Dapat Ang Tuldukan Ni Tito Yang Mga Tumatalig Ang Ipausuy Nira Yang Pag̓urulag̓ën Nira Tung Tamang Nag̓itulduk (2:1-10)
2
Piru ta nuyu,
Tito,
idayun mu yang pagturuldukun mu tung mga tumatalig kung unu pang mga ubra-ubraay ang magkatunu tung tamang nag̓itulduk natëtëngëd tung kalibrian ta.
2 Bilang yang mga mamaëpët ang mga lalii padëmdëmën mung gamitën ka nira yang pagkamaëpët nirang purmal.
Dapat ka ang yang mga ug̓ali nira garalangën yang kadaklan ang mga kaarumanan nira.
Pirmi ka tung katamtaman ilëm yang pag̓irisipën nirang makdëk kang magsuspindi tung mga sadili nira.
Asta yang pagparanangërën nira tung tamang nag̓itulduk dapat ang pirming këtkët tung mga isip nira.
Pati yang paggërëgmaën nira tung mga masigkatau nira,
dapat kang tëdëk ka tung mga pupusukun nira,
ig pirming matëntën yang mga isip nirang mag̓agwanta tung mga kaliwag̓an.
3 Asta mga mamaëpët ang mga baw̓ay ya ka.
Padëmdëmën mu ka ang yang tanan ang mga pag̓urulag̓ën nira dapat ang ëklan ka nira tung ikadëngëg yang Dios.
Bilang bëlag̓an kunliw̓aknën,
indi ka magpagamën ang subra tung irinëmën ang binu.
Kaministiran kang magturuldukun tung mga kaarumanan nirang mga baw̓ay ang mga kinamamulaan pa natëtëngëd tung pagburuatën ang matitinlu.
4-5 Ya ray dapat ang iugyat nira ang para magmaskë rang maggërëgmaën ta ustu tung mga kasawa nira pati tung mga ana nira,
maskëan da ka nira kung ya pa ag̓aring magsuspindi tung mga sadili nira,
kung ya pa ag̓aring mag̓ëkël tung pagkabaw̓ay nirang anday masawayan tung nira,
kung ya pa ag̓ari yang pag̓arasikasuën nirang matinlu tung mga pamalay-w̓alay nira,
ig kung ya pa ag̓ari yang pagparanëk nirang ustu tung mga kasawa nira.
Dapat ang magkamaningan da ta maning tia yang mga pag̓urubraën nirang mga baw̓ay ug̓ud anday mapadatëlan ta dumang magsaway ang anda unu ay kuinta yang Matinlung Balitang liit tung Dios ang ya ray ag̓aningay yang mga baw̓ay ang nag̓ausuy ka unu nira.
6 Asta yang mga sinultirus,
ya ka.
Pampaktëlën mu ra ka yang mga isip nira ang magsuspindi tung sadiling kalëlyag̓an nira maskin tung unu pang bag̓ayay.
7 Pati yawa mismu,
Tito,
dapat ang pirmia ra kang magpaita ta matinlung mulidu ang puiding mapausuyan yang mga kaarumanan mu asan.
Kidispuis pa,
kung magturuldukuna ra nganing,
magpaitaa ka ang ta yawa,
anday pag̓aintris mung maëklan tung mga taung pag̓apanuldukan mu.
Dapat kang bistu tung nira ang yang pagpabëtang mu tung nag̓itulduk mu talagang may timbang nang durug kaimpurtanti.
8 Asta yang nag̓itulduk mu,
puliduën mu ka ta mupia ang para pirming magkatunu tung tamang nag̓itulduk ug̓ud indi maptikan ta duma ang may kamali na ug̓ud kung tinu pay pagkuntra tung yatën,
anda ra kay maaning nang malain natëtëngëd tung yatën,
kung indi,
maëyak da ka ilëm.
9 Pati yang mga tumatalig ang mga kirëpën asan,
pampaktëlën mu ra ka yang mga isip nirang pirming magpanangëd tung mga ag̓alën nira maskin unu pay ituw̓ul tung nira ang para yay mauyunan nira.
Ig dapat kang indi magtuw̓al ta supakil.
10 Dapat ka ang indi magkawkaw tung mga ibëbtang yang mga ag̓alën nira,
kung indi,
dapat yang maita yang ag̓alën nira tung nira ang tanira talagang piadur ang pagkatau ang puiding matalig̓an nira maskin tung unu pang bag̓ayay.
Yay dapat ang usuyun nira ay ug̓ud ëkël tung tanan ang mga pag̓urubraën nira,
asan da nga maladmaray yang mga tau ang yang nag̓itulduk ta natëtëngëd tung pagtarapnayën yang Dios tung yatën ang mga tau,
durug tinlu yang apiktar na tung pagpangabui yang kumpurming panangëd.
Nag̓apabilug̓an Na Yang Kantidad Yang Kanëëman Yang Dios Kung Unu Pay Apiktar Na Tung Sasang Tumatalig (2:11-14)
11 Dapat ang magkamaningan da ta maning tia yang pag̓urulag̓ën yang mga tumatalig asan alang-alang da ilëm tung kanëëman ang ipinagbuluntad yang Dios tung nira ëkël tung ni Jesu-Cristong nagpundar yang kalibrian tang mga tau.
12 Natëtëngëd pinaitaanita ra ka man yang Dios yang kanëëman nang atiang asta tinapnayita ra anya,
asanita ra ngaëyangay ta ipagtabtab ta tung pagburuatën ta yang kumpurming indi na nag̓auyunan pati yang mga kalëlyag̓an tang pangkaliw̓utan.
Asanita ra ka ngaëyangay ta ipagsuspindi ta tung mga sadili ta ang para mapagbuatita ta magkatama mintras buiita pa taa tung kaliw̓utan ang naa ang ya ra kay nag̓auyunan na ta mupia.
13 Dapat ang magkamaninganita ra ta maning tia ay natëtëngëd yay sistimang magkabag̓ay ang pisan tung nag̓apakbat tang sasang ikasadya tang pisan tung uras ang ipagkaita ta yang kasusulawën yang Dios tang makagag̓aëm ang ya ra ka man yang Mananapnay tang ti Jesu-Cristo mismu.
14 Ya ka man yang nagpatumbas yang linawa na arangan da ilëm tung yatën ug̓ud asanita ra nga gawaray nang ipaluasay tung pinagpakëmkëman ta ra rin ang ita pirmi ra ilëm ang paglampas tung mga katuw̓ulan yang Dios.
Kag yadwa pa ug̓ud asanita ra ka nga punasay na tung tanan ang mga kasalanan ta ang para anda ray dumang may anya tung yatën,
kung indi,
tanya ra ilëm ang simanyan duruita ra ka man agkadërërëp ang magbuat yang matitinlu ang yay nag̓auyunan na.
Kaministiran Ang Magpaita Ti Tito Ang Tanya Piniaran Da Ka Man Ta Katëngdanan Ni Ginuung Jesus (2:15)
15 Yang mga bag̓ay ang atiaa,
ipagpaintindi mu tung mga tumatalig asan ang nunut da ka ta pagpaktël mu tung mga isip nirang mamagtuman.
Kung may asan ang indi magpauyun,
ya ray sugpatan mu ta mupiang tadlëngën.
Ipaita mu ëngëd tung nira ang yaway piniaran ni Ginuu ta ta katëngdanan mung magpaiwan-iwan tung nira.
India ra ëngëd magpadëëg kung may magkuntra tung nag̓ipagpaintindi mu,
maskin tinu pa.