Kaministiran Ang Iintriga Ni Timoteo Tung Duma Yang Ipinagtulduk Ni Pablo Tung Anya (2:1-2)
2
Kapurisu,
Timoteo,
ta yawang maning pa tung anaw,
kumus pagkinapulitayamu ra ni Jesu-Cristo,
ya ray pirming talig̓an mung magpaktël tung nuyu ang para makayanan mung tumanën yang ipinagpiar na tung nuyu.
2 Yadwa pa,
yang kumpurming ipinagtulduku tung nuyu ang ya ra kay kindëngan yang dakëlëng mga tau ya si ay itulduk mung ipiar tung mga aruman mung pag̓atëlëngan mung talagang matalig̓an mu ig nag̓akdëkan mu ra kang lag̓i ang maskë kang magtulduk tung duma ang ya si kay piaran nira.
Nag̓apaktël Na Yang Isip Ni Timoteong Mag̓agwanta Tung Mga Pinitinsia (2:3-13)
3 Magpakigsasaa ra ëngëd tung yëën ang mag̓agwanta tung mga pinitinsiang nag̓agakdan ta arangan da ilëm tung ni Jesu-Cristong pag̓akëgngan taa.
Pakbunga tung sasang maayën ang sundalu ang pag̓aragwantaën kang lag̓i tung mga pinitinsia.
4 Anda ngani ay sundalung paglaban ang magpakilakët pa tung mga pag̓urubraën ang anday kalalabtën na tung pagralabanën na.
Ay yang gustu na ang tanya mauyunan ëngëd ta mupia yang kapitan na ang ya ka man ay nagsakada tung anyang magsundalub.
5 Pariu ka tung sasang manigkayam.
Kung indi na disiplinaën yang sadili nang mag̓usuy tung tanan ang mga riglamintu yang kayam,
indi ra ka ëngëd padëngëg̓an ang pakdulan ta primyuc.
6 Yang sasang manigluak ang pagpakabëdlay tung pagruluakën na,
magkabag̓ay kang tukaw ang magpakinaw̓ang tung pinakabëdlayan nad.
7 Atia,
Timoteo,
kung panëëm-nëëman mu ta maayën yang ipinananglitung atiang tulu,
paëyangana ra ni Ginuu ta ta ipag̓intindi mu tung linëgdangan na ang para maskëan mu kung unu pay dapat ang buatën mu.
8 Ang para këmtël yang isip mung mag̓agwanta tung mga pinitinsia,
pirming padëmdëman mu yang napanawan ni Jesu-Cristo ang maskin napasar tung kamatayën,
piru binwi si kang uman yang Dios ang pinaliit tung mga minatay.
Padëmdëman mu ka ang tanya ka man yang kanubli ni Adi David ang pinilik yang Dios ang maggaraëmën tung bilug ang kaliw̓utan.
Ya ray kamtangan yang Matinlung Balitang naang nag̓ipagpakaw̓utu tung mga tau.
9 Mag̓agwantaa ay kipurki,
maskin pagpapinitinsiaw natëtëngëd tung pagpakigkuntra yang duma tung Matinlung Balitang naang nag̓ipagpakaw̓utu ang asta yuu ra pakulungay nira ang kuari sasang lain ang tau,
nag̓askëanu ang bëlag̓an kulung yang bitala yang Dios,
kung indi,
nag̓ipagpakaw̓ut pa ka ëngëd ta duma.
10 Kapurisu ya ray nag̓ipag̓agwantaw tung tanan ang mga kaliwag̓anung naa arangan da ilëm tung mga taung pinagpilik da kang lag̓i yang Dios,
ug̓ud pati tanira,
matultul da ka ëngëd tung kalibrian ang ipinagtukud ni Jesu-Cristo ig mapagpasapën da ka tung anyang asta tung sampa duun tung pag̓atiniran nang durung pisan agkasusulaw.
11-13 Purisu mag̓agwantaita ka ëngëd kipurki padëmdëman ta ra kanay yang sasang pirming nag̓ipagkësën-kësën tang mga tumatalig ang talagang matuud ka man ang maning taa yang palaksu na:
“Kumus damayita ra tung ni Jesu-Cristong napataye,
Damayita ra ka tung anyang magbungkarasf.
Kumus pag̓agwantaita tung kumpurming nag̓apasaran tang mga kaliwag̓an,
Magkasira-siraanita ra ka tung anyang maggaraëmëng.
Piru kung alimbawa,
mag̓ingwaraita tung anyah,
Tanya si kay mag̓ingwara tung yatëni.
Kung magluaita rang indiita ra matalig̓an na,
Tanya matalig̓an tang magtuman da ka ëngëd yang nag̓atalig̓an ta tung anya.
Kipurki indi ka ëngëd maimung maisulan na yang pinangakuan na tung yatën.”
Nag̓apaprusigir Nang Magpakbung Tung Sasang Manig̓ubrang Anday Maëyakan Na Tung Nag̓aubra Na (2:14-26)
14 Yang mga bag̓ay ang atia,
ipadëmdëm mung ipadëmdëm tung mga aruman mung atiang nag̓apangugyatan muj.
Paamanën mu ra ka dayun tung katalungaan yang Dios mismu ang indi ra ëngëd magtag̓am ta pakigdiskusiun ang pakinitan natëtëngëd tung rilyun.
Kipurki andang pisan ay pakaw̓utun nang matinlu,
kung indi,
asan da nga talang tung kamatuuran yang pamamati.
15 Ta yawa,
Timoteo,
magpadërëpa ang yawa sasang taung magluang aprubadu ra yang Dios ang talagang matalig̓an na.
Magpakbunga ra tung sasang manig̓ubra ang anday dapat ang maëyakan na tung ubra na.
Bilang puliduën mung puliduën yang pagwaraswasën mu yang kamatuuran ang para pirming usuy tung pitik.
16 Likayan mung likayan yang mga diskusiun ang atiang buat na pa natëtëngëd tung Dios ang anday katumuyan na.
Ay kipurki kung tinu pay magpaintra asan,
mas pa ka ëngëd ang maplëkan ta ipanggalang na tung Dios may tung kalëlyag̓an na.
17 Kag yadwa pa,
yang nag̓itulduk yang duma tung mga tau,
may apiktar na tung pamamati ay maning pa tung bakukang ang sigi ra ilëm yang pagkabkab na.
Katulad da asan tung nag̓itulduk ni Himeneok durua ni Fileto.
18 Kumus tinalyuran da nira yang kamatuuran ang ipinagpabunayag yang Dios,
nangatalang da.
Ay yang nag̓itulduk nira tung mga tumatalig ang yang pagpabui sing uman yang Dios tung mga patay,
nainabu ral.
Purisu yang luluaan na,
asan da nga paguluay nira yang isip yang dumang mga tumatalig kung ay ray tamang nag̓itulduk ang panangdën nira.
19 Piru maskin pang may mga taung mga maning tiang pagturuldukun ta bukli,
yang kamatuuran ang naang nag̓usuyun ta,
indi ra ka ëngëd mag̓uman kipurki maning pa tung sasang mabakëd ang pundasyun ang paniëlan ta balay ang dakulu ang indi ra ëngëd matandëg-tandëg.
Katulad tung sasang pundasyun ang may mga bitalang iginurit,
yang maning pa tung pundasyun ang naa ya ka ang maning taa yang kamtangan na:
“Nag̓ailalang nag̓ailala ni Ginuu kung tinu pay talagang anyang matuudm.”
May sam bilug pang maning taa yang nag̓ianing na:
“Kung tinu pay pagpailala ang tanya pagpalalang da tung ni Ginuung Jesus,
dapat ang butwanan na yang mga pag̓urubraën nang malalainn.”
20 Nag̓askëan ta ang tung balay ang dakulu ang pag̓istaran ta sasang manggaranën,
sari-saring garamitën.
Bëlag̓an ilëm ang may mga garamitën ang bulawan may landuk ang salapi,
kung indi,
may mga garamitën ka asan ang ayu yang pinamuat,
may asan kang tanëk ang kaluntani yang pinamuat.
Yang mga garamitën ang atiang mamaalën,
pag̓agamit tung may dakulung bag̓ay.
Yang mga panigunda,
pag̓agamit tung pastikular ka ilëm.
21 Yang lagpakan na tung yatën ang pagpaturuw̓ulun tung ni Ginuu ta,
kung tinu pay mamlëk tung mga ubra-ubra nang mga malalain,
mambung da tung sasang garamitën ang ya ag̓itig̓anaay yang may balay ang para magamit na tung may mga dakulung kantidad na.
Ay simpan dang gamitën na tung maskin unu pang ubraay ang matinlu.
22 Kung gustu mung magkamaningana ra ta maning tia,
tay puis,
kung unu pay mga kalëlyag̓an yang mga masigkasultirus mung yay kadagmitan ang gustu nirang papsawan,
ya rag panlaksuay mung likayayo.
Yang sikarën mu ang yawa pirming magbuat yang magkatama tung pagtërëlëngën yang Dios.
Magpaitaa ka ang yawa sasang matalig̓anp ig maginëgmaëna tung mga masigkatau mu,
ig durung kalëlyag mu ang yamung magpurutul asan pirmiamung mag̓uruyunan ta matinlu.
Ya ray sikarën mu yang tanan ang atia,
kasiraanamu ra ka yang kumpurming pag̓ambay tung ni Ginuu ta ang yang lusu tung isip nira ang tanira pirming magtuman yang nag̓auyunan na.
23 Piru likayan mung likayan yang mga diskusiun ang anday kapulutan na ay nag̓askëan mu ra ka ang ya ray makaling makanayan ta suruayën.
24 Ay ta yatën ang pagpaturuw̓ulun tung ni Ginuung Jesus,
dapat ang indiita ëngëd magpakigsuay tung mga tau,
kung indi,
dapat magpakaamumuita maskin tung ninu pa,
maskëita kang mamadbad ta isip tung luay-luay ilëm ang pamëtang-bëtang ig mapinaurayënita ka ta kinaisipan.
25 Bilang kung balaw̓ag̓anita ra nganing ta mga taung pagpakigkuntra tung kamatuuran ang nag̓itulduk ta,
kaministiran paamumuan ta ta matinlu ig tag̓aman tang sugpatan ta luay-luay.
Basi pa ra ilëm ang may uras ang kaw̓utun ang tanira paëyangan da yang Dios ta ipagsug̓at nira tung pagkuruntraën nirang atia ang asan da ka dayun magpauyun tung kamatuuran.
26 Balang da ilëm asan da ka nga manmanay ang magpapuklut da tung maning pa tung laang ang itinakën ni Satanas ang ya ray nagdëëp tung nira ang para magtuman da yang kalëlyag̓an na.