Yang Primirung Isinulat Ni Pablo Tung Ni TIMOTEO
Yang Intrada Yang Sulat (1:1-2)
1
Yang may sulat tia,
yuung ti Pablong nag̓ing sasang apustul ang pangërëngan tung ni Jesu-Cristo natëtëngëd tung kalalangan yang Dios ang pagtapnay tung yatën,
durua ni Jesu-Cristo ang yay nag̓apakbat tang magpalua yang tanan ang nag̓aëlatan ta.
2 Timoteo,
sinulatana ra yëën gatëd agkaw̓ig̓ëna yëën ang anaung sadili gatëd atiing primiru,
pinainunukuana yëën kung ya pa ag̓ari yang pag̓irintindiën mung ustu tung kamatuuran ang nag̓apanangëd ta.
Yang nag̓ipag̓ampuu para tung nuyu ang mas pang maispirinsiaan mu yang kanëëman yang Ama tang Dios pati kaildaw na ang pagpadag̓ën-dag̓ën tung nuyu,
durua tanira ni Ginuu tang Jesu-Cristo ang ya ray paglimëngan yang isip mu.
Nag̓aulit Na Yang Sasang Ipinagpatuman Na Tung Ni Timoteo (1:3-11)
3 Atiing pagliitu ra asan tung nuyu ang nanganingaw ra duun tung Macedonia,
yang iningaluku tung nuyu ang magpabutwana ra ilëm asan tung Efeso ang para ampalarën mu yang duma asan ang indi ra magpadayun yang pagturuldukun nira ta balaw̓ag tung ipinagtulduku ra kang lag̓i asan.
4 Bilang aningën mu ang indi ra padayunan nirang intindiën yang mga isturia-isturiang atiang natëtëngëd unu tung Dios buat ang yay pinanubli nira tung mga kinaampu nira.
Pati yang mga aran yang mga kinaampu nirang pira-pira rang laksang lug̓ud da ka yang mga aran yang namagsurubli-subli tung nira,
indi ra ka nira padayunan ang pagamënan ta mga isip nira.
Kipurki yang pakaw̓utun yang nag̓itulduk nirang maning tia tung mga taung pamamati,
bëlag ya ëyangay ta ipagtalig nira tung ni Jesu-Cristo ang para matultulan da rin nira yang planu yang Dios,
ya mag̓intra surug̓aan.
Ay ya pa ag̓ari,
natëtëngëd ilëm tung pagtaralig̓ën ta tung ni Jesu-Cristo,
asan da ilëm ngaintindiay ta kung unu pay palaksu yang planu yang Dios ang para mausuy ta.
5 Yang pag̓asikarung nagtuw̓ul tung nuyung magpasanag̓a tung mga manigtulduk ang atia ay ug̓ud imbis magsurug̓aan da yang pamamati tung nira,
indi ra.
Kung indi,
asan da ngaëyangay ta paggërëgmaan nirang magpurutul.
Ang para maggërëgmaan tanira ta ustu,
kaministiran ang bilug̓un da nira yang mga isip nira tung nag̓auyunan yang Dios ang indi magtënakan,
mag̓amlig kang indi ëngëd magbuat ta nag̓askëan nirang kuntra tung kalëlyag̓an na,
ig tëdëk ka tung mga isip nira yang pagtaralig̓ën nira tung ni Ginuung Jesus.
6 Kipurki may duma asan ang naski ra tung tulung palaksung atia ang asta nagpaklëd da tung pagturuldukun ta anday katumuyan naa.
7 Gustu nirang magpabantug ang tanira sag̓ad da tung mga katuw̓ulan ang ipinagpasulat yang Dios tung ni Moises.
Ang pagkatapus indi nira nganing nag̓amarësmësan kung unu pa ëngëd ay katuyuan na yang mga katuw̓ulan ang atiang nag̓apapaktëlan nira ta mupia.
8 Nag̓askëan tang matinlung itulduk ta yang mga katuw̓ulan yang Dios tung mga tau,
basta gamitën ta ilëm tung tamang palaksu.
9-10 Nag̓askëan ta ka ang yang rumbu nira ëngëd bëlag̓an tung mga taung pamag̓usuy ra tung kalëlyag̓an yang Dios.
Kung indi,
ipinakdul na tung yatën ang para ipasanag ta tung mga taung malinampasën ang basi pa ra ilëm asan da nga malamaray nira ang tanira alawid tung Dios.
Pariu ra asan tung mga taung indi ra kang lag̓i pag̓intindi tung mga katuw̓ulan.
Asan da ka ta baliwala ka ilëm tung isip nira yang kumpurming unu pay nag̓adapat tung Dios,
asan da ka ta mga taung anday pag̓ëlëd nira tung Dios,
kung indi,
masadya ka ëngëd tung isip nirang magpakasalak tung anya,
asan da ka ta anday pagmaal na tung nag̓amaal yang Dios ang pulus pangkaliw̓utanën ka ilëm yang nag̓apagamënan nira ta mga isip nira,
asan da ka ta mga taung pangimatay tung sadiling tatay nira mismu ubin tung sadiling nanay nira mismu ubin tung mga masigkatau nira,
asan da ka ta pangumbaw̓ay ubin pangunlalii ubin pagpangrangga tung pagkadarala yang mga darala,
asan da ka ta mga taung pangasawa-kasawa tung aruman nirang lalii,
asan da ka ta mga taung pagpamiag tung mga masigkatau nirang para ipaalang da nira tung duma ang ipakirëpën,
asan da ka ta mga taung bukliën ang maskin magsumpa tung katalungaan yang Dios may yang mga usgadu,
pagbukli ka ëngëd,
asan da ka ta mga taung pagbuat ta maskin unu pang ubra-ubraay ang balaw̓ag tung tamang nag̓itulduk.
11 Yang nag̓itulduk ang atiang tama,
asan da ngaitaay tung nag̓adapatan yang Matinlung Balitang naang ipinagpiar yang Dios tung yëën ang ipagpakaw̓ut tung mga taub.
Liit tung anyang makagag̓aëm ig yay magkabag̓ay ang dayawën tang pirmi.
Natëtëngëd Tung Sasang Nag̓apasalamatan Ëngëd Ni Pablo Tung Ni Ginuung Jesu-Cristo (1:12-17)
12 Durug dakul yang pagpasalamatu tung ni Ginuu tang Jesu-Cristong nagpaktël tung yëën ang para makayananung mag̓ërëkëlën tung katëngdanan ang ipiniar na tung yëën.
Ay kipurki atii pala,
ipinabtangaw ra anyang sasang matalig̓an nang mag̓ërëkëlën ta matinlu tung balitang atia natëtëngëd tung anya.
Purisu pinilikaw ra nganing anyang manirbian tung anyang magparakaw̓utun.
13 Pinilikaw ra ka ëngëd anya,
ag̓ad atii kanay,
nagparalagpakënaw pa ta mga bitalang panduminar tung anya.
Pati mga tumatalig tung anya,
pinandëëg-dëëg̓anu nganing ang pinanginsultu.
Piru inildawanaw ra ka ëngëd anyang indiaw ra ka pinarusan na natëtëngëd anday malayu kung unu pa ëngëd ay nag̓abuatu atiing pagdiskumpiaraw pa rin tung anya.
14 Maskin dakulu ka man yang kasalananu tung anya,
piru pinagpaitaanaw ra ka ëngëd anya ta kanëëman nang subra bastanti ay pinaëyanganaw ra anya ta ipagtalig̓u tung anya pati yang ipaggëgmaw tung mga tauan na.
Ya ray nag̓ainabu kung pagkinapulitayita ra ni Jesu-Cristo.
15 Naa w̓a yang sasang pirming nag̓apagkërësën-kësënan tang mga tumatalig ang talagang matuud ig magkabag̓ay kang pauyunan yang kadaklan ang mga tau ang anday dua-dua yang mga isip nira.
Maning taa yang palaksu na:
“Yang ipinag̓ingtau ni Jesu-Cristo taa tung kaliw̓utan ang naa ay ug̓ud magpanapnay tung mga taung makinasalananën.”
Ang pagkatapus yang pinakamalain tung nirang tanan yuu.
16 Piru ya ra ka man taa yang katuyuan ni Jesu-Cristong nag̓ildaw tung yëën ay ug̓ud tung yëën ang pinakamalain ëngëd tung tanan ngaipaitaay na yang pagparurusun nang subra ang para ya ray magsirbing mulidu tung duma ang këmtël da yang mga isip nirang magtalig da ka tung anya ang asan da ka nga paëyangay na ta ipagpangabui nirang baklu ang anday pagtapusan na.
17 Purisu agdayawënu ta mupia yang Dios ang yay may gaëm tung tanan mag̓impisa pa atiing primiru ang asta ra ilëm tung sampang anday katapus-tapusan.
Tanya banal ig indig dakatën ta mata.
Ultimu ilëm tanya yang matuud ang Dios.
Yay dapat ang padëngëg̓an ta ta mupiang dayawën ang asta ra ilëm tung sampang anda ëngëd ay katapus-tapusan na.
Talagang magkabag̓ay ang pisan ang yay buatën ta.
Nag̓apaktël Ni Pablo Yang Isip Ni Timoteong Magprusigir Tung Ipiniar Na Tung Anya (1:18-20)
18 Yang nag̓iurdinung atia tung nuyuc,
anaw,
prusigiran mu ta mupia ang katulad ka tung sasang sundalung pagprusigir ang pagbatuk tung gira,
maskin nag̓aliwag̓an da.
Ang para india magpatalaw ang magpasanag tung duma asan ang pagturuldukun ta mali,
pirming dëmdëmën mu yang mga bitala yang mga kaarumanan mu ang natëmëng da tung nuyu atiing pagpasanag yang Espiritu Santo tung nira ang yawa unu matinlung papgësën ta katëngdanand.
19 Kaministiran ang padayunan mu yang pagtaralig̓ën mu tung ni Jesu-Cristo.
Asta yang nag̓askëan mung malain ang pagburuatën,
amlig̓an mu ka ta mupiang likayan ug̓ud anday barasulun yang painu-inu mu tung nuyu.
Ag̓aningëna yëën ta maning tia ay kipurki may dumang mga manigtulduk ang nagpalangaas da ilëm ang nagbuat yang nag̓askëan da kang lag̓i nirang malain ang pagkatapus ya ray nakanayan ta ikarangga yang pagtaralig̓ën nira tung ni Ginuung Jesus.
20 Katulad da asan tung binuat ni Himeneoe durua ni Alejandrof.
Kapurisu ipinag̓intrigaw ra tung pudir ni Satanasg.