Nag̓apagpasunaid Na Yang Puiding Ikaayën Nira May Yang Puiding Ikalain Nira (4:1-11)
4
Simanyan tung panimpung naa,
pinangakuanita ra ka yang Dios ang puidiita ra kang magpalg̓ud tung sasang pag̓inëtëg̓an yang mga isip tang pinagsimpan na.
Purisu mangamanita ra ta maayën nusias may asan tung numyung ibilang da ilëm yang Dios ang luminalis da.
2 Ay kipurki ta yatën,
pinakaw̓utanita ra ka ta matinlung balita natëtëngëd tung sasang pag̓inëtëg̓an yang mga isip ta ang katulad ka tung mga kinaampu tang atii.
Dispirinsia ilëm tung nira,
indi ra ilëm napakinaw̓angan nira yang pinangakuan yang Dios ang atii tung nira,
ay maskin nagngël da nira,
piru indi ra ka ëngëd namagpauyun tung mga aruman nirang bug̓us yang pagtalig nira tung Diosa.
3 Kipurki,
ta yatën ang kumpurming nagtalig da yang sadili ta tung ni Jesus ang nagpatapnay,
nag̓apalg̓uran ta ra yang pag̓inëtëg̓an yang mga isip tang atiang pinangakuan yang Dios tung yatën.
Ug̓aring tanirang indi ra namagtalig tung Dios atii kanay,
sinakëp da yang sasang inaning yang Dios ang mag̓aning,
“Natëtëngëd tung kasisilag̓ënu tung nira,
ipinanumpaw ra ilëm ang talagang indi ra ka ëngëd mangapakinaw̓ang tung kaayënan ang atiang pinagsimpanu ang ya ra rin ay pag̓inëtëg̓an ta mga isip nira,”
ag̓aaningb.
Maskin indi ra nangapakinaw̓ang tanira tung pag̓inëtëg̓an da rin ta mga isip nira,
piru simpan da kang lag̓i disti pa atiing pagkakumplitu yang Dios yang pag̓irimuën na yang kaliw̓utan.
4 Nag̓askëan tang simpan da kang lag̓i tia,
ay may sasang napabtang tung kasulatan natëtëngëd tung yapitung kaldaw ang maning taa:
“Pagkaw̓ut yang yapitung kaldaw atiing pag̓irimuën yang Dios yang tanan ang bag̓ay,
ya ray ipinagtadëng na tung tanan ang pag̓urubraën na ang ya ra kay pinag̓inëtëg̓an yang isip na,”
ag̓aaningc.
5 Maskin asan ka tung inaning yang Dios ang atiang baklu ilëm nag̓aulitu,
nasambit na ka yang kaayënan ang atiang pag̓inëtëg̓an ta isip atiing pag̓aning nang,
“Indi ra ka ëngëd mangapakinaw̓ang tanira tung kaayënan ang atiang pinagsimpanu ang ya ra rin ay pag̓inëtëg̓an yang mga isip nira,”
ag̓aaningd.
6-7 Simanyan,
nag̓ilug̓ut pa yang Dios tung duma ang para mapalg̓uran nira yang sasang mapag̓inëtëg̓an ta mga isip nira.
Dispuis yang mga taung atiing nangagngël yang matinlung balita atiing primiru,
indi ra nangalg̓ud natëtëngëd tung pagpasuag nira tung kalëlyag̓an na.
Purisu ya ray ipinagtipu na ta duma sing uras ang ipagpalg̓ud yang duma.
Yang uras ang atia,
ya ray ginuuyan nang “numaan ang kaldaw” atiing pagpabitala na tung ni David ang nabuay rang timpung nagkarataklib ang ya ra ka man mismu ay nag̓aulitu ta nungaynang mag̓aning,
“Numaan ang kaldaw,
kung masinti mi ra nganing ang ag̓aningënamu ra yang Dios,
indi mi ra ëngëd pagpatëg̓asan ang asta magdiskumpiaramu ra tung anya,”
ag̓aaninge.
8 Kipurki atiing pagmangulu ni Josue tung mga tau ang namagpaklëd duun tung banwang Canaan,
kung pinakdulan na ra tanira yang ultimung pag̓inëtëg̓an ta mga isip nira,
ig disir,
indi ra rin napag̓inambit si yang Dios ta duma pang uras ang ya ray ipagpalg̓ud ta duma tung kaayënan ang atia.
9 Ig disir,
puiding aningën ta ang may sasa pang pag̓inëtëg̓an ta isip ang nag̓ilug̓ut pa yang Dios tung mga tauan na ang magkapariu ka tung pinag̓inëtëg̓an yang isip na atiing pagkakumplitu na yang pag̓irimuën na yang tanan ang bag̓ay.
10 Ag̓aaningënung pariu yang duruang atia ay kung tinu pay nagpalg̓ud da tung pag̓inëtëg̓an yang isip nang atiang pinangakuan yang Dios,
yang pagpalg̓ud na ya kay pagtadëng na tung pagtaralig̓ën na tung sadiling këtël na ang tanya puiding risibiën yang Dios natëtëngëd tung pagturumanën na yang mga katuw̓ulan.
Yang pagtadëng nang atia tung sadiling pag̓urubraën na magkaanggid ka tung pagtadëng yang Dios tung pag̓urubraën na atiing pagkakumplitu na yang pag̓irimuën na tung tanan ang bag̓ay.
11 Purisu,
padërëpan ta ëngëd ang palg̓uran yang pag̓inëtëg̓an ta isip tang atia ug̓ud may sam bilug tung yatën,
andang pisan ay malsik ang malambëg tung kalainan ang katulad ka tung nalambëg̓an yang mga kinaampu ta natëtëngëd ka man tung pagdiskumpiar nira tung Diosf.
Papanuw̓alën Yang Dios Kung Tinu Pay Indi Ra Mag̓intindi Ta Ustu Tung Nag̓ianing Na Tung Nira (4:12-13)
12 Ag̓aningënamu ra yëën ta maning tia ay natëtëngëd kumpurming unu pay pinag̓aning yang Dios,
durung pisan agkapuirsa yang builu na ang yang kaalimbawaan na maning pa tung buig.
Kung matarëm nganing yang sasang sabli,
mas matarëm pa ka ëngëd yang ipinagdiklara yang Dios.
Ay kipurki yang sasang sabli,
maskin dumlut tung mga tinanguni ta ang asta magkaratigbung da ilëm yang mga duli pati yang amuyukyukun yang duli magkaraita ra ka,
piru naang ipinagdiklara yang Dios dulut ang pisan tung pundu yang mga kinaisipan ta ang asta bistu rang pisan kung unu pay nabtang.
Purisu ëkël tung ipinagdiklara na,
asanita ra ngausisaay na ta mupia kung unu pay nag̓apanëëm-nëëman ta ig kung unu pa ëngëd ay pag̓asikad ta.
13 Anda ëngëd ang pisan ay taluk tung pagtërëlëngën na,
kung indi,
bunayag ang pisan yang tanan tung pagpatëëk-tëëk na ang tanya ka man mismu ay may kalalabtën ang magpatuw̓al tung yatën kung nagpabëngëlita tung pinag̓aning na.
Nag̓apabilug Na Yang Gustu Nang Ianing Tung Intirung Sam Bulus Mag̓impisa Tung 3:7 Ang Asta Tung 4:11 (4:14)
14 Simanyan ita may sasang paring inding pisan mapasiring-siringan duun ëngëd ang pisan tung katalungaan mismu yang Dios,
ay duun da tanya nagpaabwat tung kaabwat-abwatan ang pisan yang langit.
Anday dumang nag̓aaningu,
kung indi,
ti Jesus ang yay pag̓aningën ang Ana Yang Dios.
Kapurisu,
kumus duun da ka man tanya agpangërëngan tung yatën,
magpakabalurita rang magdiklara tung duma may ruma natëtëngëd tung anya ang simanyan ultimu ra ilëm tanya yang panalig̓an ta.
Nag̓apagpasunaid Na Yang Pagkapari Ni Ginuung Jesus Numanyan May Yang Pagkapari Yang Dating Mga Pari Atiing Tukaw (4:15–5:10)
15 Indiita maglaum ang yang pinakalandaw ang pari tang naa anday pasunaid na tung yatën ang may kaluw̓ayan,
kung indi,
tanya nagkatinir da ta pasunaid na tung yatën natëtëngëd tung pinasaran nang sari-saring mga tuksung malëlbat ang pariu ka tung nag̓apasaran ta simanyan ang pagkatapus bëlag ya magpaluw̓ay ang magpanunut,
kung indi,
ya mag̓agwantang manguntiël.
16 Kumus may pinakalandaw ang pari tang maning tia,
pabalurun ta yang mga isip tang magpalëngët ang pirmi tung Dios ang yay napnukan ang pisan ta kanëëman ug̓ud maildawanita ra anyang taw̓angan tung uras ang pangaministiran ta ëngëd yang taw̓ang na.