Nag̓apaprusigir Na Pablo Ang Tanira Pirming Riparasiun Ang Pagpakbat Tung Ni Ginuung Jesus (5:1-11)
5
Mga kaputulan,
anday ministir ang sulatanamu pa yamën kung unu pang panimpuay magkarainabu yang mga bag̓ay ang atia u kung unu pa ëngëd ang urasay magkamaning da.
2 Sipurki kunisidu mi ra kang pisan ang yang uras ang ipaglëkat ni Ginuu ta ay inaling kumaw̓ut ang katulad ka tung pagpanaw yang sasang takawan ta law̓ii ang masapuan ta ra ilëm asan da.
3 Ay magkadëngan da tung uras ang ipagkërësën da yang mga tau ang malimëng da unu yang mga pagkarabëtangën nira taa tung kaliw̓utan,
anda ra ka unung pisan ay ag̓ëldan nira.
Pagkatapus inaling mataktakan ta sintinsia yang Dios ta ikalain nira.
Mamanulad dang pisan tung sasang matung ang pagpasiit da ay indi rang pisan mapalikayan nira yang sintinsiang atia.
4 Piru ta yamu,
mga kaputulan,
indiamu ra pagtinir tung makiklëp ang katulad tung bëlag̓an mga tumatalig.
Purisu kung kaw̓utun da nganing yang uras ang atiang ipagsintinsia yang Dios,
indiamu ra masëka ang katulad tung sasang taung indi nabantay tung takawan ang kuminaw̓ut.
5 Ag̓aningënung indiamu ra pagtinir tung makiklëp ay yang kaalimbawaan ming tanan maning pa tung nagpasakëpamu ra tung masadlaw,
tung kaldawanamu ra.
Itang mga tumatalig,
bëlag̓anita ra kinasakpan yang law̓ii ang yay makiklëp.
6 Kapurisu kaministiran indiita ra magpakbung tung kadaklan ang maning pa tung ëlëk pa,
ang baliwala ra ilëm tung mga isip nira yang paglëkat ni Ginuu ta.
Ang indi,
ta yatën,
riparasiunita rang pirming pagpakbat tung ni Ginuung Jesus ang maglëkat ang nunut da ka ta pagsuspindi ta tung mga kalëlyag̓an tang sadili.
7 Sipurki yang mga taung nag̓ëlkën,
law̓ii yang kadagmitan ang iërëlëk nira.
Pati yang mga taung buu,
law̓ii kang kadagmitan ang ipagpabuu nira.
8 Piru ta yatën,
kumus tung kaldawanita ra ka man,
kaministiran ang magsuspindiita ka ëngëd tung mga kalëlyag̓an tang sadili.
Yang kaalimbawaan ta,
ita sundalu.
Kaministiran may gamitën tang ipagdipinsa tung mga sadili ta ang para indiita madëëg̓an ni Satanas.
Yang isirbi tang ipagmanada ya ra yang pagtaralig̓ën tang mabakëd tung ni Ginuung Jesus may yang paggërëgmaan tang magpurutul ang pirmi tung matinlu.
Yang isirbi tang ipagdipinsa tung mga isip ta,
ya ra yang pagparakbatën ta tung uras ang ipagkumplitung pisan ni Ginuu ta yang kalibrian ang ipinakdul na tung yatën.
9 Magkabag̓ay ang yay pakbatën ta tia natëtëngëd yang planu yang Dios para tung yatën ang mga tumatalig,
bëlag̓an ang mag̓aning ang itay tamaan yang kasisilag̓ën nang sintinsiaan tung kalainan,
ang indi,
ang para magkatinirita ta kalibrian ëkël tung binuat ni Ginuu tang Jesu-Cristo.
10 Kipurki yay nagpakugmatay para tung ikaayën ta ug̓ud maskin patayita ra u kung buiita pa tung uras ang ipaglëkat na,
pariu ka ilëm ang mabtangan ta ang magkasira-siraanita ra ang asta tung sampa.
11 Kapurisu kumus maning tia yang nag̓aëlatan ta,
padayunan mi yang pagparakëtël-këtëlan mi ta kinaisipan may kinaisipan may yang pagparadag̓ën-dag̓ënan mi ang katulad ka tung nag̓abuat mi.
Nag̓apaprusigir Na Pablo Ang Yang Mga Manigpadag̓ën-dag̓ën Kaministiran Ang Maalën Nira Ta Mupia (5:12-13)
12 Simanyan,
mga kaputulan,
yang nag̓aingaluk yamën tung numyu,
galangën mi ra ta ustu yang mga aruman ming pamagpakabëdlay asan tung numyung sam pundaan.
Kipurki tanira ka man ay pamagpadag̓ën-dag̓ën tung numyu natëtëngëd tung pag̓urusuyun mi tung ikadëngëg ni Ginuu ta ig kung kaisan ya kay pamagpaaman tung numyu.
13 Maalën mi ta mupiang gëgmaan natëtëngëd tung ubra nirang atiang pamagpadag̓ën-dag̓ën tung numyu.
Kaministiran kang pirmiamung mag̓uruyunan ta matinlu.
Nag̓apagpaprusigir Na Pablong Mamagtaw̓ang Tanira Tung Mga Kaarumanan Nirang May Mga Kaliwag̓an Ig Indi Ëngëd Mangimalësan (5:14-15)
14 Mga kaputulan,
nani pa yang sasang nag̓ipagpaprusigir ka yamën tung numyu.
Yang duma asan ang pamagbinulakbul da,
paamanën ming magpakatautau ra ta ustu.
Pati yang dumang midyu talawan,
paktëlën mi ka yang mga isip nira.
Asta yang dumang midyu agluw̓ayën da padag̓ën-dag̓ënan mi ka ta matinlu.
Dispuis pa,
tung pagtaraw̓angën mi tung mga kaarumanan ming mga maning tia,
kaministiran ang parurusan mi tanirang tanan.
15 Sasa may sasa tung numyu masig̓amlig ang indi ëngëd mangimalësan tung aruman na.
Kung indi,
yang dapat ming sikarën ang pirming magburuatanamu ta ikaayën ming magpurutul.
Pati yang mga kaarumanan ming bëlag̓an mga tumatalig,
ya ka,
buatan mi ka ta maning ka tia.
Nag̓asambit Na Pablo Yang Tulung Bag̓ay Ang Pulus Nag̓alëlyag̓an Yang Dios Ang Yay Usuyun Nira (5:16-18)
16 Pirmiamu ilëm ang magpakasadya maskin unu pay mapasaran mi.
17 Muya-muyaamung mag̓ampu.
18 Maskin unu pay mapanawan mi,
luw̓us dang pasalamatan mi tung Dios.
Sipurki tia pulus nag̓alëlyag̓an na ang yay usuyun mi ëkël tung pagpaktël ni Jesu-Cristo tung numyua.
Natëtëngëd Tung Pag̓urubraën Yang Espiritu Santo Tung Pagsaragpun Nirang Sam Pundaan Ang Dapat Indi Nira Sagangën (5:19-22)
19 Yang kaalimbawaan yang pag̓urubraën yang Espiritu Santo tung isip yang mga tumatalig,
maning pa tung sasang apuy ang durug builu.
Purisu tung uras ang ipagsaragpun ming sam pundaan,
indi mi ra ilëm sagangën yang pag̓urubraën na ang muya ya ray maning pa tung mapugdawan na.
20 Alimbawa kung may sasang putul ming pag̓aning ang tanya unu may ipinaëyang da yang Espiritu Santo tung isip na ang para ipagpadapat na tung numyu,
indi mi ra kali-kaliën ang lamkuën ang anday kuinta yang nag̓ipagpadapat na.
21 Ang indi,
pasadsaran mi ra kanay ang timbang-timbangën ta mupia tung mga isip mi yang tanan ang bitalang mga maning tia kung matuud ang paëyang yang Espiritu Santo u kung bëlag.
Pagkatapus ta pagtimbang-timbang mi,
kung unu pay nagngël ming matinlu ang talagang paëyang yang Espiritu Santo,
ya ray pauyunan ming usuyun.
22 Ig kung unu pay nagngël ming bëlag̓an paëyang yang Espiritu Santo natëtëngëd yang rumbu na tung malain,
ya ray pangindian mi,
maskin unu pang bag̓ayay.
Nag̓ipag̓ampu Na Pablo Ang Tanira Paktëlën Ëngëd Yang Dios Ang Para Mas Pang Mag̓atu Rang Mag̓atu Tung Anya Tung Tanan Ang Mga Pasais Nira (5:23-24)
23 Kumus yang Dios yay pinangapunglan yang pag̓uruyunan ming magpurutul,
yang nag̓ipag̓ampu yamën tung anya ang tanya mismu ay magpaktël ëngëd tung numyu ang para asanamu rang mas pang mag̓atuamu rang mag̓atu tung anya.
Bilang manadaanamu ra anya ta maayën ang para yang intirung pagkatau mi,
mag̓ing yang tanan ang pag̓irisipën mi,
mag̓ing yang tanan ang mga kalëlyag̓an mi,
may yang tanan ang mga pag̓urubraën mi mapabtang dang pulus tung magkatama ang asta ra ilëm maglëkat ti Ginuu tang Jesu-Cristo ug̓ud andang pisan ay mabangdan na tung numyu.
24 Yang Dios ang ya ka man ay pagbëtëng tung numyung magpaatu tung anya,
talagang yay matalig̓an ming mag̓ërëkëlën tung numyung asta masalapayan mi.
Yang Pagtapusan Yang Sulat (5:26-28)
25 Mga kaputulan,
pati yami,
iampuayami ka ta maning ka tia.
26 Dispuis pa,
kada magsaragpunamung sam pundaan,
magsarapëtanamu ka ta matinlub ug̓ud asan da nga bistuay yang pagpurutulan mi ang talagang liit ka man ang matuud tung Dios.
27 Nani pa yang sasang kalalanganu tung numyu ëkël tung katëngdanan ang ipinakdul ni Ginuu ta tung yëën.
Kung magsaragpunamu ra nganing ang sam pundaan,
yang sulat yamën ang atia basaën ming ipagngël tung tanan ang mga kaputulan ta asan.
28 Buinu yang nag̓ipag̓ampu yamën ang mas pang maispirinsiaan mi yang kanëëman ni Ginuu tang Jesu-Cristong pagpadag̓ën-dag̓ën tung numyu.
Ya ra ilëm tia ay maaning yamën tung numyu,
Pablo,
Silas,
Timoteo