Nag̓apabilug̓an Na Ti Jesus Ang Napruibaan Dang Matalig̓an Yang Dios Ang Magmangulu Tung Maning Pa Tung Pamalay-w̓alay Na (3:1-6)
3
Kapurisu mga putulung binuat da ka yang Dios ang mga tauan na kang sadili,
kumus bintëngita ra anyang para mapalg̓uran ta yang planu na,
kaministiran ang pabilug̓an ta ta mga isip ta yang sasang tinuw̓ul yang Dios ang magpadapat yang bitala na tung yatën,
ang ya ra kay nagyaring pangultimung pari ta ang maning ka man tia yang nag̓ipag̓ubligar ta tung mga kaarumanan ta.
Anday dumang nag̓aaningu,
kung indi,
ya ra mismu ti Jesus.
2 Kaministiran ang ya ray buatën ta ay natëtëngëd tanya napruibaan dang talagang matalig̓an yang nagpiar tung anya ta katëngdanan ang katulad ka tung ni Moises ang yay nag̓ërëkëlën tung kabilug̓an yang mga tauan yang Dios atiing tukaw ang yang kaalimbawaan nira maning pa tung pamalay-w̓alay na.
3 Kidispuis pa,
kung ti Moises bag̓ay ang padëngëg̓an,
ti Jesus kapin da ëngëd ang magkabag̓ay ang padëngëg̓an ang katulad ka tung sasang nagbuat ta balay ang yay mas pang dayawën kay tung balay ang binuat na.
4 Ay simpri maskin unu pang balayay,
may nagbuat,
ig yang nagbuat yang tanan ang bag̓ay,
ya ra ka man yang Dios.
5 Kung tung bag̓ay,
ti Moises napruibaan da ka man ang matalig̓an yang Dios atiing pag̓ërëkëlën na tung maning pa tung pamalay-w̓alay na.
Yang pusisiun na atii kanay,
sasang turuw̓ulun ilëm yang Dios ang pinapag̓ula na natëtëngëd tung mga bag̓ay ang ipaintindi tung mga tau tung magdarasun ang panimpua.
6 Piru yang pag̓aningën ang Cristo ang napruibaan da kang matalig̓an yang Dios,
yang anyang pusisiun,
tanyay pag̓aningën nang Ana Na mismu ang yay pagmangulu tung maning pa tung pamalay-w̓alay na.
Ang pagkatapus ta yatën simanyan,
lug̓urita ka tung pamalay-w̓alay nang atia,
basta padayunan ta ka ëngëd yang pagpakabalur ta may yang kasiguruan yang mga isip tang pagpakbat tung tanan ang kaayënan ang pinangakuan yang Dios tung yatën.
May Sam Bulus Tung Kasulatan Ang Nag̓aulit Na Ang Para Asan Da NGa Patiëlay Na Yang Ipagpaaman Na Tung Nira (3:7-11)
7-8 Kapurisu pariu tung nag̓ianing da yang Espiritu Santo mismu tung yatën simanyanb,
“Numaan ang kaldaw,
kung masinti mi ra nganing ang ag̓aningënamu ra yang Dios,
indiamu ilëm magpakgat ang magdiskumpiar tung anya ang katulad ka tung mga kinaampu mi atiing pagbatuk nira tung anya ang ya kay uras ang pinagtag̓aman nira ta pagtuung atiing duun pa rin tanira tung banwang kapasc.
9-10 Duun tung banwang atii pinag̓intraanaw ra ilëm nira ta pagtuung ëkël tung pagdiskumpiar nira tung yëën ang pagkatapus pinapasaranu tanira ta parusa tung sëlëd ëpat ang puluk ang takun.
Yang pagtag̓am nirang atii ta pagtuung tung yëën ya ray nakanayan nang nasilag̓aw ra ta duru tung nira.
Ya ra ka nganing ay ipinagkësën-kësënu tung isipu ang,
‘Abaa,
yang mga taung naa,
pirmi ilëm ang pamagpatalang.
Indi ra ëngëd inintindi nira yang nag̓alëlyag̓anung usuyun nira.
11 Purisu natëtëngëd tung kasisilag̓ënung duru tung nira,
ipinanumpaw ra ilëm ang talagang indi ra ka ëngëd mangalg̓ud tung kaayënan ang sinimpanu ang ya ra rin ay pag̓inëtëg̓an yang mga isip nirad,’”
ag̓aaning yang Dios.
Nag̓abadbaran Na Yang Mga Isip Nira Tung Sam Bulus Ang Atiang Inulit Na, Bilang Sasang Paaman Na (3:12-19)
12 Kapurisu mga putulu,
kumus maning da ka man tia yang nainabu tung nira,
mangamanamu ra ta mupia,
nusias may asan tung numyung maëyangan da ka ta isip nang durug ka sayud ang magdiskumpiar da ka ëngëd natëtëngëd tung Baklung Ipinagpakigpaig̓ung naang pinagtukud ni Ginuung Jesus ang asta muya manalyud da dayun tung Dios mismu ang yay makagag̓aëme.
13 Ang para malikayan mi tia,
kaministiran kaldaw-kaldaw magparakëtël-këtëlanamu ra ta kinaisipan may kinaisipan ang nunut da ka ta pagparaaman-amanan mi,
mintras nagsakpënamu pa yang bitalang atiang “numaan ang kaldaw”f.
Kaministiran ang ya ray prusigiran mi ëngëd ta mupia nusias may asan tung grupu ming magpadaya yang isip na tung mga katadlëngan ang durug kakaingganya ang asta magdiskumpiadu ra tung Baklung Ipinagpakigpaig̓u yang Dios ang duun da ka manëg̓as yang isip nang magpakasalak bilang mamalpas da tung ni Ginuung Jesusg.
14 Nag̓apaamananamu ra yëën ta maning tia ay dumayun yang kaampiran tang naa tung ni Jesu-Cristo basta indi ilëm mag̓uman ang asta tung sampa yang kasiguruan ta ang talagang matuud yang pinanangëd ta natëtëngëd tung anya atiing primiruh.
15 Siguru mas maayën pa kung ya si kay ulitënung uman yang sam parti yang inaning yang Dios ang yay sinambitu nungayna ang mag̓aning,
“Numaan ang kaldaw,
kung masinti mi ra nganing ang ag̓aningënamu ra yëën,
indiamu ilëm magpakgat ang magdiskumpiar tung yëën ang katulad ka tung mga kinaampu mi atiing pagbatuk nira tung yëën,”
ag̓aaningi.
16 Ya ray dapat ang pangamanan ta tia,
ay tinu pa ëngëd basung mga tauay ang nangagngël yang pinangakuan yang Dios tung nira ang pagkatapus namagbatuk da ka ëngëd tung anya,
kung indi,
tanirang tanan mismung ipinampalua ni Moises duun tung Egiptoj?
17 Ayw̓a,
tinu pa ëngëd basung mga tauay ang nasilag̓an na tung sëlëd ëpat ang puluk ang takun,
kung indi,
tanira ka ilëm mismung namagpakasalak tung anyang namagdiskumpiar tung pinangakuan na ang pagkatapus anday dumang dinangat na,
amat-amat da ilëm ang nagkarapatay ang asta namalakad-balakad da ilëm yang mga tinanguni nira duun tung banwang kapask?
18 Ayw̓a,
tinu pa ëngëd basung mga tauay ang ipinanumpa na ang talagang indi ra ka ëngëd mangalg̓ud tung kaayënan ang patiniran na ra rin tung nira ang ya ra rin ay pag̓inëtëg̓an yang mga isip nira,
kung indi,
tanira ka ilëm mismung namagdiskumpiar tung anyal?
19 Purisu asan da ngaintindiay ta ang yang nadikanan nang indi ra nangasarang ang namampaklëd tung banwang atii ay natëtëngëd ilëm tung pagdiskumpiar nira tung Dios.