10
Taa numanyan,
ti Jesus nagliit da duun tung Galilea ang minangay duun tung sinakëpan yang Judea ang asta nagpalaktëd da tung subang atiang pag̓aningën ang Jordan,
kasiraan da ka tanira yang mga tauan na.
Atiing duun da,
duru sing mga taung namagtaripukpuk tung anya.
Purisu dayun sing nagturuldukun tung nira ang katulad ka tung pag̓abuat na kang lag̓i.
Yang Linyang Nag̓ipagpasanag Ni Jesus Natëtëngëd Tung Pagkarasawaën (10:2-12)
2 Numanyan may mga Pariseong namansikaw̓ut da.
Kumus may gustu nirang papagmintiraën ti Jesus ang para mabitala ilëm ta magbalaw̓ag tung katuw̓ulan yang Dios,
dayun dang namagtalimaan tung anyang mag̓aning,
“Uyun basu tung mga katuw̓ulan ang nag̓ausuy ta ang yang sasang lalii puiding magpakiblag tung kasawa na?”
3 Mag̓aning ti Jesus ang nagtimalës,
“Ayw̓a,
unu pay katuw̓ulan ang ibinutwan ni Moises atiing tukaw natëtëngëd tung bag̓ay ang atia?”
4 Mag̓aning ka tanirang namansituw̓al,
“Ilinug̓ut ni Moises ang yang sasang lalii puidi unung magpakiblag tung kasawa na basta magpasulat unu ta bawdukumintu ang yay magpaingmatuud ang tapus da ka man yang pagkakasawaan nira.”
5 Mag̓aning ka ti Jesus ang nagtimalës,
“Yang ipinagsulat ni Moises yang riglamintung atia para tung numyu ya ra yang katëtëg̓asën yang mga kinaisipan mi.
6 Ay napabtang tung kasulatan ang atiing primirung pag̓imu yang Dios tung tau,
inimu na unung lalii may baw̓ay.
7-8 Purisu unu ya ra kay natëngëran na ang yang sasang lalii magliit da tung ni tatay na may tung ni nanay na ang para magpakiunung da tung ni kasawa na ang pagkatapus unu tanirang durua mag̓ing sa nga tinangunian da ilëm.
Ig disir,
bëlag̓an dang durua pa,
kung indi,
sa nga tinangunian da ilëm tanira.
9 Purisu yang pinapagsasa ra yang Dios dapat ang indi bëlag̓ën ta tau,”
mag̓aning.
10 Taa numanyan atiing duun da tanira na Jesus tung balay ang pagdayunan nira,
namagpasadsad da yang mga taung atiang nag̓apangugyatan na tung anya natëtëngëd tung inaning nang atia sigun tung pagbëlag ta magkasawa.
11 Mag̓aning ti Jesus ang nagpasanag tung nira,
“Kung tinu pang laliiay ang magpakiblag tung kasawa na ang pagkatapus mangasawa sing uman tung dumang baw̓ay,
asan da nga limbungay na yang kasawa nang atiang dati.
12 Dispuis,
maskin tung mga baw̓ay,
kung tinu pay magpakiblag tung kasawa na ang pagkatapus magpakasawa si tung dumang lalii,
asan da ka nga limbungay na yang kasawa nang atiang dati,”
mag̓aning.
Yang Taung Risibiën Yang Dios Ya Ra Yang May Pagkamula Na (10:13-16)
13 Taa numanyan may mininsa ang may mga taung namag̓ëkël tung mga ana nira tung ni Jesus ang para pampabisaën nira tung anya.
Piru sinambëng da yang mga taung atiang nag̓apangugyatan na.
14 Pagkaita ni Jesus yang pag̓abuat nira,
dayun dang inërëpan dang nag̓ampalar tung nirang mag̓aning,
“Ëëy,
yang mga mamulang atia,
paw̓ayaan mi ra ilëm ang mamagpalëngët tani tung yëën.
Indi mi ra ëngëd pagsagangën,
ay kipurki kung tinu pay may pagtalig nira tung Dios ang katulad ka tung pagtaralig̓ën yang mga mamulang atiang bug̓us tung mga ginikanan nira,
lug̓ud da tung mga taung pamagpagaëm ang bug̓us tung Dios.
15 Iugtulu tung numyu yang kamatuuran,
kung tinu pay indi magpagaëm tung Dios ang katulad ka tung sasang mulang bug̓us yang pagpagaëm na tung mga ginikanan na,
yang taung atia indi na ra ëngëd maispirinsiaan tung sadili na kung unu pay palaksu yang paggaraëmën yang Dios tung pagpangabui na,”
mag̓aning.
16 Pagkatapus dayun na rang pinagsabak-sabak yang mga mamulang atiang pinampabisa.
Yang Sasang Manggaranën Durug Liwag Ang Magpalamtuk Yang Pundu Yang Kinaisipan Nang Magpagaëm Tung Ni Jesus (10:17-31)
17 Taa numanyan,
atiing magpanaw ra rin ti Jesus tung karsada,
may sasang taung yag paglaksung pagpakigbag̓as tung anya.
Pagkaw̓ut na,
dayun dang nagluud tung katalungaan nang nagtalimaan tung anyang mag̓aning,
“Amëëy,
nag̓askëanu ang yawa sasang maayën ang tau.
Unu pa w̓asu ay dapat ang buatënu ug̓ud mapagpasapënaw tung Dios ang anday katapus-tapusan?”
18 Mag̓aning ka ti Jesus ang nagtimalës,
“Muya indi mu ilëm nag̓askëan kung unu pay linagpakan na atiing inaningaw ra nuyung maayën.
Anday dumang sarang ang maaning mung maayën,
kung indi,
ultimu ilëm yang Dios.
19 Yang mga katuw̓ulan na nag̓askëan mu ra ka siguru.
Ulitënu ra kanay ang ipadëmdëm tung nuyu.
‘India mangimatay ta masigkatau mu,
india maglimbung tung kasawa mu,
india manakaw ta bëlag nuyu,
india manistigus ta bukli tung katalungaan yang ustisia,
india magdaya tung masigkatau mu,
ig galangën mu ti tatay mu may ti nanay mu.’”
20 Mag̓aning ka yang taung atiang nagtimalës,
“Piru ëlat kanay,
Amëëy.
Yang tanan ang atiang mga katuw̓ulan ang sinambit mu luw̓us dang nag̓atumanu mag̓impisa pang atiing paranaw pa.”
21 Numanyan tung pagtëlëng ni Jesus tung anya,
ya ra nga gamën yang isip na tung anyang mag̓aning,
“May sam bilug pang dapat ang buatën mu.
Mulika ra kanay.
Yang tanan ang kamanggaran mu ipaalang mu ra.
Yang kabayaran nang kuarta ipamakdul-pakdul mu ra tung mga maliliwag̓ën.
Kung ya ray buatën mu tia,
tay puis magkatinira ra ta kapakli nang maning pa ka tung sasang manggad mu duun tung langit.
Dispuis pagkatapus ta pamakdul-pakdul mu,
magbalika ra ka tani ang magpaugyat tung yëën ang para mag̓ing tauana ka yëën,”
ag̓aaning.
22 Pagkagngël na tia,
gulpi rang natalmëd yang ityura nang nanluluw̓ay.
Dayun da ilëm ang nagliit ang duru rag kapungaw yang isip na.
Ay ya pa ag̓ari,
durung kamanggaran na.
23 Numanyan panëlëng-tëlëng ni Jesus tung mga taung atiang nag̓apangugyatan na,
dayun dang nagbitala tung nirang mag̓aning,
“Durug liwag ang yang sasang manggaranën magpalamtuk pa yang pundu yang isip nang magpagaëm ang bug̓us tung Dios.”
24 Pagkagngël nira yang inaning ni Jesus ang atia,
nangatingala ra ta duru.
Piru ti Jesus dayun na rang sinugpatan yang bitala nang mag̓aning,
“Mga putulu,
duru ka man agliwag ang yang tau magpagaëm tung Dios.
25 Kung maliwag nganing ang yang sasang kamilyu ang pumuyuk tung buli yang tingway,
mas pang maliwag ang yang manggaranën magpalamtuk yang pundu yang isip nang magpagaëm ang bug̓us tung Dios,”
mag̓aning.
26 Atii mas pang nangabërëng ang pisan yang mga aruman nang mag̓aning tung anya,
“Tay kung maning tii pala ang maski nganing yang mga manggaranën ang tag̓isip yamën ang alëngët tung Dios indi nganing matapnay,
ya pa yang kadaklan ang mga tau?”
27 Atii dayun dang nanëlëng-tëlëng ti Jesus tung nira ang mag̓aning,
“Kung tung tau ilëm ka man,
indi maimu tia.
Piru kung tung Dios,
maimu ra tia ay natëtëngëd tung anya maimu yang tanan,”
mag̓aning.
28 Atii,
ya ra ngabnga ti Pedro ang mag̓aning tung anya,
“Tëëd mu,
Amëëy,
ta yaming pagpaugyat tung nuyu,
binutwanan da yamën yang tanan basta magpakignunutami ra ilëm tung nuyu.”
29-30 Mag̓aning ka ti Jesus ang minlës,
“Iugtulu tung numyu yang kamatuuran,
kumpurming tinu pay namutwan tung banwang natauan na ubin tung mga putul na ubin tung ginikanan na ubin tung mga ana na ubin tung mga ganadus na natëtëngëd yuuy ag̓ipalusu na ta gëgma na.
Yadwa pa durung gustu nang magparakaw̓utun yang Matinlung Balita natëtëngëd tung yëën.
Purisu ya ray pakdulan yang Dios ta kapakli yang tanan ang atiang pinamutwanan na ang pira-pira rang dubli.
Ay numaan tung panimpung naa,
may mga kapakli nang mga balay,
mga putul na,
mga ginikanan na,
mga ana na ig mga ganadus na.
Piru dënganën kang pasaran ta padëëg-dëëg arangan da ilëm tung yëën ang pag̓akëgngan na.
Dispuis kung kaw̓utun da nganing yang baklung panimpu,
magsapënan da ka tanira yang Dios ang asta tung sampa.
31 Ug̓aring ilëm naa w̓a yang dapat ang pangamanan mi.
Durung pag̓atëlëngan ta abwat simanyan ang ya ra iparanëkay tung uri ig duru kang pag̓atëlëngan ta aranëk simanyan ang ya ra ka ipaabwatay tung uri,”
mag̓aning.
Maklung Mainambit Ni Jesus Yang Dapat Ang Mapasaran Na Tung Uri Ang Durug Liwag (10:32-34)
32 Taa numanyan,
sigi-sigi ra yang pagparanawën nira na Jesus tung karsada ang pamanungul duun tung Jerusalem.
Ti Jesus ya ray pagtukaw tung mga tauan na ang yay nabërëngan nira ta duru tung anya.
Yang kadaklan ang mga taung pamag̓uri tung nira pamangëlbaan da ta mupia.
Taa numanyan,
yang mga tauan nang atiang sam puluk may durua,
pinampaligbin na sing pinapag̓intindi kung unu pay dapat ang mapasaran na.
33 Mag̓aning tung nira,
“Ta,
naawita rag panungul ang pag̓angay duun tung Jerusalem.
Muya mabërëngamu tung ianingung naa tung numyu.
Yuung pag̓aningën ang Maninga Tau,
anday dumang mainabu tung yëën duun,
kung indi,
iintrigaw ra tung pudir yang mga paring arabubwat ta katëngdanan may yang mga sag̓ad tung mga urdinansa,
ang pagkatapus sintinsiaanaw ra nirang ipaimatay.
Pagkatapus dayunaw si ka nirang iintriga tung pudir yang bëlag̓an mga masigkanasyun ta ang anda ëngëd ay pag̓intindi nira tung Dios.
34 Buatënaw ra ilëm nirang sasang kayaman,
lawayan pa nira yang tinanguniu ang pagkatapus paburdunanaw ra ka nira bakluaw imatayay nira.
Piru pagkaw̓ut yang yaklung kaldaw,
pabungkarasënaw ra ka ëngëd yang Dios,”
ag̓aaning.
Agbaliskarën Da Ni Jesus Yang Sistima Yang Kaliw̓utan Ang Naa Natëtëngëd Tung Pag̓ërëkëlën Ta Katëngdanan (10:35-45)
35 Taa numanyan,
namagpalëngët da tung ni Jesus ti Santiagong duruang mag̓ari ni Juan ang yay mga ana ni Zebedeo.
Mag̓aning tanira tung anya,
“Amëëy,
gustu rin yamën ang kung unu pay ingalukun yamën tung nuyu ya ray ipapakdul mu tung yamën.”
36 Ag̓aaning ka ti Jesus ang minlës,
“Ayw̓a,
unu pay nag̓alëlyag̓an ming ipakdulu tung numyu?”
37 Mag̓aning ka tanirang nansituw̓al,
“Kung kumarunga ra nganing tung puistu mung maggaraëmën ang duru rag kasusulaw yang pagkabëtang mu,
ipakarungayami ka tung tëpad mung magtimbang ang para kasiraanita ra kang maggaraëmën tung mga tau.”
38 Mag̓aning ka ti Jesus ang nagtimalës,
“Indi mi ka ilëm nag̓amarësmësan kung unu ra ilëm ay nag̓aingaluk mi.
Basu kayanan mi kang magpapinitinsia ang katulad ka tung pasaranu?
Matëntën da w̓asu yang mga isip ming manalunga tung kalainan ang katulad ka tung pag̓atalungaw?”
39 Mag̓aning ka tanirang nansituw̓al,
“Ëë,
kayanan ka yamën.”
Mag̓aning si ti Jesus tung nirang nagsugpat,
“Mapasaran mi ka man yang mga pinitinsia ang katulad ka tung mapasaranu,
manalungaamu ra ka man tung kalainan ang katulad ka tung pag̓atalungaw.
40 Piru kung tinu pay makarung tung tëparung magtimbang ang para kasiraanaming maggaraëmën,
bëlag yuuy may pudir ang maglug̓ut,
kung indi,
ya ray nag̓itig̓ana yang Dios tung kumpurming tinu pay pinilik nang kumarung,”
mag̓aning.
41 Numanyan atiing nangabalitaan da yang mga kaarumanan nirang sam puluk,
namag̓intra ra kimun tung ni Santiago durua ni Juan.
42 Purisu dayun dang ginuuyan ni Jesus tanirang tanan ang pinag̓aning,
“Nag̓askëan mi ra ka ang yang mga taung pag̓aningën ang may mga katëngdanan tung mga tag̓a duma-rumang nasyun,
yang katëngdanan nira ya ag̓ipandëëg-dëëg̓ay nira tung mga kinasakpan nira.
Muya-muyang manuw̓ul tung mga sakëp nira ang para ilalaën da nirang yay abwat tung nira.
43 Piru tung numyu,
indiaw malëlyag ang yay usuyun mi yang sistima nirang atia,
kung indi,
kung tinu pay malëlyag ang tëlëngan ta abwat asan tung numyu,
dapat ang yang pagpabëtang na tung sadili na tanya sasa ilëm ang turuw̓ulun ming mga kaarumanan na.
44 Kung tinu pay malëlyag ang magmangulu tung numyu,
dapat ka ang yang pagpabëtang na tung sadili na tanya sasa ilëm ang kirëpën ming kadaklan.
45 Ay ya pa ag̓ari,
ta yëën ang pag̓aningën ang Maninga Tau,
yang katuyuanu bëlag̓an ang mag̓aning ang para yuuy magpanuw̓ul tung mga taung magpasikasu,
kung indi,
ang para yuuy mag̓ing turuw̓ulun nirang mag̓arasikasuën tung nira.
Yang inangayu ëngëd,
ay magpatumbasaw yang linawaw ang para durung mga taung mapaluasu tung pagpakirëpën nira tung pagburuatën nira yang kasalanan,”
mag̓aning.
Yang Pagpabuskad Ni Jesus Tung Mata Yang Buray Ang Nag̓aranan Tung Ni Bartimeo (10:46-52)
46 Taa numanyan,
pagkaw̓ut da ni Jesus duun tung lansangan ang Jerico,
diritsyu-diritsyu ra ilëm yang panaw nang asta nalua ra tung lansangan ang atia,
kasiraan da ka tanira yang mga taung nag̓apangugyatan na pati mga taung buntun.
Numanyan may sasang manigpalimus ang buray ang nag̓aranan tung ni Bartimeo ang yag kakarung tung binit yang karsada.
Tanya ana ni Timeo.
47 Numanyan pagkabalita na ang asan da ti Jesus ang atiang tag̓a Nazaret,
dayun dang nagkëkëndalën ang mag̓aning,
“Jesus,
yawang manubli tung paggaraëmën ni Adi David,
ildaway ka!”
48 Pagkatapus durung namagsambëng tung anyang mag̓ipës da.
Piru bëlag ya mag̓ipës,
kung indi,
mas pang ya magkëkëndalën ang magkëkëndalën ang mag̓aning,
“Yawang manubli tung paggaraëmën ni Adi David,
ildaway ka!”
49 Atii,
nagtadëng da ti Jesus ang nagbitala tung mga taung atiang buntun ang mag̓aning,
“Ala,
guuyan mi ra kanay tia ang magpalëngët da tani tung yëën.”
Purisu dayun da ka man ang ginuuyan nirang inaning,
“Ala,
paktëlën mu ra yang isip mu!
Këmdënga ra asan ay nag̓aguuyana ra anyang magpalëngët tung anya!”
50 Pagkagngël na tii,
ya ra mamlëk tung panlamig na ang pagkatapus dayun dang nagbungkaras ang nagpalëngët tung ni Jesus.
51 Mag̓aning ti Jesus ang nagbugnu tung anya,
“Ta,
unu pay gustu mung buatënu para tung nuyu?”
Mag̓aning ka yang buray ang minlës,
“Ay Rabbi,
gustuu rin ang maitaw si.”
52 Mag̓aning ka ti Jesus ang nagtimalës,
“Ala,
mulika ra.
Natëtëngëd itinalig mu ra tung yëën yang sadili mu,
naulikan da tia.”
Atii lag̓i-lag̓ing naita si ka man ig nagpakignunut da dayun tung ni Jesus.