Natëtëngëd Tung Mga Pasais Ang Dapat Mapitikan Tung Sasang Tumatalig Baklu Ra Piaray Ang Manirbian Tung Sam Pundaan (3:1-14)
3
Naa w̓a yang sasang pirming nag̓apagkërësën-kësënan tang mga tumatalig ang talagang matalig̓an tang matuud.
Maning taa yang palaksu na:
“Kung tinu pay pagsikad ang manirbian bilang magmaëpët-ëpëta tung sam pundaan yang mga kaputulan nang mga tumatalig,
yang nag̓alëlyag̓an nang atia,
talagang may timbang nang durug kaimpurtanti para tung ikaayën yang grupu.”
2 Kapurisu,
kumus duru ka man agkaimpurtanti yang ubrang atia,
kung tinu pay piaran ang magmaëpët-ëpët,
dapat ang anday mapitikan tung anyang mga malalain.
Yang tëtëlëngan tung anya,
maning taa:
Dapat ang sam bilug ilëm yang kasawa nang yay nag̓apabuyukan na ta gëgma na,
maskë kang magsuspindi tung sadiling kalëlyag̓an na,
matandës ka tung tanan ang mga pag̓urubraën na ang pirmi ka tung magkabag̓ay tung pagtërëlëngën yang mga kaarumanan na,
mainasikasuën ka tung mga bisita na,
ig dapat kang maayën ang magbadbad tung kinaisipan yang kumpurming pag̓apanuldukan na.
3 Dispuis pa,
dapat kang bëlag̓an tarainëm,
bëlag̓an kang mairil,
kung indi,
maamumu,
alawid tung anya yang suruayën,
ig bëlag̓an kang maamluk tung kuarta.
4 Dapat kang maskëng mag̓ërëkëlën tung sadiling pamilya na tung matinlu ang asan da ngaëyangay yang mga ana na ta ipaggalang nira ta ustu tung anyang magpalalang,
maskin tung dumang mga mamaëpët,
ya ka.
5 Simpri kung tinu pay indi pa nganing maskëng mag̓ërëkëlën ta matinlu tung sadiling pamilya na,
ya pa yang sam pundaan ang yang Dios ka man yay may anya,
makayanan na pa w̓asung panirbian tung matinlu?
6 Dapat ka ang yang sasang tumatalig ang indi pag tëg̓asan tung pagtalig na,
bëlag̓an ang yay piaran mu.
Ay muya kung ya pay piaran mung manirbian,
ya ra ilëm ay pagdakulan yang kulu na yang pusisiun na ang asta lumambëg da dayun tung sintinsia yang Dios ang katulad ka tung ipinakdul na tung ni Satanas atiing pagdakul da ka yang kulu na ang asan da nga kuatay na tung katëngdanan nang abwat.
7 Kidispuis pa,
kung tinu pay piaran,
dapat kang matitinlu yang mga ubra-ubra na ang pati yang mga taung indi pa nag̓atultul tung kamatuuran,
durung panggalang nira tung anya.
Kipurki kung anda,
ya ray sawayën nira tung anya ig indi ra ka mamagpamati tung nag̓ipagpakaw̓ut na ra rin tung nira.
Yang pisan ay kalëlyag̓an ni Satanas ang mainabu ang yang kaalimbawaan na maning pa tung nasiërita ra anya.
Yang Dapat Ang Mapitikan Tung Sasang Malëlyag Ang Magtaw̓ang Tung Sam Pundaan (3:8-13)
8 Kung natëtëngëd tung duma ang nag̓alëlyag dang manirbian ang magtaw̓ang tung mga masigkatumatalig nira tung sam pundaan,
dapat kang garalangën kang lag̓i ta mga tau ang tanya sasang maayën ang tau.
Dapat kang bëlag̓an sanga yang dilak na.
Dapat kang bëlag̓an tarainëm ta binu.
Bëlag̓an kang maamluk tung kuarta.
9 Dispuis dapat kang tëdëk tung isip na yang pagparanangërën na tung kamatuuran ang naang ipinagpabunayag da yang Dios tung yatën ang nunut da ka ta pagturumanën na ang limpiu yang painu-inu na ang anday barasulun na tung anya.
10 Dispuis pa,
pati tanira,
dapat kang puntusan da kanay ang pamalaran kung tanira talagang magkabag̓ay rang piaran u kung indib.
Pagkatapus,
kung anday puntus ang naita tung nira,
baklu ra piaray ang manirbian tung sam pundaan.
11 Pati mga baw̓ay ang kumpurming malëlyag da kang manirbian,
dapat kang garalangën kang lag̓i ta mga tau,
dapat kang bëlag̓an kang sanga yang mga dilak nira,
dapat kang maskëng magsuspindi tung mga kalëlyag̓an nirang sadili ig dapat kang matalig̓an ka tung maskin unu pang ubraay.
12 Kung nainu pay nag̓alëlyag ang magtaw̓ang tung sam pundaan,
dapat kang sam bilug ilëm yang mga kasawa nirang yay nag̓apabuyukan nira ta gëgma nira ig dapat kang matinlu yang pag̓ërëkëlën nira tung sadiling pamilya nira.
13 Yang ipagpadërëp nira tung turnu nirang atia ay kung tinu pay magtaraw̓angën ta matinlu tung mga aruman na tung sam pundaan,
galangën da nira ta mupia ig asan da ka ngaëyangay ta balur yang isip nang magpaintindi tung duma may ruma natëtëngëd tung kamatuuran ang nag̓ausuy na.
Nag̓ipasanag Na Kung Unu Pay Pag̓asikad Nang Nagsulat Tung Anya (3:14-16)
14 Maskin sinulatana ra yëën natëtëngëd tung mga bag̓ay ang atia,
may sarig̓u ka ang basi pa ra ilëm ang indi ra ilëm buay,
mangayaw ra asan tung nuyu.
15 Ug̓aring ilëm,
naisipu ka ang muya kung may maatrasaduanu pa tani,
mas matinlu sulatana rang lag̓i yëën ug̓ud maintindian mu rang lag̓i kung unu pay mga matinlung palaksu ang dapat ang ipausuy mu tung mga kaarumanan mung mga tumatalig asan ang yang kaalimbawaan nirang sam pundaan maning pa tung yay pamalay-w̓alay yang ultimu ilëm ang Dios.
Katulad tung mga adili may yang pinakdëngan nira ang yay paniëlan yang lëbat yang intirung balay ang para mabakëd ig yang gamitan na uyun tung katuyuan yang nagpakdëng,
ya ray kaalimbawaan yang mga tauan yang Dios.
Ay tanira kay pamagpabakëd tung kamatuuran ang naang ipinagpabunayag da yang Dios tung yatën ig ipinagpiar na ra ka dayun tung nirang këgngan ang para pirming mapuirsa yang builu na tung isip yang mga tau ug̓ud kumaw̓ut da ka ëngëd tung katuyuan yang nagpiar.
16 Durung pisan agkatimbang yang kamatuuran natëtëngëd tung ni Jesu-Cristong ipinagpabunayag da yang Dios tung yatën.
Asan da nga bilug̓ay ta yang nag̓adapatan na tung sarabyën yang sasang karantaën tang mag̓aning,
“Ya ray nag̓ingtaung bilugc,
Pinaingmatuuran da ka yang Espiritu Santo ang tanya ra ka man yang Mananapnay gatëd nabui si kang umand,
Pagkatapus naita ra ka ta mga angil ang bui ra ka mane.
Yang balita natëtëngëd tung anya ipinampakaw̓ut da ka tung mga tag̓a duma-rumang nasyun,
Pinanalig̓an da ka nira taa tung kaliw̓utan ang naa,
Ang tanya duun da ka man tung langit paggaraëmënf.”