Yang Isinulat Ni Pablo Tung Ni TITO
Yang Intrada Yang Sulat (1:1-4)
1
Yang may sulat taa yuung ti Pablong tinulduk yang Dios ang mag̓ing turuw̓ulun na ig tinuw̓ulaw ka ni Jesu-Cristong mangërëngan tung anya,
bilang sasang apustul na.
Yang gustu na magpadag̓ën-dag̓ënaw tung mga taung pinilik yang Dios ang mag̓ing mga tauan nang sadili ang para mamarësmësan da ëngëd nira ta maayën yang matuud ang nag̓itulduk natëtëngëd tung Dios ang asan da ka tanira ngaëyangay ta ipag̓usuy nira tung kalëlyag̓an na.
2 Yang luluaan yang pagpadag̓ën-dag̓ënu tung nira,
duru rag kadërërëp tanirang pamagpakbat ang magsarapënan da tanira yang Dios ang asta tung sampang anday katapusan.
Indi ëngëd lumalis tiang nag̓apakbat nira ay kipurki atiing indi pa nganing nag̓aimu yang kaliw̓utan,
ya kang lag̓i ay pinangakuan yang Dios ang tanya ka man anda ëngëd ang pisan ay bukli na.
3 Pagkatapus tung uras ang ipinagtipu na,
ipinagpabunayag na ra yang bitala na ëkël tung mga taung pinagpilik nang magparakaw̓utun ig tung yëën ipiniar na ra ka ang para ipagpakaw̓utu ka tung mga tau.
Bilang yay kalalangan yang Dios mismu tung yëën ang tanya ka man yay masarang ang magtapnay tung yatën ang mga tau.
4 Sinulatana ra yëën,
Tito,
gatëd agkaw̓ig̓ëna ra yëën ang anaung sadili natëtëngëd atiing primiru,
pinainunukuana ra yëën kung ya pa ag̓ari yang pagtalig mu yang sadili mu tung ni Ginuu ta ang katulad ka tung binuatua.
Yang nag̓ipag̓ampuu para tung nuyu ang mas pang maispirinsiaan mu yang kanëëman yang Ama tang Dios ang pagpadag̓ën-dag̓ën tung nuyu durua ni Jesu-Cristong nagyari rang Mananapnay ang nag̓atalig̓an ta ig mas pa kang ikasadya yang isip mu yang kaampiran mung naang baklu tung nira.
Natëtëngëd Tung Ipinagbutwan Na Tung Anya Duun Tung Creta (1:5-9)
5 Yang ipinagbutwanu tung nuyu asan tung Creta ay ug̓ud panadlëngën mu yang kumpurming kaministiran ang taradlëngën.
Kag yadwa pa ang para magpamilika ta mga mamagmaëpët-ëpët tung mga kaarumanan nirang mga tumatalig ang kada sam pundaan.
Duun ipapanaway mu tung mga pitik ang ya si kay ipadëmdëmu tung nuyu.
6 Kung tinu pay piaran mu,
dapat ang anday mapitikan tung anyang mga malalain.
Bilang sam bilug ilëm yang kasawa na ang yay nag̓apabug̓usan na ta gëgma na.
Yang mga ana na dapat kang mapinanangërën tung anya ang yay puiding matalig̓an na.
Bilang anday nuta nirang mapinagpapsaw tung mga malalaway ang pag̓urubraën ubin mabinatukun pa tung anya.
7 Kipurki kung tinu pay magmaëpët-ëpët tung sam pundaan,
dapat ang anday mapitikan tung anyang malalain ay natëtëngëd tanya sasang taralig̓an yang Dios ang magpadag̓ën-dag̓ën tung grupu.
Bilang bëlag̓an mapinaglalang,
bëlag̓an kang tipusun,
bëlag̓an kang tarainëm,
bëlag̓an kang kanununtuk,
bëlag̓an kang mainamlukun tung kuarta.
8 Kung indi,
dapat ang durug kainasikasuën tung mga taung nag̓apanaw tung balay na,
duru kag dërëp ang magbuat yang matinlu ig magkatama ka tung pagtërëlëngën yang Dios,
pirmi kang bilug yang isip na tung nag̓auyunan na,
ig pirmi ka tung katamtaman ilëm yang pag̓irisipën nang makdëk kang magsuspindi tung sadili na.
9 Kidispuis pa,
dapat kang durug pëg̓ët yang pamgës na tung Matinlung Balita natëtëngëd tung ni Jesus ang usuy ang pisan tung ipinagtulduk ta tung nira atiing primiru.
Ay kung maning tia,
maskë rang magturuldukun tung mga tumatalig yang magkatama ang nunut da ka ta pagpaktël na tung mga isip nirang mamagtuman.
Kag yadwa pa,
maskë ra kang magbinsir tung isip yang kumpurming pagpakigkuntra tung nag̓itulduk ta ang basi pa ra ilëm mamanmanan da ka nira ang tanira ka man pala ay mali.
Kung May Nag̓aisip Dang Magpaëkël Da Yang Mga Isip Nira Tung Maling Nag̓itulduk, Dapat Ang Paamanën Na (1:10-16)
10 Nag̓asambitu tia,
ay duru ra asan ang pamagpakigkuntra tung tamang nag̓itulduk.
Indi ëngëd magpalalang tung duma ig pagpandaya tung panangëd tung nira ëkël tung nag̓itulduk nirang anday kuinta.
Yang lumiru unu asan,
ya ra yang mga Judiong nagtalig tung ni Ginuung Jesus,
piru pamagrëg̓ës tung mga tumatalig ang tag̓a duma-rumang nasyun ang dapat ang magpabuat ta tanda tung mga tinanguni nira.
11 Yang mga taung atia,
Tito,
dapat ang indi mu ra pakdulan ta lugar ang para magturuldukun pa.
Kipurki,
tëëd mu,
intirung sam pamilyang lag̓i yang nag̓akumbinyu nirang nag̓apatalang tung kamatuuran,
natëtëngëd ka man tung nag̓itulduk nira yang dapat da rin ang indi ra nira itulduk.
Yang pag̓asikad ëngëd nirang pagturuldukun ay ang para manginguarta ra ilëm.
Makakaëyak yang trabaw nirang atia.
12 Maskin nganing yang sasang tag̓a asan tung Creta ang bantug da atii kanay ang ya unu ay sasang propëta,
may inaning na natëtëngëd tung mga masigkabanwa na ang maning taa:
“Yang mga tag̓a taa tung Creta,
pirmi ra ilëm ang pagburukli-buklian.
Midyu tung mga dayamdam ang durug karaisëg ang dapat pangamanan.
Durug katatamad ig duru kag katatakab,”
ag̓aaning.
13 Yang inaning nang atii talagang matuud,
tëmëng da ka man ang pisan tung mga manigtulduk ang atia,
maskin yang nag̓adayaan nira man,
ya ka.
Ya ray natëngëran na ang kaministiran ang tag̓aman mung pangkëlan yang mga isip yang mga tau asan ëkël tung pagparasanag̓ën mung klaradung pisan ang basi pa ra ilëm asan da tanira magkaramanmanay ang tanira ka man ay mali ug̓ud maulikan da yang pagparanangërën nira tung kamatuuran ang nagkawaldang da.
14 Ya ray buatën mu ug̓ud indi ra mamagpadayun ang mamag̓intindi tung mga isturia-isturiang atiang inimu-imu ka ilëm yang mga Judiong atia ang asan da ilëm nag̓ipatiëlay nira yang nag̓itulduk nirang mali tung mga tau.
Pati yang mga riglamintung atiang nag̓ipatuman da rin yang mga manigtulduk ang atiang pamanalyud da tung kamatuuran,
ya ka,
indi ra ka intindiën nira.
15 Yang tanan ang bag̓ay limpiu tung may mga kinaisipan ang linimpiuan da,
piru tung may mga kinaisipan ang mansadu ta kasalanan ig indi ka pagtalig tung ni Ginuung Jesus,
alus pa ilëm anday bag̓ay ang limpiu tung pagtërëlëngën nira.
Kumu mansadu ka man yang kinaisipan nira,
kung mangabuat da nganing ta malain,
ya ra ilëm agpamatëltëlay nira yang pag̓imasul da rin yang mga painu-inu nirab.
16 Kung pabitalaën mu yang mga manigtulduk ang atia,
pag̓aning ka ang may kaampiran unu nira tung Dios,
piru asan da tung mga ubra-ubra nira nga bistuay ta ang bëlag matuud.
Nag̓alawayan ngani yang Dios ang pagtëlëng tung nira ay pamagpasuag tung kalëlyag̓an na.
Maskin unu pang ubra-ubraay ang matinlu indi nganing kayanan nirang buatën.