Nag̓apaamanan Nang Indi Ëngëd Magpasunlug Tung Duma Ang Para Magpadayun Pa Rin Tung Pagpakasalak Nira (3:1-10)
3
Tëëd mi tiang gëgmang ipinagpaita yang Ama tang Dios tung yatën kung unu pag kalutuk!
Ag̓aningënita nganing anyang mga anaita ra anyang sadili!
Ig matuud ka man ang ya ra ka man taang nag̓abtangan ta.
Ya ray natëngëran na ang indiita rag saptën yang mga taung pamagpaguyud tung sistimang pangkaliw̓utan ay natëtëngëd indi kang lag̓i sinapët nira ti Jesus atiing taa pa rin.
2 Mga putulung nag̓amaalu ta duru,
yang pagkabëtang ta numaan,
mga anaita ra ka man yang Dios.
Ug̓aring kung unu pay kaalimbawaan yang mabtangan ta tung uri,
indi na pa nag̓ipabunayag tung yatën yang tanan ang kamtangan na.
Nag̓askëan ta ilëm ang kung maglëkat da nganing ti Ginuung Jesus ang magpabistu,
mag̓atuita rang pisan tung anya ay natëtëngëd tung uras ang atia,
mabilug̓an ta rang pisan yang pirsunal na.
3 Purisu kung tinu pay may nag̓ipagpakisëw̓at na tung ni Ginuung Jesus ang para mabilug̓an na,
asan da ngaëyangay ta ipagpulidu nang pirmi tung mga ubra-ubra na ang para mag̓atu rang mag̓atu tung anyang dati kang lag̓ing limpiu.
4 Piru kung tinu pay pagpadayun tung pagpakasalak na,
asan da nga likday na yang mga katuw̓ulan yang Dios ay natëtëngëd yang kamtangan yang pagpakasalak yang sasang tau tung Dios,
ya ra yang paglilikërën na tung mga katuw̓ulan na.
5 Nag̓askëan mi ra ka ang yang inangay ni Jesu-Cristo tung kaliw̓utan ang naa ay ug̓ud mapunasanita ra anya tung mga kasalanan ta.
Ig askë mi ra ka ang inding pisan nagpakasalak tanya may mininsa.
6 Purisu kumpurming tinu pay pagpakigkapulit da tung anya,
indi ra pagpadayun tung pagpakasalak na.
Piru kumpurming tinu pay pagpadayun tung pagpakasalak na,
indi ra kang lag̓i nagpakirampil tung anya.
7 Kapurisu mga anaung nag̓agëgmaanu ta duru,
mag̓amlig̓amu ang indiamu madayaan ta duma.
Kipurki yang taung masarang ang magbuat ta matadlëng,
suluminti ilëm yang taung matadlëng ka yang pagkatau na.
8 Piru kung tinu pay pagpadayun tung pagpakasalak na,
ti Satanas ya ray may anya tung anya.
Kipurki pagkapariu ra ka ilëm tung ni Satanas ang disti pa atiing indi pa nag̓aimu yang kaliw̓utan,
pagpakasalak da kang lag̓i.
Pagkatapus yang inangay taa yang pag̓aningën ang Ana Yang Dios ay ug̓ud ranggaën na yang pag̓urubraën ni Satanas.
9 Kumpurming tinu pay inana ra yang Dios,
indi ra pagpadayun tung pagpakasalak na kipurki tinënakan da yang Dios yang sadiling irinsia na ang asan da nga paëyangay na ta baklung ipagpangabui nang katulad ka tung sasang similyang pagpaëyang ka ta burak nang baklu.
Purisu yang taung atia,
indi ra maimung magpadayun tung pagpakasalak na natëtëngëd inana ra yang Dios.
10 Kapurisu taa ra nga bistu kung tinu pay inana ra yang Dios ang matuud ig kung tinu pay ana ni Satanas.
Kumpurming tinu pay indi pagbuat yang magkatama tung pagtërëlëngën yang Dios,
bilang indi paggëgma tung mga aruman nang mga tumatalig,
yang taung atia indi ra kang lag̓i inana yang Dios.
Nag̓apapagprusigir Nang Maggërëgmaan Tanira Ta Ustu (3:11-18)
11 Ag̓aningënamu ra yëën ta maning tia ay natëtëngëd maning taa yang bitalang ipinagngël tung numyu atiing primirung pagtalig mi tung ni Jesu-Cristo:
ita unung mga tumatalig,
dapatitang maggërëgmaan.
12 Indiita mag̓usuy tung ni Cain ang nagpagaëm yang pupusukun na tung ni Satanas ang asta inimatay na ra ka man yang ari na.
Natëtëngëd tung unu pa inimatay na,
kung indi,
natëtëngëd yang anyang ubra-ubra sayud tung pagtërëlëngën yang Dios ang yang ubra-ubra yang ari na yay magkatama.
13 Kapurisu mga kaputulan,
indiamu ilëm mabërëng kung dëmtanamu yang mga taung pamagpaguyud tung sistimang pangkaliw̓utan ang kuntra tung kalëlyag̓an yang Dios.
14 Ay ta yatën,
nag̓askëan ta ra ang naliitita ra tung dating panalugpatay ta tung Dios ig nalaktërita ra ka tung pagkamadërëp tang magtuman yang kalëlyag̓an na gatëd simanyan nag̓apaggëgmaita ra tung mga putul ta tung ni Ginuu ta.
Piru kung tinu pay indi nag̓apaggëgma tung mga putul na tung ni Ginuu ta,
indi pa nag̓aliit tung dating panalugpatay na tung Diosa.
15 Kumpurming tinu pay pagdëmët tung sasang putul na tung ni Ginuu ta,
katimbang nang sasang nangimatay ra ta tau tung pagtërëlëngën yang Dios ig nag̓askëan mi ra ka ang yang sasang nangimatay ta tau indi naëyangan ta baklung pagpangabui nang anday pagtapusan na.
16 Maning taa mabilug̓an ta yang kantidad yang matuud ang gëgma ang ti Jesu-Cristo nagpakugmatay para tung yatën.
Purisu ta yatën,
kaministiran kang maggëgmaita ra ka tung mga putul ta tung ni Ginuu ta,
maskin magatërita pa tung kamatayën.
17 Piru kung may sam bilug tung yatën ang may kaya ang pagkatapus nag̓adipara na yang sasang putul na tung ni Ginuu tang nag̓aliwag̓an da ta duru tung pagpangabui na,
piru indi na ra ka ildawan,
ya pa ag̓aring aningën ta pa ang tanya paggëgma ra tung Dios?
18 Mga anaung nag̓amaalu,
kaministiran ang bëlag̓an ka ilëm tung tumbung yang dilak ta yang paggërëgmaan tang magpurutul,
kung indi,
ipaita ta tung mga buat-buat ta ang para mag̓ing matuud da yang paggërëgmaën ta.
Nag̓apapagprusigir Nang Mamagpadayun Tung Pagpanangëd Nira Ang Ti Jesus Sasay Pagkadios Nira Yang Dios Ig Mamagpadayun Ka Tung Paggërëgmaan Nirang Magpurutul (3:19-24)
19-20 Kung maning tia yang kantidad yang paggërëgmaën ta tung mga putul ta,
asanita ra masiguru ang talagang pag̓usuyita ra ka man tung kamatuuran ang liit tung anya.
Purisu kung magpalëngëtita ra nganing tung anyang mag̓ampu,
maskin mabasulita pang kaisan yang mga painu-inu tang bëlag dang klaradung matuud,
mapalimëng ta ra ka ëngëd yang mga isip tang magulu gatëd yang Dios mas landaw ta nag̓askëan na kay tung nag̓askëan yang mga painu-inu ta ay luw̓us ang nag̓akdëkan na.
Purisu nag̓askëan na ra ang yang pag̓asikad ta ëngëd ang yang mga pag̓urubraën ta ipausuy ta ra ëngëd tung kalëlyag̓an nab.
21 Mga putulung nag̓amaalu ta duru,
kung indiita rag basulun yang mga painu-inu ta,
maktël yang isip tang manalunga tung Dios.
22 Ig kung unu pay ingalukun ta tung anya,
ya ray ipakdul na tung yatën natëtëngëd yang nag̓ituw̓ul na tung yatën yay nag̓atuman ta bilang pag̓usuyita ra tung nag̓auyunan na.
23 Ya taa yang nag̓ituw̓ul na tung yatën.
Dapatitang magpadayun tung pagparanangërën ta ang pulus matuud yang ipinagpailala ni Jesus natëtëngëd tung pagkabëtang na ang tanya ka man yang pag̓aningën ang Ana Yang Dios sigun tung paglinukutay nirang mag̓ama tung pagkadios.
Bilang tanya yang pag̓aningën ang Cristong pinilik yang Dios ang mag̓ing Mananapnay ig maggaraëmën.
Ig yadwa pa,
dapatita kang magpadayun tung paggërëgmaan tang magpurutul.
Yang duruang atia yay nag̓ituw̓ul na tung yatën.
24 Kumpurming tinu pay pagtuman yang nag̓ituw̓ul nang atia,
asan da ta taung pagpakigkapulit da tung anyang matuud ig nag̓asaliran da yang Dios yang pagpangabui na.
Maning taa masiguru ta ang yang pagpangabui na nag̓isalid na ra tung yatën ëkël tung pag̓irimakluën tung mga isip ta yang Espiritu Santong ipinatinir na tung yatën.