Yang Nag̓ipagpaaman Na Natëtëngëd Tung Mga Manigtulduk Ta Kabuklian (4:1-6)
4
Mga putulung nag̓amaalu ta duru,
indiamu ra magpakali-kaling manangëd tung maskin unu pay nag̓itulduk natëtëngëd tung Dios,
kung indi,
pasadsaran mi ra kanay ta maayën ug̓ud madëëp mi kung matuud ang liit tung Dios u kung bëlag.
Ag̓aningënamu ra yëën ta maning tia ay natëtëngëd duru rang namagluang mga manigtulduk ta kabuklian ang pamag̓ambu ang tanira unu mga manigpalatay yang bitala yang Dios buat.
2 Maning taa mabilug̓an mi kung liit tung Dios yang nag̓itulduk nira.
Kumpurmi tinu pay pag̓ubligar ang ti Jesus ya ra ka man yang pag̓aningën ang Cristong pinangakuan yang Dios ig nag̓ingtau ëngëd ang bilug,
yang nag̓itulduk yang taung atia liit tung Dios.
3 Piru kung tinu pang manigtuldukay ang indi mag̓ubligar natëtëngëd tung ni Jesus ta maning tia,
bëlag̓an liit tung Dios yang nag̓itulduk na,
kung indi,
uyun ang pisan tung sistima yang sasang magpakigkuntra tung ni Jesu-Cristo ang ya ra kay nabalitaan ming maglua tung uri ang pagkatapus yang manyu na taa ra pagsag̓usut da tung kaliw̓utan numanyana.
4 Piru ta yamung agkaw̓ig̓ënung mga anaw,
yang may anya ra tung numyu ya ra yang Dios.
Purisu indiamu ra nagpadëëg tung mga taung atia.
Ay kipurki yang Dios ang pagpaktël tung numyung panguntiël mas maktël tung ni Satanas ang yay pagpaktël tung kumpurming mga taung pagpaguyud tung sistimang pangkaliw̓utan ang naang balaw̓ag tung Dios.
5 Yang mga manigtulduk ang atiang nag̓aaningu lug̓ud tung sistimang atia.
Purisu yang magkatunu tung sistimang atia ya ra ka man nganing ay nag̓ipagtulduk nira ig ya ra kay nag̓apanangëd yang mga taung kumpurming pagpaguyud ka tung sistimang atia.
6 Ta yamën ang mga apustul,
kumus yang Dios yay may anya tung yamën,
kumpurming tinu pay may kaampiran na tung anya,
yay panangëd tung nag̓itulduk yamën.
Piru yang sasang taung bëlag̓an Dios yang may anya tung anya,
indi panangëd tung nag̓itulduk yamën.
Purisu asan da nga bilug̓ay ta yang nag̓itulduk ang matuud may yang nag̓itulduk ang makatatalang.
Kaministiran Ang Maggërëgmaan Tanirang Magpurutul Kumus Pinaitaan Da Tanira Yang Dios Ta Mulidu Kung Ya Pa Ag̓ari Yang Ustung Paggërëgmaën (4:7-11)
7 Mga putulung nag̓amaalu,
kaministiran ang maggërëgmaanitang magpurutul natëtëngëd yang gëgma liit tung Dios.
Kag yadwa pa,
kumpurming tinu pay paggëgma tung mga putul na tung ni Ginuu ta,
ya ray pruiba ang tanya inana ra yang Dios ang matuud ig pagrinampilay ra tanira.
8 Kung tinu pay indi paggëgma tung mga putul na tung ni Ginuu ta,
indi pagrinampilay tanira yang Dios,
kipurki yang ug̓ali yang Dios maginëgmaën tung yatën ang mga tau.
9 Maning taa yang pagpaita yang Dios yang gëgma na tung yatën.
Yang pag̓aningën nang Ana Nang indi mapakdingan ya ray tinuw̓ul nang magpakiunung tung yatën ang mga tau ug̓ud ëkël tung pagpakugmatay na mapaëyanganita ra anya ta ipagpangabui tang baklu ang mag̓atu tung Dios.
10 Naa yang ustung gëgma.
Bëlag̓an ang mag̓aning ang itay naggëgma tung Dios,
kung indi,
tanyay naggëgma tung yatën ang nagtuw̓ul tung pag̓aningën nang Ana na ang para magpabalaw̓ag tung sintinsiang dumangat da rin tung yatën ug̓ud asan da ngaulikay yang kasisilag̓ën yang Dios tung yatën ang para asanita ra ka nga patawaray na tung mga kasalanan ta.
11 Mga putulung nag̓amaalu,
kumus ginëgmaanita ra nganing yang Dios ta maning tiang durung pisan agkalutuk,
purisu ta yatën ang magpurutul,
dapatita ra kang maggërëgmaan.
Ang Para Masiguru Ta Ëngëd Ang Yang Pagpangabui Ta Atu Tung Ug̓ali Yang Dios, Kaministiran Maggërëgmaanitang Magpurutul (4:12-21)
12 Maskin andang pisan ay taung naita tung pirsunal yang Dios,
piru kung paggërëgmaanitang magpurutul,
ilyag nang ianing,
nag̓asaliranita ra yang Dios yang pagpangabui na ig yang apiktar yang gëgma na tung yatën nasalapay ra tung intinsiun na.
13 Maning taa masiguru ta ang ita pagpakigkapulit da tung Dios ang matuud ig nag̓asaliranita ra ka anya yang pagpangabui na ëkël tung pag̓irimakluën tung kinaisipan ta yang Espiritu Santong ipinatinir na tung yatën.
14 Dispuis,
ta yamën ang mga apustul,
yang nag̓ibalita yamën tung mga tau sigun tung ni Jesu-Cristo,
sinakëp ta mga mata yamën.
Purisu pagpaingmatuurami ra nganing tung nira ang yang pag̓aningën ang Ama yay nagpangay tung pag̓aningën nang Ana Na taa tung kaliw̓utan ang naa ug̓ud ya ray mag̓ing Mananapnay tung yatën ang mga tau ang para mapalibriita ra anya tung sintinsia yang Dios.
15 Kung tinu pay pag̓ubligar ang ti Jesus ya ra ka man yang pag̓aningën ang Ana yang Dios bilang paglinukutay tanira tung pagkadios,
asan da ta taung nag̓asaliran da yang Dios yang pagpangabui na sigun tung pagpakigkapulit na tung anya.
16 Purisu nag̓aispirinsiaan ta ra ang nag̓agëgmaanita ra anya ig ya ra kay nag̓atalig̓an ta tung anya.
Kumus yang ug̓ali yang Dios maginëgmaën tung yatën ang mga tau,
kung tinu pay pagpadayun tung paggërëgmaën na tung mga putul na tung ni Ginuu ta,
asan da ta taung pagpakigkapulit ang matuud tung Dios ig nag̓asaliran na ra yang pagpangabui na.
17 Maning taa nag̓asalapay ra tung intinsiun yang Dios yang apiktar yang gëgma na tung yatën ang yang sistima yang pagpangabui ta pag̓atu rang pag̓atu tung sistima yang pagpangabui ni Jesu-Cristo atiing taa pa rin tung kaliw̓utan ang naa.
Yang katuyuan na tia ay ug̓ud tung uras ang ipanginsapu na ra nganing tung yatënb natëtëngëd tung mga pag̓urubraën ta,
maktël da yang isip tang manalunga tung anya.
18 Kung paggëgmaita rang matuud tung Dios,
indiita ra maëlëd tung anya.
Bilang kung nasalapay ra tung intinsiun na yang apiktar yang gëgma na tung yatën,
asanita ra nga plëkay ta ëlëd ta tung anya.
Kipurki kung may ëlëd ta tung anya,
yang ilyag nang ianing,
nag̓aisipan ta ang muya parusaanita pa anya.
Kung tinu pay pag̓ëlëd pa tung anya,
indi pa nag̓asalapay tung intinsiun yang Dios yang apiktar yang gëgma na tung anya.
19 Nag̓apaggëgmaita ra nganing tung anya may tung mga putul tang mga tumatalig natëtëngëd ilëm ang tanya ra mismu ya ray tukaw ang naggëgma tung yatën.
20 Kung tinu pay pag̓aning ang tanya paggëgma tung Dios ang pagkatapus pagdëmët tung sasang putul nang tumatalig,
bukliën tanya.
Kipurki kung tinu pay indi nganing paggëgma tung sasang putul nang yag dawalay na,
talagang indi ka ëngëd maimu ang yang Dios ang indi na nganing nag̓aita ya pay magëgmaan na.
21 Ya taa yang katuw̓ulan ang ipinakdul na tung yatën ang ita maggëgma tung anya ig maggëgmaita ra ka tung sasang putul ta tung ni Ginuu ta.