Yang Yadwang Isinulat Ni Pablo Tung Ni TIMOTEO
Yang Intrada Yang Sulat (1:1-2)
1
Yang may sulat tia,
yuung ti Pablong nag̓ing sasang apustul ang pangërëngan tung ni Jesu-Cristo natëtëngëd tung kalalangan yang Dios.
Tinuw̓ulaw nganing anyang magparakaw̓utun tung mga tau natëtëngëd tung pagkataung baklu ang pinangakuan na ang ya ray ipaëyang na tung kumpurming tinu pay magtalig yang sadili na tung ni Jesu-Cristong magpatapnay.
2 Timoteo,
sinulatana ra yëën ay agkaw̓ig̓ëna yëën ang sasang anaung nag̓agëgmaanu ta duru gatëd atiing primiru,
pinainunukuana ra yëën kung ya pa ag̓ari yang pagtalig mu yang sadili mu tung ni Ginuu taa.
Yang nag̓ipag̓ampuu para tung nuyu ang mas pang maispirinsiaan mu yang kanëëman may yang kaildaw may yang kalimëngan ang pag̓ipakdul yang Ama tang Dios durua ni Ginuu tang Jesu-Cristo.
Nag̓apasalamatan Na Tung Dios Yang Pagtaralig̓ën Ni Timoteo (1:3-5)
3 Pagpasalamataw tung Dios ang yay nag̓atuuanu ang pariu ka tung mga kinaampuu ig limpiung pisan yang painu-inuung pagtuu tung anyang anday basulun na tung yëën.
Tung pagpasalamatu tung anya,
nag̓adëmdëmana yëën ang nag̓ipag̓ampung pirmi,
law̓iig kaldaw.
4 Ay pagyëngët-yëngëtan da ngani ta duru yang isipung mag̓ita-ita si kang uman ug̓ud magkasadya si ka yang isipu.
Ay kipurki atiing pagbëlag ta,
nag̓adëmdëmanu ang minëla-w̓ëlaan da ta luuk yang mga mata mu.
5 Yang nag̓adëmdëmanu ëngëd ya ra yang pagtaralig̓ën mu tung ni Ginuung Jesus ang tëdëk ang pisan tung pupusukun mu ang yay tukaw rang nabalay tung isip ni bai mung ti Luisa,
durua ni nanay mung ti Euniceb ig nag̓asiguruu ang maning ka tia yang pagtaralig̓ën mu.
Nag̓apadëmdëm Na Ti Timoteo Ang Padërëpan Nang Pirmi Yang Abilidad Ang Ipinakdul Yang Dios Tung Anya (1:6-7)
6 Ya ra kay nag̓atëngëran na ang maktël yang isipung magpadëmdëm da tung nuyu ang kung tung apuy pa,
kayaw̓an mung pirmi yang abilidad ang atiing ipinakdul yang Dios tung nuyu ëkël tung pagdëënu tung nuyu atiing pagpiliku tung nuyu tung publiku ang yaway ëklanung papgësën ta katëngdanan muc.
7 Yay pirming padërëpan mu ay kipurki pinatiniranita ra man nganing yang Dios tung Espiritu Santo bëlag̓an ang mag̓aning ang para ita patalaway na,
kung indi,
ang para ita paktëlay nang magtuman yang nag̓ipaubra na tung yatën kag yadwa pa ang para ita paëyangay na ta ipaggëgma tang ustu tung mga masigkatau ta kag yaklu pa ang para ita taw̓angay nang magsuspindi tung sadili ta.
Nag̓apaktël Na Yang Isip Ni Timoteo Ang Indi Ëngëd Ikaëyak Na Yang Matinlung Balita Pati Tanya Mismung Nag̓akalabus (1:8-12)
8 Kapurisu,
Timoteo,
india mag̓ëkël ta kaëyak mung magparakaw̓utun yang bitala ni Ginuu ta.
Pati yuu tani ang nag̓akalabus natëtëngëd tung pangërënganu tung anya,
indiaw ka ikaëyak mu,
kung indi,
bilug̓un mu yang isip mung magpakigsasa tung yëën ang magpapinitinsia arangan da ilëm tung Matinlung Balitang naang nag̓ipagpakaw̓ut ta ang yang Dios mismu yay magpaktël tung nuyung mag̓agwanta.
9 Kipurki yay nagtapnay tung yatën ig nag̓imbitar ang para mag̓ing mga tauanita ra anyang limpiu yang pagpangabui ta.
Yang pagtapnay na tung yatën,
bëlag̓an natëtëngëd tung mga buat-buat tang matitinlu,
kung indi,
sigun ilëm tung sadiling planu na ig tung kanëëman na.
Disti pa atiing anda pay naimu,
yay nag̓aplanu na kang lag̓ing buatën ëkël tung pagtalus ni Jesu-Cristo.
10 Ang pagkatapus,
simanyan ang mga uras ang naa,
yang kanëëman nang atia,
ipinagpabunayag na ra ëkël tung pag̓ingtau ni Jesu-Cristo ang ya ray nagyaring Mananapnay tung yatën.
Bilang dinëëg na yang pudir yang kamatayën ig ëkël tung Matinlung Balitang nag̓ipagngël tung mga tau,
ipinasanag na kung ya pa ag̓aring maëyangan yang mga tau ta ipagpangabui nirang baklu simanyan ang yang pakaw̓utun na,
mag̓ing banal da.
11 Yuu mismu ay tinulduk na ang yang balitang atia ya ray ipagpakaw̓utu tung mga tau,
bilang pinilikaw anyang mag̓ing sasang apustul nang mangërëngan tung anya ig sasa kang manigtulduk natëtëngëd tung kamatuuran ang atia.
12 Ya ra man nganing ay nag̓atëngëran na ang nag̓apasaranaw ra ta mga pinitinsiang mga maning taa.
Piru indi ra ka ëngëd nag̓ikaëyaku.
Kipurki sunaduu rang pisan yang pinagtalig̓anu.
Kapurisu,
dakulu yang kumpiansaw tung anya ang kayanan nang amlig̓an yang Matinlung Balitang naang itinalig na tung yëënd ang asta kaw̓utun da ilëm yang uras ang ipaglëkat na.
Nag̓apaprusigir Nang Mag̓usuy Tung Platapurmang Durug Kapulidu Ang Itinulduk Na Tung Anya (1:13-14)
13 Yang ipinagtulduku tung nuyu atiing primiru kaministiran ang yay buatën mung pitik ang pausuyan mu.
Amlig̓an mu ta mupia yang kamatuuran ang atiang durug kapulidu.
Yang pag̓amlig mu,
ëklan mu tung pagtaralig̓ën mung mabakëd tung ni Jesu-Cristo may tung paggëgma mu tung anyang bug̓us.
14 Yang Matinlung Balitang atiang ipinagpiar yang Dios tung nuyu,
amlig̓an mung amlig̓an ta mupia ëkël tung taw̓ang yang Espiritu Santong pagpakëën tung yatën ug̓ud indi malaktan ta bëlag̓an tamang nag̓itulduk.
Nag̓asambit Na Yang Taw̓ang Ni Onesiforo Tung Anya (1:15-18)
15 Nag̓askëanu ra ang ibinalita ra tung nuyu ang durung mga putul tang tag̓a asan tung sinakëpan yang Asia ang namanalyud da ilëm tung yëën ang namag̓ingwara.
Pati pala ti Figelo,
durua ni Hermogenes,
ya ka.
16-17 Maayën ilëm ti ungkuy Onesiforo.
Gustuu ang yang pamilya nang nabutwan asan tung Efeso pakaayënën da ta mupia ni Ginuu ta.
Kipurki muya-muyang paktëlën na yang isipu.
Maskin yuug këkëdkëd ka man tung kadina,
indiaw ka ëngëd ikinaëyak na,
kung indi,
pagkaw̓ut na tani tung Roma,
atiang lag̓i pinadërëpanaw ra anyang pinagsagyap ang asta naitaw ra ka ëngëd anya.
18 Natëtëngëd tung binuat nang atia tung yëën,
gustuu ang tanya balësan da ta mupia ni Ginuu ta tung uras ang ipanginsapu na tung yatën ang mga tauan nae.
Asta yang tanan ang pagparadag̓ën-dag̓ënën ni ungkuy tung yëën atiing asanaw pa tung Efeso,
baskin yawa,
nabilug̓an mu ra ka.