Yang Mga Tumatalig Dapat Ang Mamag̓arampuën Para Tung Tanan Ang Mga Tau Natëtëngëd Yang Gustu Yang Dios Ang Magpalibri Tung Nirang Tanan (2:1-7)
2
Numaan,
may ingalukunu si tung nuyu may tung mga kaputulan ta asan ang landaw tung tanan ang pirmiamung mag̓arampuën para tung tanan ang mga masigkatau mi.
2 Yang ipag̓ampu mi ëngëd ya ra yang mga adi pati yang tanan ang may mga katëngdanan ang taw̓angan na tanira ta maayën tung pag̓ërëkëlën nira tung banwa ug̓ud malimëng yang pagkarabëtangën tang pirmi ig ërëk-ërëk tang pag̓usuy tung kalëlyag̓an yang Dios.
Ay tung pag̓urusuyun tang atia,
asanita ra nga galangay ta mga tau ig pamatiënita ra ka nirang pagpaintindi yang kamatuuran.
3 Atia yay durug tinlung buatën ta ig ya kay nag̓auyunan yang Dios ang pagtapnay tung yatën ang mga tumatalig.
4 Pati yang kadaklan ang mga tau gustu na kang maintindian da ka nira yang kamatuuran ang nag̓itulduk natëtëngëd tung ni Jesu-Cristo ig panangdën da ka nira ug̓ud magkaratapnay na ra ka.
5 Yang dalan yang kalibrian sam bilug ilëm ay kipurki sam bilug ilëm yang Dios ig sam bilug ka ilëm yang manigpakaknga tung yatën may tung Dios.
Anday duma,
ya ra ti Jesu-Cristong nag̓ingtaung bilug.
6 Yay nagpatumbas yang linawa na para tung yatën ang tanan ang mga tau ug̓ud mapaluasita anya tung pagpakasalak taa.
Yang pagpatumbas nang atii,
ya ray pruibang durug kasanag ang ipinagpaita na tung uras ang ipinagtipu na kang lag̓i ang tanya talagang may gustu na ang yang tanan ang mga tau malibri.
7 Ya ra kay natëngëran na ang tinuldukaw ni Jesu-Cristong mag̓ing sasang apustul nang mangërëngan tung anyang magparakaw̓utun tung bëlag̓an mga masigkanasyunung mga Judio.
Bilang pasanag̓anu ta maayën natëtëngëd tung kamatuuran ang kung magtalig yang mga sadili nira tung anya,
asan da nga tapnayay na.
Yang nag̓ianingung atia ang tinuldukaw ni Jesu-Cristong mag̓ing sasang apustul na bëlag̓an bukli ang katulad tung nag̓ipëtël yang duma tung yëën,
kung indi,
talagang matuud.
Natëtëngëd Tung Mga Pasais Ang Dapat Usuyun Yang Mga Tumatalig Tig Lalii Tig Baw̓ay (2:8-15)
8 Ibaliku ra kanay tung pag̓arampuën mi asanb.
Yang nag̓aingaluku tung mga tumatalig maskin ay pa mamagsaragpun ang para mamagtuu tung Dios,
yang mga lalii yay magmangulu tung pag̓arampuën.
Ug̓aring ilëm yang magkabag̓ay ang magkërëng ang magpaabwat yang mga kalima nang mag̓ampu,
kumpurmi ra ilëm yang taung bilug yang isip na tung nag̓auyunan yang Dios,
bilang anday nag̓asilag̓an na ig anda kay kabalala na.
9 Asta yang mga kaputulan tang mga baw̓ay,
yang nag̓aingaluku tung nira,
ya taa.
Kaministiran ang yang pag̓araw̓ëlën nira ëklan nira tung magkabag̓ay tung pagtërëlëngën ta duma may ruma ang anda kay ëkël nang danyu tung mga lalii,
kung indi,
tung katamtaman ilëm.
Indi ka nira pasubraan yang pagpurusturaën nira tung mga bua nira ig tung pagsuruutun nira ta mga alaas ang bulawan ubin mga musya ubin mga aw̓ël ang durug maal.
10 Kung indi,
yang gamitën nirang ipamustura tung mga sadili nira ya ra yang pagburuatën nira yang matitinlu ang katulad ka tung dapat ang maita tung mga baw̓ay ang pag̓aning ang tanira pagtuu ta ustu tung Dios.
11 Dispuis kung nag̓apanuldukan da yang mga lalii,
kaministiran ang yang mga baw̓ay mamagpamati ra ilëm ang indi ra ka magsublang-sublang,
kung indi,
ilalaën nira ta maayën yang katëngdanan ang ipiniar yang Dios tung mga lalii ang magturuldukun tung sam pundaan.
12 Indi nganing nag̓atugtanu yang mga baw̓ay ang magturuldukun tung mga lalii ubin mangatëngdanan tung nira,
kung indi,
kaministiran mamagpamati ra ilëm asan.
13 Ay ya pa ag̓ari,
ti Adan yay tukaw ang inimu yang Dios,
baklu pa ti Ebac.
14 Yadwa pa,
bëlag̓an ti Adan yang nagpadaya tung nagpairaw-iraw ang atii,
kung indi,
yang baw̓ay ang asta dayun dang naglampas tung sasang inurdin yang Dios tung nirad.
15 Piru kung mag̓intindi ra ta ustu yang mga putul tang mga baw̓ay tung turnu nirang pagparanganaën kag pagparadakulun tung mga ana nira,
asan da nga bag̓asay nirang mas pa yang kalibrian nirae basta padayunan nira yang pagtaralig̓ën nirang bug̓us tung ni Jesu-Cristo pati yang paggërëgmaën nirang ustu tung mga kaarumanan nira,
ya ka.
Ig dayun-dayun da ka yang pag̓atu nirang pag̓atu tung kalëlyag̓an yang Dios ang pirmi ka tung magkabag̓ay yang tanan ang mga pag̓urulag̓ën nira.