Kaministiran Ang Intindiën Nira Ta Mupia Yang Itulduk Na Sigun Tung Pagkapari Ni Jesus (6:1-3)
6
Kapurisu,
indi ta ra ilëm papagtëërën yang mga pag̓irintindiën ta tung primirung itinulduk tung yatën natëtëngëd tung ni Jesu-Cristo ang yay maning pa tung abakada pa ka ilëm.
Maayën pa,
magpaëkëlita ra yang mga isip ta tung Espiritu Santo ang para mapaëyanganita ra anya ta ipag̓intindi ta tung magdarasun ang sambitënu ang asan da magwayang yang mga kinaisipan taa.
Anda ray ministir ang ya si ay pangapunglan ta yang pinangapunglan tang primiru,
kung ya pa ag̓ari ita manligna tung mga ubra-ubra tang malalain ang ya ray pinagpaalawiran ta tung Dios ig kung ya pa ag̓aring magtalig̓ita yang mga sadili ta tung ni Jesu-Cristong magpatapnay.
2 Lug̓ud da ka duun yang itinulduk tung yatën natëtëngëd tung pagrilimpiuën tung mga tinanguni tang atiang dating nausuy tang mga Judio ang pagkatapus ya ray ipinagpasunaid tung pagpabënyag yang sasang tumatalig ang may gustu nang magpailala tung publiku ang asan da nga pananglitay na kung unu pay napanawan na atiing pangimaklu ni Ginuung Jesu-Cristo tung anya.
Asta yang pagdërëënën tung mga taung lug̓ud tung dating patakaran pati yang lug̓ud tung baklu,
pinapagpasunaid ka kung unu pay pinagbëlag̓anan nira ta puntus.
Pati yang pagpabui si kang uman yang Dios tung mga taung nagkarapatay ra ang ya ra ka man ay uras ang ipagsintinsia na tung nira kung ay pay ultimung panampëtan nirang asta tung sampa,
tinuldukanita ra ka ngani.
3 Karkuluu ilëm ang puiding matuman ta yang nag̓ipagpaprusigirung atia basta taw̓anganita ra ilëm ang pirmi yang Dios.
Nag̓apaamanan Na Tanirang Indi Ëngëd Mamagsaka Tung Duma Ang Nanambing Da Tung Ni Ginuung Jesus (6:4-8)
4 Ag̓aningënamu ra yëën ta maning tia ay kung indi ta tumanën tia,
muya ya ray makanayan ta ipagsaka ta tung duma ang nanambing da tung ni Jesu-Cristo.
Tëëd mi,
pinagpasanag̓an da ka yang Dios natëtëngëd tung kamatuuran ang nagliit tung anya.
Maning pa tung natimtiman da ka nira kung ya pa ag̓arig katinlu yang nag̓ipakdul yang Dios ta diw̓aldi tung nira.
Naispirinsiaan da ka nira yang pagparaktëlën yang Espiritu Santo tung nira.
5 Nabilug̓an da ka nira yang bitala yang Dios ang durung pisan agkatinlu yang nag̓adapatan na.
Nabilug̓an da ka nira yang mga pruibang maktël ang ya ray nagpailala tung kagaëman ni Jesu-Cristo ang yang kabilug̓an na ya ray ipalapus na tung uring panimpung anday katapus-tapusan.
6 Ag̓ad naispirinsiaan da nira yang tanan ang atia,
piru namalpas da ka ëngëd ang nanambing tung ni Jesu-Cristo.
Purisu indi ra ka ëngëd maimung imakluën pa yang mga isip nira ang para mapagsug̓at si ka rin ang uman.
Ay ya pa ag̓ari,
tung panambing nirang atia tung ni Jesu-Cristo ang ya pa ka man ay pag̓aningën ang “Ana yang Dios” mismu,
katimbang nang ya si ka ag̓ipaglansangay nirang uman tung krus ang asan da kag duminaray nira ta mupiang magpakaëyakan tung katalungaan yang dakëlëng mga tau.
7 Ipananglitu ra kanay tung tanëk.
Yang tanëk ang muya-muyang nag̓akuranan ang pagkatapus magtubwan da ka ta mga luak ang yay mapruduktuan yang may tanëk ang nag̓ipasikasu na tung mga manig̓ubra,
ya ray tanëk ang talagang nag̓apakaayën ta maayën yang Dios.
8 Piru kung magtubwan da ka ilëm ta mga masapinitën,
anda ra ka ilëm kuinta nang pagkatanëk.
Muya ya ra ilëm ag̓ituluyay yang Dios tung malain.
Tëgkaan na,
palalaw̓an da ilëm ta apuy.
Nag̓ainambit Na Yang Kumpiansa Na Tung Nira Ang Nunut Da Ka Ta Pagpaktël Nang Mamagpakbat Tung Kaayënan Ang Pinangakuan Yang Dios (6:9-12)
9 Piru mga putulung nag̓agëgmaanu,
maskin nag̓apagbitalaw ta maning tia,
may kumpiansaw ka ëngëd tung numyu ang may mga ubra-ubra ra kang nag̓ipalua ming magkabag̓ay ra tung mga taung nagkatinir da ta kalibrian nira.
10 Ay yang Dios tanya,
kumus pulus tung matadlëng yang nag̓abuat na,
talagang indi na ra ka ëngëd paglipatan yang bëdlay ming nanirbian tung anya nuntaa may yang gëgmang ipinaita mi tung anya atiing pagtaraw̓angën mi tung mga kaarumanan ming mga tumatalig ang asta ra ilëm simanyan ya ra kay nag̓apadayunan mi.
11 Yang gustuung gustu para tung numyung sasa may sasa ang yang kadërërëpën ming paggërëgmaan,
ya ray patupuan ming magpakbat tung uras ang ipagkërëng yang Dios tung pinangakuan na ug̓ud marisibi mi ra ka ëngëd yang kaayënan ang atiang nag̓iëlat na.
12 Ya ray buatën mi ug̓ud indi ra manluw̓ay yang mga isip ming kumiput,
kung indi,
magsug̓utamu ra tung kumpurming may pagtalig nirang bug̓us tung Dios ang anday katakaan nirang nag̓ëlat tung anyang magkërëng tung pinangakuan na tung nira ang asta rinisibi ra ka ëngëd nira.
Nag̓ipadëmdëm Na Kung Unu Pag Kabakëd Yang Pinangakuan Yang Dios Tung Kumpurming Pagtalig Tung Ni Jesu-Cristo (6:13-20)
13 Kipurki isipën mi ra ilëm kanay ti apu tang Abraham.
Atiing pagpangaku yang Dios tung anya,
pinaugtunan na pa ta panumpa.
Kumus anday dumang mas landaw tung anyang masambit na,
mismu yang sadili na ya ray sinambit nang nanumpa.
14 Mag̓aning tung ni Abraham ang nanumpa,
“Sumpaanu pa tung sadiliu ang talagang pakaayënëna yëën ta mupia,
ay padamlënu ta duru-duru yang mamagsurubli-subli tung nuyu,”
mag̓aningb.
15 Purisu anday dumang pinakaw̓ut na tung uri,
nagkamatuud da ka ëngëd tung ni Abraham yang pinangakuan yang Dios ang atia tung anya ay natëtëngëd indi ra tinakaan ta pag̓ëlatc.
16 Isipën ta ra kanay atiing panumpa yang Dios tung ni Abraham.
Kipurki maskin tung yatën ang mga tau,
kung tinu pay manumpa,
yang aran ang sambitën na,
ya ra yang aran ta sasang mas landaw tung anya.
Dispuis basta pinanumpaan na ra nganing natëtëngëd tung sasang bag̓ay,
mabakëd da,
asan da ka nga tabtab yang pagkadiskumpiadu yang dumang pagpabalala.
17 Kapurisu maning kang pisan tia yang binuat yang Dios.
Natëtëngëd durung kalëlyag nang may pagbakëran ëngëd yang mga isip yang mga taung pinangakuan na ta kaayënan,
ang para mas pang masiguru ra nira ang indi na ra ka ëngëd maisulan yang nabitalaan na,
anday dumang binuat na,
pinaugtunan na ra kang lag̓i ta panumpa.
18 Yang pag̓asikad na ëngëd duun ang nanumpa ay ug̓ud may durua rang bag̓ay ang sarang pagbakëran yang mga isip ta,
ang yang duruang atia indi ra ka ëngëd maimung mag̓uman,
ig yang Dios indi ra ka ëngëd maimung magkabuklian asan.
Purisu ta yatën ang napagdangëp da tung ni Jesu-Cristong para magpamanadaita tung anyang para indiita ra sakpën yang sintinsia yang Dios,
asan da tung duruang bag̓ay ang atia këmtël ta mupia yang mga isip ta ang yang kaayënan ang atiang nag̓iëlat na tung yatën,
ya ëngëd ay pabilug̓an ta mga isip tang pakbatën.
19 Yang pagparakbatën ta tung kaayënan ang atia yay pagpabakëd tung isip tang pagtalig tung ni Ginuung Jesus ang katulad ka tung sasang pundung pagpabakëd tung pagkabëtang yang sasang salaayan.
Duru rag bakëd yang pagkakalmang yang maning pa tung pundung naa ay natëtëngëd duun dang pisan ipakalmangay tung pag̓atiniran ëngëd yang Dios tung langit ang kung ipananglit ta tung pinagtuuan pa rin yang mga kinaampu ta atiing tukaw pa,
natëëm dang pisan tung duw̓ali yang kurtinang yag sasalag̓a tung kuartung pag̓atiniran ëngëd yang Dios atii kanay ang yay pinakasagradud.
20 Duun da nagtukaw ti Jesus tung yatën ug̓ud ya ray mangërëngan tung yatën tung katalungaan mismu yang Dios.
Ay tanya ray nagyaring pangultimung pari ang yang pagkapari na dumayun ang asta tung sampa ig pagkapariu ka tung pagkapari ni Melquisedec atiing tukaw.