Pagkëba-këbaan Yang Dëdlaan Na Natëtëngëd Tung Nira Duun Tung Tesalonica (3:1-5)
3
1-3 Kapurisu atiing indiami ra maagwantang pag̓ëlat tung balitang liit tung numyu,
naisip da yamën ang maskin yaming durua ni Silas magpabutwanami ra ilëm duun tung Atenas para ti Timoteo ya ray ipaangay yamën asan tung numyu.
Ay tanya sasa ka man ang putul ta tung ni Ginuu ta ig ya kay sasang aruman yamën ang pag̓atuw̓ul ka yang Dios ang magparakaw̓utun yang Matinlung Balita natëtëngëd tung ni Jesu-Cristo.
Yang ipinagpangay yamën tung anya asan tung numyu ay ang para magpaktël tung mga isip ming para mas magbakëd yang pagtaralig̓ën mi tung ni Ginuung Jesus,
ug̓ud maskin tinu pa tung numyu indi magkagulu yang isip na tung mga pandëëg-dëëg ang atiang nag̓apasaran mi.
Tutal nag̓askëan mi ra kang lag̓i ang yang mga pinitinsiang mga maning tia,
lug̓ud da kang lag̓i tung planu yang Dios ang para tung yatën ang mga tumatalig.
4 Ay atiing asanami pa tung numyu,
pinakdëkamu rang lag̓i yamën ang indi maimu ang indiita mapasaran ta pandëëg-dëëg.
Ang pagkatapus nag̓askëan mi ra ka ang ya ra ka man ay nainabu.
5 Kapurisu ta yëën,
atiing indi ra maagwantaanu yang pagkëba-këba yang dëdlaanu natëtëngëd tung numyu,
ipinaangayu ra ti Timoteo asan ang para masiguruu kung mabakëd pa yang pagtaralig̓ën mi tung ni Ginuung Jesus.
Ay yang pag̓ëlëru ka man kung muya pinalëngtanamu ra ni Satanas ang pinagtuksu,
nusias napamalpasamu ra tung ni Ginuung Jesus ang asan da ka nga diadu yang pinakabëdlayan yamën asan tung numyu.
Nag̓aulit Na Kung Unu Pag Kasadya Yang Mga Isip Nirang Nabalitaan Ni Timoteo Sigun Tung Nira (3:6-10)
6 Piru maayën ilëm,
anda ka!
Sipurki tung pagbalik ni Timoteo tani tung yamën,
binalitaanami ra anya yang makasasadyang pisan ta mga isip yamën ang nag̓apadayunan mi ka ëngëd yang pagtaralig̓ën mi tung ni Ginuung Jesus pati yang paggërëgmaan mi kang magpurutul,
ya ka.
Pinaskëami ra ka anya ang nag̓adëmdëmanami ka numyung pirmi,
ig aglangkag̓ënamu ka tung yamën ang katulad ka tung yamën ang paglangkag ka tung numyu.
7 Kapurisu,
mga kaputulan,
maskin durung kaliwag̓an may pinitinsia ang nag̓apasaran yamën tani,
kumintël da ka ëngëd yang isip yamën natëtëngëd tung nabalitaan yamën ang atia tung anya natëtëngëd tung pagtaralig̓ën mi.
8 Sipurki simanyan,
pag̓akdëk yamën ang mabakëd pa ka ëngëd yang paniël-tiël ming pagpadayun tung pagtaralig̓ën mi tung ni Ginuu ta,
anda ray katëgka-tëgkaan yang kasadyaan yamën.
9 Ay kipurki kung isip-isipën yamën,
unu pang pagpasalamatay ang sarang mapakdul yamën tung Dios natëtëngëd tung numyu ang para mapatalub yamën tung kasadyaan ang naang pag̓ampay tung mga isip yamën ang kada madëmdëmanamu yamën tung katalungaan yang Ampuan ta?
10 Kapurisu law̓iig kaldaw yang pag̓arampuën yamën tung anya ang durug dërëp ang basi pa ra ilëm tung makali,
mag̓ërëmëtanita si ka ug̓ud mapadag̓ën-dag̓ënamu yamën ang para mas pang mag̓ëlët yang pagtaralig̓ën mi.
Yang Nag̓ipag̓ampu Na Pablo Para Tung Nira (3:11-13)
11 Simanyan pag̓ampuami ra tung Ama tang Dios durua ni Ginuu tang Jesus ang tanira mismu ay magpakdul ta dalan tung yamën ang para diritsyu ra ilëm yang pagparanawën yamën ang manganing asan tung numyu.
12 Kung natëtëngëd tung numyu,
nag̓ipag̓ampuamu ra ka yamën ang taw̓anganamu ra ni Ginuung Jesus ang mas pang ya rag durulang agdurulang yang paggërëgmaan ming magpurutul pati yang gëgma mi tung kadaklan ang mga masigkatau mi ang katulad ka tung gëgma yamën tung numyu ang ya ra kag durulang agdurulang.
13 Nag̓ipag̓ampuamu ra yëën ang paktëlën ni Ginuung Jesus yang isip ming magbuat yang magkatama.
Kipurki asanamu ra tëlëngay yang Ama tang Dios ang andang pisan ay mabangdan na tung numyu tung uras ang ipaglëkat ni Ginuu tang Jesus,
kasiraan da ka tanira yang tanan ang mga tauan naa.
Magkamaningan da tia.