Yang Isinulat Ni Pablo Tung Ni FILEMON
Yang Intrada Yang Sulat (1-3)
1
1-2 Yang nagpasulat yang sulat ang atia yuung ti Pablong sasang ditiniadu tani natëtëngëd ilëm tung pagkërërëngënu tung ni Jesu-Cristo.
Yang sulat ang atia,
pinaugtunan da ni Timoteong sasang putul ta.
Ipinaëkël da yamën tung nuyu,
Filemon,
ay yawa sasang nag̓amaal yamën ig sasa kang aruman yamën ang panirbian ka tung ni Jesu-Cristo,
pati tung ni Apiang sasa kang putul tang baw̓aya may tung ni Arquipob ang yay maning pa tung sasang masigkasundalu yamën,
asta tung intirung sam pundaan ang pamagsaragpun-sagpun asan tung balay mu.
3 Yang nag̓ipag̓ampuu ang para tung numyung tanan asan,
ang mas pang maispirinsiaan mi yang kanëëman yang Ama tang Dios durua ni Ginuu tang Jesu-Cristo ang pamagpadag̓ën-dag̓ën tung numyu ig mas pang ikasadya mi yang kaampiran mi tung nirang naang baklu.
Yang Pagpasalamat Ni Pablo Natëtëngëd Tung Gëgmang Nag̓ipaita Ni Filemon Tung Mga Masigkatumatalig Na (4-7)
4 Filemon,
kada iampua yëën,
nag̓apasalamatana yëën tung Dios ang yay panirbianu.
5 Ay kipurki may balitang nagngëlu ang yawa unu paggëgma tung tanan ang mga masigkatumatalig mung binuat da ka yang Dios ang mga tauan na ig pagpadayuna ka unu tung pagtaralig̓ën mu tung ni Ginuung Jesus.
6 Yang nag̓ipag̓ampuu para tung nuyu,
putulu,
ang ëkël tung pagpadayun mu tung pagtaralig̓ën mu tung ni Ginuung Jesus ig ëkël ka tung pagkamalamad mu tung tanan ang kaayënan ang ipinakdul yang Dios tung yatën ang mga tumatalig,
mas pang padërëpan mu yang pagpakignunut mu tung tanan ang mga taung binuat da ka yang Dios ang mga tauan na ug̓ud yay ikadëngëg ni Jesu-Cristo.
7 Magkabag̓ay ang maning tia yang nag̓ipag̓ampuu para tung nuyu,
putulu,
ay pagkagngëlu yang balitang atia,
inampayanaw ra ta kasadyaanung duru ig asan da ka kumintël yang isipu natëtëngëd ka man tung gëgmang atiang nag̓ipagpaita mu tung mga kaputulan ta.
Ay natëtëngëd unu tung nuyu,
putulu,
namagkatinir da ka unu ta këtël yang mga isip yang mga kaarumanan mu asan ang binuat da ka yang Dios ang mga tauan na.
Yang Nag̓aingaluk Ni Pablo Tung Ni Filemon (8-11)
8 Intunsis simanyan,
Filemon,
may ipakigkësënu rin tung nuyu.
Sabag̓ay,
anda kay dalëndën yang isipung magkalalangan tung nuyu kung unu pay dapat ang buatën mu natëtëngëd ka man tung katëngdananung naa ang yuu sasang apustul ni Jesu-Cristo.
Piru indiaw ra ilëm magkalalangan tung nuyu.
9 Kung indi,
magpakiksënaw ra ilëm tung nuyu,
ay nag̓askëanu ang yawa sasang maginëgmaën.
Ay yuung pagpakiksën bali tung nuyu,
maëpëtaw ra,
nag̓aditiniaw pa ngani tani natëtëngëd tung pagkërërëngënu tung ni Jesu-Cristo.
10 Purisu may sasang gustuu rin ang ingalukun tung nuyu natëtëngëd tung sasang taung nagyari rang maning pa tung sasang anaw.
Ya ray nabtangan na natëtëngëd pinainunukuanu kung ya pa ag̓aring magsuku yang sadili nang magtalig tung ni Ginuu tang Jesus ang magpatapnay.
Anday dumang nag̓aaningu,
ya ra ti Onesimo.c
11 Tung bag̓ay,
nag̓askëanu ka ang yang tukaw midyu anda ka man ang pisan ay pakinaw̓ang mu tung anya.
Piru simanyan dakulung taw̓ang na tung nuyu pati tung yëën,
ya ka.
Yang Nag̓aingaluk Na Ang Ti Onesimo Risibiën Da Ni Filemon (12-17)
12 Simanyan,
maskin durug maal tung pagtëlëngu,
atia ra,
ipinabaliku ra tung nuyu.
13 Kung tung bag̓ay,
naisipanu ra rin ang awiranu ra kanay ang para mag̓ing sali mung magtaw̓ang tung yëën tani,
mintras naniaw pa nag̓aditini natëtëngëd ka man ilëm tung pagparakaw̓utunu yang Matinlung Balita natëtëngëd tung ni Jesu-Cristo.
14 Piru mintras indi pa nag̓aingaluku tung nuyu,
indiaw ka malëlyag ang magpanadiliaw ra ilëm ang mag̓awid tung anya,
nusias yang taw̓ang mu tung yëën midyu tung yawa ra ilëm ngaëklayu tung karëg̓ësan.
Yang gustuu,
kung unu pay mataw̓ang mu tung yëën,
ëlatanu ra ilëm yang buluntad tung isip mu.
15 Indi ra ilëm inawiranu ay naisipu ka ang muya may planu yang Dios tung anya ang magpablag da kanay ta gësyëng uras tung nuyu ug̓ud kung magbalik da ngani asan tung nuyu,
magsapënanamu ra ang asta tung sampa.
16 Yang tukaw tanya sasang kirëpën ilëm.
Piru simanyan bëlag da ilëm kirëpën,
kung indi,
sasa ra kang putul tang nag̓amaal ta.
Kumus talagang durug kamaal tung yëën,
kapin pa siguru tung nuyu,
ay kipurki bëlag da ilëm kirëpën mu,
kung indi,
magputulamu ra ka natëtëngëd tung pagtalig ming durua tung ni Ginuu ta.
17 Kapurisu,
kung pag̓atëlënganaw nuyung sasang putul mu tung ni Ginuung Jesus,
risibiën mu ra ti Onesimo ang katimbang nang ya ra ka tiang tinanguniu.
Yang Pangaku Ni Pablo (18-21)
18 Kung alimbawa may binuatan nang malain tung nuyu u kung may utang na,
yuu ray mangaku tia.
19 Uay,
atia ra yang yëën ang sadiling pirmaw.
Yuuy kamatuuran ang magbayad tung nuyu,
Pablo.
Siguru anday ministir ang sambitënu pa tung nuyu yang utang mung kanëëman tung yëënd.
20 Purisu,
putulu,
maimu ilëm,
paitaay ka ta sasang pag̓alinaynayan ta isipu sigun tung putul tang atia arangan da ilëm tung pagtaralig̓ën tang naang durua tung ni Ginuu ta ang katulad ka tung pag̓abuat mu tung dumang mga putul tang mga tumatalig asane.
21 Napagsulataw ra tung nuyu,
ungkuy,
ay dakulu yang sarig̓u tung nuyu ang buatën mu yang nag̓aingalukung atia tung nuyu ig pasubraan mu pa nganing.
Pati Ti Pablo Simpanan Da Ka Ni Filemon Ang Risibiën (22)
22 Kidispuis pa,
ungkuy,
may sam bilug pang ingalukunu tung nuyu.
Katulad ka tung pagrisibi mu tung putul tang atia,
simpanay ka ta kuartung madayunanu asan tung balay mu.
Kipurki may nag̓ipagpakisëw̓atu tung Dios ang ëkël tung pag̓arampuën mi para tung yëën,
basi pa ra ilëm ang mapalpasanaw ra ang para liw̓ianuaw rang magbisita asan tung numyu.
Yang Pagtapusan Yang Sulat Na (23-25)
23 Ti Epaprasf ang sasang arumanu ang nag̓aditini ka tani natëtëngëd ka tung pagkërërëngën na tung ni Jesu-Cristog,
pagpakikumusta asan tung nuyu.
24 Asta na Marcos ni Aristarco ni Demas,
Lucas ang yay mga katabyangu tung pagparakaw̓utun yang Matinlung Balita,
pamagpakikumusta ka asan tung nuyu.
25 Yang nag̓ipag̓ampuu ang para tung numyung tanan asan ang mas pang maispirinsiaan mi yang kanëëman ni Ginuung Jesu-Cristong pagpadag̓ën-dag̓ën tung numyu.
Ya ra ilëm tia ay sarang ang maaningu tung nuyu,
ungkuy,
Pablo