9
Mag̓aning ti Jesus ang nagsugpat yang bitala na tung nira,
“Iugtulu tung numyu yang kamatuuran.
May duma asan tung numyu ang baklu magkarapatay,
mabilug̓an da ka ëngëd nira yang puirsa yang paggaraëmën yang Dios,”
ag̓aaning ti Jesus duun tung nira.
Yang Paglëw̓ad Yang Pagkabëtang Ni Jesus (9:2-13)
2 Taa numanyan,
pagkataklib da yang ënëm ang kaldaw,
ingkëlan na ti Pedro may ti Santiagong durua ni Juan ang namansitungul tung sasang bukid ang makbu ang tanira tanira ra ilëm.
Atiing duun da tanira,
naglëw̓ad da yang pagkabëtang ni Jesus tung pinagtaralungaan nira.
3 Yang aw̓ël na masulaw ra ig duru rang pisan agkakulit.
Maskin uniën pa ta baka yang sasang aw̓ël ang papanikulitën,
anda ray pakdingan ta kakulit tung aw̓ël na.
4 Numanyan asan da nansilput ti Elias durua ni Moises.
Pamagkërësën tanira ni Jesus.
5 Numanyan nabnga ra ti Pedrong mag̓aning tung ni Jesus,
“Rabbi,
maayën ilëm naawami ra ka.
Tugtayami kang magpakdëng ta tulu nga layang-layangan,
salëgsam bilug mi ni Moises may ni Elias,”
mag̓aning.
6 Naa pala,
napagbitala ra ta maning tia,
ay ya ra ilëm nabnga na yang kumpurming kinaw̓ut yang isip na ay dinlaan da ta mupia tanira yang mga aruman na.
7 Atii,
may sasang panganud ang ya ray nagpaulung tung nirang tanan ang pagkatapus may nagngël da nirang busis ang asan manliit tung panganud ang atia ang mag̓aning ang pagbitala,
“Uay,
atia ra yang pag̓aningënung anaw ang nag̓apabuyukanu ta gëgmaw.
Intindiën mi ra ta maayën yang kumpurming ianing na tung numyu,”
mag̓aning.
8 Unaw̓is manëlëng-tëlëng tanira,
anda ray naita nira,
kung indi,
ti Jesus da ilëm ang sam bilug.
9 Numanyan atiing pamandanëk da tanira tung bukid ang atii,
pinag̓urdinan da tanira ni Jesus ang pinag̓aning,
“Indiamu ra kanay magbaw̓alitaën maskin tung ninu pa natëtëngëd tung naita ming atii ang asta kaw̓utun da ilëm yang uras ang yuung pag̓aningën ang Maninga Tau pabungkarasënaw ra yang Dios,”
mag̓aning.
10 Numanyan maskin inëgtëman da ka man nira yang bag̓ay ang atia,
piru durung kërësën-kësën nira natëtëngëd tung inaning na ang tanya buiën si ka yang Dios ang uman,
kung unu pa kaya ay lagpakan na.
11 Purisu ya ray ipinagtalimaan nira tung anyang mag̓aning,
“Ay kung maning tii yang mainabu tung nuyu,
ayw̓a kaya nag̓itulduk yang mga sag̓ad ang ti Elias ang atiang baklu ka ilëm naita ta,
dapat unu tukaw ang magbalik baklu lumua yang pag̓aningën ang Cristo?”
12 Mag̓aning ti Jesus ang tuminuw̓al,
“Kung tung bag̓ay,
tama ka man yang nag̓itulduk nirang atia ang yang pag̓aningën ang Cristo matkawan ni Elias ang lumua ang pagkatapus yay magpaiwan-iwan ug̓ud simpan da rin yang mga taung mamampauyun tung pag̓uri tung anya.
Piru yang dapat ang panëëm-nëëman mi ta maayën ya ra yang sasang napabtang tung kasulatan natëtëngëd tung yëën ang pag̓aningën ang Maninga Tau ang yuu unu durung pinitinsiang mapasaranu ay lamkuënaw ta mga tau ang yuu anday kuintaung pagkataua.
13 Piru iugtulu tung numyu,
kuminaw̓ut da ka man ti Eliasb piru binwatan ta mga tau yang kumpurming nalëlyag̓an nira ang katulad ka tung napabtang tung kasulatan natëtëngëd tung anya,”
mag̓aning.
Yang Pagpamaayën Ni Jesus Tung Sasang Mulang Dinimunyu Ra Rin (9:14-29)
14 Taa numanyan,
pandanëk da nira tung bukid,
kinaw̓utan da nira yang mga taung nag̓apangugyatan ni Jesus ang nagkarabutwan tung datal.
Pagkaw̓ut nira,
durug dakël yang mga taung naita nirang pamagtaripukpuk tung mga tauan nang atia ig may mga sag̓ad tung mga riglamintung pamagpakigsug̓a tung nira.
Jesus Heals a Boy with an Unclean Spirit (Marcos 9:14-29)
15 Atii,
pagkaita yang mga taung atiang buntun tung ni Jesus,
nangabërëng da ta mupia.
Purisu dayun da nirang dinag̓umukan ang kinumusta.
16 Numanyan dayun dang tinalimaan ni Jesus yang mga taung nag̓apangugyatan nang atia ang inaning,
“Unu pay nag̓apagsurug̓aan mi?”
17 Numanyan may sasang tau asan tung mga taung atiang gaw̓ung ang ya ray nagsublang ang mag̓aning tung ni Jesus,
“Amëëy,
ag̓idangëpu ra tung nuyu yang anaung lalii ay pag̓aëkël-ëkëlan ta dimunyung yay pagpaapa tung anya.
18 Kada ulag̓ën yang dimunyu,
nag̓ilampak na tung tanëk.
Pagkarëtkët yang isi na ang nunut da ka ta paglawayway yang nganga na,
pagkatapus dayun dang mangëkbël.
Ipinataw̓angu ra rin tung mga taung naang nag̓apangugyatan mu ang para palayasën nira yang dimunyung atia,
piru indi ra ka ilëm nasarangan nira,”
mag̓aning.
19 Numanyan tung pagtuw̓al ni Jesus,
tung nira rang tanan iparumbuay na yang bitala nang mag̓aning,
“Uu,
yamung mga {tauamung mga} masigkanasyunu simanyan!
Ay ra yang pagtalig mi?
Midyu tung maglakgasënaw ra tung numyu kung sanuamu ra kaya ngaëyangay ta ipagtalig ming ustu tung yëën!
Ala,
ëklan mi ra tani tung yëën yang mula,”
mag̓aning.
20 Atii,
dayun dang ingkëlan nira yang mula tung anya.
Numanyan pagkaita yang dimunyu tung ni Jesus,
dayun na rang linuw̓ag yang mulang pinapagkëgtëng ta mupia ang asta nalampak da ilëm tung tanëk ang nagpulpul ang nunut da ka ta paglawayway yang nganga na.
21 Dayun dang tinalimaan ni Jesus yang amaën ang inaning,
“Pira rang takun ang maning da tia yang pagkabëtang na?”
Ag̓aaning yang may anang tuminuw̓al,
“Duminalpët tung anya atiing mula pang gësyë ang asta ra ilëm simanyan.
22 Muya-muyang pag̓atag̓aman da rin yang dimunyung imatayën.
Ang kaisan,
manga ilanggid na tung apuy,
ang kaisan manga ilanggid na ka tung wai ang para malmës.
Purisu ildawayami kang taw̓angan,
kung masarangan mu,”
ag̓aaning.
23 Mag̓aning ti Jesus ang nagtimalës,
“Unu pay gustu mung ianing kung masaranganu?
Kung tinu pay magtalig tung yëën,
maimuanu ta maskin unu pa.”
24 Atii dayun dang nagkëkëndalën yang may ana ang mag̓aning tung ni Jesus,
“Aay,
nag̓apagtalig̓aw ra rin tung nuyu!
Iplëk mu ra yang pagkadiskumpiaduu!”
mag̓aning.
25 Numanyan atiing pagkaita ni Jesus yang mga taung atiang buntun ang midyu mamagdag̓umuk si tung anya,
dayun dang nagkalalangan tung dimunyung atiang mag̓aning,
“Yawang dimunyua ang pagpaapa kag pagpabëngël tung mulang naa,
lalangana ra yëën ang maglayasa ra asan tung anya ang asta tung sampa indi mu ra ëngëd balikan,”
mag̓aning.
26 Atii,
naglëlpakën da yang dimunyu ang linuw̓ag na yang mulang pinapagkëgtëng ta muya-muya,
baklu naglayas.
Numanyan yang mula,
maninga patay ra.
Purisu ya ra ka man ag̓aningay yang kadaklan ang mga tau ang,
“Patay ra!”
27 Piru ti Jesus tanya,
pagpëg̓ës na tung kalima yang mula,
dayun na rang pinabungkaras ang asta kumindëng da.
28 Taa numanyan,
pagkapaklëd ni Jesus tung balay ang tanira tanira ra ilëm yang mga taung nag̓apangugyatan na,
dayun da nirang tinalimaan ang inaning,
“Natëtëngëd tung unu pa w̓asu indiami nasarang ang napagpalayas tung dimunyung atia?”
29 Mag̓aning ka ti Jesus ang nagtuw̓al,
“Yang maning tiang klasi ta dimunyu indi ta mapalayas kung indi ta ipag̓ampu tung Dios,”
mag̓aningc.
Nag̓asambit Si Ni Jesus Yang Dapat Ang Mapasaran Nang Durug Liwag (9:30-32)
Mateo 17:22-23; Lucas 9:43b-45
30-31 Taa numanyan,
ti Jesus may yang mga taung atiang nag̓apangugyatan na,
dayun dang namagliit tung banwang atii ang namagpadayun yang pagparanawën nira duun tung sinakëpan yang Galilea.
Gustu ni Jesus ang anday makdëk tung pagparanawën nirang atia ug̓ud liw̓ianu rang magpasanag tung mga aruman na.
Maning taa yang inaning na tung nira:
“Yang mainabu tung yëën ang pag̓aningën ang Maninga Tau,
iintrigaw tung pudir yang mga taung ya ra ka man ay mamagpaimatay tung yëën ang pagkatapus kung mapaimatayaw ra nganing nira,
tung yaklung kaldaw magbungkarasaw si ka,”
mag̓aning.
32 Ug̓aring indi ilëm namarësmësan nira yang ipinasanag nang atia.
Yadwa pa pamandalëndën pa tanirang mamagtalimaan tung anya kung unu pay gustu nang ianing.
Yang Magparanëk Tung Pagkabëtang Na, Yay Landaw Tung Pagtërëlëngën Yang Dios (9:33-50)
33 Taa numanyan,
nangakaw̓ut da duun tung lansangan ang Capernaum.
Pagkatapus atiing duun da tanira tung kaklëran yang balay ang pag̓atiniran nira,
nagtalimaan da ti Jesus tung nirang mag̓aning,
“Ëlat kanay,
unu pay pinagbaralalaan mi nungayna tung pagparanawën ta?”
ag̓aaning.
34 Piru tanira indi namag̓iw̓ëk-iw̓ëk.
Ay ya pa ag̓ari,
namagbaralalaan da kung tinu pay pinakalandaw tung nirang tanan ang mga tauan na.
35 Numanyan dayun dang nagkarung ti Jesus ang nagguuy tung mga tauan nang atiang sam puluk may durua ang mamagpalëngët da tung anya.
Napagbitala ra tung nirang mag̓aning,
“Kung tinu pay nag̓alëlyag ang tëlëngan yang Dios ta landaw,
kaministiran ang yang sadili na ipabtang nang pinakaaranëk tung tanan ang mga kaarumanan na ig mapinagpaiwan-iwan tung nirang tanan,”
mag̓aning.
36-37 Numanyan,
may sasang mulang ingkëlan ni Jesus ang kinaw̓ëd na tung pinagtaralungaan nirang tanan.
Pagkatapus,
dayun sing nagbitala tung nirang mag̓aning,
“Kung tinu pay magparanëk tung sadili nang magrisibi tung maskin tinu pa ang aranëk ta pagkabëtang ang pariu ka tung mulang naa natëtëngëd tung pagtalig na tung yëën,
katimbang nang yuu kay nag̓arisibi na.
Ig kung tinu pay magrisibi tung yëën,
bëlag da ilëm yuuy nag̓asapët na,
kung indi,
pati yang nagtuw̓ul tung yëën,
ya kay nag̓arisibi na,”
mag̓aning.
38 Numanyan pagkagngël ni Juan tia,
dayun dang nabnga tung ni Jesus ang mag̓aning,
“Amëëy,
nuntaa pa,
may sasang taung naita yamën ang atia pala nag̓apagpalayas ta mga dimunyu ëkël tung kagaëman mu ang yang aran mu yay nag̓ainambit na.
Purisu dayun dang pinagsambëng yamën ay natëtëngëd bëlag̓an kang lag̓ing ugpu yamën ang mga tauan mu.”
39 Mag̓aning ti Jesus ang minlës,
“Ëëy,
dapat ang indi mi ra rin pinagsambëng.
Ayw̓a,
yang sasang taung nag̓apagpalapus da nganing ta pruibang maktël ëkël tung kagaëmanu,
indi magsaway agkali tung yëën.
40 Tutal,
yang taung indi nganing pagkuntra tung yatën,
katimbang nang pagtaw̓ang ka tung yatën.
41 Ay kipurki kung tinu pay magpadag̓ën-dag̓ën tung numyu,
maskin gësyëng bag̓ay ra ilëm yang itaw̓ang na ang katulad ka tung sam basu ra ilëm ang waing ipainëm na tung numyu natëtëngëd ag̓ilalaënamu ra ka anya ang pag̓atuw̓ulamu ra yëën ang pag̓aningën ang Cristo,
iugtulu tung numyu yang kamatuuran,
talagang balësan ka ëngëd yang Dios yang pagtaraw̓angën nang atia tung numyu.
42 Piru kanugun yang pagkabëtang yang sasang tau tung uri ang kumpurming magpatalang tung sasang pagtalig da tung yëën ang asta magpakasalak da ubin mamalpas da tung yëën,
maskin sam bilug ilëm tung mga mamulang naad.
Ay kipurki mas malbat yang kalainan ang maagmaan na kay tung buntug̓an da ilëm duun tung alauran.
43-44 Dispuis pa,
kung midyu yang kalima ming tuu yay gamitën ming magpakasalak,
sibaya mapungkulanamu ra asan ta panguntiël mi tung tuksu,
tung magpanunut,
indiamu ra ëngëd.
Kipurki maayën pang maplëkanamu ra ta sam parti ilëm tung tinanguni mi kay tung anda pay buin ang duunamu ra manampët tung impirnu ang yang apuy na andang pisan ay kapugdaw-pugdawan nang asta tung sampa.
45-46 Pariu ka kung midyu yang kakay mi yay gamitën ming magpakasalak,
sibaya mapungkulanamu ra asan ta panguntiël,
tung magpanunut,
indiamu ra ka ëngëd.
Maayën pang pungkul yang kakay ming sam bëlak,
ang mapagpakigsapënamu ra tung Dios kay tung duruay kakay mi ang duunamu ka ilëm iplëkay tung impirnu.
47 Pariu ka ta palaksu kung midyu yang pagtëlëng mi ya ray makanayan ta ipagpakasalak mi,
sibaya maluat da asan yang mata mi tung panguntiël mi,
tung magpanunut,
indiamu ra ëngëd.
Maayën pang sam bilug da ilëm yang mata ming malg̓ud tung paggaraëmën yang Dios tung uri kay tung duruay mata mi ang duunamu ra ka ilëm iplëkay tung impirnu.
48 Duun anda ëngëd ang pisan ay katapus-tapusan yang pinitinsiang maagmaan yang mga tau,
kung indi,
dumayun ka ëngëd yang pagkadiadu nirang asta tung sampae.
49 Dapatamu rang manguntiël ta mupia tung mga panuksung mga maning tia,
ay kipurki yang tanan kasinan ta apuyf.
Utru Si Yang Kasin Ya Ra Ag̓ipananglitay Ni Jesus Tung Gëgma Nira Tung Anya (9:50)
50 “Kung natëtëngëd tung kasin,
kung tung bag̓ay,
durug tinlung gamitën.
Piru nusias malaktan da ta dumang bag̓ay,
anda ray rimidyung sarang ang mabuat ang para maulikan pa yang pagkatëma nag.
Purisu kaministiran ang yang gëgma mi tung Dios maning pa tung tëma kang pirmi ig yang pag̓uruyunan ming magpurutul pirmi kang ëklan mi tung matinlu,”
mag̓aningh.