19
Numanyan atiing pagkatapus ni Jesus yang pagparasanag̓ën nang atia tung yamën ang mga tauan na,
dayun dang nagliit tung Galilea ang minangay duun tung sinakëpan yang Judea ampir duun tung subang atiang paggug̓uuyan ang Jordan,
kasiraanami ra kang mga tauan na.
2 Duru-durung mga taung namagpakignunut tung anya.
Kung tinu pay may mga laru tung nira,
ya ray pinampamaayën na.
Yang Linyang Nag̓ipagpasanag Ni Jesus Natëtëngëd Tung Pagkarasawaën (19:3-12)
3 Taa numanyan may mga Pariseong namagpalëngët da tung anya ay gustu nirang papagmintiraën ang para mabitala ilëm ta magbalaw̓ag tung katuw̓ulan yang Dios.
Purisu dayun dang namagtalimaan tung anyang mag̓aning,
“Uyun basu tung mga katuw̓ulan ang nag̓ausuy ta ang yang sasang lalii puiding magpakiblag tung kasawa na,
maskin unu ra ilëm ang katadlënganay ang patiëlan na?”
4 Mag̓aning ka ti Jesus ang nagtimalës,
“Siguru nabasa mi ra ka yang sasang napabtang tung kasulatan ang atiing primirung pag̓imu yang Dios tung tau,
inimu na unung lalii may baw̓aya.
5 Dispuis may napabtang ka asan ang maning taa:
‘Purisu ya ra kay natëngëran na ang yang sasang lalii magliit da tung ni tatay na may tung ni nanay na ay magpakiunung da tung ni kasawa na ang pagkatapus tanirang durua sa nga tinangunian da ilëm,’
mag̓aningb.
6 Ig disir,
bëlag̓an dang durua pa kung indi sa nga tinangunian da ilëm tanira.
Purisu yang pinapagsasa ra yang Dios dapat ang indi bëlag̓ën ta tau,”
mag̓aning.
7 Mag̓aning si yang mga Pariseong namagsulingaag tung anya,
“Ëlat kanay,
ayw̓a kaya may urdinansang ibinutwan ni Moises ang yang sasa unung lalii puidi unung magpakiblag tung kasawa na basta pakdulan na ra ilëm unu ta bawdukumintu ang yay magpaingmatuud ang tapus da ka man yang pagkakasawaan nirac?”
8 Mag̓aning si ti Jesus ang nagtimalës,
“Linugtanamu ra ilëm ni Moises ang magpakiblag tung mga kasawa mi natëtëngëd ilëm tung katëtëg̓asën yang mga kinaisipan mi,
piru bëlag̓an ëngëd maning tia yang intinsiun yang Dios atiing pag̓imu na tung primirung lalii may tung primirung baw̓ay.
9 Purisu iugtulu tung numyu,
kung tinu pang laliiay ang magpakiblag tung kasawa na ang pagkatapus mangasawa sing uman tung dumang baw̓ay,
asan da nga limbungay na yang kasawa nang dati,
puira pa kung yang ipagpakiblag na tung kasawa na yang pagpaluku-luku na,”
mag̓aning.
10 Numanyan yaming nag̓apangugyatan ni Jesus,
yami ray nabnga ang mag̓aning tung anya,
“Tay kung maning da tii yang kapulutan yang pagkarasawaën,
maayën pang indi ra ilëm mangasawa yang sasang lalii.”
11-12 Mag̓aning ka ti Jesus ang minlës,
“Kung tung bag̓ay,
may mga lalii ka man ang indi mapag̓usuy tung intinsiun yang Dios ang lalii may baw̓ay magkakasawaan.
Kipurki yang duma dispirinsiadu yang pagkabëtang nirang mga lalii ang dëngan tung pagkatau nira.
Yang duma mga kirëpën ang ya ra ag̓ipakapunay yang mga ag̓alën nira.
May duma pa ang maskin puiding mangasawa,
indi ra ka malëlyag ay ipinalandaw ra ëngëd nira yang pagpatuw̓ul nira tung Dios ang para mas pang magdakël yang mga taung magpagaëm ang bug̓us tung Diosd.
Piru yang kadaklan ang puiding mapag̓usuy tung intinsiun yang Dios ang atia,
mag̓usuy ra,”
mag̓aning.
Yang Taung Risibiën Yang Dios Ya Ra Yang May Pagkamula Na (19:13-15)
13 Pira pang kaldaw,
may mga taung namag̓ëkël tung mga ana nira tung ni Jesus ang para pampabisaën da nira tung anya.
Piru sinambëng da yamën ang nag̓apangugyatan na.
14 Pagkagngël ni Jesus tia,
dayunami rang inampalar nang,
“Ëëy,
yang mga mamulang atia,
paw̓ayaan mi ra ilëm ang mamagpalëngët da tani tung yëën.
Indi mi ra ëngëd pagsagangën,
ay kipurki kung tinu pay may pagtalig nira tung Dios ang katulad ka tung pagtaralig̓ën yang mga mamulang naang bug̓us tung mga ginikanan nira,
lug̓ud da tung mga taung pamagpagaëm ang bug̓us tung Dios.”
15 Pagkatapus dayun na rang pinampabisa na yang mga mamulang atia.
Pagkatapus tia,
dayun dang nagliit duun tung banwang atii.
Yang Sasang Manggaranën Durug Liwag Ang Magpalamtuk Yang Pundu Yang Kinaisipan Nang Magpagaëm Tung Ni Jesus (19:16-30)
16 Taa numanyan may sasang kaldaw ang may sasang taung nagpalëngët tung ni Jesus ang mag̓aning,
“Amëëy,
kung maimu ilëm,
may gustuu rin ang talimaanën tung nuyu.
Unu pa w̓asung ubraay ang matinlu ang dapat ang buatënu ug̓ud mapagpasapënaw tung Dios ang anday katapus-tapusan?”
17 Mag̓aning ka ti Jesus ang nagtimalës,
“Ayw̓at ministir pang yuu pay talimaanën mu kung unu pang ubraay ang matinlu ang yay dapat ang buatën mu?
Ultimu ilëm yang sam bilug ang magkabag̓ay ang aningën mung maayën.
Tumanën mu yang mga katuw̓ulan na kung gustu mung magpasapën tung anya ang anday katapus-tapusan,”
mag̓aning.
18-19 Mag̓aning si yang sam bilug,
“Ayw̓a,
unu pang katuw̓ulanay ang dapat ang tumanënu?”
Mag̓aning si ti Jesus ang minlës,
“Ya taang ulitënu.
‘India mangimatay ta masigkatau mu,
india maglimbung tung kasawa mu,
india manakaw ta bëlag̓an nuyu,
india manistigus ta bukli tung katalungaan yang ustisia,
galangën mu ti tatay mu may ti nanay mue ig gëgmaan mu yang aruman mung tau ang katulad ka tung paggërëgmaën mu tung sadili muf.’”
20 Mag̓aning ka yang kaw̓ataan ang atiang minlës,
“Yang tanan ang atia luw̓us dang nag̓ausuyu.
Unu pa pa ka ëngëd ay pagkakulang tung yëën ang dapat pang buatënu?”
21 Mag̓aning ka ti Jesus ang minlës,
“Kung yawa talagang gustu mung magpakumplitu,
tay mulika ra kanay.
Ipaalang mu ra yang tanan ang ganadus mu.
Yang kabayaran nang kuarta ipamakdul-pakdul mu ra tung mga maliliwag̓ën.
Kung ya ray buatën mu tia,
tay puis magkatinira ra ta kapakli nang maning pa ka tung manggad duun tung langit.
Dispuis pagkatapus ta pamakdul-pakdul mu,
magbalika ra tani ang magpakignunut tung yëën ang para ugyatana ra yëën,”
ag̓aaning.
22 Numanyan pagkagngël yang kaw̓ataan yang itinuw̓al ni Jesus ang atia tung anya,
dayun da ilëm ang nagliit ang duru rag kapungaw yang isip na.
Ay ya pa ag̓ari,
durung kamanggaran na.
23 Atii dayun dang nagbitala ti Jesus tung yamën ang nag̓apangugyatan nang mag̓aning,
“Iugtulu tung numyu yang kamatuuran,
durug liwag ang yang sasang manggaranën ang magpalamtuk yang pundu yang isip nang magpagaëm ta bug̓us tung Dios.
24 Ulitënu pa ta minsa.
Kung maliwag nganing ang yang sasang kamilyu pumuyuk tung buli yang tingway,
mas pang maliwag ang yang sasang manggaranën magpalamtuk tung pundu yang isip nang magpagaëm ta bug̓us tung Dios.”
25 Numanyan pagkagngël da yamën yang inaning ni Jesus ang atia,
durung pisan agkadakul yang pagkabërëng yamën.
Mag̓aningami tung anya,
“Tay kung maning tii pala ang maski nganing yang mga manggaranën ang tag̓isip yamën ang alëngët da tung Dios indi nganing matapnay,
ya pa yang kadaklan ang mga tau?”
26 Atii dayun dang nanëlëng-tëlëng ti Jesus tung nirang mag̓aning,
“Kung tung tau ilëm ka man,
indi maimu tia.
Piru kung tung Dios,
maimu ra tia ay natëtëngëd tung anya maimu yang tanan,”
ag̓aaning.
27 Numanyan ti Pedro ya ray nabnga ang mag̓aning,
“Tëëd mu,
Amëëy,
ta yaming pagpaugyat tung nuyu,
binutwanan da yamën yang tanan basta magpakignunutami ra ilëm tung nuyu.
Unu pa w̓asu ay iblës yang Dios tung yamën?”
28 Mag̓aning ti Jesus ang minlës,
“Iugtulu tung numyu yang kamatuuran,
kung kaw̓utun da nganing yang kaliw̓utan ang baklu,
yuung pag̓aningën ang Maninga Tau,
kumarungaw ra tung puistuung maggaraëmën ang durung pisan agkasulaw yang pagkabëtangu.
Tung uras ang atia,
ta yamung sam puluk may durua ang nagpakignunut tung yëën taa tung kaliw̓utan ang naa,
kumarungamu ra ka tung mga puistu ming maggaraëmën tung sam puluk may duruang palaanaan yang nasyun tang Israel.
29 Dispuis kumpurming tinu pay namutwan tung sadiling pamalay-w̓alay na ubin tung sadiling tanëk na,
ubin tung mga putul na ubin tung ginikanan na,
ubin tung mga ana na arangan da ilëm tung gëgma nang lusu tung yëën,
ya ray pakdulan yang Dios ta kapakli yang tanan ang pinamutwanan nang atia ang pira-pira rang dubli ig tung uri mapagpasapën da tung anya ang asta tung sampa.
30 Ug̓aring ilëm naa w̓a yang dapat ang pangamanan mi.
Durung pag̓atëlëngan ta abwat simanyan ang ya ra iparanëkay tung uri ig duru kang pag̓atëlëngan ta aranëk simanyan ang ya ra ka ipaabwatay tung uri,”
mag̓aning.