Nag̓ipadëmdëm Na Pablo Tung Nira Ang Mas Pang Padërëpan Nira Yang Kumpurming Ipinagpatuman Kang Lag̓i Nira Tung Nira (4:1-2)
4
Simanyan sigun tung mga bag̓ay ang nag̓aëpëd ang gustu pa yamën ang sambitën,
may sasang nag̓aingaluk yamën tung numyu,
mga kaputulan.
Tan taa pa,
tinuldukanamu ra kang lag̓i yamën kung unu pay dapat ang tumanën mi ang para yay mauyunan yang Dios.
Kung tung bag̓ay,
nag̓askëan da ka yamën ang ya ra kay nag̓ausuy mi simanyan.
Ug̓aring kumus pag̓atuw̓ulami ka man ni Ginuung Jesus,
yang nag̓ipagpaprusigir ëngëd yamën tung numyu ang yang mga bag̓ay ang atia ya ray mas pang padërëpan mi.
2 Sipurki nag̓askëan mi ra ka ang kung unu pay ipinatuman yamën tung numyu pulus ka man itinuw̓ul ni Ginuung Jesus tung yamën ang para ipadapat yamën tung numyu.
Natëtëngëd Tung Ustung Pag̓ërëkëlën Yang Sasang Tumatalig Tung Bilug Ang Tinanguni Na (4:3-8)
3 Ya taa yang nag̓alëlyag̓an yang Dios natëtëngëd tung numyu ang mas pang mag̓atu rang mag̓atu yang mga ubra-ubra mi tung nag̓auyunan na.
Yang gustu nang ianing tia,
likayan mi yang pangumbaw̓ay pati pangunlalii.
4 Bilang,
sasa may sasa tung numyu,
kaministiran ang maskëamung mag̓ëgtëm tung mga tinanguni mi ang para indiamu ra madëëg̓an yang kakaiblën mia.
Gamitën mi tung may pagkasagradu na ang uyun tung kalëlyag̓an yang Dios ang bag̓ay kang dayawën na.
5 Indi mi ëngëd panuntan yang kakaiblën ming malaway ang katulad ka tung pag̓abuat yang bëlag̓an mga tumatalig ang indi kang lag̓i pamag̓intindi tung Dios.
6 Purisu indiamu ra ëngëd magpakasalak tung sasang putul mi tung ni Ginuu ta ang muya ya ray lëpsën mi tung bag̓ay ang atia.
Kipurki anday dumang magbalës tung kumpurming magbuat ta maning tia,
ya ra ti Ginuu ta mismu ang katulad ka tung ipinagpaaman kang lag̓i yamën tung numyu.
7 Sipurki yang ipinag̓imbitar yang Dios tung yatën ang mag̓ing mga tauan na,
bëlag̓an ang mag̓aning ang para magpadayunita ra ilëm tung mga bag̓ay ang atiang malalaway tung pagtërëlëngën na,
ang indi,
ang para mag̓atuita rang mag̓atu tung anya.
8 Kapurisu kung tinu pay magbaliwala tung nag̓ipaaman yamën ang atia,
bëlag̓an ka ilëm tau yang nag̓apasuag̓an na,
ang indi,
pati yang Dios,
ya ka ang ya ra ka man ay pagpatinir tung numyu yang Espiritu Santo ang para manguluanamu anya.
Natëtëngëd Tung Paggërëgmaan Nirang Magpurutul Ang Yay Mas Pang Palutukun Nira (4:9-10)
9 Simanyan,
kung natëtëngëd tung paggërëgmaan ming magpurutul,
anday kaministiran ang sulatanamu pa yamën ang sugpatan.
Sipurki nag̓atuldukanamu ra kang lag̓i yang Ampuan tang maggërëgmaan.
10 Ya ra ka nganing ay nag̓ipagpaita ming pirmi tung tanan ang mga kaputulan ming mga tumatalig asan tung intirung sinakëpan yang Macedonia.
Kapurisu,
mga kaputulan,
yang gustu ilëm yamën tung numyu ang yay mas pang palutukun mi yang paggërëgmaan ming atia.
Natëtëngëd Tung Pagpakatandës Nira Ang Dapat Ipaita Nira Maskin Tung Bëlag̓an Mga Tumatalig (4:11-12)
11 Bilang yang pakëg̓ëran ming sikarën ang pirmi tung matandës yang mga ubra-ubra mi.
Indiamu ëngëd magpasilaw̓ët tung indi mi pinakabëdlayan,
kung indi,
magprusigiramu tung sadiling pagpangabui mi ang katulad ka tung ipinagpatuman da kang lag̓i yamën tung numyu.
12 Sipurki kung ya ray usuyun mi,
asanamu ra nga galangay yang mga kaarumanan ming indi pa nag̓atultul tung kamatuuran ig anda ra kay kaministiran ming magpasuitu tung duma may ruma.
Yang Nag̓ikunsiu Na Pablo Tung Nira Natëtëngëd Tung Mga Kaarumanan Nirang Nagkarapatay Ra (4:13-18)
13 Simanyan,
mga kaputulan,
durung gustu yamën ang maintindian mi natëtëngëd tung mga kaarumanan ming mga tumatalig ang nagkarapatay ra kung unu pa ëngëd ay mainabu tung nira tung uri.
Sipurki kung maintindian mi tia,
indiamu ra magpakapungaw ang subra ang katulad ka tung kapupungawën ang nag̓asinti yang napatayan ang anday nag̓ipagpakisëw̓at nirang mabui si kang uman.
14 Ayw̓at magpakapungawamu pang subra sindu panangërita ra kang lag̓i ang ti Ginuung Jesus maskin napatay,
piru nabui si ka ëngëd ang uman.
Purisu duun da ka nga siguruay ta ang pati yang mga tumatalig ang nagkarapatay ra,
ya ka,
mangabui si ka ëngëd ang uman ay kung maglëkat da nganing ti Ginuung Jesus,
ipampaëkël da yang Dios tung anyang ipampaliit tung mga minatay.
15 Talagang matuud tia ay kipurki may sasang ipinagpabunayag ni Ginuu ta tung yamën ang ya ray ipaskë yamën tung numyu numaan.
Kung tinu pa tung yatën ay bui pa tung uras ang ipaglëkat na,
bëlag̓an ang mag̓aning ang magtukawita ra tung mga putul tang nagkarapatay ra.
16 Sipurki yang mainabu maning taa.
Ti Ginuu ta mismu ya ray magparanëk ang duun manliit tung langit.
Yang pagparanëk na ya ra kay pagkalalangan nang maknul,
dërëngan da kang magkërëndalën yang sasang angil ang abwat ta katëngdanan asta yang turumpita yang Dios magtunul da ka.
Yang mga putul tang mga tumatalig kang lag̓i tung ni Jesu-Cristong nagkarapatay ra,
ya ray tukawën nang pampabungkarasën.
17 Pagkatapus,
ta yatën ang kumpurming kaw̓utan nang bui pa,
magkasira-siraanita ra ka yang mga kaarumanan tang atiang paalsaën yang Dios duun tung mga panganud ang para magpakigbag̓asita rang tanan tung ni Ginuu ta duun tung pamilat-pilatan.
Tung maning tiang papanaw pirmiita rang magsarapënan ni Ginuu ta.
18 Kapurisu yang nag̓ipaintindi yamën ang atia tung numyu,
ya ray gamitën ming magrilinga-lingaan.