Yang Yadwang Isinulat Ni Pablo Tung Mga Tag̓a TESALONICA
Yang Intrada Yang Sulat (1:1-2)
1
Yang nagpasulat tung sulat ang atia yuung ti Pablo,
kasiraanami ra ka na Silas ni Timoteo.
Ipinaëkël da yamën tung numyung mga tumatalig asan tung Tesalonica ang anday dumang may pundar tung numyung sam pundaan asan,
kung indi,
ya ra yang Dios ang nagyari rang Ama ta durua ni Ginuu tang Jesu-Cristo.
2 Yang nag̓ipag̓ampu yamën ang mas pang maispirinsiaan mi yang kanëëman nirang pagpadag̓ën-dag̓ën tung numyu ig mas pang ikasadya mi yang kaampiran mi tung nirang naang baklu.
Nag̓apasalamatan Na Pablo Yang Pagtaralig̓ën Nirang Mabakëd (1:3-4)
3 Mga kaputulan,
indi maimu ang indiami magpasalamat tung Dios ta muya-muya natëtëngëd tung numyu.
Magkabag̓ay ka tia ay natëtëngëd mas pagbakëd yang pagtaralig̓ën mi tung ni Ginuung Jesus pati yang paggërëgmaan ming sasa may sasa ya ra kag durulang agdurulang.
4 Kapurisu indi maimu ang indiamu ipabantug yamën tung duma-rumang mga tumatalig ang kada sam pundaan ang yang may anya tung nira ya ra ka man yang Dios.
Ay yang nag̓ipagdayaw yamën tung numyu,
ya ra yang kabakëd yang pagtaralig̓ën ming pag̓agwanta tung tanan ang pandëëg-dëëg tung numyu may tung tanan ang mga kaliwag̓an ang pagpasar tung numyu.
Nag̓ipagpasanag Na Pablo Kung Unu Pang Sintinsiaay Ang Ipakdul Yang Dios Tung Nira Pati Yang Ipakdul Na Tung Pamandëëg-dëëg Tung Nira (1:5-10)
5 Tung pag̓aragwantaën ming atia,
asan da nga pruibaay ang tung uri,
yang tanan ang mga tau sintinsiaan da yang Dios tung magkatamang pisan.
Bilang ta numyu,
ibandunaramu ra anyang bag̓ayamu rang paklërën na tung kaliw̓utan ang baklu ang duun da maggaraëmën tung mga tauan nang asta tung sampa.
Talagang matuud tia kipurki natëtëngëd ilëm ang yamu pagpagaëm dang bug̓us tung anya simanyan,
ya ra kay nag̓atëngëran na ang nag̓adëëg-dëëg̓anamu.
6 Ay tung pag̓intindi yang Dios,
magkatamang pisan ang yang mga taung atiang pamagpapinitinsia tung numyu numanyan,
bëlsën na ka ta pinitinsia tung uri.
7 Ig ta yamung nag̓apasaran ta pinitinsia numanyan,
palinaynayanamu ra anya.
Kasiraanita rang palinaynayan na tung uras ang ipagpabistu na tung ni Ginuu tang Jesus ang liit tung langit,
ig mag̓aliw̓utan da ka ta sasang apuy ang pagdaw̓a-raw̓a,
kasiraan da ka tanira yang mga angil nang makëktël.
8 Ya ray uras ang ipagpakdul na ta silut tung mga taung indi kang lag̓i pag̓intindi tung Dios ang ya ra ka man yang mga taung kumpurming indi nalëlyag ang manangëd tung Matinlung Balita natëtëngëd tung ni Ginuu tang Jesus ang ya ray ipinagpakaw̓ut tung nira.
9 Yang mga taung mga maning tia,
ya ray mangaagma ta pinitinsiang magkatamang pisan ang ipakdul tung nirang asta tung sampa.
Ay ipaaw̓ig da ni Ginuu tang Jesus tung katalungaan nang durung pisan agkasusulaw.
10 Yang tanan ang atia mainabu ra kung maglëkat da nganing ti Ginuung Jesus tung uras ang ya ra kang lag̓i ay ipinagtipu yang Dios.
Yang ipaglëkat na ay ug̓ud dayawën da natëtëngëd tung pag̓irimakluën na tung pagkatau yang mga tauan na.
Bilang yang pag̓irimakluën na tung kumpurming nagtalig tung anya,
ya ray mabërëngan da ta mupia yang kadaklan ang mga tau.
Pati yamu nganing mabërëngamu ra ka tung pagkabëtang na tung uras ang atia natëtëngëd pinanangëd mi ra yang ipinagpaingmatuud yamën tung numyu.
Nag̓ipag̓ampu Tanira Na Pablo Ang Ipabag̓ay Yang Dios Tung Katuyuan Nang Nagbëtëng Tung Nira (1:11-12)
11 Kapurisu ya ra kay nag̓ipag̓ampu yamën ta muya-muya tung Ampuan tang Dios ang ipabag̓ayamu ra anya tung katuyuan nang nagbëtëng tung numyung mag̓ing mga tauanamu ra anya atiing primiru.
Yadwa pa ang maskin unu pang ubraay ang matinlu ang yay pagyëngët-yëngatan yang mga isip ming ubraën mi,
paktëlënamu ra ka anya ang para kayanan mi.
Pati yang maskin unu pang buat-buatay ang nag̓aimpisaan mi ra ang asan da ka nga pruibaay yang pagtaralig̓ën ming ustu,
taw̓anganamu ra ka anyang talusun.
12 Tung maning tia asanamu ra ikadëngëg ni Ginuu ta ig pati yamu maumiramu ra ka tung anyang mapadëngëg̓an tung uri.
Yang tanan ang atia magkamaningan da natëtëngëd ilëm tung pagpadag̓ën-dag̓ën tung numyu yang Ampuan tang Dios durua ni Ginuung Jesu-Cristo.