Agtuw̓ulun Na Ti Timoteong Magprusigir Ëngëd Tung Pagparakaw̓utun Na Yang Kamatuuran (4:1-8)
4
Timoteo,
naaw̓a ëngëd yang nag̓ituw̓ulu tung nuyu tung katalungaan yang Dios mismu durua ni Jesu-Cristo ang ya ra ka man ay magpatuw̓al tung tanan ang mga taung kaw̓utan nang bui pa maskin patay ra man.
Ya ray mainabu tung uras ang ipagpabistu na ra tung sadili nang magpalua yang paggaraëmën na tung bilug ang kaliw̓utan.
Purisu kung paw̓aya-w̓ayaan mu yang nag̓ituw̓ulung naa tung nuyu,
paamanëna rang lag̓i yëën,
talagang siguradung patuw̓alëna ra anya.
2 Ya taa yang nag̓ituw̓ulu tung nuyu.
Prusigiran mu ëngëd yang pagparakaw̓utun mu tung mga tau yang kamatuuran,
maskin malëlyag ang mamati kag indi,
ta yawa,
mag̓alistua ra ka ëngëd ang magpagngël tung nira.
Kung may nag̓atalang da tung kamatuuran u kung may pagbuat ta malain,
tag̓aman mung painunukuan ang binsirën yang isip na ang basi pa ra ilëm mamanmanan dang indi ra magdayun.
Paktëlën mu ra ka dayun yang isip nang magbuat yang magkabag̓ay ang dapat ang buatën na.
Ug̓aring tung pagturumanën mu tung nag̓ituw̓ulung atia tung nuyu,
ëklan mu tung mga matinlung pasais ang ta yawa duruag kapinaurayën ang mapinarurusun ig pirming tama yang nag̓itulduk mu.
3 Ya ray dapat ang prusigiran mu ay kipurki may uras ang kaw̓utun ang yang nag̓itulduk tang naang tama,
indi ra mauyunan ta mga tau,
kung indi,
mamandawal da ilëm ta mga manigtulduk ang magpagngël tung nira yang kumpurming unu pay uyun tung isip nirang magngël.
Yang nag̓ipagsagyap nira tung mga taung atia,
ay yang gustu nira mamagpapsaw ra ilëm tung sadiling kalëlyag̓an nira.
4 Bilang yang kamatuuran ya ray panalyuran nira,
pagkatapus yang mga pasamintu ta mga masigkatau ka ilëm nira ya pay pagamënan ta mga isip nirang asta mangatalang da.
5 Piru ta yawa,
Timoteo,
pirmia rang magsuspindi yang sadili mu ig patëntënën mu ka yang isip mung mag̓agwanta tung mga kaliwag̓an ang magpasar tung nuyu.
Prusigiran mu yang pagparakaw̓utun mu tung mga taung indi pa nag̓atultul tung Matinlung Balitang naa natëtëngëd tung kalibrian ang ipinagtukud ni Jesu-Cristo.
Yang gustuung ianing,
talusun mu ëngëd yang tanan ang ipinagpiar na tung nuyung ubraën.
6 Timoteo agtuw̓uluna ra nganing yëën ta maning tia ay ta yëën tanya,
yang kaalimbawaan yang kabuiung naa,
maning pa tung irinëmën ang ya ra ag̓ibukbukay tung sasang nag̓idasag ang para makumplitu ra.
Ay alëngët da yang uras ang ipagpablag̓u ang ya ray uras ang ipagkumplituu yang pag̓irintrigaënu yang sadiliu tung ni Ginuu taa.
7 Kung natëtëngëd tung pagparakaw̓utunu yang Matinlung Balita tung mga tau,
pinagpaawatanu ëngëd ta mupia ang katulad ka tung pagpaawat yang sasang maniglaksung paglaban tung karira.
Kung natëtëngëd tung pagturumanënu yang gustu yang Dios ang ubraënu,
pinagtalusu ra ang katulad ka tung sasang maniglaksung nagpasapung da.
Kung natëtëngëd tung kamatuuran ang liit tung Dios ang nag̓apanangëd ta,
pinag̓amlig̓anu ta mupia ang para indi ëngëd malaktan ta nag̓itulduk ang bëlag̓an tama.
8 Numaan katulad tung sasang maniglaksu ang nandëëg da tung karira ang ya ray padëngëg̓an ang pakdulan ta primyu,
yuu may sasa kang maning pa tung primyung nag̓iëlat tung yëën ay natëtëngëd tung panirbianu tung ni Ginuu tang pirming inusuyu yang magkatama.
Anday dumang magpakdul tung yëën,
kung indi,
tanya mismu tung uras ang ipanginsapu na tung mga tauan na ang yang pagparakdulun na ta maning pa tung mga primyu tung nira magkatama ilëm ang pisan.
Bëlag̓an ka ilëm yuu ay pakdulan na,
kung indi,
pati yang kumpurming tinu pay pagmaal tung anya ang ya ra ka nganing ay pagyëngët-yëngëtan nang maglëkat.
Nag̓apaprusigir Nang Mag̓impurta Rang Mangay Duun Tung Anya (4:9-13)
9 Timoteo,
maimu ilëm,
mag̓impurtaa rang mangay tani tung yëën.
10 Ay kipurki ti Demasb binutwananaw ra ka ilëm anya ang naniaw ra tung pangalang-alangan.
Ay unu pa,
ipinalusu na ra yang pangkaliw̓utan ka ilëm.
Purisu duun da minangay tung Tesalonica.
Ti Cresente tanya,
anda ka tani numanyan ay minangay ra duun tung Galacia.
Asta ti Tito,
ya ka,
duun da minangay tung Dalmasia.
11 Anday dumang ugpuu tani,
kung indi,
ti Lucas ilëm.
Kung manganinga ra nganing tani,
ti Marcos,
yay takluyun mung panuntun.
Kipurki tanya durug katinaw̓angën tung yëënc.
12 Ti Tikiko tanya,
tinuw̓ulu rang mangay asan tung Efesod.
13 Asta yang panlamig̓u pala,
Timoteo,
kung mangaya ra nganing tani,
patigayunan mu ra kanay ang takluyun duun tung balay ni ungkuy Carpo duun tung Troas ay duun tung balay na nga butwanayu.
Asta mga kasulatan ang yag lululun,
ëklan mu kang patigayun,
kapin da ëngëd atiing mga ulit ang nagkarasulatane.
Nag̓ipabantay Na Tung Ni Timoteo Yang Sasang Taung Nag̓aranan Tung Ni Alejandro (4:14-15)
14 Ti Alejandrof ang atiang manigpanday ta landuk,
binuatanaw ra anya ta durug kalain.
Yang taung atia bëlsën ni Ginuung Jesus natëtëngëd tung binuat nang atii tung yëën.
15 Purisu pati yawa,
magbantaya ka kipurki nagkuntra ra ta mupia tung balitang naang nag̓ipagpakaw̓ut ta.
Dakulu Yang Pagtalig Na Tung Ni Ginuung Jesus Ang Magpakigsasa Tung Anya Tung Kaliwag̓an (4:16-18)
16 Atiing primirung pagdipinsaw tung sadiliu tani tung katalungaan yang mga usgadu,
andang pisan ay nagkërëng tung yëën,
may sam bilug,
kung indi,
pinaw̓ayaanaw ra ka ilëm nirang tanan ang ipinaalang-alang.
Basi pa ra ilëm ang indi ra idata yang Dios tung nira.
17 Piru maskin pa maning tia yang nainabu,
ti Ginuu ta tanya,
ya ray nagpakigsasa tung yëën ang nagpaktël ang asta duun dang pisan nga talusayu yang pagparakaw̓utunu yang Matinlung Balita.
Ay duun da ka nga pagngëlayu yang mga taung taga sari-saring nasyun ang namamati tung ipinanuw̓alu tung pagpabistaung atii.
Tung uras ang atii,
nalibriaw ra tung dakulung karisguan ang yang kaalimbawaanu maning pa tung yuu duukay tung nganga yang sasang liun.
18 Kapurisu duun da mas pang duminakul yang pagtalig̓u tung ni Ginuu ta ang yay magpalibri tung yëën tung maskin unu pang malalainay ang buatën tung yëën ig siguradung asikasuënaw ra ka anyang asta kaw̓utunu yang paggaraëmën na duun tung langit.
Purisu,
tanya ray dayawën tang dayawën ang asta tung sampa ang anda ëngëd ay katapus-tapusan na.
Talagang yay magkabag̓ay rang pisan tia.
Yang Pagtapusan Yang Sulat (4:19-22)
19 Timoteo,
ipakikumustayaw ra kanay nuyu tung ni Prisca duruang magkasawa ni Aquilah pati tung pamilya ni Onësiforog.
20 Kung ti Erasto yay gustu mung pabalitaan,
duun ka nabutwan tung Corinto.
Ti Trofimo tanya,
duun da ilëm ibutwanayu tung Mileto ay pagbalatian.
21 Timoteo,
kung maimu ilëm tung nuyu,
mag̓impurtaa ra ka ëngëd ang mangay tani tung yëën baklu ra kaw̓utay yang timpung igbaralyu.
Simanyan,
yang gustu kang mamagpakikumusta tung nuyu asan,
ya ra ti Eubulo,
ti Pudente,
ti Lino,
may ti Claudia,
asta yang kadaklan ang mga putul tang mga tumatalig tani tung Roma.
22 Buinu,
Timoteo,
yang nag̓ipag̓ampuu para tung nuyu ang pirming maktël yang isip mu ëkël tung pagpakigsasa ni Ginuu ta tung nuyu.
Pati yamung tanan ang mga tumatalig asan,
nag̓ipag̓ampuamu ka ëngëd yëën ang mas pang maispirinsiaan mi yang kanëëman ni Ginuu tang Jesu-Cristong pagpadag̓ën-dag̓ën tung numyu.
Ya ra ilëm tiay maaningu,
Pablo