Kung Ya Pa Ag̓ari Yang Pagpakignunut Na Tung Mga Mamaëpët May Tung Aranëk Ta Idad Tung Anya (5:1-2)
5
Kung alimbawa may sasang maëpët ang lalii asan ang kaministiran ang paintindiën mu natëtëngëd tung ubra-ubra na,
indi mu ëngëd buyayawën,
kung indi,
pakigkësënan mu ta luay-luay ang ya rag kaw̓ig̓ay mung ama mu.
Kung natëtëngëd man tung mga masigkalalii mung aranëk ta idad tung nuyu,
ipabtang mung mga putul mung sadili ang yag kunsiuay mu ta matinlu.
2 Kung natëtëngëd man tung mga mamaëpët ang mga baw̓ay,
kaw̓ig̓ën mung nanay mu.
Kung natëtëngëd man tung mga baw̓ay ang aranëk ta idad tung nuyu,
ipabtang mu kang mga putul mung mga baw̓ay ang pulus ka tung magkabag̓ay yang pag̓aratratarën mu tung nirang anday danyu.
Nag̓apasanag̓an Na Natëtëngëd Tung Pag̓ërëkëlën Na Tung Mga Baw̓ay Ang Mga Balu (5:3-16)
3 Yang mga baw̓ay ang nagkarabalung anday may kaampiran tung nirang mag̓asikasu tung nira,
yay dapat ang diparaën yang sam pundaan ang asikasuën.
4 Piru kung may sasang balu ang may mga ana na ubin mga apu na,
tanirang may sadili,
yang dapat ang ipalandaw nirang intindiën tung panirbian nira tung Dios ya ra yang pag̓arasikasuën nira tung sasang maëpët nira ang para asan da nga balësay nira ta matinlung kanëëman ti nanay nira ubin ti bai nira.
Ay kipurki yay nag̓auyunan ang pisan yang Dios.
5 Ug̓aring yang sasang balung kapas ang pisan ta mag̓asikasu tung anya,
atia anday dumang pag̓inëtëg̓an yang isip na,
kung indi,
ultimu ra ilëm yang Dios.
Law̓iig kaldaw yang pagpataw̓ang na tung anya.
Ya ray balung dapat ang asikasuën yang sam pundaan.
6 Piru kung may balung pagpapsaw ra ilëm tung sadiling kalëlyag̓an nang pagbuat ta malalaway,
maskin bui pa tanya,
katimbang nang patay rang lag̓i ay nagpablag da tung Dios ang nagpanadili.
7 Yang nag̓iurdinung atia natëtëngëd tung pag̓arasikasuën tung mga balu,
kaministiran ang ipagpadapat mung ipatuman tung sam pundaan yang mga tumatalig asan ug̓ud anda ray sarang ang mabangdan ta duma tung nira.
8 Piru kung tinu pay indi mag̓arasikasuën tung balung may kaampiran tung anya,
kapin pa ëngëd yang sadiling nanay na ubin sadiling bai na,
asan nga paitaay na ang nag̓apanalyuran na ra yang ustung pag̓urusuyun tung kamatuuran ang naang nag̓apanangëd ta.
Asan da ka napadëëg tung bëlag̓an mga tumatalig ang pamag̓arasikasuën ngani tung mga balu nira.
9-10 Kung natëtëngëd tung listaan ta mga balua,
yang sulaminting ilista asan,
ya ra ilëm yang kumpurming pag̓idaran da ta saisinta anyus (60) patakwal.
Kaministiran minsa ilëm ang nagpakasawa ang indi na ra ka linimbungan yang kasawa na.
Kaministiran kang ilaladu ra kang lag̓ing durug tinlu yang mga buat-buat na.
Bilang durug tinlu yang pagparadakulun na tung mga ana nang asta namaglua rang nëëman,
duru kag kainasikasuën tung mga tumatalig ang nag̓apanaw tung anya maskin indi na ka nag̓ailala,
panirbian ka tung mga masigkatumatalig na ang maskin ubra ta sasang turuw̓ulun,
agpëgsan na ka ëngëd ang ubraënb,
ig durug katinaw̓angën tung mga taung nag̓aliwag̓an da.
Kung pirming pagprusigir tung mga pag̓urubraën ang mga maning tiang nag̓ikaayën ta mga masigkatau na,
yay sasang balung dapat ang ilista.
11 Piru kung natëtëngëd tung mga balung mga baw̓ay ang aranëk pa ta idad tung saisinta,
indi ra ilëm ilista.
Ay kipurki kung ilista pa,
muya kung dërëëg̓ën da yang kalëlyag̓an nirang magpakasawa si,
mag̓isul da tung pinangakuan nirang manirbian da tung ni Jesu-Cristong mintras bui pa.
12 Ya ray magakdan nira ta pakusalak natëtëngëd pinanalyuran da nira yang sinumpaan da nira atiing pagpalista nirang primiru.
13 Yadwa pa,
pag nalista ra ngani,
muya magkaanad-anad da tung pagpatamad.
Imbis magprusigir tung panirbian nira tung ni Ginuu ta,
gastaën da ka ilëm nira yang uras nira ta masyadung pamasyar-pasyar nira tung mga kabalayan.
Bëlag̓an da ilëm maning tia,
kung indi,
maglua ra kang daldalira pa,
mapinagpalaw̓ët pa tung anday kalalabtën nira ig mainisturiaën pa tung bëlag dang bag̓ay ang sarambitën.
14 Purisu yang gustuu asan tung nira,
maayën pang magpakasawa si,
magparanganaën da ig mag̓arasikasuën da tung pamalay-w̓alay nira ug̓ud asan da nga kapasay ta mapadatëlan yang pamagkuntra tung yatën ang mga tumatalig ang mamagtag̓am pa rin ta saway.
15 Impurtanting sambitënu tia,
ay kipurki may dumang mga balung aranëk pa ta idad ang nagpalista ra ang pagkatapus napatalang da tanira tung ni Satanas ang nagpaklëd da tung mga ubra-ubrang mga maning tiang durug kasayud.
16 Ibaliku ra kanay tung mga balung kapas ang pisanc.
Kung may tumatalig ang baw̓ay ang kasawaan pa ang yay may sadili tung sasang balung baw̓ay,
dapat ang yay mag̓arasikasuën tung balung atia.
Indi na ra palbatan yang mga kaarumanan nang sam pundaan ang papagsuituën ug̓ud yang suituën nira ya ra ilëm yang mga balung kapas ang pisan ta magsuitu tung nira.
Yang Mga Urdin Ni Pablo Natëtëngëd Tung Mga Pamagmaëpët-ëpët Ang Kada Sam Pundaan (5:17-25)
17 Ibaliku ra kanay tung mga pamagmaëpët-ëpët ang kada sam pundaand.
Kung matinlu yang pagmaëpët-ëpët nira ang pamanirbian tung mga kaarumanan nira,
magkabag̓ay kang galangën nira ta maayën kag riparaën ka nira kung agkulangën da nganing tung mga kaministiran na.
Kapin da ëngëd yang pamagpakabëdlay ang pamagprusigir tung pag̓araralën nira tung bitala yang Dios may tung pagturuldukun nira.
18 Ag̓aningënung magkabag̓ay ang galangën ang riparaën,
ay tia uyun tung sasang napabtang tung kasulatan ang yang sasa unung bakang nag̓apapanggëyëk,
indi unu pugsungane.
Uyun ka tung sam bilug kang bitalang napabtang ka tung kasulatan ang mag̓aning,
“Magkabag̓ay ka ang yang sasang ubrirus asikasuën tung mga kaministiran nang yay maning pa tung suul na,”
ag̓aaningf.
19 Yang sasang pagmaëpët-ëpët,
kung alimbawa mabangdanan ta malain ang ya ray ikig̓a tung nuyu,
indi mu ra kanay intindiën,
mintras anda pay magpaingmatuud ang durua ubin tulu nga tauang.
20 Kung masiguru mu ra nganing ang matuud ka man,
ipaintindi mu ra tung anya yang kasalanan na ug̓ud basi pa ra ilëm asan da ngaëyangay ta ipagsug̓at na.
Ya ray buatën mu tung katalungaan yang kadaklanh ug̓ud asan da mamagkatinir ta pag̓ëlëd nirang mamag̓usuyi.
21 Timoteo,
naaw̓a ëngëd yang nag̓ituw̓ulu ra tung nuyu tung katalungaan mismu yang Dios durua ni Jesu-Cristo kasiraan da ka tanira yang mga angil ang pinilik nirang para mamagtaripukpuk tung pagkarungan nira.
Yang mga nag̓iurdinung atiang baklu ra ilëm ang sinambituj,
dapat ang ya ray tumanën mu ëngëd ta ustu ang andang pisan ay pinilikan mung dapig̓an,
maskin tinu pang pagmaëpët-ëpëtay asan.
Ay kung malalisan mu tia,
siguradung patuw̓alëna ra anya.
22 Kung natëtëngëd tung pagpiar mu tung sasang putul tang magmaëpët-ëpët tung sam pundaan,
india ra ëngëd magpakali-kaling magdëën tung anyak.
Ay muya kung kali-kaliën mung dëënan ang pagkatapus magbuat da ta kasalanan,
asana ra ngaumiray ang nag̓ing kusintidur tung buat na.
Pati yawa,
mag̓amlig̓a ka ang india ka magbuat ta kasalanan.
23 Piru bëlag̓an ang mag̓aning ang pulus ilëm wai yang igmën mu.
Kumus midyu muya-muyaa rang sisiitan ta tian mu,
maayën pang manginëma ta binung gësyë ilëm,
bilang bulung tung tian mu.
Kung manginëma ta binung gësyë ka ilëm,
bëlag̓an kasalanan mu tial.
24 Ibaliku ra kanay tung pagpiar mu tung sasang magmaëpët-ëpët tung sam pundaanm.
Yang indi mu ipagpakali-kaling pagpiar ay natëtëngëd kung kaisan,
durug liwag ang madëëp mu agkali kung unu pang klasing pagkatauay na.
Kung tung bag̓ay,
yang duma bistung bistu mung lag̓i yang mga kasalanan nira.
Pagtukaw ra nganing tung anyang magprisintar tung nuyu.
Anda ray kaministiran mung paptikan mu pang pamalaran.
Piru yang duma yay mas maliwag ang masiplatan mu ay taluk yang mga kasalanan nira.
Kuidaw,
muya baklu ra luw̓away ang napiaran mu ra!
25 Pati yang mga ubra-ubrang matitinlu,
maning ka.
Yang duma bistung bistung lag̓i.
Maskin yang duma ang bëlag̓an bistu,
may uras dang luw̓awan da ka ëngëd agyapun.
Purisu ya ra ag̓ëlatay mung lumbaw.