Nag̓ipasanag Na Kung Ya Pa Ag̓aring Mabilug̓an Nira Kung Tinu Pay Matuud Ang Nag̓apabitala Yang Espiritu Santo May Yang Bëlag (12:1-3)
12
Taa numanyan,
mga putulu,
kung natëtëngëd tung tinalimaan mi tung yëën natëtëngëd tung pag̓urubraën yang Espiritu Santo tung yatën,
durung kalëlyag̓u ang yay mamarësmësan mi ta maayën.
2 Nag̓askëan mi ra ka ang atiing indiamu pa nag̓apagtalig,
ëkël tung sari-saring aklës ni Satanas,
muya-muyaamu ra ilëm ang nadayaan na ang para magtuuamu tung mga bultung indi nganing maskëng magbitala.
Piru kumus may mga dimunyung pag̓ërëkëlën tung pagturuuën ming atii,
pinaëyanganamu ra nira ta mga pagbiw̓italaën mi.
3 Purisu ang para mabilug̓an mi kung tinu pay matuud ang nag̓apabitala yang Espiritu Santo may yang bëlag,
ipaskëu ra tung numyu ang yang sasang taung nag̓apabitala yang Espiritu Santo,
indi na ra ëngëd isumpa ti Jesus ang ituluy tung malain,
kung indi,
ya ra ag̓aningay nang Dios ang Makagag̓aëm.
Sari-saring Mga Abilidad Ang Nag̓ipamakdul-pakdul Yang Espiritu Santo Tung Mga Tumatalig, Piru Sam Bilug Ilëm Tanyang Pagpamakdul-pakdul (12:4-11)
4 Dispuis pa sari-saring abilidad ang bëlag̓an pastikulara ang nag̓ipamakdul-pakdul ta diw̓aldi tung yatën ang mga tumatalig,
piru sam bilug ilëm yang Espiritu Santong pagpaëyang.
5 Sari-sari kang palaksu yang panirbian ta tung Dios may tung mga putul ta,
piru sam bilug ilëm ti Ginuu tang pagpaktël tung yatën ang panirbian.
6 Sari-sari kang nag̓ipabuat yang Dios tung yatën,
piru sam bilug ilëm tanyang pagpaktël tung yatën ang tanan ang para kayanan tang buatën yang kumpurming unu pay nag̓ipabuat na tung yatën.
7 Sasa may sasa tung yatën sinagpakdulay ta anya-anyang mga abilidad ug̓ud ikaayën yang kadaklan ang mga kaarumanan tang mga tumatalig ang asan da ka nga papruibaay yang Dios ang asan dag pagtinir tung numyu yang Espiritu Santo.
8 Kipurki tëlëngan mi.
Ëkël tung pag̓urubraën yang Espiritu Santo tung sasang tumatalig nag̓apakdulan yang Dios ta kaya nang magpadapat ta bitalang pagwayangan ta isip.
Ig yang sam bilug ka nag̓apakdulan na ta kaya nang magpasanag ta makaliliway tung mga kaarumanan na sigun tung tamang pag̓irintindiën tung kamatuuran ëkël ka mismu tung pag̓urubraën yang Espiritu Santo tung anya.
9 Yang duma nag̓apaëyangan yang Dios ta dakulung pagtalig na tung anya,
ëkël ka mismu tung pagparaktëlën yang Espiritu Santo tung anya.
Yang duma nag̓apakdulan yang Dios ta kaya na kang magpamaayën tung may mga laru ëkël ka mismu tung pagparaktëlën yang Espiritu Santo tung anya.
10 Yang duma nag̓apakdulan na ta kaya na kang magpalua ta mga pruibang maktël.
Yang duma nag̓apakdulan na ka ta kaya nang magpadapat ta mga bitalang ya ipaëyangay yang Dios tung isip na.
Yang duma nag̓apakdulan na ka ta kaya nang mag̓ilala tung mga abilidad yang duma kung ya ipaëyangay yang Espiritu Santo u kung ya ipaëyangay yang kakuntrariu na.
Yang duma nag̓apakdulan na ka ta kaya nang magbitala tung dumang bitala ang indi na ra ka nag̓akdëkan.
Yang duma nag̓apakdulan na ka ta kaya nang magpalatay tung kadaklan kung unu pay linëgdangan yang ibinitala yang aruman na tung bitalang atiang indi nag̓akdëkan.
11 Yang tanan ang mga abilidad ang atiang nagkarasambitu pulus ya ag̓ipaëyangay yang Espiritu Santo ang ya kay nag̓ipamarti-parti na tung sasa may sasa tung yatën,
ang kumpurmi ra ilëm ang nag̓alëlyag̓an na,
anya-anyang abilidad sinagpakdulay na.
Nag̓ipananglit Ni Pablo Yang Sam Pundaan Yang Mga Tumatalig Tung Sasang Tinanguni (12:12-26)
12 Maayën pa,
ipananglitu ra kanay yang gustuung ianing tung tinanguni ta sasang tau.
Maskin sam bilug ilëm ka man,
piru durung mga parti-parti na,
ig maskin durung mga parti-parti na,
sa nga tinangunian ka ilëm yang pamilug̓an nirang tanan.
Yang pisan tia ay kaalimbawaan ni Jesu-Cristo ang yay pamilug̓an tab.
13 Ay,
itang tanan ang mga tumatalig,
atiing pagtalig ta tung anyang nagpatapnay,
pinatiniranita ra anya tung Espiritu Santong sam bilug ilëm ang yang kaalimbawaan na yay maning pa tung ipinamënyag na tung yatën ang para ita mag̓ing maning pa tung sa nga tinangunian da ilëm.
Atia ya ray binuat na tung yatën ang tanan maskin unu pang nasyunayita,
maskin mga Judioita ubin tag̓a duma-rumang nasyunita,
ubin maskin unu pang pagkabëtangay ta taa tung kaliw̓utan,
maskin mga kirëpënita ta tau u bëlag̓an man.
Bilang maning pa tung parariuita rang pinapanginëm na tung Espiritu Santong sam bilug ilëm ka man.
14 Kung ibaliku tung tinanguni ta,
maskin sam bilug ilëm ka man,
piru bëlag̓an sam parti ilëm,
kung indi,
dakëlëng mga parti-parti na.
15 Alimbawa kung may sasang kakay rin ang maskë ra rin ang magbitala ang ya ra ag̓aningay nang “Aa,
kumus yuu bëlag̓anaw kang kalima,
anda ray kalalabtënu tung tinanguning naang nag̓akabitanu,”
unu pa pa duun?
Maskin pa maning da tia yang binitala na,
may kalalabtën na ka ëngëd agyapun tung tinanguning atia.
16 Alimbawa kung may sasang talinga rin ang maskë ra ka rin ang magbitala ang ya ra ag̓aningay nang,
“Aa,
kumus yuu bëlag̓anaw kang mata,
anda ray kalalabtënu tung tinanguning naa,”
unu pa pa duun?
Maskin pa maning pa tia yang binitala na,
piru may kalalabtën na ka ëngëd agyapun tung tinanguning atia.
17 Alimbawa kung yang intirung tinanguni yang sasang tau,
anday dumang parti na,
kung indi,
sam bilug ilëm ang mata,
ya pa ag̓aring magngël yang may tinanguni?
Ig alimbawa kung yang tinanguni na,
anday dumang parti na,
kung indi,
sam bilug ilëm ang talinga,
ya pa ag̓aring mauw̓u?
18 Piru tung pagkamatuud,
yang Dios yay nagpanayu-tayu tung tanan ang mga parti-parti yang mga tinanguni ta sasa may sasa ang kumpurmi ra ilëm tung kalëlyag̓an na.
19 Ayw̓a,
kung alimbawa yang intirung tinanguni ta,
sam bilug ilëm ang parti,
aningën pa w̓asung tinanguni?
20 Piru tung pagkamatuud,
yang tinanguni ta,
maskin dakëlë yang mga parti-parti na,
piru sa nga tinangunian pa ka ëngëd yang pamilug̓an nirang tanan.
21 Numanyan baliskarën ta ra yang alimbawa.
Indi ra ka ëngëd magkabag̓ay ang yang sasang mata ya ra ag̓aningay na yang sasang kalima ang “Anday kaministiranu tung nuyung kalimaa.”
Utru si,
pati yang sasang kulu indi ra ka magkabag̓ay ang ya ra ka ag̓aningay na yang mga kakay ang,
“Anday kaministiranu tung numyung mga kakayamu!”
22 Kung indi,
yang mga parti-parti yang mga tinanguni ta ang kalaum tang may kaluw̓ayan na kay tung duma,
ya pa ka ëngëd ay kaministiran tang kaministiran.
23 Dispuis yang mga parti-parti nang midyu bëlag̓an masyadung matinlung tëlëngan,
ya pa ka ëngëd ay mas ang nag̓asikasuën ta.
Pati yang mga parti-parti nang makakaëyak ang maita,
ya pa ka ëngëd ay mas ang paiwan-iwanan tang papaablan.
24-25 Piru yang mga parti-parti nang matitinlung tëlëngan,
anday ministir ang paiwan-iwanan ta pang paisa-isaan ta masyadu.
Kung indi,
yang Dios ya ray nagpanayu-tayu ang pinapagsarasa na tanirang tanan.
Ay yang mga parti-parti nang midyu aranëk ta dëngëg,
ya ray mas ang pinadëngëg̓an na.
Maning tia yang pagpasasa na tung nira,
ug̓ud anday mapagparasuag-suag̓an tung sa nga tinangunian,
kung indi,
tanirang tanan pariu-pariung mag̓irintindian ang mag̓arasikasuan tung ikaayën yang sasa may sasa.
26 Alimbawa yang sam parti kung magsisiitan da,
pati yang kadaklan magsisinti ra ka.
Kung alimbawa yang sam parti nag̓adayaw,
tanira kang tanan mag̓ampayan da ka ta kasadyaan nira.
Yang Isplikar Ni Pablo Natëtëngëd Tung Mga Turnung Ipinamiar Yang Dios Tung Mga Tumatalig Ang Para Ikaayën Yang Intirung Kabilug̓an Nira (12:27-31a)
27 Anday dumang linëgdangan yang nag̓ipananglitung naa,
kung indi,
yamung tanan maning pa tung tinanguni ni Jesu-Cristo asan tung Corinto.
Ig sasa may sasa tung numyu,
maning pa tung mga parti-parti yang tinanguni na.
28 Yang mga tumatalig pinamiaran yang Dios ta mga turnu nira ang maskin dakëlë tanira,
luw̓us dang ipinampatayu-tayu yang Dios ang pinapagsarasa tung intirung sam pundaanc.
Kung pamilang-bilangën ta yang mga turnu nira,
ya ra taa yang duma.
Primiru,
asan da ta mga apustul ni Ginuu ta.
Pangyadwa,
asan da ka ta may kaya nirang magpadapat ta mga bitalang ya ag̓ipaëyangay yang Dios tung mga isip nira.
Pangyaklu,
asan da ka ta may kaya nang magtulduk yang bitala yang Dios ang nabtang tung kasulatan ang makaliliway ta kinaisipan.
Asan da ka ta may kaya nang magpalapus ta mga pruibang maktël,
asan da ka ta may kaya nang magpamaayën tung may mga laru,
asan da ka ta may kaya nang magtaw̓ang ta matinlu tung mga kaarumanan nira tung masadyang kinaisipan,
asan da ka ta may kaya nang mag̓ërëkëlën ta matinlu tung mga kaarumanan nira,
asan da ka ta may kaya nang magbitala tung dumang bitalang indi na ka nag̓aintindian.
29-30 Simpri bëlag̓an ang mag̓aning ang tanirang tanan pulus mga apustul ubin pulus mga manigpadapat ta bitalang ya ag̓ipaëyangay yang Dios tung mga isip nira ubin pulus mga manigtulduk yang bitala yang Dios.
Bëlag̓an kang mag̓aning ang tanirang tanan pulus nag̓apagpalapus ta mga pruibang maktël ubin pulus nag̓apagpamaayën tung may mga laru ubin pulus nag̓apagbitala tung dumang bitala ang indi ka nira nag̓aintindian ubin pulus manigpalatay kung unu pay linëgdangan yang ibinitala yang aruman na tung dumang bitala ang para maintindian da ta kadakland.
31 Piru yang mga abilidad ang kapin pang ingalukun mi tung Dios ya ra yang may taw̓ang na ëngëd tung grupu ang para mas pang magtinlu yang pag̓urusuyun nira tung kalëlyag̓an na.
Nag̓ipaskë Ni Pablo Yang Sasang Papanaw Ang Mas Matinlung Usuyun Nira Tung Paggaramitën Nira Yang Mga Abilidad Nira (12:31b-13:13)
Kidispuis pa,
kung gamitën mi ra nganing yang mga abilidad mi,
may sasang papanaw ang mas matinlung usuyun mi kay tung nag̓usuyun mi numanyan.
Ya ra ka man taang ipaskëw ra tung numyu.