Nag̓ipagpaprusigir Nang Mas Pang Padërëpan Nirang Intindiën Yang Natëtëngëd Tung Kalibrian Ang Ipinagpaintindi Ni Ginuung Jesus (2:1-4)
2
Kapurisu kumus nagbitala ra ka man yang Dios tung yatën ëkël tung pag̓aningën nang Ana Na,
dapat ang mas pang padërëpan tang intindiën yang ipinagngël tung yatën natëtëngëd tung anya.
Ya ray dapat ang buatën ta nusias manluw̓ay ra yang mga isip tang asta mamalpasita ra ilëm dayun tung anya ang maning pa tung ita ra ibëëkay.
2 Ay kipurki isipën ta ra ilëm yang mga katuw̓ulan ang atiing itinalig yang Dios tung mga angil ang para iintriga nira tung ni Moises atiing tukawa.
Inding pisan mabasta-w̓asta,
kung indi,
kung tinu pay nagpabëngël ang naglampas,
ya ray pinakdulan ta sintinsiang sukat ang pisan tung binuatan na.
3 Ay kung maigpit nganing tii,
ta yatën da simanyan,
ya pa ag̓aaring mapalikayan ta yang sintinsia yang Dios tung yatën kung yang balita natëtëngëd tung kalibrian ang naang durung pisan agkatimbang yang kantidad na,
ya pay baliwalaën ta?
Ay kipurki yang kalibrian ang naang nag̓aaningu,
mismu ti Ginuung Jesus yay katukaw-tukawan ang nagpaintindi ang pagkatapus pinagpaingmatuuran da ka tung yatën yang mga taung nangagngël tung anya.
4 Dispuis pa yang pagpaingmatuud nirang atia,
pinagpaugtunan da ka nganing yang Dios ang nagpalapus ta sari-saring mga pruibang maktël ang duru kang pisan agkabëw̓ërëng.
Nunut da kang lag̓i asan yang mga abilidad ang ipinamakdul-pakdul na tung nira ang kumpurmi ra ilëm ang nalëlyag̓an na ëkël tung pag̓urubraën yang Espiritu Santo tung nira.
Nag̓ipagpasanag Na Ang Ti Jesus Yang Nangërëngan Tung Yatën Ang Mga Tau Ang Para Bawiën Na Yang Dating Kagaëman Tang Naplëk Tung Yatën (2:5-18)
5 Dapat ang yang balitang nagngël ta,
ya ray padërëpan tang intindiën ay kipurki bëlag̓an ang mag̓aning ang tung mga angil ipagaëmay yang Dios yang kaliw̓utan ang kaw̓utun ang ya ra ka man taang nag̓adapatan yang nag̓ianingu nungaynab.
6 Kung indi,
kung tinu pay papaggaëmën na,
bistu ra tung sasang napabtang tung kasulatan ang mag̓aning,
“Ay Ampuanung Dios,
nag̓abërëngaw ta duru ang ayw̓at yami pang mga tau ka ilëm,
yami pay nag̓adëmdëm mung nag̓asikasuën.
7-8 Ay atiing pag̓imu mu tung yamën,
ipinaaranëkami ilëm nuyu ta gësyë tung mga angil.
Pinadëngëg̓anami ka nganing nuyu ta maayën,
ay yang tanan ang bag̓ay ang inimu mu,
luw̓us dang ipinagaëm mu tung yamën,”
ag̓aaningc.
Atiing pag̓aning na ang yang tanan ang bag̓ay ipinagaëm na tung yatën ang mga tau,
yang gustu nang ianing tia,
anday bag̓ay ang bëlag̓an lug̓ud tung kagaëman ta may sam bilug.
Ug̓aring ka man ilëm simanyan,
indi ta pa nag̓aita ang yang tanan ang bag̓ay luw̓us dang nalg̓ud tung kagaëman tang mga tau.
9 Kung indi,
yang nag̓apabilug̓an ta ra ta mga isip ta,
ya ra ti Jesus ang sinug̓ut na rang pisan yang pusisiun tang mga tau.
Ay atiing pag̓ingtau nang bilug,
tung gësyëng uras ka ilëm ipinaaranëk ka yang Dios tung mga angil ug̓ud ëkël tung kanëëman nang durung pisan agkabëw̓ërëng,
itang tanan mapangërënganita ra ni Jesus ang magpakugmatay.
Dispuis natëtëngëd ëngëd tung pagpasar na tung kamatayën ang atii,
pinadëngëg̓an da ka yang Dios ta maayën.
10 Napasaran nganing ta kamatayën ang maning tia ay natëtëngëd yay tuminunung pisan tung planu yang Dios ang ya ka man ay nag̓imu yang tanan atiing primiru ang para tung uri ikadëngëg na ra kang tanan.
Purisu ang para durung mga ana nang mapalg̓ud na tung kasusulawën na ang ipalapus na tung uri,
bag̓ay ang pisan ang yang magtukud yang kalibrian nira,
yay papagpasarën na tung mga pinitinsiang mga maning tia ug̓ud asan da tanya mag̓ing sukat dang pisan ang magliway yang dalan ang pagbalikan nira tung Dios.
11 Nag̓ianingung bag̓ay ang pisan tia ay tanyang pagpabag̓ay tung nira tung pagtërëlëngën yang Dios pati tanirang nag̓apabag̓ay na,
sasay pagkatau nira.
Purisu indi na ra ag̓ikaëyak ang tanira ag̓aningën nang mga putul na.
12 Ay asan da nga dëëpay ta yang pagpabëtang na tung nira tung sasang inaning na tung Dios ang napabtang tung kasulatan ang mag̓aning,
“Paintindiënu ra yang mga putulu natëtëngëd tung nuyu kung unu pag katinlu yang pagkadios mu.
Kung magsaragpunami ra nganing ang magpurutul,
magdayawaw tung nuyung magkanta,”
ag̓aaningd.
13 Dispuis may sam bilug pang maning ka tia yang lagpak nang mag̓aning,
“Pati yuu,
magtalig̓aw ka tung Dios ang katulad ka tung nirang mga putulu,”
ag̓aaninge.
Kidispuis pa may sam bilug pa ka ëngëd ang pariu ta palaksu na ang mag̓aning,
“Uay,
simpanaw rang magtuman yang kalëlyag̓an yang Dios,
kasiraanami ra ka yang mga mamulang naang itinalig yang Dios tung yëën ang manguluan,”
ag̓aaningf.
14 Kapurisu yang mag̓aningën nang atiang mga mamula,
kumus mga tau ka man ang bilug,
pati tanya mismu nagpakiunung dang pisan tung nirang nag̓ingtau kang bilug.
Ya ray binuat na ug̓ud asan da tung pagpakugmatay na nga dëëg̓ay na yang sasang pagkëmkëm tung nira ang para yang dating pagkablag nira tung Dios ang dating natauan nira,
ya ra ilëm din ay mapadayunan nira ang asta magkarapatay ra ilëm ang yang pagkablag nirang atia tung anya ya ray pagnatisan nirang asta tung sampa.
Anday dumang nag̓ianingu,
ya ra mismu ti Satanas.
15 Yang ipinagdëëg na tung ni Satanas ay ug̓ud asan da ngaipapuklutay na yang mga tau tung pagkakirëpën nira tung anya ang ëkël tung ëlëd nirang mapatay,
asan da ka rin nga këmkëmay na ta mupia disti pa tung kinatau nira.
16 Talagang matuud yang nag̓ianingung atia,
ay simpri bëlag̓an yang mga angil yang nag̓apaunungan nang nag̓apadag̓ën-dag̓ënan,
kung indi,
ita ra mismu ang kumpurming pagsug̓ut tung irinsia ni apu tang ti Abraham ang bug̓us yang pagtalig na tung Dios.
17 Kapurisu ya ray ipinagkaministiran na ang tanya magpakbung dang pisan tung yatën ang kumpurming tinu pay agkaw̓ig̓ën nang mga putul na ug̓ud asan da magkatinir ta mapagpasunairan nang mag̓ildaw tung nira ig asan da ka magyaring pinakalandaw ang pari tang matalig̓an tang manalunga tung Dios para tung yatën.
Nagkamaningan da ta maning tia ay ug̓ud tung pagpakugmatay na asan da ngaulikay yang kasisilag̓ën yang Dios tung yatën natëtëngëd tung pagpakasalak ta tung anya ug̓ud asanita ra ka nga patawaray na.
18 Talagang kaministiran ang pinakbunganita ra anya ay kipurki natëtëngëd tung pagkapasar na tung mga tuksung malbat,
asan da tanya nagkatinir ta mapagpasunairan nang magpadag̓ën-dag̓ën ta maayën tung yatën ang kumpurming nag̓apasaran ka ta mga tuksu.