Nag̓apabantay Na Ti Timoteo Natëtëngëd Tung Sistima Yang Mga Tau Tung Uri Ang Durug Kalain (3:1-9)
3
Timoteo,
naaw̓a may sasang bag̓ay ang yay dapat ang intindiën mu ta maayën.
Baklu maglëkat ti Ginuung Jesus,
may uras ang kaw̓utun ang durug liwag.
2 Yang ipagliwag na,
magkamaningan da ta maning taa yang sistima yang kadaklan ang mga tau.
Asan da ta mapinagpanadili,
asan da ka ta durug kainamlukun tung kuarta,
asan da ka ta durug kapinabug̓alën ang yang mga kulu nira pagdakul dang subra,
asan da ka ta durug kapinalandawën tung mga aruman nira,
asan da ka ta mapinagduminar,
asan da ka ta mabinatukun tung mga ginikanan nira,
asan da ka ta anday utang nirang kanëëman maskin tung Dios,
maskin tung mga masigkatau nira man ngani,
asan da ka ta naplëkan da ta panggalang nira tung Dios ang anda ra kay pag̓ëlëd tung anya.
3 Asan da ka ta mga taung maskin pang sadiling pamilya nira,
indi ra ëngëd ëyangan ta gëgma na tung nira,
asan da ka ta mga taung rangga yang mga isip nirang indi ra ëngëd mabulungan,
asan da ka ta mapinagrangga ta dëngëg,
asan da ka ta mga taung indi ëngëd mag̓ëgtëm tung mga sadili nira,
asan da ka ta mga taung andang pisan ay pasunaid nira tung mga taung nag̓apapinitinsiaan nira,
asan da ka ta mga taung maskin may matinlung buat-buat,
aglalawayan da ka ëngëd nira.
4 Asan da ka ta may pagkatraidur na tung mga aruman na,
asan da ka ta mapinalangaasën ang indi ëngëd masagangan ang magpasubu tung anday kalalabtën na,
asan da ka ta may kulu nirang duminakul da ta subra ang kanisip nira sag̓ad da tung tanan ang bag̓ay,
asan da ka ta mga tau ang yang nag̓apagamënan ta mga isip nira bëlag̓an da yang Dios,
kung indi,
ya ra ilëm yang sadiling kalëlyag̓an nirang papsawan.
5 Yang mga taung maning tia,
pamagpaita-ita ra ilëm ang tanira pamagtuu ka tung Dios,
piru bistu tung mga ubra-ubra nira ang indi ra ka ëngëd pagpagaëm tung anya ang para paktëlën na ra rin ang magtuman yang kalëlyag̓an na.
Purisu kung mapanawan mu yang mga taung mga maning tia,
indi mu ëngëd pakigsasaan.
6 Nag̓apabantaya rang lag̓i yëën ay kipurki maskin numaan may mga manigtulduk ang pamagbuat da ta magkapariu ka tung mga maning ka tiang pag̓urubraën.
Kipurki durug kaansianung mag̓armunia tung may mga balay ang basta maklëd ilëm ang para mag̓aral da unu natëtëngëd tung bitala yang Dios buat.
Yang katuyuan ëngëd nira,
ya ra yang mga baw̓ay ang ërëkël-ëkëlan ta kulu ang basi pa ra ilëm madayaan da nirang papanangërën tung kumpurming nag̓itulduk nira.
Malpës da ilëm ang makumbinsir nira,
ay tëlëb dang lag̓i ta kasalanan yang mga baw̓ay ang atia ig dërëëg̓ën yang mga kalëlyag̓an nirang sari-sari ra ilëm.
7 Maskin pirmi ra ilëm ang pamagpatulduk yang mga baw̓ay ang mga maning tia,
piru indi ra ka ëngëd maimung mabilug̓an nira yang kamatuuran.
8 Katulad ka tung ni Janes durua ni Jambres atiing tukaw ang namagpakigkuntra tung ni Moisësa,
yang mga manigtulduk ang atiang nag̓ipabantayu tung nuyu pamagpakigkuntra ka tung kamatuuran ang naang nag̓ipagpakaw̓ut ta.
Ay ya pa ag̓ari,
maning pa tung nalubuk da yang mga isip nirang naplëkan da ta pag̓intindi nirang matandës.
Tinalyuran da ngani yang Dios ang bëlag dang bag̓ay ang piaran na pang magturuldukun tung duma ay natëtëngëd yang kamatuuran ang liit tung anya tinalyuran da nira.
9 Piru maskin pamagpakigkuntra ka man tung kamatuuran,
indi ëngëd mag̓umintung masyadu yang pag̓urubraën nirang atiang malalain.
Kipurki maintindian da ka ëngëd ta kadaklan ang yang mga taung atia nakabusan da ang katulad ka tung na Janes ni Jambres.
Nag̓apaprusigir Nang Magpadayun Yang Pagparanangërën Na Tung Kamatuuran Ang Pinag̓aralan Na Ang Ya Ra Kay Pinag̓inëtëg̓an Yang Isip Na (3:10-17)
10 Piru ta nuyu,
Timoteo,
natëtëngëd tung pagpakignunut mu tung yëën,
nabilug̓an mu ra kung unu pay ipinagtulduku,
kung unu pang klasiay yang mga ug̓aliu,
kung unu pay sinikaru,
kung ya pa ag̓ari yang pagtaralig̓ënu tung Dios,
kung ya pa ag̓ari yang pagparaurayënu tung mga tau,
kung ya pa ag̓ari yang paggërëgmaënu tung nira,
ig kung ya pa ag̓ari yang pag̓aragwantaënu tung mga pinitinsiang ipinamakdul-pakdul nira tung yëën.
11 Pariu ra atiing dinëëg-dëëg̓anaw ra ta mga tau duun tung Antioquia,
magdasun duun tung Iconio,
magdasun pa duun tung Listra,
ang duru ka man agkalëlbat yang inag̓umanu.
Piru kada dinëëg-dëëg̓anaw,
ipinalibriaw ra ka ëngëd ni Ginuu tab.
12 Maski nganing tinu pa,
kumpurming tinu pay malëlyag ang mag̓urusuyun tung nag̓auyunan yang Dios natëtëngëd tung pagpakigkapulit na tung ni Jesu-Cristo,
ya ka,
talagang mapasaran ka ta padëëg-dëëgc.
13 Kung natëtëngëd tung mga malalain ang mga taung mga maning tia may yang mga manigtulduk ang mga mandarayang atiang nag̓asambitu,
madulangan dang madulangan yang pagkamalain yang pagkatau nira.
Bilang dayun-dayun da ilëm yang pagdarayaën nira tung mga tau ig dayun-dayun da ka ilëm yang pagpadaya yang kumpurming pag̓intindi tung nag̓itulduk nira.
14 Piru maskin maning tiay mainabu,
ta nuyu,
Timoteo,
idayun mu yang pagparanangërën mu tung kamatuuran ang pinag̓aralan mu ang ya ra ka dayun ay pinag̓inëtëg̓an yang isip mu ang talagang yay matuud.
Kipurki yaming nagturuldukun tung nuyu,
sunadu mung pisan ang talagang matalig̓anami nuyung magtulduk yang pulus matuud.
15 Kag yadwa pa,
nag̓adëmdëman mu pa ka siguru ang disti pa atiing paran-parana pa,
nag̓aintindian mu ra yang bitala yang Dios ang ipinagpasulat nang tukawd,
ang duun da ka nga tultulay mu kung ya pa ag̓aring magkatinira ra yang kalibrian mu ëkël tung pagtalig mu yang sadili mu tung ni Jesu-Cristong nagpatapnaye.
16 Yang tanan ang atiing ipinagpasulat yang Dios,
ya ipaëyangay na tung isip yang kumpurming pinanuw̓ul nang magsulat.
Purisu durug tinlung gamitën ang para asan da nga mamarësmësay ta kung unu pay tamang nag̓itulduk,
ig asan da ka nga maladmaray ta yang mga kamali ta,
ig asanita ra ka nga tadlëngay yang Dios,
ig asanita ra ka ngaugyatay na kung ya pa ag̓ari ita magbuat yang magkatama tung pagtërëlëngën na.
17 Yang katuyuan na tia ay ug̓ud yang sasang pagpaturuw̓ulun tung Diosf asan da magluang simpan dang pisan ang manirbian tung anya natëtëngëd biasa rang magtuman da yang maskin unu pang mga ubra-ubraay ang matitinlu.