Yang Mga Pari Pamagplanu Ra Kung Ya Pa Ag̓aring Mapadëëp Nira Ti Jesus (22:1-2)
22
Taa simanyan alëngët da yang pistang pag̓aningën yang mga Judio ang Nag̓ipagpangan Ta Tinapay Ang Indi Pinalëskag ang lug̓ud yang iapun nirang pag̓aningën ang Taklib.
Lucas 22:1-22
2 Tung uras ang atii,
yang mga paring arabubwat may naang mga sag̓ad tung mga urdinansa,
pamagdilëm da ta matinlung idya ang para ipaimatay nira ti Jesus.
Yang indi ilëm nira mapasinawan ang mapadëëp ay pamangaman tung mga taung naang buntun ang pamagpauyun tung anya.
Pagprisintar Ti Judas Tung Mga Pari Ang Tanya Ray Magpadëëp Tung Ni Jesus (22:3-6)
3 Pagkatapus numanyan naang ti Judas ang Iscariote ang yay sam bilug tung nirang mga tauan ni Jesus ang sam puluk may durua,
pinaalëngtan da ni Satanas yang isip nang linuyuk ang asta nagbilug.
4 Purisu numanyan,
anda ray dumang binuat na,
diritsyu rang nag̓angay duun tung mga paring arabubwat ta katëngdanan may tung mga kapitan yang mga manigbantay yang pagtuuan ang pinakalusu.
Nagpakigkësën da tung nira kung ya pa ag̓aring mapadëëp na ti Jesus ang para maintriga ra tung pudir nira.
5 Numanyan pagkagngël nira tia,
namagkalipay ra ta duru.
Dayun dang namagpangaku tung anya ang mapadëëp na ilëm ti Jesus,
ay pakdulan nira ta kuarta.
6 Purisu nagpaayag da tung nira.
Numanyan nagbantay ra ta këtat ang para mapadëëp na ti Jesus tung nira ang indi ka makdëkan ta kadaklan ang mga tau.
Pagpasimpan Ti Jesus Tung Pagsilibra Nira Tung Pistang Pag̓aningën Ang Taklib (22:7-13)
7 Taa numanyan kuminaw̓ut da yang pistang pag̓aningën ang Nag̓ipagpangan Ta Tinapay Ang Indi Pinalëskag ang ya ra kay kaldaw ang dapat ipagdasag nira tung mga karnirung ipagsëra nira tung iapun nirang pag̓aningën ang Taklib.
8 Purisu ti Jesus nanuw̓ul da tung ni Pedro durua ni Juan ang mag̓aning,
“Ala,
magsimpanamu ra yang iapun tang para silibraën ta yang pistang naang Taklib,”
ag̓aaning.
9 Mag̓aning tanirang namagtimalës,
“Ariami pa w̓asung balayay magsimpan?”
10 Mag̓aning ti Jesus ang nagtuw̓al,
“Patandaan mi,
kumaw̓utamu ra nganing duun tung siudad,
may mabag̓as ming sasang laliing pagsakan ta tiw̓ud ang punuk ta waia.
Ya ray nuntun mi ang asta pumaklëd tung balay.
11 Kung magpaklëramu ra nganing duun,
yamu ra ag̓aaning tung may balay,
‘Yami minangayami ra ilëm taa,
ay yang tuyun ni Ginuu tang pagturuldukanën tung yatën,
itulduk mu unu tung yamën yang kuartung pagyapunan nang magsilibra tung pistang naang Taklib,
kasiraanami ra kang mga taung nag̓apangugyatan na.’
12 Atia itulduk na ra tung numyu yang kuartung dakulu duun tung yadwang gradu yang balay ang simpan da ka yang tanan ang garamitën ang tutal kaministiran ta.
Asanamu ra magsimpan yang yapun ta,”
mag̓aning.
13 Kapurisu numanyan,
nansiangay ra ka man duun tung siudad yang durua nga tauan ang atia.
Pagkaw̓ut nira duun,
kumpurming unu pay inaning ni Jesus tung nira,
ya ra kang pisan ay kinaw̓utan nira.
Purisu numanyan duun da ka man namagsimpan yang yapun nirang mamagsilibra tung pistang Taklib.
May Sasang Nag̓atukud Ni Jesus Ang Para Yay Ipausuy Na Tung Mga Tauan Nang Mamagdëmdëm Tung Anyang Nagpakugmatay (22:14-23)
14 Numanyan pagkaw̓ut yang uras ang ipagsilibra nira,
nagpasintar da ti Jesus tung lamisaan ang para magyapun da,
kasiraan da ka tanira yang mga taralig̓an na.
15 Numanyan mag̓aning ti Jesus tung nira,
“Duru-durung paglalangkag̓ënu ang bakluaw mapasaran ta pinitinsia ang ita mapagsararuan da tung yapun tang naang pag̓ipagsilibra ta tung pistang Taklib.
16 Kipurki iugtulu tung numyu,
yang yapun tang naa,
may mas pang nag̓adapatan na ang indi pa maglutawan.
Purisu yuu maskin indiaw ra mapagsilibrang uman yang yapun ang naa,
yang nag̓aëlatanu ëngëd,
kung mabilug̓an dang pisan yang ultimung nag̓adapatan na tung uras ang ipagpabistu rang pisan yang Dios yang paggaraëmën na,”
mag̓aning.
17 Pagkatapus numanyan namisik da ta sam basung binu ang ya ray pinasalamatan na tung Dios ang pagkatapus ipinarawat na tung mga aruman nang inaning,
“Ia,
ya ray pagbërëlës-bëlësan ming igmën.
18 Kipurki iugtulu tung numyu,
mag̓impisa numanyan,
indiaw ra manginëm ang uman ta binung maning taa.
Bakluaw ra manginëm si kung kaw̓utun da nganing yang uras ang ipagpabistu ra ëngëd ang pisan yang Dios yang paggaraëmën na,”
mag̓aning.
19 Pagkatapus numanyan dayun dang namisik ta tinapay ang ya ray pinasalamatan na tung Dios.
Pagkatapus ya ra kay piningas-pingas nang ipinarawat tung mga aruman nang mag̓aning,
“Atia,
ya ra taang tinanguniu ang ya ray buatënung sasang dasag ang para asanamu ra nga paluasay tung sintinsia yang Dios.
Kada mapangan mi tia,
ya ray ipagdëmdëm mi tung yëën ang nagpakugmatay para tung numyu.”
20 Numanyan pagkatapus nira ta pag̓iapun,
maning ka tia yang binuat na tung sam basung binu.
Tung pagparawat na tung nira,
mag̓aning tung nirang nagpasanag,
“Yang binung atiang inëmën mi,
ya ra taang dug̓uu ang ipaturuku arangan da ilëm tung numyu ang para ya ray mapatiëlan yang Dios ang magtukud tung baklung ipagpakigpaig̓u na tung mga tau ug̓ud asan da nga panapnayay na.
21 “Piru tëëd mi,
yang magtraidur tung yëën pagpakigsadu ra nganing taa tung lamisaan ang naa!
22 Tung bag̓ay,
ta yëën ang pag̓aningën ang Maninga Tau,
lug̓ud kang lag̓i tung planu yang Dios tung yëën ang yuug imatayay.
Piru kanugun yang taung naang magtraidur tung yëën.
Durug dakul yang panuw̓alan na tung uri,”
ag̓aaning.
23 Numanyan,
pagkagngël yang mga aruman na,
diritsyu rang namagbaralalaan ang namagturugyan-tugyanan ang tinu pa tung nira ay pagtimang magbuat yang maning tia.
Lucas 22:23-38
Agbaliskarën Da Ni Jesus Yang Sistima Yang Kaliw̓utan Ang Naa Natëtëngëd Tung Pag̓ërëkëlën Ta Katëngdanan (22:24-30)
24 Taa numanyan,
indi ilëm nabuay,
namagbaralalaan si kung tinu pa tung nira ay tëlëngan ang abwat.
25 Numanyan pagkagngël ni Jesus yang pagbaralalaan nirang atia,
dayun dang nagpainunuku tung nirang mag̓aning,
“Tëlëngan mi ra ilëm yang mga ading pamaggaraëmën tung duma-rumang banwa.
Yang kagaëman nira ya ag̓ipandëëg-dëëg̓ay nira tung mga kinasakpan nira.
Tëëd mi,
tanirang pamagpanlëpës tung mga sakëp nira,
ya pay pamagpadayaw ang tanira unu pamagpakaayën buat yang banwa!
26 Piru ta numyu,
indiaw ka ëngëd malëlyag ang yay usuyun mi yang sistima nirang atia.
Kung indi,
kung tinu pa tung numyu ay pag̓atëlëngan ang abwat yang mga aruman na,
anday dumang pagpabëtang na tung sadili na,
tanya maning pa tung sasang ari nirang tanan.
Dispuis kung tinu pa man tung numyu ay pagmangulu tung mga kaarumanan na,
yang pagpabëtang na tung sadili na,
tanya maning pa tung sasang maniglamisa tung nira.
27 Tinu pa w̓asu ay abwat tung sasang pagpalamisa may tung paglamisa tung anya?
Bëlag bang yang pagpalamisa yay abwat?
Piru ta yëën,
yang pusisiunu tung grupu ta maningaw ra ilëm tung sasang maniglamisa tung numyu.
28 Piru maskin nag̓apagbitalaw ra ta maning tia,
pagpasalamataw ka ëngëd ang ta yamu durug tinlu yang pagpakiunung mi tung yëën tung tanan ang mga kaliwag̓an ang napasaranu.
29-30 Purisu ta yëën,
kumus pinakdulanaw ra ni Ama ta katëngdananung maggaraëmën tung uri,
pakdulanamu ra ka yëën ta maning ka tia ug̓ud kung kaw̓utun da nganing yang uras ang atia,
yang kaalimbawaan ta,
maning pa tung sa nga lamisaananita ra ilëm ang magsararuan ay pakarungunamu ra yëën tung mga puistu ming abubwat ang para maggaraëmënamu ra tung sam puluk may duruang pinalaana yang nasyun tang Israel,”
mag̓aning.
Nag̓aula Ni Jesus Ang Yang Mga Tauan Na Mamalpas Da Tung Anya Maskin Pa Ti Pedro, Ya Ka (22:31-34)
31 Pagkatapus numanyan,
ti Simon Pedro ya ray binugnu ni Jesus ang inaning,
“Aay Simon,
pagkëba-këba ra yang dëdlaanu natëtëngëd tung nuyu.
Ag̓askëan mu,
ti Satanas napag̓ingaluk da ang yamung tanan itug̓ut da tung anya ang para tuungunamu ra anya.
Yang kaalimbawaan yang pagtuung na tung numyu,
maning pa tung taung pangaap ta paray.
Muya yang pagtaralig̓ën mi tung yëën,
manulad da ka ilëm tung kaap ang kalpës da ilëm ang iplad.
32 Piru atiing pag̓ingaluk na tung numyu,
yawa ëngëd ay ipinag̓ampuu,
Simon,
ang yang pagtaralig̓ën mu tung yëën,
indi na ra masarangan ang ludasën ang pisan.
Purisu kung madëmdëma si nganing tung yëën ang magbalik,
yawa ray magpadag̓ën-dag̓ën tung mga kaarumanan mu ang para mas pang këmëët yang pagtaralig̓ën nira tung yëën,”
ag̓aaning.
33 Mag̓aning ti Simon ang nagtimalës,
“Ginuu,
bilug da yang isipung magpakiunung tung nuyu maskin yawa kalabusay,
maskin yawa imatayay!”
ag̓aaning.
34 Mag̓aning ti Jesus ang minlës,
“Aa Pedro,
iugtulu tung nuyu,
numaan ang law̓iing naa,
baklu ra manuluk yang manu,
maklua rang mag̓ingwara tung yëën ang indiaw pala ag̓ailala mu,”
mag̓aning.
Nag̓apaktël Ni Jesus Yang Mga Tauan Nang Mamagpatëntën Da Yang Mga Isip Nirang Mamanalunga Tung Mga Kaliwag̓an (22:35-38)
35 Numanyan nagbitala ra ti Jesus tung nirang tanan ang mag̓aning,
“Ta,
atiing tinuw̓ulamu ra yëën ang magliliw̓utun ang indiamu tinugtanung mag̓ëkël ta balun ming kuarta ubin mga balutan yang aw̓ël ming irimaraan,
pati mga sandalyas mi pang mga risirba,
nakulanganamu ra w̓asu tung mga kaministiran mib?”
Mag̓aning tanirang namansituw̓al,
“Andang pisan ay kakulangan yamën.”
36 Mag̓aning ka ti Jesus ang nagtimalës,
“Piru numanyan aparti ra.
Purisu kung tinu pa tung numyu ay may kuarta na ubin mga aw̓ël nang irimaraan,
kaministiran ang ekel-ekelan na rang magpanaw.
Kung tinu pay anday sabli na,
ipaalang na ra kanay yang lambung na ang para may ipangalang na ta sabli na.
37 Kipurki iugtulu tung numyu,
may sasang napabtang tung kasulatan ang dapat ang magkamatuud da ang yuu unu,
ipabtangaw ra ilëm yang mga tau ang sasang kriminal ang dapat ang sintinsiaan tung kalainanc.
Ag̓askëanu ang indi ra ilëm buay,
ya ray mapasaranu,”
ag̓aaning.
38 Mag̓aning yang mga aruman na,
“Ginuu,
nani w̓a may durua ra nga sablian.”
Mag̓aning ti Jesus ang minlës,
“Aa ustu ra tia.
Midyu indiita ra ka ilëm nagpërëtëtand,”
mag̓aning.
Yang Nag̓ipag̓ampu Ni Jesus Natëtëngëd Tung Pinitinsiang Atiang Nag̓atalunga Na (22:39-46)
39 Numanyan paglampud ni Jesus tung balay ang pinagyapunan nira,
dayun dang nag̓angay duun tung tinënaran yang bukid ang atiang durung mga ayung pag̓aningën ang olibo.
Ay ya ra kang lag̓i ay ug̓ali na kung mga law̓ii.
Pati yang mga taung nag̓apangugyatan na,
namagpakignunut da ka tung anya.
Lucas 22:39-71
40 Numanyan pagkaw̓ut na duun tung lugar ang atii,
pinag̓aning na yang mga aruman nang,
“Mag̓ampuamu ra tung Dios ang paktëlën na yang mga isip mi ang para indiamu madëëg̓an ta tuksu,”
ag̓aaning.
41-42 Pagkatapus,
nagpaag̓ës da kanay tung nira ang yang pinaalawiran na,
kumpurmi yang kaw̓utun yang këtël yang sasang taung mamatu.
Pagkaw̓ut na duun,
dayun dang luminuud ang nag̓intra ra pag̓arampuën ang mag̓aning,
“Amaw,
kung uyun ilëm tung kalëlyag̓an mu,
ipataklib mu ra ilëm tung yëën yang lain ang naang nag̓atalungaw.
Piru maskin pag̓ianingu tii,
bëlag̓an yang yëën ang sadiling kalëlyag̓an ay matuman,
kung indi,
yang nuyu,”
ag̓aaning.
43-44 Atii,
may sasang angil ang liit tung langit ang ya ray nagpaita tung anyang nagpaktël tung kinaisipan na sigun tung kalëlëbatën na ang nag̓aliwag̓an na ta mupia ang ya ra kay nag̓ipagpadëgtë na tung pag̓arampuën nang duru.
Ay nag̓aëyangan da ta ulas nang midyu ra ilëm tung dug̓u ang magbuw̓ugsuk tung tanëk.
45 Numanyan,
pagkatapus ni Jesus ta pag̓ampu,
diritsyung kumindëng ang nagbalik tung mga aruman nang tulu.
Kaw̓utan na tanira,
naa pala mga ëlëk da.
Atii pala pinangampayan da ta kapungaw nirang duru ang ya ray inlëk nira.
46 Numanyan dayun dang pinamuaw ni Jesus ang inaning,
“Baa tia!
Ëlëk mi rang ëlëk!
Ala,
magbungkarasamu rang mag̓ampu tung Dios ug̓ud indiamu ra madëëg̓an ta tuksu!”
ag̓aaning.
Yang Pagpadëëp Ni Judas Tung Ni Jesus (22:47-53)
47 Numanyan atiing indi pa nganing nag̓atapus ta pagbitala,
asan da namansilput yang mga taung buntun.
Anday dumang pag̓ërëkëlën tung nira,
ya ra taa ti Judas ang naang sasang aruman nirang mga tauan ni Jesus ang sam puluk may durua.
Pagkaw̓ut na,
dayun dang nagpalëngët tung ni Jesus ang para ara-araan na.
48 Ag̓aaning ti Jesus tung anyang nagbugnu,
“Baa tia,
Judas,
yuung pag̓aningën ang Maninga Tau,
pag̓aara-araanaw ka nuyu,
piru naa pala,
yuu rag traiduray mu!”
mag̓aning.
49 Numanyan naang mga kaarumanan ni Jesus,
pagkasinti nira yang mainabu,
ag̓aaning tanira tung anya,
“Ta,
Ginuu,
mag̓aninga ilëm kung taraw̓angan da yamën ta sibat.”
50 Unaw̓is may sam bilug tung nirang nanibat tung sasang turuw̓ulun yang paring pinakalandaw ang pagkatapus yang talinga na tung tuu,
ya ray nalampung.
51 Numanyan pagkaita ni Jesus tia,
dayun dang nagsambëng tung anyang mag̓aning,
“Ëëy,
ustu ra tia!”
Pagkatapus diritsyung pinisik na yang talinga yang turuw̓ulun ang atiang inulik duun tung nalampungan na,
ang ya ra kay pinagmupiaan na dayun.
52 Numanyan asan tung mga taung atiang namanuyu duun ang para mamagdëëp tung ni Jesus,
may mga paring arabubwat ta katëngdanan may mga kapitan tung mga manigguardia tung pagtuuan ang pinakalusu may mga pamagpakigmaëpët tung nasyun nirang mga Judio.
Numanyan yang mga taung atia,
ya ra ëngëd ay binugnu ni Jesus ang inaning,
“Ayw̓a yuu sasang ribildi ang yuu rag sulungay mi ta mga gëëd may mga palu?
53 Ayw̓a kung yuu may kasalananu,
ayw̓a indiaung lag̓ing dinëëp mi tan taa pa?
Tutal kaldaw-kaldaw nagkasira-siraanita ra ka duun tung pagtuuan ang pinakalusu.
Piru nag̓askëanu,
nagkamaningaw ra ta maning taa,
ay ya ra ka man taa yang uras ang ilinug̓ut yang Dios tung numyu ang kumpurming unu pay kalëlyag̓an ming buatën tung yëën,
matutuman mi ra yang tanan.
Ay ya pa ag̓ari,
ya ra ka man taa yang uras ang këmtël da ëngëd yang trabaw ni Satanas ang durug kiklëp,”
ag̓aaning ti Jesus duun tung nira.
Magbistaën Da Ti Jesus (22:54-55)
54 Atii dayun da ka man nirang dinëëp ang ingkëlan duun tung balay yang paring pinakalandaw.
Naa ti Pedrong naa,
nanikad da ka tung nira,
piru atii ra tung kauri-urian da ilëm ang pisan.
55 May apuy ang pinagkalan duun tung kakngaan yang plasa-plasa yang balay.
Nagpakilakët da ti Pedro tung mga taung kumarungan tung paliw̓ut yang apuy ang pamamarang.
Maklung Mag̓ingwara Ti Pedro Tung Ni Jesus (22:56-62)
56 Numanyan may sasang turuw̓ulun ang baw̓ay ang naita tung ni Pedrong yag kakarung tung pag̓alanyag̓an yang apuy ang pamarang.
Pinatëëk-tëëkan na ta mupia ang inilala.
Pagkatapus dayun na rang binugnu ang,
“Uay,
atia pala sasa kang tauan yang taung nakaang nadëëp!”
ag̓aaning.
57 Pagkagngël ni Pedro tia,
dayun dang nag̓ingwara ang mag̓aning,
“Bëë,
yang baw̓ay kang naa ka!
Indi nganing nag̓ailalaw yang taung atiang nag̓ianing mu kung tinu pa!”
58 Buay-w̓uay ta gësyë,
may duma sing naita tung anya ang pagkatapus nagbugnu ka tung anyang mag̓aning,
“Ëëy,
yawa talagang sasang aruman na!”
Mag̓aning ti Pedrong nagtuw̓al,
“Bëë,
yang tau kang naa ka,
yuu bëlag̓anaw tauan na,
ëy!”
59 Numanyan,
siguru may mga sang uras dang nagtaklib,
may sam bilug sing tau asan ang nagpaugtun tung mga aruman nang nangilala.
Ya si ay nabngang mag̓aning tung mga ugpu na,
“Ëëy,
kamatuuran ka man,
yang taung naa,
talagang sasang aruman yang taung nakaa,
kipurki sasa kang Galileanen.”
60 Mag̓aning ti Pedrong nagtuw̓al,
“Indi ilëm nag̓aintindianu kung unu pay gustu mung ianing!”
Numanyan atiang lag̓ing indi pa nganing nag̓atapus ta pagbitala,
may manung nanuluk da.
61 Pagkatuluk da yang manu,
ti Ginuu ta dayun dang nagbalyëd ang tuminëlëng tung ni Pedro.
Pagbinag̓asay yang mga mata nirang durua,
baklu ra nga dëmdëmay ni Pedro yang inaning ni Ginuu na tung anya ta nungayna,
ang mag̓aning,
“Pedro,
numaan ang law̓ii,
baklu manuluk yang manu,
ang maklua rang mag̓ingwara tung yëën ang yuu pala indiaw ag̓ailala mu.”
62 Numanyan pagkadëmdëm ni Pedro tii,
diritsyu rang luminua ang nag̓intra ra tarangitën ang duru rang pagsurug̓atën nae.
Magbistaën Da Ti Jesus (22:63-71)
63-64 Taa numanyan yang mga taung naang pamagbantay tung ni Jesus,
yang binuat nira tung anya,
pinaalëngtan da nirang pinëdëngan.
Pagkatapus,
pinikadaan da nira ta suntuk ang ya ray pagkalipayan nirang pag̓atalangkakan.
Kada suntukun,
dayun da nirang talimaanën ang,
“Ta,
atiing yawa bantug ang prupita,
abir,
pintuën mu kung tinu pa atiang nagtigbak tung nuyu!”
65 Dispuis duru pang mga bitalang malalain ang nag̓ipanalunga nira tung anyang nag̓ipagsaway.
66-67 Numanyan atiing pangayag da yang kaliw̓utan,
namagsaragpun da yang mga pamagpakigmaëpët tung nasyun ang Israel,
may yang mga paring arabubwat ta katëngdanan asta yang mga sag̓ad tung mga urdinansa.
Pagkasagpun da nirang tanan,
dayun da nirang pinaguuyan ti Jesus ang pinatalunga ang para bistaën da nira.
Mag̓aning tanira tung anyang pamagbista,
“Kung matuud ang yawa yang pag̓aningën ang Cristo,
idikta mu taa mismu tung katalungaan yamën,”
ag̓aaning.
Tumuw̓al ti Jesus,
“Aa maskin magtuw̓alaw pa,
indiaw ra ka ilëm panangërën mi.
68 Dispuis kung unu pay talimaanënu tung numyu,
indiaw ra ka ilëm tuw̓alën mi.
69 Piru yang nag̓ianingu tung numyu ya ra taa.
Yuung pinag̓ulang tukaw ang Maninga Tau,
maskin naanaw ra tung pudir mi simanyan,
piru indi ilëm buay,
pakarungunaw ra yang Dios tung tëpad na tung tuu ug̓ud kasiraanami rang maggaraëmën,”
mag̓aning.
70 Pagkagngël nira tia,
pinabalitëktëkan si nirang tinalimaan ang,
“Ayw̓a,
yang gustu mung ianing yawa yang pag̓aningën ang Ana Yang Dios?”
Ag̓aaning ka ti Jesus ang nagtimalës,
“Yamu ka nganing ay pag̓aning.”
71 Pagkagngël da nira tia,
dayun dang namag̓araning-aningan dang mag̓aning,
“Ta,
tëlëngan mi.
Ayw̓a magkaministiranita pa ta dumang magsistigus,
sindu atia ra,
nagngël ta ra,
nabitala na ra!”
mag̓aning.