13
Maskin pang may ikayaung magbitala tung dumang bitala ang indi nag̓aintindianu maskin bitala ta mga tau taa tung kaliw̓utan ang naa,
maskin bitala ta mga angil duun tung langit,
piru kung anda ka ilëm ay paggëgmaw tung mga masigkatauu,
yang pamitalaung maning tia,
andang pisan ay kapulutan na.
Katimbang nang sasa ka ilëm ang ginla ang katulad ka tung mga turugtug̓an ang yag patikay ubin yag papagsantikay.
2 Maskin pang may ikayaung magpadapat ta bitalang ya ag̓ipaëyangay yang Dios tung isipu,
maskin yang tanan ang inëgtëman pa rin yang Dios ang tukaw luw̓us dang nag̓aintindianu,
maskin yay kayananung ipasanag ta makaliliway ta isip,
maskin durug dakul yang pagtaralig̓ënu tung anya ang asta saranganung buatën yang sasang bag̓ay ang ag̓aningën ta duma ang indi masarangana,
piru kung anda ka ilëm ay paggëgmaw tung mga masigkatauu,
anda pa ka ëngëd ay kuintaw.
3 Maskin pang yang tanan ang kumpurming nabtang tung pudiru,
luw̓us dang ipamakdul-pakdulu tung mga maliliwag̓ën,
piru anda ka ilëm ay paggëgmaw tung nira,
bëlag̓an ang yay dayawën yang Dios tung yëën tung uri.
Maskin bilug yang isipung mapirinda ra yang sadiliu tung malain sigun ilëm tung mga taung mamagkatinir da yang kalibrian nira ang para ya ray ikadëngëg̓u tung katalungaan ni Ginuung Jesusb,
ang pagkatapus anda ka ilëm ay paggëgmaw tung mga taung atia,
anda ka ilëm ay dayawën na tung yëën asan.
4-5 Maning taa yang ug̓ali yang sasang taung may paggëgma nang matuud tung mga aruman na.
Tanya mapinaurayën,
mainildawën,
bëlag̓an kang mainiw̓ëg̓ën,
bëlag̓an kang mapinalandawën,
bëlag̓an kang sayud yang ug̓ali na,
bëlag̓an kang madinëmtën.
6 Indi kag sadyaan kung may sasang aruman nang pagbuat ta malain,
kung indi,
masadya ëngëd tung isip na kung pagbuat ta matinlu.
7 Kipurki kung talagang nag̓agëgmaan ta ta ustu yang mga aruman ta,
anda tung isip tang magdaldal kung may nabuat nirang kamali,
indiita ra ka maplëkan agkali ta pagtalig ta tung nira,
kung indi,
maparurusan tang maagwantaan ang basi pa ra ilëm magsug̓at da.
8 Piru naang abilidad ang nag̓apagpadapat ta mga bitalang ya ag̓ipaëyangay yang Dios tung isip ta matatapus ka ëngëd.
Pati naang abilidad ang pagbitala tung dumang bitala ang indi nag̓aintindian,
magtadëng da ka.
Asta naang abilidad ang pagpasanag ta makaliliway ta isip sigun tung pag̓irintindiën ta tung kamatuuran,
ya ka.
9 Ay ya pa ag̓ari,
maskin pang duru rang nag̓aintindian ta,
may pagkakulang na pa ka ëngëd.
Pati yang kumpurming nag̓ipagpadapat ta tung mga kaarumanan ta.
10 Piru kung kumaw̓ut da nganing yang uras ang ipagpalua yang Dios yang kumplitung pisan,
kung unu pay may pagkakulang na,
maparëng da ka ilëm.
11 Pariu tung yëën.
Atiing mulaw pa,
yang pamitalaw may yang palaksu yang pag̓irisipënu may yang pag̓irintindiënu pulus may pagkamula na.
Piru atiing namalamaraw ra,
binutwanu ra yang sistimaung atiing may pagkamula na.
12 Maning kang pisan tia ay kaalimbawaan yang nag̓askëan ta natëtëngëd tung pagkadios yang Dios simanyan ay maning pa ilëm tung ulung ang malaw̓uk-law̓uk ang tëlëngan tung ispiuc.
Piru tung uri may uras kang kaw̓utun ang mag̓ërëmëtanita ra ka ëngëd yang Dios.
Purisu maskin may pagkakulang pa ka man yang nag̓askëan ta natëtëngëd tung pagkadios na numanyan,
piru tung uri,
makumplitu rang pisan tia ang katulad ka tung pagkakumplitu yang nag̓askëan na simanyan natëtëngëd tung pagkatau ta ang andang pisan ay pagkakulang na.
13 Mintras indi pag kaw̓utun yang uras ang atia,
may tulung bag̓ay ang yay dapat ang pirming impurtaën ta.
Ya ra taang pagtaralig̓ën ta tung ni Jesu-Cristo may ya ra taang pagparakbatën ta tung anyang maglëkat may ya ra ka taang paggërëgmaan tang magpurutul.
Piru tung nirang tulu,
mas landaw ta kantidad yang paggërëgmaan ta.