11
14Bilang mag̓usuyamu ra ilëm tung muliduung naang nag̓ipaitaw ang katulad ka tung yëën ang pag̓usuy ka tung mulidung ipinagpaita ni Jesu-Cristo.
Nag̓alalangan Ni Pablo Yang Mga Baw̓ay Ang Kaministiran Ang Mamagpandung Kung Mamagsaragpun Da Nganing Tanirang Sam Pundaan (11:2-16)
2 Agdayawënamu yëën natëtëngëd pagdëmdëmamu pang pirmi tung yëën ig nag̓apadayunan mi ka yang nag̓itulduk ang ipinag̓intrigaw ra tung numyu ang kumpurming ibinutwan ni Ginuung Jesus tung mga apustul na.
3 Ug̓aring ilëm may sasang bag̓ay ang gustuung mamarësmësan mi ta maayën.
Tung yatën ang mga lalii sasa may sasa,
yang pagmangulu tung yatën,
ya ra ti Jesu-Cristo.
Tung mga baw̓ay,
yang pagmangulu,
ya ra yang mga kasawa nira.
Tung ni Jesu-Cristong nagparanëk ang nag̓ingtaung bilug,
yang pagmangulu tung anya,
ya ra yang Dios ang yay pag̓aningën nang Ama na.
4 Ig disir,
kung magsaragpunamu ra nganing ang para magtuuamu ra tung Dios,
kung alimbawa may sasang laliing may pandung nang pag̓ampu ubin pagpadapat ta sasang bitalang ya ag̓ipaëyangay yang Espiritu Santo tung isip na,
asan da nga pakaëyakay na yang pagmangulu tung anyaa.
5 Piru kung may sasang baw̓ay ang anday pandung nang pag̓ampu ubin pagpadapat ta sasang bitalang ya ipaëyangay yang Espiritu Santo tung isip na,
ya ka,
asan da ka nga pakaëyakay na yang pagmangulu tung anya.
Ay katimbang nang pinakayasan na ra ilëm yang kulu na.
6 Ay kung indi ra nganing malëlyag ang magpandung,
maayën pang magpatupi ra ilëm ta linalii.
Piru kumus makakaëyak tung sasang baw̓ay ang magpatupi ta linalii ubin magpakayasb,
dapat ang magpandung yang kulu na tung pagsaragpunan.
7 Ay simpri,
yang sasang lalii,
yang indi na dapat ipagpandung ay natëtëngëd yang pagkatau na ipinanggid-anggid yang Dios tung sadiling pagkabëtang na ang para ikadëngëg nac.
Piru yang baw̓ay tanya,
kaministiran ka ëngëd ang magpandung ay natëtëngëd tanya ag̓ikadëngëg yang lalii.
8 Ay atiing pag̓imu yang Dios tung primirung lalii may tung primirung baw̓ay,
yang lalii tanya bëlag tung baw̓ay ëklay na,
kung indi,
yang baw̓ay yay tung lalii ëklay nad.
9 Dispuis yang ipinag̓imu yang Dios tung lalii,
bëlag̓an ang mag̓aning ang para yay mag̓aruman tung baw̓ay,
kung indi,
yang baw̓ay inimu na ug̓ud yay mag̓aruman tung laliie.
10 Ya ray natëngëran na ang kung magsaragpunamu ra nganing,
dapat ang magpandung yang sasang baw̓ay bilang sinyalis ang tanya pagpamangulu tung kasawa na.
Maskin pa tung mga angil ang pamagpaniid asan tung numyung pagsaragpun,
yay magkatamang pisan tung pag̓irintindiën nira.
11 Ug̓aring maskin pang maning tia,
itang pagtalig tung ni Jesu-Cristo laliig baw̓ay,
pagkinaministiranay tanirang duruang magkasawa.
12 Ay kipurki kung yang primirung baw̓ay tung lalii ka man ngaëklay yang Dios,
simanyan yang sasang lalii tung baw̓ay si ka manliit.
Ang pagkatapus pariung tung Dios manliit ang katulad ka tung tanan ang bag̓ay.
13 Timbang-timbangën mi ra ilëm tung mga isip mi.
Magkabag̓ay w̓asu kung yang sasang baw̓ay mag̓ampu tung Dios tung katalungaan ming kadaklan ang anday pandung naf?
14-15 Ayw̓a,
maskin tung kinaug̓alian ta,
kung may sasang laliing magpabug̓aw ra tung bua nang magbinaw̓ay,
bëlag bang asan da nga pakaëyakay na yang tinanguni na?
Piru yang sasang baw̓ay tanya,
kung abwat yang bua na,
bëlag bang ya ray dëngëg na?
Simpri dëngëg na tia ay ya ra kay ipinakdul yang Dios tung anyang durug tinlu ang maning pa tung ya ray sungkut nag.
16 Piru kung tinu pay nag̓alëlyag ang magpakigsug̓a natëtëngëd tung bag̓ay ang naa,
anday dumang matuw̓alu,
kung indi,
ya taa:
kung tung pagturuuën tung Dios,
maning tia yang ug̓ali yamën ang mga apustul pati yang kadaklan ang mga kinasakpan yang Dios ang kada sam pundaan.
Yang Pamasul Ni Pablo Tung Nira Natëtëngëd Tung Pagdërëmdëmën Nira Tung Pagpakugmatay Ni Ginuung Jesus Ang Ya Ra Ilëm Ag̓ipapanaway Nira Tung Basta-w̓asta (11:17-22)
17 Numanyan natëtëngëd tung magdasun ang ipaintindiu tung numyu,
bëlag yamug dayawayu ay natëtëngëd kung magsaragpunamu ra nganing ang magpurutul,
yang pakaw̓utun na bëlag̓an tung ikaayën mi,
kung indi,
tung ikalain mi.
18 Ag̓aningënamu ra yëën ta maning tia ay tukaw-tukaw tung tanan nabalitaanu ra ang kung magsaragpunamu ra unu nganing,
yang kadagmitan unu tung numyu paggrupu-grupuamu.
Maskin tung yëën ang pag̓intindi,
siguru may sam parti tung balitang atia ang puiding may kamatuuran na.
19 Tung bag̓ay,
kung isip-isipënu yang pagbërëlag-bëlag ming maning tia,
may kaayënan na ka ay natëtëngëd asan da nga luw̓away kung tinu pa asan tung numyu ay pag̓usuy rang matuud tung magkatama.
20 Purisu ya ra ka man taang nag̓ipag̓aningu ang kung magsaragpunamu ra nganing tung balay yang sasang aruman mih,
yang pagsararuan ming atia,
bëlag̓an tung ikadëngëg ni Ginuu tai.
21 Umpat indiamu aningënu ay kipurki yang duma asan tung numyu,
panalungkuyan dang pagtukaw tung mga kaarumanan nirang kadaklan ang anya-anyang balun sinagpagustuay ra ta pagpangan.
Purisu anday dumang pakaw̓utun na,
yang duma nag̓asuw̓uk da,
yang duma balëng da ay nag̓asubraan na ra nganing yang panginëm na ta binuj.
22 Abaa yang numyung atia!
Ayw̓a,
anday mga balay ming sadili ang para duunamu ra ilëm mamangan ang nunut da ka ta panginëm mi ta binu?
U ëngëd mi w̓asung maglamku tung mga kaarumanan mi ang tanira ka pa man mga kinasakpan ka mismu yang Dios?
Ëngëd mi w̓asung magpakaëyak tung nirang mga maliliwag̓ën ang gësyë ilëm yang balun ang ëkël nira?
Unu pa w̓asu ay sarang ang maaningu tung numyu?
Yamug dayawayu tung pag̓abuat ming atia?
Bëlag!
Yamug basulayu!
Nag̓aulit Ni Pablo Sigun Tung Pagpundar Ni Ginuung Jesus Tung Pagdërëmdëmën Tung Pagpakugmatay Na (11:23-26; Mateo 26:26-29; Marcos 14:22-25; Lucas 22:14-20)
23 Sanu pa indiamu ra basulunu tung pag̓urubraën ming atia,
ay ta yuu,
pinasanag̓anaw ra ni Ginuu ta kung unu pay palaksu yang pagdërëmdëmën tang atia tung anya ang pagkatapus,
ya ra kay ipinag̓intrigaw tung numyu.
Ulitënu si kanay ang ipadëmdëm tung numyu yang palaksu na.
Ti Ginuung Jesus,
atiing law̓iing atiing tanya traidurun dang ipadëëp,
atiing simpan dang mamagsararuan da tanira yang mga tauan na,
tanya namisik da ta tinapay.
24 Pagkatapus ta pagpasalamat na tung Dios,
dayun na rang piningas-pingas ang nunut da ka ta pagpasanag na tung nira ang mag̓aning,
“Atia,
ya ra taang tinanguniu ang ya ray buatën ang maning pa tung sasang idasag arangan da ilëm tung numyu.
Yang nag̓aita ming naa tung yëën,
ya ray usuyun ming magdëmdëm tung yëën ang nagpakugmatay para tung numyu,”
ag̓aaning.
25 Numanyan pagkatapus nira ta pagsararuan nirang pamag̓iapun,
pati yang sam basung binu ya si kay pinisik nang pinasalamatan tung Dios.
Pagkatapus maning taa yang pagpasanag na tung nira,
“Yang irinëmën ang atia,
ya ra taang dug̓uu ang ipaturuku ang ya ray magpabakëd tung baklung ipagpakigpaig̓u yang Dios tung mga tau ug̓ud asan da nga tapnayay nak.
Kada igmën mi tia,
asanaw ra ka nga dëmdëmay ming nagpakugmatay para tung numyu,”
ag̓aaning duun tung nira.
26 Nag̓aulitu ra ilëm ngani yang palaksu nang atia ay gustuu ilëm ang pamaridëngdëngan mi ta maayën ang kada mapangan mi tiang tinapay,
kada mainëm mi tiang binu,
ya kay pagparaintindiën mi kung unu pa ëngëd ay nag̓adapatan yang pagpakugmatay ni Ginuu ta ang asta ra ilëm tung ipaglëkat na.
Yang Pagpaaman Ni Pablo Tung Nira Ang Kung Basta-w̓astaën Ilëm Nira Yang Pagdërëmdëmën Nirang Atia, Ya Ray Panuw̓alan Nira Tung Dios (11:27-34)
27 Purisu anday dumang lagpakan na tia,
kung indi,
kung tinu pay magpakipangan yang tinapay ang atia,
ang pagkatapus magpakiinëm yang irinëmën ang atia ang indi na rag pakdulan ta kantidad yang nag̓adapatan na,
yang taung atia ya ray turuw̓alën na tung ni Ginuu ta ay natëtëngëd katimbang nang asan da ilëm nga basta-w̓astaay na yang tinanguni na may yang dug̓u na mismu.
28 Imbis basta-w̓astaën na ra ilëm,
maayën pang baklu ra magpadayun ang magpakipangan yang tinapay ig magpakiinëm yang binu,
dapat ang insapuën na ra kanay yang sadiling mga ubra-ubra na kung magkatunu tung pagsirilibraën ming atia.
29 Ay kipurki kung tinu pay magpakipangan ig magpakiinëm ang indi na ra ag̓intindiën ta maayën yang tinanguni ni Ginuu tal,
tanya ra mismu ay pagsagyap ta parusa tung sadili nang liit tung ni Ginuu ta.
30 Purisu ya ray natëngëran na ang dakëlë ra asan tung numyung pamaglaru ig bëlag̓an da ka ilëm pira pang bilug ang nagkarapatay ra.
31 Piru kung insapuën ta ra kanay yang mga sadili ta bakluita ra magpakipangan ig magpakiinëm,
atia,
indiita ra ka dangatën ta parusa.
32 Piru kung alimbawa parusaanita ni Ginuu ta,
asanita ra kag tadlëngay nang agdisiplinaay ug̓ud indiita ra madamay tung bëlag̓an mga tumatalig ang masintinsiaan na tung kalainan ang anday katapus-tapusan na.
33 Kapurisu mga putulu,
ang para maanluyan da yang prublimang atiang nag̓asambitum,
kung magsaragpunamu ra nganing ang para magsararuanamung magpurutul ang kalug̓ud da ka yang pagdërëmdëmën mi tung pagpakugmatay ni Ginuu ta,
mag̓iristimaranamu rang mag̓ërëlat-ëlatan.
34 Alimbawa kung tinu pa asan tung numyu ay midyu nag̓asuw̓uk da,
ang muya indi ra mapag̓ëlat tung mga kaarumanan na,
maayën pang mamangan da kanay tung balay na baklu magpasakëp.
Ya ray buatën na ug̓ud yang pagsaragpun ming atia anda ray makanayan na ta ipagdisiplina yang Dios tung numyu.
Kidispuis pa,
kung natëtëngëd ka man tung dumang mga bag̓ay ang nagkarasambit mi tung sulat mi,
baklu ra tayu-tayuayu,
kung kumaw̓utaw ra nganing asan.