Kung Ya Pa Ag̓aring Indiita Magpadëëg Tung Sistimang Pangkaliw̓utan (5:1-5)
5
Yang kumpurming panangëd ang ti Jesus ya ra yang pag̓aningën ang Cristo bilang yang Mananapnay ang pinilik yang Dios,
asan da ta taung inana ra yang Dios ig yang kumpurming paggëgma tung Dios ang yay naana tung anya,
paggëgma ka tung putul nang inana ka yang Dios.
2 Maning taa masiguru ta kung nag̓apaggëgmaita rang matuud tung mga aruman tang inana ra ka yang Dios kung yang Dios ya ray nag̓agëgmaan ta ig yang nag̓ipanuw̓ul na tung yatën ya ra kay nag̓atuman ta.
3 Ay kipurki ya taa yang kamtangan yang paggërëgmaën ta tung Dios ang ita pagtuman yang nag̓ipanuw̓ul na tung yatëna.
Dispuis bëlag̓an masyadug liwag ang tumanën ta tia.
4 Ag̓aningënung bëlag̓an masyadug liwag ang tumanën ta ay natëtëngëd kumpurming tinu pay inana ra yang Dios,
indi ra pagpadëëg tung sistimang pangkaliw̓utan ang kuntrang pisan tung Dios.
Ëkël tung pagparanangërën ta ang ti Jesus talagang ya ra yang pag̓aningën ang Ana Yang Dios bilang paglinukutay tanira yang Dios tung pagkadios,
indiita ra nagpadëëg tung sistimang atiab.
5 Tinu pay indi madëëg̓an yang sistimang pangkaliw̓utan,
kung indi,
suluminti ilëm yang taung panangëd da ang ti Jesus ya ra yang pag̓aningën ang Ana Yang Dios bilang paglinukutay tanira tung pagkadios.
Natëtëngëd Tung Pagpaingmatuud Yang Dios Sigun Tung Pag̓aningën Nang Ana Na (5:6-12)
6 Ti Jesus ang naang pag̓aningën ang Cristo ya ra ka man taang ipinangay yang Dios taa tung kaliw̓utan ang naa ang para magtalus tung ipinagpiar yang Dios tung anya.
Atiing primirung paglua na tung publiku,
napruibaan da ang tanya ka man yang pinilik yang Dios ëkël tung pagpabënyag na tung waic.
Ig tung kauri-urian da nagpailala ra ka sigun tung katuyuan na ëkël tung pagpaturuk na yang dug̓u nang nagpakugmatay.
Yang pagpailala na bëlag̓an ilëm ëkël tung pagpabënyag na,
kung indi,
pati tung pagpaturuk na yang dug̓u na.
Dispuis pa,
pati yang Espiritu Santo pagpaingmatuud ka tung yatën natëtëngëd tung mga bag̓ay ang atiang duruad.
Talagang matalig̓an ta yang nag̓ipagpaingmatuud nang atia ay natëtëngëd pulus matuud yang nag̓ipag̓aning na.
7-8 Kapurisu tulu yang pagpaingmatuud tung yatën natëtëngëd tung ni Jesu-Cristo kung unu pa ëngëd ay pagkabëtang na.
Ya ra yang Espiritu Santo may yang pagpabënyag ni Jesus tung wai may yang pagpaturuk na yang dug̓u nang nagpakugmatay.
Ig yang tulung atia sasa ilëm yang nag̓ipagpaingmatuud nira.
9 Kung yang sasang nag̓ipagpaingmatuud yang aruman tang tau yay nag̓apanangëd ta,
ya pa yang ipinagpaingmatuud yang Dios ang atia natëtëngëd tung pag̓aningën nang Ana Na,
indi ta pa ka ëngëd panangërën?
Ay kipurki mas pang matalig̓an ta yang ipinagpaingmatuud nang atia tung yatën kay tung maskin unu pay nag̓ipagpaingmatuud tung yatën yang aruman tang tau ka ilëm.
10 Purisu yang kumpurming pagtalig yang sadili na tung pag̓aningën ang Ana Yang Dios,
nag̓asiguru na rang pisan ang talagang matuud yang ipinagpaingmatuud yang Dios ang atia.
Piru kung tinu pay indi pag̓impurmi tung ipinagpaingmatuud yang Dios ang atia,
asan da nga ipaimukliay na natëtëngëd indi ra nanangëd tung ipinagpaingmatuud na natëtëngëd tung pag̓aningën nang Ana Na.
11 Ya taa yang linuaan yang pagpanangëd ta tung ipinagpaingmatuud yang Dios.
Asanita ra pinaëyangan na ta baklung pagpangabui tang atu tung pagpangabui nang anday pagtapusan na ëkël tung pagtaralig̓ën ta tung pag̓aningën nang Ana Na.
12 Kung tinu pay may kaampiran tung Ana Na,
yay may pagpangabui nang baklu ang anday pagtapusan na.
Piru kung tinu pay anday kaampiran tung anya,
anda pa kay pagpangabui nang baklu.
Nag̓apabilug Ni Juan Yang Kamtangan Yang Intirung Sulat (5:13-20)
13 Yang mga bag̓ay ang atia,
isinulatu ra tung numyung kumpurming pagtalig tung pag̓aningën ang Ana Yang Dios ug̓ud asan da nga siguruay mi ang naëyanganamu ra ka man ta ipagpangabui ming baklu ang anday pagtapusan nae.
14 Purisu kung magpalëngëtita ra nganing tung anyang mag̓ampu,
may kumpiansa ta ra ang kung unu pay ingalukun ta tung anyang kumpurming uyun tung kalëlyag̓an na,
pamatiënita ra anya.
15 Bilang kumus nag̓askëan ta ra ang kung unu pay ingalukun ta tung anya pamatiën na,
ig disir nag̓askëan ta ra ka ang binuat na ra yang iningaluk ta,
maskin indi pa nag̓aita ta.
16 Katulad da asan ang kung may sasang putul tang tumatalig ang yay maita tang pagbuat ta kasalanan,
piru bëlag̓an yang kasalanan ang makanayan ta ipagkablag na tung Dios ang asta tung sampa,
simpri ipag̓ampu ta tung Dios ang para maulikan da yang pagpakigkapulit na tung ni Jesu-Cristong nawaldang da.
Atia,
ulikën da yang Dios basta yang pag̓abuat na bëlag̓an yang makanayan ta ipagkablag na tung Dios ang asta tung sampa.
Piru may dumang pagbuat ta kasalanan ang yay makanayan ta ya tii.
Kung natëtëngëd tung mga taung maning tia,
indiamu ka ag̓aningënu ang ya pay ipag̓ampu mi tung Diosf.
17 Kung tung bag̓ay,
yang tanan ang pagburuatën ta malain purus kasalanan tung pagtërëlëngën yang Dios.
Piru may kasalanan ang indi makanayan ta ipagkablag yang tau tung Dios ang asta tung sampa.
18 Dispuis nag̓askëan ta ang kumpurming tinu pay inana ra yang Dios,
indi ra pagpadayun tung pagpakasalak na,
kung indi,
ti Jesus ang ya kay maning pa tung inana yang Dios atiing pangingtau na taa tung kaliw̓utan ang naa,
yay pagmanada tung anya ug̓ud indi magëësan ni Satanasg ang yay pinangapunglan yang tanan ang malalain.
19 Nag̓askëan ta ka ang ta yatën,
yang may anya tung yatën ya ra yang Dios ig yang tanan ang mga tau ang pamagpaguyud tung sistimang pangkaliw̓utan yay nag̓akëmkëm ni Satanas.
20 Yang sam bilug pa kang nag̓askëan ta ang yang pag̓aningën ang Ana yang Dios nag̓ingtaung bilug ig pinaëyanganita ra ka anya ta ipag̓intindi ta tung kamatuuran ug̓ud asanita ra magkatinir ta kaampiran ta tung matuud ang Dios.
Bilang magrarampilanita ra yang ultimung Dios durua yang pag̓aningën nang Ana Na ang ti Jesu-Cristo.
Ay tanya ka man yang matuud ang Dios ig yay pagpaëyang tung mga tau ta ipagpangabui nirang baklu ang anday pagtapusan na.
Yang Pangultimung Nag̓ipagpaprusigir Na Tung Nira Ang Indi Ëngëd Mamagtalig Tung Dumang Panalig̓an (5:21)
21 Kapurisu ta numyung agkaw̓ig̓ënung mga anaw,
kumus ti Jesus yang matuud ang Dios,
magbantayamu ra ta mupia tung mga sadili mi ang indiamu ëngëd magtalig tung maskin unu pang bag̓ayay ang nag̓ipakli yang mga tau tung Dios ang nag̓apagamënan.
Ya ra ilëm tia ay masulatu tung numyu,
Juan ang pag̓aningën ang pagmaëpët-ëpët