pagtaralig̓ën nirang mabakëd, maskin nag̓adëëg-dëëg̓an ta duma, asta yang pakaw̓utun yang pamandëëg-dëëg tung nira, ya ka (1:5-10). Dayun dang nag̓ampu para tung nira (1:11-12). Pagkatapus dayun da kang nagtadlëng tung maling pag̓irintindiën yang duma natëtëngëd tung paglëkat ni Ginuung Jesus (2:1-12). Tung 2:13-15, nagpasalamat tung Dios natëtëngëd tung pagpilik na tung nira pati yang pagbëtëng na tung mga isip nirang magtalig tung ni Ginuung Jesu-Cristo. Pinanuntan na ka ta ipagpaprusigir na tung nirang pirming mamagpakatëntën tanira ig ipapëg̓ët da ka nira tung mga isip nira yang ipinaskë na tung nira. Baklu ra ipinag̓ampu na ang tanira pirming paktëlën na (2:16-17). May sam bilug pang gustu nang ipatuman na tung nira natëtëngëd tung sasang disiplinang gamitën nira tung mga aruman nirang pira pang bilug ang pamagbinulakbul (3:6-15).