Yang Nag̓ipaaman Na Tung Anya Natëtëngëd Tung Duma Ang Manalyud Da Tung Kamatuuran (4:1-5)
4
Ug̓aring ilëm,
durug kasanag yang sasang ipinagpaula yang Espiritu Santo ta muya-muya ang tung panimpu ta unung naang panguri ang baklu maglëkat ti Ginuung Jesus,
may duma unung mamalpas da tung kamatuuran ang naang nag̓apanangëd tang tanan natëtëngëd tung ni Jesu-Cristoa.
Ay magpaëkël da yang mga isip nira tung mga manigtulduk ang mga mandaraya ang yag paisipay ta mga dimunyu kung unu pay itulduk nira tung mga tau.
2 Yang mga taung atia pagtulduk ta kabuklian ang ya ra ag̓aningay nirang yay kamatuuran.
Indi ra maimung magsug̓at tung pag̓abuat nirang atiang kamali natëtëngëd pinamatëltëlan da kang lag̓i nira yang pagbarasulun tung nira yang mga painu-inu nira ang asta maning pa tung naminëd da.
3 Ag̓ampalarën da nira yang mga tau ang indi ra magkarasawaan.
Aglalangan da ka nira ang dapat ang maglii tung duma-rumang mga palanganën.
Ang pagkatapus yang nag̓ibawal nirang atia inimu nganing yang Dios ang para mapakinaw̓angan da yang mga tumatalig ang nangatultul da tung kamatuuran ang nunut da ka ta pagpasalamat nira tung anyang nagpakdul.
4 Talagang mali yang nag̓itulduk nira ay kipurki yang tanan ang inimu yang Dios,
pulus matinlu ig anday dapat ang pangindian ta,
kung indi,
luw̓us ang mapakinaw̓angan ta basta panuntan ta ta pagpasalamat ta tung anya.
5 Yang indi ta ipandëlëg tung mga bag̓ay ang atia ay pulus da limpiu ëkël tung pinag̓aning yang Dios ang matinlu atiing primirung pag̓imu na kag yadwa pa ëkël tung pagpasalamat ta tung anyang nagpakdul.
Natëtëngëd Tung Dapat Ang Tumanën Ni Timoteo Ug̓ud Mag̓ing Matinlung Turuw̓ulun Ni Jesu-Cristo (4:6-16)
6 Yang mga bag̓ay ang atiang baklung nag̓asambitu,
kung ipasanag mu tung mga kaputulan ta asan,
maayën yang pagpaturuw̓ulun mu tung ni Jesu-Cristo.
Kayanan mu tia kung pirming panëëm-nëëman mu yang kamtangan yang kamatuuran ang naang nag̓apanangëd ta pati yang ipinagtulduku tung nuyung durug tinlu ang ya ra kang lag̓i ay mag̓usuyun mu.
7 Piru yang mga isturia-isturiang atiang nag̓ipakli yang duma tung kamatuuran ang nag̓itulduk,
indi mu ra ëngëd intindiën ay imu-imu ta tau ka ilëm ig andang pisan ay pakaw̓utun nang matinlu.
Kung indi,
katulad ka tung sasang manugkayam ang pirming pagpaawat ang pagpaktël tung tinanguni na ang para simpan dang pisan tung paglaban,
yawa ya ka.
Pirmia ra kang magpaawat ang magpaktël tung pag̓urusuyun mu tung kamatuuran ang para yang pag̓urulag̓ën mu atu rang pisan tung kalëlyag̓an na.
8 Durug kaimpurtanti tia,
ay kipurki tëlëngan mu ra ilëm.
Kung tung bag̓ay,
yang pagpaktël ta tung tinanguni ta mabintaa ka piru tung gësyëng uras ilëm.
Piru yang pagpaawat tang pagpaktël tung pag̓urusuyun ta tung kamatuuran,
anday katëgka-tëgkaan yang mabintaan ta asan.
Ay asan da ëngëd nga bag̓asay tang mas pa yang baklung klasi ta pagpangabui ta bëlag̓an ilëm simanyan,
kung indi,
pati asta tung uras ang kaw̓utun ang anday katapus-tapusan nab.
9 Yang nag̓asambitung atia sasang pirming nag̓ipagkësën-kësën tang mga tumatalig ang talagang matuud ka man ig magkabag̓ay kang pauyunan tang usuyunc.
10 Ya ra ka nganing ay natëngëran na ang pagpakabëdlayitang pagpaawat tung pag̓urusuyun ta tung kalëlyag̓an yang Dios.
Kipurki tanyang makagag̓aëm yay pag̓inëtëg̓an yang isip tang pakdulanita ra anya yang pinangakuan na ang tanya ka man yang manigpanapnay tung maskin tinu pang tauay bilang tung kumpurming magtalig yang sadili na tung ni Ginuung Jesus.
11 Kaministiran ipasanag mu ta mupia yang mga bag̓ay ang atia tung mga kaputulan ta asan ang nunut da ka ta pagpatuman mu tung nira.
12 Maskin lamkuëna ta duma ang yawa indi magkabag̓ay ang magturuldukun tung nira sigun tung pagkamula mu,
indi mu ra ilëm këtëyën.
Kung indi,
ta nuyu,
magpaitaa ta matinlung mulidung puiding mausuy nira tung pamitala mu,
tung mga ulag mu,
tung paggërëgmaën mu,
tung pagtaralig̓ën mu tung Dios,
may tung pagtaraklingën mu tung may pagkamalaway na.
13 Mintras indiaw pa magkakaw̓ut asan,
yang pabilug̓an mung prusigiran ya ra yang pagbarasaën mung pagpagngël yang napabtang tung kasulatan.
Panuntan mung lag̓i ta maliway ang pasanag kung unu pay nag̓alagpakan na ig paktëlën mu ra ka dayun yang mga isip nirang mamagtuman.
14 Indi mu ilëm paw̓aya-w̓ayaan yang abilidad ang atiang ipinakdul yang Dios tung nuyu ëkël tung sasang inula natëtëngëd tung nuyud.
Atii pinauyunan da ka dayun yang mga pamagmaëpët-ëpët asan ang namagdëën tung nuyung namagpapgës yang katëngdanan mue.
15 Yang nag̓ipanuw̓ulung atiaf tung nuyu,
padërëpan mu ta mupiang pabilug̓an ug̓ud asan da mabistung pisan tung tanan ang mga kaarumanan mu ang yang panirbian mu tung ni Ginuung Jesus pagtinlu rang pagtinlu.
16 Amlig̓an mung amlig̓an yang mga ubra-ubra mu pati yang nag̓itulduk mu ang parariung ipausuy mung pirmi tung pitik ang para magkatunuan.
Ay kipurki kung yay padayunan mu,
asan da ngaipalibriay mu yang sadili mu tung pagkatalang pati yang pamagpamati tung nuyu,
ya ka.