Natëtëngëd Tung Mga Pasais Ang Dapat Usuyun Yang Mga Tumatalig Ang Mga Kirëpën (6:1-2)
6
Kung natëtëngëd tung mga tumatalig asan ang binuat dang mga kirëpën,
kaministiran ang yang pagpabëtang nira tung mga ag̓alën nira bag̓ay ang garalangën nira ta ustu.
Ay kung alimbawa indi galangën nira,
asan da nga durug̓as yang kadëngëg̓an yang Dios pati yang nag̓itulduk ta natëtëngëd tung ni Jesu-Cristo,
ya ka.
2 Yang may mga ag̓alën nirang mga tumatalig ka,
dapat ang indi maglaum ang kumus magputul da tanira tung ni Ginuu ta,
anda ray baling indi ra manggalang ta matinlu.
Kung indi,
dapat ngani ang yay pagpakirëpënan nira ta mas pang madërëp kay tung sasang ag̓alën ang bëlag̓an tumatalig.
Ay kipurki yang ag̓alën nirang atiang pagpakinaw̓ang tung panirbian nira sasang masigkatumatalig nirang maal nira.
Kapurisu yang mga nag̓iurdinung atia tung nuyua,
itulduk mu tung mga kaputulan ta asan ang nunut da ka ta pagpaktël mu tung mga isip nirang magtuman.
Yang Nag̓ipagpaaman Na Si Sigun Tung Mga Manigtulduk Ta Kabuklian (6:3-11)
3-4 Kung tinu pa asan ay pagturuldukun ta balaw̓ag tung kamatuuran,
indi kang lag̓ing pagpauyun tung ipinagtulduk ni Ginuu tang Jesu-Cristong yay pulidung pisan.
Pati yang nag̓itulduk ta ang asan da ngaëyangay yang mga putul ta ta ipag̓usuy nirang ustu tung kalëlyag̓an yang Dios,
indi ka nira risibiën.
Yang taung maning tia,
yang kulu na masyadu ra yang pagdakul na.
Kanisip na tanya mataku,
piru anda ëngëd ay naërëm na tung kamatuuran.
Masyadug kaginamënën tung pakigsug̓a nang pagpakigdiskusiun natëtëngëd tung duma-rumang bitala kung unu pay nag̓adapatan nira.
Anday dumang dangatën na,
tanya pati yang pamati tung anya,
asan da mamagluang marainggit,
mapinagsuay,
mapinagduminar,
ig masyadung mag̓ërëna-ënaën ta malain tung masigkatau nira.
5 Anday katapusan yang pagpakigkuntra nira.
Ay ya pa ag̓ari,
nagkadiw̓ul da yang kinaisipan nira ig nawaraan da ka ta ipag̓intindi nirang ustu tung kamatuuran.
Yang pagturuldukun nira ya ra ka ilëm ay paniëlan nirang pagpasëën ang tanira pag̓usuy tung kalëlyag̓an yang Dios buat.
Kalaum nira ang yay sasa kang mabintaan nirang mangita.
6 Matuud ka man ang durug kabintaa ang ita mag̓usuy tung kalëlyag̓an yang Dios basta kuntintu tung isip ta yang kumpurming nag̓ipakdul na tung yatën.
7 Tutal atiing pag̓ingtau ta taa tung kaliw̓utan ang naa,
andang pisan ay ëkël ta ig kung manliitita ra nganing,
anda ka.
8 Mintras taawita pa,
basta may mapangan ta,
may pag̓aw̓ël ta,
may matiniran ta,
asanita ra ilëm nga kuntintu.
9 Yang mga taung mga maning tiang durung kalëlyag nirang magmanggad,
indi maimung indi matuksung magbuat ta kasalanan.
Anday dumang pakaw̓utun na,
katulad tung sasang ayëp ang nasiëd dang indi ra mapuklut,
indi ra ka mapuklut tung pagburuatën nira ta kasalanan.
Ay dërëëg̓ën da ta sari-saring kalëlyag̓an nira tung mga bag̓ay ang anday kuinta ig ikarangga ka ilëm nira ang asan da ka nga gakday nira ta pinitinsia.
10 Talagang matuud tia ay kipurki naang kaamluk tung kuarta,
yay pinangapunglan ta sari-saring mga malalain ang pagburuatën ta mga tau.
Yang dumang mga tumatalig,
kumus indi ra tëmëgka ang indi nira ra maëklan yang nag̓atingwa nira,
duun da natalang tung kamatuuran ang asta indi ra pag̓usuy.
Purisu bëlag̓an da ilëm gësyë yang kunsimisiun ang nag̓agmaan nira.
Yang Pagpaktël Na Tung Isip Ni Timoteo Ang Magtuman Yang Tanan Ang Nag̓iurdin Na (6:11-17)
11 Piru ta yawang panirbian da tung Dios,
ya rag lilingay mu yang pag̓amluk ta kuarta may yang tanan ang pag̓urubraën ta mga malalain ang asan maniël.
Kung indi,
yang sikarën mung padërëpan ang yawa pirming magbuat yang magkatama,
pirmi kang bilug yang isip mu tung nag̓auyunan yang Dios,
ig pirmi kang mabakëd yang pagtaralig̓ën mu tung anya.
Asta yang mga kaarumanan mu,
gëgmaan mu ka ta ustu ang durua kag kaamumu tung nira.
Patëntënën mu ka yang isip mung mag̓agwanta tung mga kaliwag̓an ang mapasaran mu.
12 Maskin maliwag ka man yang magpasaran mu,
bëlag yawag pagpaluw̓ay,
yawag pagprusigir ka ëngëd ang pagkërëng ta ustu tung kamatuuran ang naang nag̓apanangëd ta.
Magpaitaa ang ta yawa may pagpangabui mu rang baklung klasi ang uyun tung kalëlyag̓an yang Dios ang ya ra kay pagnatisan mung asta tung sampa.
Ya ra kang lag̓i ay katuyuan nang nagbëtëng tung isip mu atiing primirung pagtalig mu.
Ang pagkatapus yang pagtalig mung atii tung ni Jesu-Cristo,
ya ra kay pinapruibaan mu tung katalungaan yang dakëlëng mga taung nangasistigus atiing pag̓ubligar mung tëdëk ang pisan tung isip mu ang anda ray dumang may kalalangan tung nuyu,
ultimu ra ilëm ti Ginuung Jesu-Cristo.
13 Numaan,
Timoteo,
nag̓aingalukana ra yëën ang magpangakua ra tung katalungaan mismu yang Dios ang yay pagpakdul yang kabui mu,
durua ni Jesu-Cristo ang atiing pagpabista na tung ni Gubirnadur Poncio Pilato,
indi nagpatalaw ang nagpaingmatuud tung anya natëtëngëd tung pagkabëtang na,
maskin ya ray puiding magakdan na ta malainb.
14 Yang pangakuan mu tung anya ang yawa magtumana ra ta pulidu yang tanan ang atiang nag̓iurdinu ang napabtang tung sulat ang atia ang andang pisan ay mabangdan tung nuyu ang asta ra ilëm kaw̓utun da yang uras ang magpaita ra ka ëngëd ti Ginuu tang Jesu-Cristo.
15-16 Anday dumang magpabistu tung anya tung uras ang may tipu na kang lag̓i,
kung indi,
ya ra yang Ampuan tang Dios.
Yay may kasadyaan na kang lag̓ing andang pisan ay pagkakulang na,
Ultimu ilëm tanyay makagag̓aëm tung tanan,
Yay may kagaëman tung tanan ang paggaëm,
Yay may kalalangan tung tanan ang pagkalalangan,
Ultimu ilëm tanya ang indig suituën ta kamatayën,
Yang pag̓atiniran na durung pisan agkasusulaw ang inding pisan malëngtan ta tauc,
Andang pisan ay taung naita tung pirsunal na,
Anda kay taung masarang ang mag̓agwantang magtëlëng tung anyad,
Purisu magkabag̓ay ang pisan tung pagkadios na ang yay dayawën tang asta tung sampa,
Bag̓ay kang pisan tung anyang maggaraëmën ang anda ëngëd ang pisan ay katapus-tapusan na.
Magkamaningan da ka man tia!
Yang Dapat Ang Ipagpadapat Ni Timoteo Tung Mga Tumatalig Ang Mga Manggaranën (6:17-19)
17 Kung natëtëngëd tung mga tumatalig ang mga manggaranën asan,
paamanën mu ang indi ëngëd magralamkuën tung mga kaarumanan nira.
Indi ka ëngëd panalig̓an nira yang manggad nirang kalpës da ka ilëm ang maplëke,
kung indi,
dapat ang anday dumang pag̓inëtëg̓an ëngëd yang mga isip nira,
ultimu ra ilëm yang Dios ang yay durug kasalama.
Kumpurming unu pay nag̓abtang tung pudir ta,
ya ray ipinakdul na tung yatën ug̓ud asanita ra ka nga sadyaay.
18 Panganingën mu ka ang yang padërëpan nira,
ya ra yang mga ubra-ubrang ikaayën ta duma may ruma.
Bilang mag̓ing manggaranën da tung mga pag̓urubraën ang matitinlu ang tanira durug kasalamang mamarti-parti tung mga kaarumanan nirang may mga kaministiran.
19 Kipurki yang kaalimbawaan yang mga pag̓urubraën nirang mga maning tia,
ya ra yang ultimung manggad ang maning pa tung nag̓iluug nira ang ya ray mabakëd ang paniëlan nira tung uras ang panalungaan ug̓ud asan da nga bag̓asay nirang mas pa yang ultimung klasi ta pagpangabui ang uyun ang pisan tung pinalanu yang Diosf.
Yang Ultimung Nag̓ipatuman Ni Pablo Tung Ni Timoteo Ang Ya Ëngëd Ay Pinakaisi Yang Intirung Isinulat Na (6:20-21a)
20 Buinu Timoteo,
kumus pinagpiarana ra ka man yang Dios ang magparakaw̓utun yang kamatuuran natëtëngëd tung ni Jesu-Cristo,
amlig̓an mung pirmi ang saktung pisan tung pinag̓aralan mung atiing primiru ang para indi ëngëd malaktan ta dumang nag̓itulduk.
Likayan mu ëngëd yang nag̓itulduk yang duma ang yang kamtangan na pangkaliw̓utan ka ilëm ang anda ëngëd ay kakuinta-kuinta na.
Ya ray nag̓agamit yang dumang pagpakigkuntra tung kamatuuran ang duun ag̓ipatiëlay nira tung pagkamatakung naëklan nira tung sikritu ang indi unu nag̓askëan ta kadaklan.
21 Ay kipurki may duma nganing ang pagpailala ra ang yang pagkamatakung atia ya ray nag̓usuyun nira ang pagkatapus duun da natalang tung ultimung kamatuuran ang pinanangëd da rin nira.
Yang Pagtapusan Yang Sulat (6:21b)
Kapurisu,
Timoteo,
yang nag̓ipag̓ampuu para tung numyung tanan ang mga tumatalig asan ang mas pang maispirinsiaan mi yang kanëëman yang Dios ang pagpadag̓ën-dag̓ën tung numyu.
Ya ra ilëm tia ay masulatu tung nuyu,
Pablo