Kung Unu Pay Nag̓ibitala Tung Pagsaragpun Nirang Magpurutul, Dapat Ang Maintindian Ta Kadaklan (14:1-25)
14
Kapurisu yang sikarën mi ëngëd ang yamu pirming maggërëgmaan ta ustu.
Padërëpan mi ra ka yang mga abilidad ang atiang nag̓ipakdul yang Espiritu Santoa,
kapin da ëngëd ang yamu paëyangan na ta abilidad ming magpadapat ta sasang bitalang ya ag̓ipaëyangay na tung mga isip mi.
2 Ay tutal,
yang pagbitala tung dumang bitalang indi nag̓aintindian,
bëlag̓an yang aruman nang tumatalig ay mag̓aningën na,
kung indi,
yang Dios.
Anda nganing ay nag̓aintindi kung unu pay gustu nang ianing,
kung indi,
nag̓apabitala yang Espiritu Santo natëtëngëd tung mga bag̓ay ang indi ka ilëm nag̓askëan ta tau.
3 Piru naang sam bilug ang nag̓apagpadapat tung mga kaarumanan na ta sasang bitalang ya ag̓ipaëyangay yang Dios tung isip na,
asan da ngayapay nira ta mataw̓ang tung nira ubin yang sasang sarang ang ipagpaktël nira tung mga isip nirang agluw̓ayën da rin ubin yang sasang paglakanan yang mga kalbatan ang nag̓apasaran nira.
4 Yang nag̓apagbitala ta dumang bitalang indi nag̓aintindian,
ya ilëm yang sadili na ay nag̓ataw̓angan na.
Piru yang nag̓apagbitala ta sasang bitalang ya ag̓ipaëyangay yang Dios tung isip na,
yang intirung sam pundaan yay nag̓ataw̓angan na.
5 Tung bag̓ay gustuu ang yamung tanan asan may abilidad ming magbitala tung dumang bitala ang indi nag̓aintindian.
Piru mas pang gustuu ang may abilidad ming magpadapat ta sasang bitalang ya ag̓ipaëyangay yang Dios tung mga isip mi.
Ay yang sasang pagpadapat ta bitalang maning tia,
mas pang may mataw̓ang na kay tung nag̓apagbitala tung dumang bitalang indi nag̓aintindian ta tau,
puira ilëm kung masarangan nang ilaktëd kung unu pay gustung ianing yang ibinitala na tung dumang bitala ang para may mataw̓ang na tung intirung sam pundaan.
6 Mga putulu,
isipën mi ra ilëm ta maayën.
Kung alimbawa kumaw̓utaw ra asan tung numyu ang pagkatapus magbitalaw ra tung dumang bitalang indi mi ka ilëm nag̓aintindian,
andang pisan ay maëklan ming taw̓ang tung yëën.
May maëklan mi ilëm kung alimbawa magpasanag̓aw tung numyu natëtëngëd tung sasang ipinagpabunayag yang Dios tung yëën ubin kung magpaintindiaw tung numyu ta sasang nag̓askëanu natëtëngëd tung kamatuuran ang naang nag̓apanangëd ta ubin kung magpadapataw tung numyu ta sasang bitalang ya ag̓ipaëyangay yang Dios tung isipu ubin magtuldukaw tung numyu natëtëngëd tung pag̓urusuyun ta tung nag̓auyunan na.
7 Puira ra kanay tung yatën ang mga tau,
maskin ialimbawaw ra ilëm tung mga turugtug̓an ang katulad ka tung palauta ubin tung dikuirdas,
kung bëlag̓an masyadung butayag yang tunul na,
ya pa ag̓aring maintindian ta kung unu pang sunataay ang magtugtug̓un?
8 Maning ka tung turumpita ang nag̓ipagliamar tung mga sundalu,
kung bëlag̓an kang butayag yang pagturugtug̓un,
tinu pa pay mapagsimpan ang para maningayaw ra tung gira?
9 Maning kang pisan tia tung numyu.
Kung indiamu magbitala ta maintindian ta duma,
ya pa ag̓aring maskëan nira yang gustu ming ianing?
Anday dumang pusisiun mi asan,
sungaw ra ka ilëm yang mga bitala mi.
10 Indi ilëm nag̓askëanu kung pira-pira pang bilug yang mga bitala ang nag̓ipamitala ta mga tau tung bilug ang kaliw̓utan.
Piru sasa may sasa,
anday inaning,
pulus nag̓aintindian ta mga taung yay may bitala ang natauan nira.
11 Piru kung alimbawa,
katulad tung yëën,
kung yang pamitala yang sasang tau indi ka ilëm maintindianu,
yang pagtërëlëngënu tung anya tanya tag̓a dumang nasyun ang aparting bitalaay ig yang pagtërëlëngën na ka tung yëën,
maning ka.
12 Maning kang pisan tia yang pagtërëlëngën ta duma may ruma tung numyu kung magbitalaamu ra tung dumang bitalang indi ka ilëm nag̓aintindian nira.
Purisu kumus maning da tiang duruamug kadërëp ang magkatinir yang mga abilidad ang naang nag̓ipakdul yang Espiritu Santo,
yang padërëpan mi ëngëd ang ingalukun ya ra yang may bastanting mapangayapan yang mga kaarumanan ming mga tumatalig ang para mas pang magtinlu yang pag̓urusuyun ming tanan tung nag̓auyunan yang Dios.
13 Purisu kung tinu pay may abilidad nang magbitala tung dumang bitalang indi nag̓aintindian,
kaministiran ang ipag̓ampu na tung Dios ang para pakdulan na ka ta abilidad nang magpasanag yang gustung ianing yang ibinitala na tung dumang bitala.
14 Kipurki alimbawa,
pariu ra tung yëën,
kung mag̓ampuaw ra nganing tung Dios ang yang bitalang gamitënu indi ka ilëm nag̓aintindianu,
matuud ka man ang nag̓apapag̓ampuaw yang Espiritu Santo,
piru kung unu pay nag̓ianing yang dilaku,
indi ka ëngëd pumanaw tung isipu,
ay indi ka ilëm nag̓aintindianu.
15 Purisu unu pay maayën ang buatënu,
kung indi,
ang kaisan mag̓ampuaw ra tung Dios tung bitalang indi nag̓aintindianu ang yay nag̓ipabitala tung yëën yang Espiritu Santo.
Ang kaisan mag̓ampuaw si ka ang yang kinaisipanu ya ray gamitënu ug̓ud maintindian da ka yang mga kaarumananung pamagtuu ka tung anya.
Pariu ka tung pagkarantaënu.
Ang kaisan magkantaaw rang magdayawaw tung Dios tung dumang bitala ang indi nag̓aintindianu ang yay nag̓ipakanta tung yëën yang Espiritu Santo.
Ang kaisan magkantaaw si ka ang yang kinaisipanu ya ray gamitënu ug̓ud maintindian da ka yang mga kaarumananung pamamati.
16 Ay kung indi ta ëklan tung maning tiang papanaw,
alimbawa pariu tung numyu,
kung magdayawamu ra nganing tung Dios tung dumang bitalang indi ka ilëm nag̓aintindian mi ang ya ra kay nag̓ipabitala tung numyu yang Espiritu Santo,
yang mga kaarumanan mi asan ang anday kaliw̓utan nira tung nag̓ianing mi,
kung magngël da nganing nira yang pagpasalamat mi tung Dios,
ya pa ag̓aring mapag̓aning ang “Magkatamang pisan tia” atiang indi ra nganing nira nag̓aintindian kung unu pay gustu ming ianing?
17 Ay maskin durug pagkatinlu yang pagpasalamat ming atia,
yang mga kaarumanan ming atiang pamamati anda ka ilëm ay maayap nira asan ang para mataw̓ang da ka rin tung nira tung pag̓urusuyun nira tung nag̓auyunan yang Dios.
18 Kung tung bag̓ay,
ta yëën pagpasalamataw tung Dios ang nag̓apabitalaaw yang Espiritu Santo tung dumang bitalang indi nag̓aintindianu ang mas pa kay tung numyung tanan asan.
19 Piru maski pang maning tia,
kung duunaw ra nganing nga lakët tung mga kaarumananung mga tumatalig ang pamagsaragpun,
gustuung magbitala ta maskin lima ilëm ang bulus ang yang isipu ya ray gamitënu ang para magparaintindiënaw tung nira.
Indi ra ilëm ang magbitalaw pa ta liniw̓u-liw̓ung tag̓a tung dumang bitala ang indiaw ra ka ilëm maintindian nira.
20 Mga putulu,
kaministiran ang yang pag̓irintindiën mi tung bag̓ay ang naa indi mi ra ilëm ëklan tung pag̓irintindiën yang mga mamula ang durug kaginamënën tung kumpurming makabëw̓ërëng.
Kung indi,
yang matinlung pakbungan mi tung mga mamulang gëg̓ësyë ya ra ilëm yang pagkainusinti nira tung pagburuatën ta mga malalain.
Piru yang pag̓irintindiën mi tung bag̓ay ang naang nag̓ianingu,
kaministiran ang ëklan mi tung pag̓irintindiën ang minaëpët.
21 May sang tag̓ang napabtang tung kasulatan ang yay pagpailala kung may apiktar nang maayën yang pagbitala tung dumang bitala ang indi nag̓aintindian.
Maning taa yang inaning ni Yawi natëtëngëd tung nasyun ang Israel atiing tukaw:
“Ëkël tung mga sundalung tag̓a dumang nasyun ang aparting bitalaay,
tag̓amanung pakdulan ta pag̓isipan yang mga tauanung naa.
Piru maskin pang maning tia,
indiaw ra ka ëngëd pamatiën nira ang para mamagsug̓at da rin,”
ag̓aaningb.
22 Purisu asan da ngaintindiay ta ang yang katuyuan yang pagbitala tung dumang bitalang indi nag̓aintindian,
bëlag̓an ang mag̓aning ang yay pruiba para tung mga taung pamagtalig tung Diosc,
kung indi,
para tung mga taung anday pagtalig nira tung anyad.
Piru yang pagparadapatën ta sasang bitalang ya ag̓ipaëyangay yang Dios tung isip ta,
yang katuyuan na ëngëd tia,
bëlag da ka rin para tung bëlag̓an mga tumatalig,
kung indi,
para tung mga tumatalige.
23 Kapurisu kung alimbawa pagsaragpunamu rang intirung sam pundaan ang pagkatapus anday dumang magngël asan,
pulus da ilëm pamagbitala tung dumang bitalang indi ka ilëm nag̓aintindian,
ang pagkatapus may mansikaw̓ut da asan ang mga bisitang indi pa nag̓apagtalig tung ni Ginuu ta,
unu pa pay sakpën yang mga kinaisipan nirang pamamati,
kung indi,
yamu ra ilëm ag̓aningay nirang mga bariaduamu.
24 Piru kung yang kumpurming magbitala pulus may sasang bitalang ya ag̓ipaëyangay yang Dios tung isip na ang ya ra kay nag̓ipagpadapat na tung kadaklan,
ang pagkatapus may masampura asan ang sasang bisita ang bëlag pang tumatalig,
puidi kang asan da tung tanan ang nag̓agngël na nga batikalay yang isip na ang tanya makinasalananën ka man.
Puidi kang asan da ka nga maladmaray na ang tanya ya rag talungaay na yang sintinsiang ipadapat yang Dios tung anya.
25 Kung unu pay nag̓atipig̓an na,
malw̓awan da.
Unaw̓is magpadagpa ra ilëm ang magsuku tung Dios ang nunut da ka ta pagdiklara na ang mag̓aning,
“Talagang yang Dios asan da ka man agpagpakigsasa tung numyu!”
ag̓aaningf.
Pagpaëtad Ti Pablo Kung Ya Pa Ag̓aring Maanluyan Nira Yang Mga Prublima Tung Pagsaragpunan Nira (14:26-40)
26 Kapurisu mga putulu,
unu pay gustuung ianing?
Yang nag̓askëanu tung numyu,
kada magsaragpunamu,
yang laksu na maning taa.
Yang sam bilug,
may sasang kantang ipinaëyang yang Espiritu Santo tung isip na ang para ipagdayaw na tung Dios.
Yang sam bilug,
may sasang itulduk na tung kadaklan ang ya ra kay ipinaisip tung anya yang Espiritu Santo ëkël tung pagpasadsad na tung kasulatan.
Yang sam bilug may sasang ipinagpabunayag yang Dios tung anyang ipagpadapat na tung mga kaarumanan na.
Yang sam bilug may ipagngël na tung dumang bitala ang indi nag̓aintindian ang ya ra kay nag̓ipabitala yang Espiritu Santo tung anya.
Yang sam bilug magpalatay kung unu pay linëgdangan yang mga bitalang atiang ibinitala yang aruman nang indi naintindian.
Buinu,
maayën ka tia.
Ya ilëm,
maskin unu pay buatën mi tung pagsaragpun mi,
luw̓us mi kang ëklan tung matinlu ug̓ud asan da ngayapay yang kadaklan yang mataw̓ang tung nira tung pag̓urusuyun nira tung nag̓auyunan yang Dios.
27 Alimbawa,
kung may malëlyag ang magbitala tung dumang bitalang indi ka ilëm nag̓aintindian,
tama ra ang may durua nga tauan ang magbitala ubin kung tëmëgka tung tulu,
basta bërëlës ilëm tanira ig dapat may magpalatay ka tung kumpurming ibinitala nirang sasa may sasa.
28 Piru kung anday magpalatay asan,
masig̓ëgtëm da ilëm mintras asan pa tung pagsaragpunan mi.
Baklu ra ikësën-kësënay na tung sadili na may tung Dios ang anda ray dumang magngël.
29 Alimbawa si,
kung may durua ubin tulu nga tauan asan ang may kaya nirang magpadapat ta mga bitalang ya ag̓ipaëyangay yang Dios tung mga painu-inu nira,
kaministiran ang pakdulan mi ka ta lugar ang magbitala kung unu pay gustu nirang ipagpadapat tung kadaklan.
Pagkatapus,
yang kadaklan ang pamagpamati,
kaministiran kung unu pay nag̓agngël nira timbang-timbangën da ta mupya tung mga isip nira kung matuud ang liit tung Espiritu Santo u kung bëlagg.
30 Dispuis kung may sasang pagpadapat da ta bitalang atiang ipinaëyang yang Dios tung isip na,
puiding padayunan na yang pagparadapatën na ang asta paëyangan da yang Dios yang aruman nang yag kakarung.
Kung mapaëyangan da nganing tiang aruman na,
naang pagbitala,
maayën pang tapusun na ra kanay yang nag̓ianing nang kumarung ug̓ud ipatug̓ay na ra tung aruman nang baklung pinaëyangan.
31 Ay kung ëklan mi tung maning tiang papanaw,
yamung tanan ang kumpurming magpadapat ta mga bitalang maning tia,
puiding mapagbërëlësamung tanan ang magpadapat yang mga bitalang atia tung kadaklan ug̓ud asanamu ra kang tanan mapangayap ang asan da ka këmtël yang mga kinaisipan ming tanan.
32 Simpri yang sasang may kaya nang magpadapat ta bitalang ya ag̓ipaëyangay yang Dios tung isip na,
kayanan na ka yang sadili nang kuntrulun.
33-34 Ay kipurki yang Dios ang yay pagpakdul tung nira yang abilidad nirang atia,
indi kang lag̓ing magsadyaan tung papanaw ang magulu,
kung indi,
tung papanaw ang mausay.
Katulad ka tung dapat ang usuyun tung pagsaragpun yang kadaklan ang mga kinasakpan yang Dios ang kada sam pundaan,
yang mga baw̓ay asan,
kaministiran ang mag̓ëkmëng da ilëm ay indi nag̓ilug̓ut tung nirang magbitala kung saragpun da nganing yang intirung sam pundaanh.
Kung indi,
dapat ang magparanëk tung mga kasawa nira ang katulad ka tung sasang linyang nag̓asambit tung kasulatani.
35 Alimbawa kung tanira may gustu nirang maskëan,
maayën pa ang tung mga kasawa ra ilëm nira italimaanay nira kung duun da nganing tanira tung sadiling pamalay-w̓alay nira.
Kipurki makakaëyak dang magbitala yang sasang baw̓ay asan tung pagsaragpunan ming sam pundaan.
36 Kung balaw̓ag tung isip mi yang nag̓ipag̓aningung atia,
ayw̓a,
yang gustu ming ianing ang yang bitala yang Dios asan tung numyu manliit?
Ubin asan da ka ilëm tung numyu nëgka?
37 Kung tinu pa asan ay pagpabëtang tung sadili na ang tanya may abilidad nang magpadapat ta mga bitalang ya ag̓ipaëyangay yang Dios tung isip na,
ubin may dumang abilidad ang ipinakdul yang Espiritu Santo tung anya,
dapat ang ilalaën na ra ka ang yang mga bag̓ay ang atiang isinulatu,
ya ra kay itinuw̓ul ni Ginuu ta tung yëën ang para ipatumanu ka tung numyu.
38 Piru kung tinu pay indi mag̓ilala,
indi ka ilalaën yang Diosj.
39 Kapurisu mga putulu,
ya ra taa yang pinakaisi yang gustuung ianing.
Yang padërëpan mi ëngëd ang sikarën ang yamu paëyangan yang Espiritu Santo ta abilidad ming magpadapat ta mga bitalang ya ag̓ipaëyangay na tung mga isip mi.
Dispuis indi mi ka pag̓ampalarën yang may mga abilidad nirang magbitala tung dumang bitalang indi nag̓aintindian.
40 Ya ilëm yang tanan ang pag̓urubraën ming pagsaragpun,
ëklan mi tung nag̓askëan ming magkabag̓ay ig mausay ang papanaw.