Natëtëngëd Tung Matinlung Pagpakignunut Yang Mga Tumatalig Tung May Mga Katëngdanan (3:1-2)
3
Yang ipadëmdëm mu ëngëd tung mga tumatalig asan ang tanira dapat ang magpanangëd tung may mga katëngdanan tung pamanwa.
Kumpurming unu pay matinlung ubraën,
kaministiran kang pirming riparasiun tanirang magbuat.
2 Padëmdëmën mu kang mamag̓amlig ang indi magpalagpak ta mga bitalang mga malalain maskin tung ninu pa,
indi ka magpakigsuay,
kung indi,
matinaw̓angën,
mapinasunairën ig mapinaëbësën tung tanan ang mga masigkatau nira.
Kaministiran Ang Ipasanag Ni Tito Ta Maayën Yang Natëtëngëd Tung Kantidad Yang Kanëëman Yang Dios (3:3-8)
3 Magkabag̓ay ang pisan ang maning tia yang mga pasais ta ay kipurki maskin ita nganing mismu,
atiing indiita pa nag̓apagsuku tung ni Ginuung Jesus,
parariuita ka ilëm ta ug̓ali tung mga kaarumanan ta simanyan ang bëlag pang mga tumatalig.
Ay atii kanay,
anda kay gustu tang mag̓intindi ta ustu tung Dios.
Nagpasuag̓ita ka nganing tung mga kalëlyag̓an na.
Talangita ka tung kamatuuran.
Turuw̓ul-tuw̓ulunita ka yang mga kakaiblën ta ang sari-sari ra ilëm yang nalëlyag̓an tang papsawan ang pulus ka man balaw̓ag tung Dios.
Yang bida ta pirmiita kang nagtima ta malalain ang pag̓urubraën ta tung mga kaarumanan ta ay duruita kag kainiw̓ëg̓ën tung nira.
Naglalawayan ka nganing tanira ang nagtëlëng tung yatën,
nagdërëmëtanita ka nganing.
4-5 Ag̓ad na pang maning da ka man tii yang mga ug̓ali ta,
piru pagkaw̓ut da yang uras ang ipinagpaita yang Dios ang yay Mananapnay ta yang kanëëman na may yang gëgma nang durung pisan agkalutuk,
atiing pagtalig ta yang mga sadili ta tung anya,
tinapnayita ra ka man anya.
Andang pisan ay natëngëran na tung yatën ang ita may nagkarabuat tang magkatama tung pagtëlëng na,
kung indi,
suluminti ilëm natëtëngëd tung sadiling kaildaw na.
Maning pa tung dinig̓uita ra anya ang para magkabag̓ayita ra tung anya.
Ya ra kay uras ang ipinag̓ubra yang Espiritu Santo tung isip ta ang maning pa tung ita ra ipanganaay nang umana,
bilang pinaëyanganita ra anya ta baklung ipagpangabui tang liit tung Dios.
6 Ya ray ipinalampud yang Dios tung yatën ang yang apiktar na tung yatën,
maning pa tung ita bukbukay ta waing bastanti ang duun ipatiëlay na tung pinagtalus ni Jesu-Cristong nagyari rang Mananapnay ta.
7 Binuatanita ra anya ta maning tia ay ug̓ud asanita ra ngaipabtangay nang mga ana nang sadili ang may nag̓iëlat na tung yatën ang durug tinlu.
Purisu simanyan nag̓apagpakbatita ra tung uras ang magsarapënanita rang mamag̓ama ang asta tung sampang anda ëngëd ay katapus-tapusan na.
Nagyariita rang mga ana na natëtëngëd inusgaranita ra anyang saluita rang pisan tung pagtëlëng na natëtëngëd ilëm tung kanëëman nang atiing ipinagpaita na.
8 Yang nag̓ipagpasanag̓ung atia natëtëngëd tung luluaan yang kanëëman yang Dios,
yay matalig̓an tang talagang matuud.
Purisu gustuu ang yang mga bag̓ay ang atia ya ray pabilug̓an mu ëngëd ang para iwaswas mu ta maayën tung mga putul ta asan ug̓ud tanirang namagtalig da tung Dios ang magtapnay tung nira ëkël tung ni Jesu-Cristo,
asan da tung nag̓ipagpasanag mu ngaëyangay ta ipagpadërëp nirang mag̓intindi kung ya pa ag̓aring mapagbuat ta mga matitinlu.
Kipurki yang mga bag̓ay ang atiang gustuung ipasanag mu tung nira,
durug tinlu yang apiktar na tung pagpangabui nira ig ikaayën da ka yang mga masigkatau nira.
Nag̓apaëtaran Nang Indi Na Ra Pakdulan Ta Lugar Yang Kumpurming Pagtulduk Ta Makakatalang (3:9-11)
9 Piru likayan mung likayan yang mga diskusiun ang anday kapulutan na ang katulad ka tung dumang pamangatadlëngan natëtëngëd tung mga listaan yang kinaampu nirang tukawb.
Pati yang pagbaratikusan yang duma may ruma natëtëngëd tung mga katuw̓ulan ang ibinutwan ni Moises tung nasyun yamën ang Israelc,
ya ka,
likayan mu ka.
Kipurki yang tanan ang mga maning tiang mga diskusiun,
anda ëngëd ay kuinta na ay andang pisan ay maëklan asan ang para mataw̓ang pa rin tung pag̓urusuyun ta tung kalëlyag̓an yang Dios.
10 Kung may sasang putul tang manigtulduk ang yay pagtukud ta pagbërëlag̓an ta pag̓irintindiën yang sam pundaan asan,
painunukuan mu ta matinlu ang basi pa ra ilëm maintindian na kung unu pay kamali na.
Panuntan mu ra ka ta pagpaaman mu ang kaministiran patadëngën na ra yang pagturuldukun na.
Kung indi magtadëng,
paamanën mu si ta minsa pa.
Kung indi ka ëngëd mamati tung nuyu,
indi mu ra ilëm tugtan ang magpadayun pa tung pagturuldukun na tung mga tumatalig.
11 Asan da tung pagpatëg̓as na nga siguruay mu ang yang sasang taung maning tia,
ëngëd nang nanalyud tung tamang nag̓itulduk.
Yang sadiling kasalanan na yay pagpailala ang tanya talagang mali.
Natëtëngëd Tung Nag̓ituyun Na Tung Ni Tito (3:12-14)
12 Tito,
nag̓aisipanu ang may ipaangayu asan tung nuyu,
patugyanan ilëm tung ni Artemas may tung ni Tikikod.
Kung kumaw̓ut da nganing asan,
ta yawa,
mag̓impurtaa rang magpakigbag̓as tung yëën duun tung Nicopolis ay ya ray nag̓aisipanung pagtiniranu ang asta mataklib da yang timpung igbaralyue.
13 Kung natëtëngëd tung ni Zenas ang abugadu durua ni Apolos ang nansiangay ra asanf,
kung kaw̓utun da nganing yang uras ang ipagliit nira asan,
padërëpan mung padag̓ën-dag̓ënan ta maayën tung mga kaministiran nirang mamagsaay ug̓ud indi pangulangën.
14 Dispuis pa yang mga kaputulan ta asan,
kaministiran kang aralan da ka nira kung ya pa ag̓aring magprusigir tung pagburuatën nira ta ikaayën yang duma ang talagang kaministiran ëngëd ang taw̓angan ug̓ud indi ra magluang inutilg.
Yang Pagtapusan Yang Sulat (3:15)
15 Buinu,
Tito,
yang tanan ang mga kaarumananu tani pamagpakikumusta ka tung nuyu asan.
Pakikumustaayami ka tung tanan ang mga kaputulan ta asan ang kumpurming pagmaal ka tung yamën ig panangëd ka tung kamatuuran ang naang nag̓apanangëd ta.
Yang nag̓ipag̓ampuu para tung numyung tanan asan ang mas pang maispirinsiaan mi yang kanëëman ni Ginuu tang Jesu-Cristong pagpadag̓ën-dag̓ën tung numyu.
Ya ra ilëm tia ay maaningu,
Pablo