Nag̓aingaluk Na Pablo Ang Tanira Indi Ra Mamagpakali-kaling Mamagpakagulu Natëtëngëd Tung Maling Balita (2:1-5)
2
Mga kaputulan,
kung natëtëngëd tung paglëkat ni Ginuu tang Jesu-Cristo ang ya ra kay uras ang ipagsagpun na tung yatën ang para magpakigsapënita ra tung anya,
may sasang nag̓aingaluk yamën tung numyu.
2 Indiamu ra magpakali-kaling magpakataranta tung nabalitaan mi ang kinaw̓ut da unu buat yang uras ang ipagsintinsia ni Ginuu ta.
Indiamu ëngëd magpakaliw̓ëg ta kulu maskin may pag̓aning pang ya unu ay ipinabunayag yang Espiritu Santo tung anya,
maskin ya ray nag̓itulduk yang duma tung numyu,
maskin may pag̓aning kang ya ra unu ay isinulat yamën.
3 Indiamu ëngëd magpadaya maskin tung ninu pa.
Ay kipurki baklu ra kaw̓utay yang uras ang atia,
kung nainabu ra yang pagparasuag̓ën yang dakëlëng mga tau tung Dios ang bëlag dang patinumas ang ya ra kay uras ang ipaglua yang sasang taung mapuirsang magpakigbatuk tung Dios ang yang mga katuw̓ulan na,
baliwalaën na ra ilëm.
Piru tung kauri-urian da,
anday dumang panampëtan yang taung atia,
kung indi,
kalainan ang anda ëngëd ang pisan ay katapus-tapusan na.
4 Kung maglua ra nganing tia,
yay magpakigkuntra ta maayën tung matuud ang Dios pati tung kadaklan ang nag̓atutuuan ta mga taung yay ag̓aningën nirang Dios nira.
Magpaambug da nganing tung sadili na ang tanya unu landaw tung tanan ang atia.
Tëgkaan na,
magkarung da tung pag̓atiniran ëngëd yang Diosa ang para asan da magpailala ang tanya unu ay ultimung Diosb.
5 Siguru nag̓adëmdëman mi ra ang atiing asanaw pa tung numyu,
yang mga bag̓ay ang atia muya-muyang ipinagpaintindiu tung numyu.
Natëtëngëd Tung Uras Ang Ipaglua Yang Pinakamaktël Ang Magpakigbatuk Tung Dios (2:6-8)
6 Nag̓askëan mi ra ka ang may sasang pagsagang numanyan tung taung atia ug̓ud baklu ra maglua,
kung kinaw̓ut da yang uras ang ipinagtipu kang lag̓i yang Dios.
7 Bilang may sasang ipinagpabunayag da yang Dios tung yëën ang indi nag̓askëan ta kadaklan.
Yang pagbaratukun tung Dios yang pagkuntrang atia,
yang manyu na pag̓sag̓usut dang lag̓i numanyan tung kaliw̓utan ang naa.
Ug̓aring yang pagsagang tung anya,
dumayun yang pagsaragangën na ang asta kaw̓utun da ilëm yang uras ang ipagpatadëng yang Dios tung pagsagang na.
8 Atia,
ya ray uras ang ipaglua yang taung atiang mapuirsang magpakuindi tung Dios.
Piru yang panampëtan na tung uri maning taa.
Kung maglëkat da nganing ti Ginuung Jesus,
sam pabitala na ra ilëm ang magkalalangan tung anya,
pirdi rang lag̓i.
Pagpabistu na pa ilëm yang kasusulawën na,
kapas dang pisan ta pudir na.
Nag̓abalikan Ni Pablo Yang Pag̓urubraën Yang Taung Atiang Pagpakigkuntra (2:9-12)
9 Ibaliku ra kanay tung paglua yang taung atia.
Tanya paktëlën da ta mupia ni Satanas ang magpalapus ta sari-saring mga pruibang makabëw̓ërëng ang buat na pa pakdul unu yang Dios tung anya.
Ya ray ipandaya na tung mga tau ang para mamanangëd da tung anya.
10 Yang tanan ang idya gamitën nang para magkaradayaan na yang mga tau ang yang panampëtan nira,
kadiaduan ka ang anday katapus-tapusan na.
Kayanan na rang dayaan natëtëngëd atiing pagkagngël da nira yang kamatuuran natëtëngëd tung ni Ginuung Jesus,
indi ra pinauyunan nirang minaal ang asan da ka rin nga tapnayay tanira yang Dios.
11 Kapurisu natëtëngëd ëngëd nirang namagpakuindi tung kamatuuran,
itug̓ut da ilëm yang Dios ang malpës da ilëm ang magkaradayaan ang asta mamamangëd da ilëm ang pisan tung tanan ang nag̓ipag̓ambu yang taung atia ang pulus bukli.
12 Kapurisu ya ray ipagsintinsia yang Dios tung kalainan tung kumpurming indi ra nanangëd tung kamatuuran,
kung indi,
nagpagustu ra ilëm tung pagburuatën nirang malalain.
Tanira Pinilik Yang Dios Ug̓ud Mamagkatinir Ta Kalibrian May Kadëngëg̓an Tung Uri (2:13-14)
13 Mga kaputulan ang nag̓amaal ni Ginuu ta,
indi ëngëd maimu ang indiami magpasalamat tung Dios ta muya-muya natëtëngëd tung numyu.
Yang nag̓apasalamatan ëngëd yamën tung anya ay atiing anda pay nag̓aimu,
pinatëmënganamu ra kang lag̓i anyang tapnayën ëkël tung pagpanangëd mi tung kamatuuran may tung pag̓urubraën yang Espiritu Santo tung mga sadili mi ang asanamu ra ngaipabag̓ayay na tung Dios.
14 Purisu ang para magkamaninganamu ra ta maning tia,
atiing pagpakaw̓ut yamën tung numyu yang Matinlung Balita,
ya ra kay pagbëtëng na tung mga isip ming magtalig̓amu ra yang mga sadili mi tung ni Jesu-Cristo ay ug̓ud tung uri,
idamayamu ra ka anya tung ni Jesu-Cristong padëngëg̓an.
Pagpaktël Da Tung Nirang Mamagpakatëntën Ang Nunut Da Ka Ta Pag̓arampuën Na Para Tung Nira (2:15-17)
15 Kapurisu,
mga kaputulan,
idayun mi yang katëntën yang isip mi.
Bilang ipapëg̓ët mi ëngëd tung mga isip mi yang ipinagtulduk yamën tung numyung pulus ka man ipinag̓intriga ni Ginuung Jesus tung yamën,
maskin ya ray ipinagngël yamën tung numyu ubin yang isinulat yamën.
16-17 Simanyan yang nag̓ipag̓ampu ra yamën ang ti Ginuu tang Jesu-Cristo mismu durua yang Ama tang Dios yay magpaktël tung mga isip ming magpadayunamu tung maskin unu pang ubra-ubraay ang matinlu may tung maskin unu pay bitalaën mi ang pulus tung matinlu ka yang pakaw̓utun na.
Yay pag̓ampuan yamën natëtëngëd yay nagpaita yang gëgma nang lutuk tung yatën ig natëtëngëd ilëm tung kanëëman nang atiang durung pisan agkabëw̓ërëng,
pinaëyanganita ra anya ta ikasadya yang isip tang asta tung sampang indi maplëk ang nunut da ka ta ipagpakisëw̓at ta tung mga kaayënan ang pinangakuan na.