Natëtëngëd Tung Pamilik Nira Tung Mga Masigkatau Nira (2:1-13)
2
Mga putulu, yang pagtaralig̓ën tang naa tung ni Ginuu tang Jesu-Cristo, indi ta ra ëngëd palaktan ta pagpirilikën ta tung mga masigkatau ta sigun tung pagkabëtang nira. Kipurki yang kadëngëg̓an ni Ginuu tang naang nag̓apanalig̓an ta asan da nga bilug̓ay ta tung pagparanëk na yang pagkabëtang nang nagpakiunung tung mga taung aranëk ta pagkabëtang. 2 Ay ipabëtangu may sasang taung magpasakëp tung saragpun ming mga tumatalig ang may titing nang bulawan ang yag susuksuk tung tulduk na ig durung pisan agkatinlu yang aw̓ël ang pag̓asuut na ang pagkatapus may sasang maliliwag̓ën ang magpasakëp ka ang yang aw̓ël na këtkët da ta buling. 3 Pagkatapus ya ray saptën mi ta mupia yang sam bilug ang durug tinlu yang bisti na ang ya ra ag̓aningay ming “Tani, tania kumarung tung parada” ang pagkatapus yang maliliwag̓ën ya ra ag̓aningay ming “Asana ra ilëm këmdëng tung binit u kung gustu mu, tania ra ilëm ngarung tung daktal.” 4 Ta, indi, asanamu rag pamilik tung mga masigkatau mi? Bëlag bang maling pisan yang pitik ang pag̓agamit mi tung pagpabëtang mi tung mga tau?5 Mga putulung nag̓amaalu, isipën mi ta maayën. Bëlag ba ang yang mga maliliwag̓ën tung kaliw̓utan ang naa ya ëngëd ay pinagpilik yang Dios ang mag̓ing manggarën tung pagtaralig̓ën nira tung anya? Bëlag bang tanira kay pampaintraën na tung paggaraëmën na tung kaliw̓utan ang baklu ang yay pinangakuan na tung kumpurming pagmaal tung anya? 6 Pagkatapus yang numyung atia, yang mga maliliwag̓ën ya rag lipi-lipiay ming pakaëyakay! Bëlag ba ang yang mga manggaranën yay pagpandëëg-dëëg tung numyu kung kaisan? Bëlag bang kaisan tanira ka mismu ay paglag̓unut tung numyu duun tung katalungaan yang mga usgadu ang para idimandaamu ra nira? 7 Bëlag bang tanira ka mismu, ang kung sambitën da nganing yang aran ni Ginuu tang Jesus, ya rag duminaray nira yang kadëngëg̓an na? Ang pagkatapus ya ra kay aran ang durug kamaal tung numyu ig ya kay sinambit mi atiing pagpailala mi ang nagpagaëmamu ra tung anya!
8 Muya manuw̓alamu ra ilëm ang yang pagsarapëtën ming atia tung mga manggaranën, ya kay pagturumanën mi yang sasang katuw̓ulan ang dapat usuyun yang kumpurming pagpamangulu tung Dios ang katulad ka tung napabtang tung kasulatan ang dapatita unu maggëgma tung mga masigkatau ta ang pariu ka unu tung paggëgma ta tung sadili ta. Atia, kung mapruibaan mi ang talagang ya ka man ay nag̓ipagsapët mi tung nira, maayën ka rin. 9 Piru maning da tiang nag̓ipaita ming pamilikamu tung mga masigkatau mi, bëlag yamug pagtuman yang katuw̓ulan ang atia, yamug pagpakasalak. Asanamu ra nga patëmëngay ang yamu talagang malinampasënamu ka man tung mga katuw̓ulan yang Dios. 10 Kipurki bilug yang mga katuw̓ulan na. Kung tinu pay magtuman yang kadaklan ang mga katuw̓ulan na ang pagkatapus may sam bilug ang nalampasan na, tung pagtërëlëngën yang Dios katimbang nang pinaglampasan na rang luw̓us. 11 Ay kipurki yang Dios ang yay nagkalalangan ang indiita unu maglimbung tung kasawa ta, ya kay nagkalalangan ang indiita unu mangimatay tung masigkatau ta. Taa numanyan ipabëtangu, maskin indiita naglimbung tung kasawa ta piru napangimatayita ra ta tau, ig disir ita sasang malinampasën da tung mga katuw̓ulan yang Dios.
Nag̓apapagbilug Na Yang Gustu Nang Ianing (2:12-13)
12 Kapurisu maskin unu pay ianing ta, maskin unu pay buatën ta, ëklan ta tung matinlung pasais ang katulad ka tung mga taung nag̓aintindi ang tung uri tanira insapuan da ka ëngëd yang Dios natëtëngëd tung tanan ang mga pag̓urubraën nira taa tung kaliw̓utan. Kipurki yang pitik ang usuyun nang manginsapu, ya ra yang kamtangan yang Matinlung Balita ang yay maning pa tung baklung katuw̓ulan ang kung tumanën ta, asanita ra nga luas tung pagpakirëpën ta tung pagpakasalak ta kag asanita ra ka ngaëyangay ta ipagtuman ta yang nag̓auyunan yang Diosa. 13 Ag̓aningënamu ra yëën ta maning tia ay natëtëngëd kung kaw̓utun da nganing yang uras ang ipagpatuw̓al yang Dios tung yatën, indi na ra ildawan yang kumpurming indi naildaw tung mga masigkatau na. Kung ildawan ta ra nganing yang duma, ya ray sasang ikasadya yang mga isip ta kipurki ya ray pruibang masanag ang ita matuud ang inildawanita ra ka man yang Dios ang tinapnay.
Yang Pagtaralig̓ën Ang Anday Kanunut Nang Pag̓urubraën, Anday Kuinta Na (2:14-26)
14 Mga putulu, unu pay pulut na kung may sasang taung pag̓aning ang tanya unu pagtalig ka tung ni Ginuung Jesus ang pagkatapus anday pruibang maita tung mga ubra-ubra na? Kung maning ka ilëm tia yang kantidad yang pagtaralig̓ën na, maimu w̓asung asan da natapnay yang Dios? 15 Ipabëtangu, may putul mi tung ni Ginuu tang sasang lalii ubin sasang baw̓ay ang durug kaalang-alang yang pag̓araw̓ëlën na ig pangaliwag da ta duru tung pamangan na tung kaldaw-kaldaw. 16 Pagkatapus may sam bilug asan tung numyung mag̓aning tung anya, “Putulu, yawa ra ag̓aliman ang pagpanaw. Taw̓angana ra yang Ampuan tang pakdulan ta masuut mung aw̓ël may mapangan mu.” Ang pagkatapus indi mi ka ilëm pakdulan yang mga kaministiran na. Unu pa pay kuinta na tiang inaning ming atia tung anya? Sungaw ra ka ilëm ay indi mi nag̓apanuntan ta pag̓urubraën. 17 Maning kang pisan tia yang pagtaralig̓ën yang sasang tau ang pagkatapus indi na ra ka nag̓apanuntan ta pag̓urubraën. Anday duma, yang pagtaralig̓ën ang maning tia ya ra yang pag̓aningën ang pagtaralig̓ën ang patay.
18 Piru muya may magsulingaag tung yëën ang mag̓aning, “Yang mga tau bëlag̓an pariu ta sistima. Yang sam bilug may pagtalig na, yang aruman na may pag̓urubraën nang matinlu.” Yang ituw̓alu tung taung pangatadlëngan ta maning tia, “Abir ungkuy, ipaita mu ra kanay tung yëën yang pagtaralig̓ën mung atiang indi mu nag̓apanuntan ta pag̓urubraën. Ig ta yëën ka, ëkël tung pag̓urubraënu, asan da ngaitaay mu yang pagtaralig̓ënu tung ni Ginuung Jesus ang talagang matuud. 19 Pag̓aninga ka, ungkuy, ang yawa panangëra ang sam bilug ilëm yang Dios. Maayën ka. Piru kung asan ilëm tëgka yang pagtaralig̓ën mu tung pag̓impurmi mu ilëm ang atia, anday kuinta na. Ay kipurki anda ka ilëm ay nalandawan na tung panangëd yang mga dimunyu. Maskin pamanangëd ka ang sam bilug ilëm yang Dios, piru duru kang pagpangërël nira ang maisip nira yang parusang anday katapus-tapusan ang nag̓iëlat na tung nira. 20 Ayw̓a, ungkuy, anda pa ka ëngëd ay naërëm tung isip mu? Kaministiran pa ka ëngëd ang papruibaanu ra tung nuyu ang andang pisan ay kuinta na yang pag̓aningën yang sasang tau ang pagtaralig̓ën na mintras anday pruibang nag̓aita tung pag̓urubraën na? 21 Padëmdëman ta ra kanay ti Abraham ang kinaampu ta. Bëlag bang natëtëngëd tung sasang binuat na duun da nga pruibaay ang tanya pagtalig ang matuud tung Dios? Bistung pisan atiing pagtuman na yang sasang itinuw̓ul yang Dios tung anya ang yang ana nang ti Isaac dapat unung iintriga na tung anyang idasagb. 22 Duun da ngaintindiay ta ang ëkël tung pagtaralig̓ën nang bug̓us tung Dios, duun da tanya ngaëyangay ta ipagtuman na yang itinuw̓ul nang atii tung anya. Kag yadwa pa, tung pagtuman na duun da ka nag̓ëlët ang mas pa yang pagtaralig̓ën na. 23 Duun da ka ngaintindiay ta ang talagang tama ka man yang pagtaralig̓ën na ang pariu ka tung sasang napabtang tung kasulatan ang tanya unu nagtalig da tung Dios ang magkërëng tung pinangakuan na tung anya ig natëtëngëd unu tung pagtalig nang atiing bug̓us, duun da tanya ngaipabtangay yang Dios ang salu rang pisan tung pagtërëlëngën nac. Maskin tung dumang kasulatan, ti Abraham ya ra nganing ag̓aningay ang tanya unu sasang ungkuy yang Dios ang durug tinlud.” 24 Kapurisu asan da ngaintindiay mi ang tung pag̓urubraën yang sasang tau, duun da ilëm nga pruibaay ang tanya talagang pagtalig dang matuud tung ni Ginuung Jesus. Bëlag̓an ang mag̓aning ang tama yang pagtaralig̓ën na kung anday pruibang maita tung pag̓urubraën na.
25 Maning kang pisan tia yang palaksu na tung ni Rahab ang yay sasang baw̓ay atiing tukaw ang yang pangita na rin pagpagamit. Bëlag bang natëtëngëd tung pag̓arasikasuën na tung mga tiktik, duun da nga pruibaay ang tanya talagang pagtalig dang matuud tung Dios? Bistung pisan yang pagtalig nang bug̓us atiing pag̓arasikasuën na tung mga masigkanasyun tang durua nga tiktikan may tung pagpainunuku na tung nira kung ay pang dalanay ang matinlung pagpalibrian nira. 26 Kapurisu ang para magbilug da yang gustuung ianing, ipapanawu ra ilëm tung sasang pananglit. Katulad tung tinanguni ta sasang tau, kung anda ray linawa na, asan da ngaskëay ta ang patay ra. Ya rang pisan yang kaalimbawaan yang pagtaralig̓ën yang sasang tau tung Dios ang pagkatapus anday kanunut nang pag̓urubraën nang matinlu. Yang pagtaralig̓ën ang maning tia ya ra yang pag̓aningën ang pagtaralig̓ën ang patay.