Yang Magparanëk Tung Pagkabëtang Na, Yay Landaw Tung Pagtërëlëngën Yang Dios (18:1-6)
18
Numanyan tung pira pang kaldaw,
yaming nag̓apangugyatan ni Jesus,
nagpalëngëtami ra tung anyang nagtalimaan ang mag̓aning,
“Amëëy,
tinu pay pinakalandaw tung tanan ang mga taung lug̓ud tung palaksu yang paggaraëmën yang Dios?”
mag̓aning.
2 Numanyan anday dumang binuat ni Jesus,
nagguuy ra tung sasang mula ang ya ray pinakdëng na tung pinagtaralungaan yamën ang tanan.
3 Pagkatapus dayun dang nagbitala tung yamën ang mag̓aning,
“Iugtulu tung numyu yang kamatuuran,
kung indi mi umanën yang mga isip mi ang para magpakbungamu ra tung mga mamulang mapinagparanëk,
tay puis,
indi mi ra ëngëd maispirinsiaan tung mga sadili mi kung unu pay palaksu yang paggaraëmën yang Dios tung pagpangabui mi.
4 Purisu kung tinu pay magparanëk tung sadili nang magpakbung tung mulang naa,
asan da ta taung tëlëngan yang Dios ang yay sasang landaw tung tanan ang pamagpagaëm tung anya.
5 Dispuis pa kung tinu pay magparanëk tung sadili nang magsapët tung maskin tinu pa ang aranëk tung pagtëlëng na,
maskin sasang mulang maning ilëm taa,
katimbang nang yuu kay nag̓asapët na ay nag̓usuyun na yang sasang nag̓auyunanu.
6 Piru kanugun yang pagkabëtang yang sasang tau tung uri ang kumpurming magpatalang tung sasang pagtalig da tung yëën ang asta magpakasalak da ubin mamalpas da tung yëën,
maskin sam bilug ilëm tung mga mamulang naa.
Ay kipurki mas malbat yang kalainan ang maagmaan na kay tung buntug̓an da ilëm duun tung alauran.
Dapat Manguntiël Ta Mupia Tung Tuksu Ang Indi Ra Ëngëd Magpanunut (18:7-9)
7 “Kanugun yang mga tau taa tung kaliw̓utan ang naa ay kipurki durung makanayan ta ipagpakasalak nira.
Kung tung bag̓ay,
indi kang lag̓i malikayan tia,
piru kung tinu pang tauay ang matëngëran ta ipagbuat yang duma ta maning tia,
kanugun yang pagkabëtang na tung uri ay mas pang maglëbat yang sintinsiang talungaën na.
8 Dispuis pa,
kung midyu may sasang buatën mi ang yang kalima ubin kakay mi yay gamitën ming magpakasalak,
sibaya mapungkulanamu ra asan ta panguntiël mi tung tuksu,
tung magpanunut,
indiamu ra ëngëd.
Maayën pang pungkulamung magpasapën tung Dios kay tung duruay kalima mi ubin duruay kakay mi ang duunamu ra ka ilëm iplëkay tung apuy ang anda ëngëd ang pisan ay kapugdaw-pugdawan na ang asta tung sampaa.
9 Pariu ka kung gamitën mi yang mga mata ming magpakasalak,
sibaya maluat da asan tung panguntiël mi,
tung magpanunut,
indiamu ra ëngëd.
Maayën pang sam bilug da ilëm yang mata ming magpasapënamu ra tung Dios kay tung duruay mata ming duunamu ra ka ilëm iplëkay tung impirnu ang yang apuy na anda ëngëd ang pisan ay kapugdaw-pugdawan nang asta tung sampab.
Nag̓ipananglit Ni Jesus Ang Durug Kaimpurtanti Ang Indi Ëngëd Nira Lamkuën Yang Mas Aranëk Tung Nira (18:10-14)
10-11 “Mag̓amlig̓amu ka ang indiamu magtag̓am ta lamku tung mas aranëk tung numyu,
maskin tung sasa ilëm ang mulang maning taa.
Kipurki iugtulu tung numyu,
maski nganing tanira may mga angil ka duun tung langit ang nag̓apanuw̓ul yang Dios ang mag̓asikasu tung nira.
Pirming pag̓irintindian tanira ni Ama duun tung langitc.
12 Ta,
unu pa tung pag̓intindi mi?
Unu pa w̓asu ay buatën yang sasang taung may kaayëpan nang sang gatus nga karniruan ang pagkatapus may sam bilug ang natalang da?
Simpri butwanan na ra kanay yang siam ang puluk may siam tung pangaraw̓an nira duun tung kabukiran ug̓ud sagyapën na atiing sam bilug ang nalsik da.
13 Pagkatapus kung maita na ra nganing,
iugtulu tung numyu,
mas pang magkasadya yang isip na natëtëngëd tung karniru nang atiang nasagyapan na kay tung siam ang puluk may siam ang indi nagkaratalang.
14 Maning kang pisan tia tung Ama mid duun tung langit.
Anda ëngëd ay gustu na ang tung tanan ang mga tumatalig tung yëën ang may mablag tung anyang asta tung sampa may sam bilug,
maskin aranëk ta pagkabëtang ang katulad ka tung mga mamulang maning taa ilëm.
Yang Nag̓ikunsiu Ni Jesus Tung Mga Tauan Na Ang Kung May Sasang Putul Nirang Nagbuat Ta Kasalanan Tung Aruman Na, Kung Unyën Pa Nira (18:15-20)
15 “Dispuis pa,
kung may sasang putul ming tumatalig ka tung yëën ang ya ray nagbuat ta kasalanan tung sam bilug tung numyue,
yawang binuatan,
angayan mu ra kanay ang pakigkësënan ta matinlu natëtëngëd tung binuat na tung nuyu ang yamu yamu ilëm ang durua.
Kung mamati tung nuyu,
asan da mag̓inulikay si yang pagputulan ming durua tung yëën.
16 Piru kung indi mamati tung nuyu,
mag̓imbitara ra tung sasang aruman mu kang tumatalig ubin durua ug̓ud kasiraanamu rang magbalik tung anyang magpaiwan-iwan.
Ay tung maning tia,
maskin unu pay mapagkërësënan mi,
makumpurmian da ta durua ubin tulu nga sistigusan ang katulad ka tung nasambit tung kasulatanf.
17 Piru kung indi pa ka ëngëd mamati,
ipakaw̓ut mi ra ilëm tung kadaklan ang mga kaputulan ming sam pundaan ang para mamagsaragpun da kanay ang para tanirang tanan mamagtaraw̓ang ta kunsiu tung anyang mangamin da.
Ang pagkatapus ang maskin pa tung intirung sam pundaan indi pa ka ëngëd mamati,
indi mi ra ilëm saptën,
kung indi,
ipabëtang mi ra ilëm ang bëlag̓an dang putul mi tung yëën ang magkapariu ka tung sasang tag̓a dumang nasyun ang indi kang lag̓i pag̓intindi tung Dios ubin sasang mandarayang manigpanukut ang anday gustu nang magsug̓atg.
18 Iugtulu tung numyu yang kamatuuran,
kung tinu pay indi mi patawarën tani tung katanëkan,
tukaw ra kang lag̓ing indi ra pinatawad yang Dios duun tung langit.
Ig kung tinu pay patawarën mi tani tung katanëkan,
tukaw ra kang lag̓ing pinatawad da yang Dios duun tung langith.
19 Naa pa yang gustuung isugpat si tung numyung talagang matuud.
Maskin duruaamu ilëm ubin mas dakëlëamu pa taa tung katanëkan,
kung magsaranyug̓amu rang magpataw̓ang tung ni Ama duun tung langit ang para paëyanganamu ra anya ta ipagsulw̓ad mi tung mga prublimang mga maning tiang nag̓aëyang tung grupu mi,
talagang taw̓anganamu ra anya.
20 Kipurki maskin duruaamu ilëm ubin subraamu pa tung durua,
maskin sanuamu pang magsaragpun ang mga tauanu ug̓ud magpataw̓angamu ra tung ni Ama,
asanaw ka pagpakigsasa tung numyu.”
Yang Pananglit Ni Jesus Ang Yang Mga Tauan Na Dapat Magparatawaran (18:21-35)
21 Numanyan ti Pedro ya ray nagpalëngët tung ni Jesus ang nagtalimaan ang mag̓aning,
“Ginuu,
asta mapira pang patawarënu yang sasang putulung tumatalig ang nagbuat ta kasalanan tung yëën?
Tama ra w̓asu ang asta mapitung bisis?”
ag̓aaning.
22 Mag̓aning ka ti Jesus ang minlës,
“Iugtulu tung nuyu,
bëlag̓an ilëm pitung bisis,
kung indi,
asta tung pitung puluk ulitën pa ka ta mapitung bisis.
23 Ag̓aningënamu ra yëën ta maning tia ay yang palaksu yang paggaraëmën yang Dios tung mga tau ay maning taa tung ipananglitung naa.
May sasang Adi.
Yang Ading naa,
naisip dang magrindikuinta tung mga turuw̓ulun na natëtëngëd tung mga utang nira tung anya.
24 Numanyan atiing naimpisaan na ra ta pagrindikuinta,
may sasang turuw̓ulun nang pinatawag̓an nang manalunga tung anya ay natëtëngëd tung kinautangan nang kuminaw̓ut da tung pira-pira rang milyun.
25 Numanyan kumus anday kuartang mabayad na,
nagkalalangan da yang Adi ang tanirang sam pamilya ipaalang da ilëm unu tung duma ang para buatën da ilëm ang mga kirëpën.
Asta yang tanan ang mga ganadus na ipaalang da ka unu ang para yang kabayaran nang kuarta ya ray idata tung kinautangan na.
26 Taa numanyan,
pagkagngël yang turuw̓ulun yang kalalangan yang Adi ang maning da tii,
dayun dang nagluud tung pinagtalungaan nirang durua ang nagpakiluuy tung anyang mag̓aning,
‘Ay Maginuung Adi,
kung maimu ilëm tung nuyu,
pakdulay kanay ta palw̓ad ang para mabayaranu kang luw̓us tung nuyu,’
mag̓aning.
27 Numanyan pagkagngël yang Adi,
ya ra ngaildaw tung turuw̓ulun nang atia.
Purisu pinatawad na ra ilëm ang inimpas yang tanan ang nag̓ipagpabayad na ra rin tung anya.
Pagkatapus dayun na ra kang pinalpasan ang pinapanaw.
28 “Taa numanyan pagkalua yang turuw̓ulun ang atia,
may napanawan na rang sasang masigkaturuw̓ulun na ang may nautangan na ka tung anya ang indi nganing mangikuy-ikuy tung pinatawad yang Adi tung anya.
Pagkaita na,
dayun na rang pinggësan ang tinag̓aman na ra ta këg̓a ang mag̓aning,
‘Ëëy,
yang utang mu,
bayaran mu rang lag̓i numaan tung yëën,’
mag̓aning.
29 Numanyan ya ra nga luud yang masigkaturuw̓ulun na tung pinagtalungaan nirang durua ang nagpakiluuy tung anyang mag̓aning,
‘Kung maimu ilëm tung nuyu,
ungkuy,
pakdulay kanay ta palw̓ad ang para mabayaranu ka yang nautanganu tung nuyu,’
ag̓aaning.
30 Piru yang sam bilug indi ra ka ëngëd nalëlyag,
kung indi,
ya ra ipakalabusay na yang aruman na ang asta mabayaran na yang utang na.
31 Taa numanyan,
maita yang mga masigkaturuw̓ulun na yang binuat nang atia,
duru rang kaërëp nira tung anya.
Purisu dayun dang namansiangay tung Ading namagkig̓a.
32 Purisu numanyan pinaguuyan si yang Adi yang turuw̓ulun nang atiang pinatawad na.
Mag̓aning tung anya,
‘Yawa anda ëngëd ay kakuinta-kuinta mung pagkaturuw̓ulun.
Pinatawara ra nganing yëën tung tanan ang nag̓ipagpabayaru ra rin tung nuyu natëtëngëd ilëm tung pagpakiildaw mu tung yëën.
33 Bëlag bang dapat da ka rin ang naildawa ra ka tung sasang masigkaturuw̓ulun mu ang katulad ka tung yëën ang naildawaw ka nganing tung nuyu?’
ag̓aaning.
34 Numanyan kumus durung kasilag yang Adi tung turuw̓ulun nang atia,
anday duma,
ipinakalabus na ra ilëm ang para duun da tigbakay ta mupia yang mga manigparusa ang asta mabayaran na ra kang luw̓us.
35 Maning kang pisan tia yang buatën tung numyu ni Ama duun tung langit kung alimbawa indiamu ka magpatawad tung sasang putul ming tumatalig tung yëën ang tëdëk tung mga kinaisipan ming sasa may sasa,”
mag̓aning.