5
Tung nasyun tang mga Judio,
kung tinu pay mag̓ing pinakalandaw ang pari,
ya pilikay yang Dios tung mga kaarumanan nang mga pari ug̓ud yay mag̓ing manigpangërëngan tung mga masigkatau nang manalunga tung Dios ang para magprisintar ta mga igparakdula nira tung anya pati mga ayëp ang nag̓ipadasag nira tung anya natëtëngëd tung mga kasalanan nira.
2 Dispuis,
puiding mapagpasunaid tung mga aruman nang tau ang nag̓atalang pa natëtëngëd indi pa nag̓aintindi kung ya pa ag̓aring mag̓usuy tung magkatama,
ay maski tanya mismu nganing,
malpës da ka ilëm ang mapagbuat ta kasalanan.
3 Ya ra ka man nganing ay nag̓ipagkaministiran na ang may anya kang idasag para tung sadiling kasalanan na ang katulad ka tung pag̓ipagdasag na para tung kasalanan yang mga masigkatau na.
4 Ig kidispuis pa,
indi puiding bëët-bëëtan ta tau yang katëngdanan ang naa,
kung indi,
dapat ang ya pilikay yang Dios ang katulad ka tung pagpilik na tung ni Aaron atiing primirub.
5-6 Maning kang pisan tia tung pag̓aningën ang Cristo.
Indi ra ka nagbëët-bëët tung sadili na ang para mag̓ing paring pinakalandaw ang para asan da ka rin magkatinir ta kadëngëg̓an na,
kung indi,
yang Dios mismu yay nagpilik tung anya.
Bistu rang pisan tia tung duruay pinag̓aning na tung anya.
Yang sam bilug maning taa:
“Yaway pag̓aningënung anaw.
Numaan ang kaldaw ang naa,
yuu ray nagpasintar tung nuyung maggaraëmëna ra ang katulad ka tung yëën ang paggaraëmën.
Yang kaalimbawaan na maning pa tung inanaa ra yëën” ag̓aaningc.
Pagkatapus yang yadwang pinag̓aning na tung anya maning taa:
“Yawa,
magyaria rang pari ang asta tung sampang anda ëngëd ay katapus-tapusan na ang yang pagkapari mu magkapariu ka tung pagkapari ni Melquisedec atiing tukaw,”
ag̓aaningd.
Purisu asan da ngaintindiay ta ang yang pagkapari na liit da ka man tung Dios.
7 Atiing ti Ginuu ta taa pa rin tung kaliw̓utan ang naa,
tëdëk ang pisan tung isip na yang pag̓arampuën na tung Dios ang yay sarang ang mapagpalibri tung anya tung kamatayën ang atiing pag̓atalungaan na.
Pinadëgtë na pa ka ëngëd nganing yang pag̓arampuën nang atii ang nunut da ka ta pagtarangitën na ang kaisan ya ra kay pinag̓isyakan na.
Ang pagkatapus,
natëtëngëd tung pagparanëk nang nagpauyun tung kalëlyag̓an yang Dios,
asan da pamatiay nang pinaktël ang mag̓agwanta tung maagmaan nang pinitinsiae.
8 Maski pang tanyay pag̓aningën ang Ana Yang Dios,
piru ëkël tung pagpasar na tung mga pinitinsiang atiing inagmaan na,
duun da nga bilug̓ay nang pisan kung unu pa ëngëd ay nag̓adapatan yang pagturumanën na yang kalëlyag̓an yang Dios.
9 Kapurisu duun da nagluang sukat ang pisan ang magtukud yang kalibrian ang anda ëngëd ang pisan ay katapus-tapusan na ang para yay malg̓uran yang kumpurming magtuman yang kalëlyag̓an na.
10 Ay kipurki tanya pinilik da kang lag̓i yang Dios ang mag̓ing paring pinakalandaw ang yang pagkapari na pagkapariu ka tung pagkapari ni Melquisedec atiing tukaw.
Kung Ayw̓a Maliwag Ang Paintindiën Na Tanira Tung Dapat Din Ang Maintindian Nira (5:11-14)
11 Kung natëtëngëd tung palaksu yang pagkapari ni Jesu-Cristong atiang nag̓asambitu,
dakëlë pa ka rin yang gustuung badbaran ang ipasanag tung numyu.
Piru maliwag dang paintindiënamu pa yëën ay natëtëngëd midyu pinaluw̓ayan mi ra yang mga isip ming pag̓intindi tung kamatuuran ang asta kuminiput da.
12 Nag̓apagbitalaw ta maning tia ay ag̓ad bastanti ra yang mga uras ang nagkarataklib ang yamu ra rin ay masarang ang magpaintindi tung duma,
piru naa pala,
yamu pa ka ëngëd ay may kaministiran ang paintindiënamu si natëtëngëd tung primirung pinag̓aralan mi tung bitala yang Dios ang yay maning pa tung abakada pa ka ilëm.
Midyu ya si ay kaministiran mi ang katulad ka tung mga mamulang gëg̓ësyë ang pagkaministiran pa ta gatas.
Indi mi pa makayanan ang intindiën yang nag̓itulduk ang magdarasun tung abakada ang yay maning pa tung anën.
13 Ay kipurki kung tinu pay natëëd da ilëm yang pag̓aral na tung primirung nag̓itulduk ang katulad ka tung mulang gësyëng panusu pa,
indi pa maskëng mag̓intindi tung nag̓itulduk da rin tung anya natëtëngëd tung pag̓urusuyun na tung kalëlyag̓an yang Dios.
14 Piru yang anën,
yay bag̓ay tung mga taung dakulu ra.
Ya ray kaalimbawaan yang mga taung maskë rang magtimbang-timbang tung mga isip nira kung ay pay magkatamang buatën nira,
kung ay pay malain.
Nagkamaningan da ta maning tia,
ay natëtëngëd ya ra kang lag̓i ay nag̓apabiasaan nira tung kaldaw-kaldaw.