Nag̓aulit Na Pablo Yang Mga Pasais Nira Atiing Primirung Pagparakaw̓utun Nira Duun (2:1-12)
2
Mga kaputulan,
yamu mismu ay nag̓askë ang yang pagrisibi mi tung yamën bëlag̓an ang mag̓aning ang anday pinakaw̓ut na.
2 Nag̓askëan mi ra ka ang bakluami ra nakaw̓ut asan tung numyu,
dinëëg-dëëg̓anami ra ta mupiang tinigbak duun tung Filiposa.
Piru maskin maning tii yang napasaran yamën duun,
pinaktël da yang Dios yang isip yamën.
Purisu indiami ra nagpaluw̓ay,
kung indi,
nagpadayunami ra ka ëngëd ang nagpakaw̓ut tung numyu yang Matinlung Balitang liit ka man tung anya,
maskin durung namagkuntra tung yamënb.
3 Yang pagpaktël yamën tung mga isip ming manangëd tung nag̓ipagpakaw̓ut yamën,
bëlag̓an kamali yang pinatiëlan yamën,
anda kay katuyuan yamën ang magbuat ta malalaway asan tung numyu,
ig indiamu ka ginamitan yamën ta daya.
4 Kung indi,
yang kamtangan yang nag̓ipagpakaw̓ut yamën tung mga tau kumpurmi ka ilëm yang usuy tung kalëlyag̓an yang Dios ang ianing yamën.
Kipurki pinagsukdaanami ra kang lag̓i anya kung matalig̓anami ra anyang mag̓ëkël yang balitang atia bakluami ra piaray na.
Purisu indiami pagsikad ang yay mauyunan yang mga tau yang nag̓ipagpakaw̓ut yamën tung nira,
kung indi,
ang yay mauyunan yang Dios ang yay pirming pagbilid tung pupusukun yamën kung unu pa ëngëd ay pag̓asikad yamën ang pagparakaw̓utun.
5 Nag̓apagbitalaaw ta maning tia ay nag̓askëan mi ra ka ang atiing pagparakaw̓utun yamën tung numyu,
indiamu rang pisan binuladas-buladas yamën,
indiami ka nagpasëën ang nagturuldukun tung numyu ang pagkatapus may pag̓aintris yamën ang maëklan tung numyung para mapapsawan yamën.
Maskin yang Dios,
puiding mapagkërëng tung nag̓ianing yamën ang atia.
6-7 Indiami ka nagsikad ang padëngëg̓anami ta mga tau,
maskin yamu maskin tinu pa ag̓ad pa kung sinikad ilëm yamën yang katëngdanan yamën ang yami mga apustul ka man ni Jesu-Cristo,
puidiami ra ka rin ang nagkalalangan tung numyu.
Piru duruamig kaamumu atiing asanami pa tung numyu.
Napakbungami ra nganing tung sasang talaana ang durug kainasikasuën tung mga ana na.
8 Kumus durung gëgma yamën tung numyu,
duru rag sadya tung isip yamën ang bëlag̓an ilëm yang Matinlung Balitang naang liit tung Dios ay ipinarti yamën tung numyu,
kung indi,
pati yang mga sadili yamën mismu,
yang kamamaalën mi tung yamën.
9 Mga kaputulan,
siguru nag̓adëmdëman mi ra ka ang bëlag̓an ilëm gësyë yang bëdlay yamën ang nagtrabaw asan.
Sipurki law̓iig kaldaw yang pandilëm yamën yang pagpangabui yamën basta indiami ilëm mapagpalbat tung numyu.
Ya ra ilëm ibalakyang-balakyangay yamën yang pagparakaw̓utun yamën tung numyu yang Matinlung Balitang naang liit tung Dios.
10 Maski yamu,
puidiamung mapanistigus tung pagkamatuud,
pati yang Dios,
ya ka,
ang yang pagpakignunut yamën tung numyu asan pulus tung limpiu ig magkatama ang anda kay mabasul ta duma tung yamën.
11 Ay kipurki nag̓askëan mi ra ka ang yang pagpadag̓ën-dag̓ën yamën tung numyung sasa may sasa maning pa tung pagpadag̓ën-dag̓ën ta sasang tatay tung mga ana na.
12 Ay pirmiaming nagpaktël tung mga isip ming naglinga-linga ig pirmiami kang nagpaprusigir tung numyu ang mag̓usuyamu tung kumpurming magkabag̓ay tung nag̓auyunan yang Dios ang tanya ka man yang nagbëtëng tung mga isip ming para tung uri,
mapalg̓uramu ra tung paggaraëmën na ang asanamu ra nga saliray yang kasusulawën na.
Nag̓aulit Na Yang Pinakaw̓ut Yang Panangëd Nira Ang Tanira Napasaran Ta Pandëëg-dëëg (2:13-16)
13 Dispuis may sam bilug pang nag̓apasalamatan ka ëngëd yamën ang pirmi tung Dios.
Ay atiing pagpakaw̓ut yamën tung numyu yang bitala na,
indi mi ipinabtang ang sasang inimu-imu ilëm ta tau,
kung indi,
pinauyunan mi ang yay bitala yang Dios ang kamatuuran ka man ang ya ra kay nag̓ipag̓imaklu na tung mga pagpangabui ming kumpurming panangëd.
14 Mga kaputulan,
nag̓asiguruung talagang matuud tia ay natëtëngëd yang napasaran mi asan,
yang pisan yang napasaran yang mga tumatalig tung ni Jesu-Cristong kada sam pundaan duun tung sinakëpan yang Judea ang yang Dios yay may anya tung nira.
Ay kipurki pinapinitinsiaanamu ra ka yang mga masigkabanwa mi asan ang katulad ka tung binuat tung nira yang mga masigka Judio nira duun.
15 Yang mga Judiong atia ya kay namagpaimatay tung ni Ginuung Jesus ig atiing tukaw yang mga kinaampu nira ya kay namagpangimatay tung mga manigpalatay yang bitala yang Dios.
Pati yaming mga apustul,
pinandëëg-dëëg̓anami ka nirang kinaskas tung banwa yamën.
Indi ëngëd nag̓auyunan yang Dios yang mga ubra-ubra nira ig nag̓akuntra ka nira yang sasang ikaayën da rin yang kadaklan ang mga tau.
16 Ay tinag̓amanami ra rin nganing nirang sagangën ang para indiami ra magpadayun ang magparakaw̓utun tung mga tag̓a duma-rumang nasyun ang bëlag̓an mga Judio ug̓ud basi pa ra ilëm mamagtalig da tung ni Jesu-Cristo ang asan da nga tapnayay tanira yang Dios.
Kapurisu,
kumus maning tia yang pag̓abuat nira,
nag̓atëlw̓an dang nag̓atëlw̓an ta kasalanan ang asta pataktakan da ka ëngëd yang Dios yang kasisilag̓ën nang parusaan.
Durung Langkag Na Pablong Magbalik Duun Tung Nira (2:17-20)
17 Simanyan,
ta yamën,
mga kaputulan,
atiing narëgsananami rang magpablag da kanay asan tung numyu,
piru bëlag̓an tung isip,
kung indi,
tung tinanguni ka ilëm,
pinungawami ra ta mupia tung numyu ig duru kang pag̓imuras yamën ang basi pa ra ilëm tung makali mag̓ërëmëtanita si ka.
18 Sipurki durung kalëlyag yamën ang magbalik asan tung numyu.
Maski yuung ti Pablo mismu,
muya-muyaaw ra rin ang nagpasukat-sukat ang magbalik asan,
maskin sam bilug̓aw ra ilëm.
Piru ti Satanas ya ray nag̓intra sagang tung yamën.
19 Talagang durung paglalangkag̓ën yamën ang tung makali mag̓irita-ita si ka ay natëtëngëd kung maglëkat da nganing ti Ginuu tang Jesus ang para manginsapu ra tung yamën,
tinu pa w̓asu ay ikadëngëg yamën kung bëlag̓an yamu?
Tinu pa w̓asu ay ikasadya yamën ta duru tung uras ang atia kung bëlag̓an ka yamu?
Tinu pa w̓asu ay matëngëran na ang padëngëg̓anami ra nganing anya,
kung bëlag̓an ka yamu?
20 Talagang yamu ra kay ipagpadëngëg tung yamën tung uras ang atia.
Yamu ra kay ipagkasadya yamën.