Nag̓aulit Ni Pablo Yang Pinakaisi Yang Ipinagpakaw̓ut Na Tung Nira Ang Ti Jesu-Cristo Matuud Ang Pinabungkaras Yang Dios (15:1-11)
15
1-2 Numaan,
mga putulu,
padëmdëmënamu ra kanay yëën natëtëngëd tung Matinlung Balitang atiing ipinagpakaw̓utu tung numyu ang ya ra kay pinanangëd mi ig numanyan ya ra kay mabakëd ang paniëlan yang pagparanangërën mi ig tung pagparanangërën mi asanamu ra ka nag̓atapnayay ni Jesu-Cristo basta yang dating kamtangan na atiing ipinagpakaw̓utu tung numyu ya ray padayunan ming panangdën,
puira pa kung nusias ilëm bëlag̓an din matuud yang pinanangëd mi.
3-4 Ay kipurki ipinag̓intrigaw ra tung numyu yang pinakaimpurtanting bitala ang ya ra kang lag̓i ay rinisibiu ang yang pag̓aningën ang Cristo nagpakugmatay natëtëngëd tung mga kasalanan ta ang yay uyun ang pisan tung nagkaraula natëtëngëd tung anyang nabtang tung kasulatana.
Dayun da kang ipinalg̓ud tung sasang lëyang ang pagkatapus tung yaklung kaldaw pinabungkaras da yang Dios ang ya kay uyun tung nagkaraulang nabtang tung kasulatanb.
5 Pagbungkaras na,
nagpaita ra tung ni Pëdrod,
magdasun tung grupung pag̓aningën ang Sam Puluk May Durua NGa Tauanc.
6 Pagkatapus may mininsang nagpaita ka tung subra limang gatus nga tauan ang mga kaputulan tang mga tumatalig ang pamagsaragpun.
Yang kadaklan tung nira bui pa ang asta simanyan,
piru may pira pang bilug ang nagkarapatay ra.
7 Pagkatapus tia,
nagpaita si ka tung ni Santiagoe,
magdasun tung tanan ang mga apustul nang pamag̓urugpuf.
8 Pagkatapus tung kauri-urian da yang pagparaitaën na,
maski nganing pala tung yëën nagpaita ka.
Yang kaalimbawaanu maning pa tung sasang mulang ipinangana ang indi naustuan tung bulan ang anday laum-laumun ta mga tau ang mabui pag.
9 Ay yuu ray pinakaaranëk ang pisan tung tanan ang mga kaarumananung mga apustul.
Indi ra ka rin nganing magkabag̓ay ang aningënaw pang apustul ay natëtëngëd pinagpamarasanu nganing yang mga tumatalig ang naa pala yay mga kinasakpan yang Dios ang matuud.
10 Piru natëtëngëd ilëm tung kanëëman ang ipinagpaita yang Dios tung yëën ang andang pisan ay natëngëran na tung yëën,
pinaktëlaw ra anya ang para makayananu yang katëngdanan ang ipinagpiar na tung yëën.
Kag yadwa pa,
yang kanëëman nang atiing ipinagpaita na tung yëën bëlag̓an ang mag̓aning ang anday pinakaw̓ut na,
kung indi,
pagprusigiraw ta mupia tung pangatëngdananu ang mas pa kay tung kadaklan ang mga apustul.
Piru bëlag̓an kang mag̓aning ang nag̓aëklanu tung sadiling këtëlu,
kung indi,
yuug paktëlay nang magprusigir.
11 Kapurisu,
maskin yuu,
maskin tanira,
ya ra ka man mismu tiing kamtangan yang balitang nag̓ipagpakaw̓ut yamën tung mga tau ig ya ra ka man nganing mismu atiing pinanangëd mi.
Yang Nag̓ipanuw̓al Ni Pablo Tung Duma Ang Pamag̓aning Ang Yang Mga Patay Unu Indi Ra Mabui Si Kang Uman (15:12-34)
12 Numanyan kung nag̓ipagpakaw̓ut yamën ang yang pag̓aningën ang Cristo binwi si kang uman yang Dios,
ya pa ag̓aring mapag̓aning yang duma asan tung numyu ang yang mga patay indi ra unu mabui si kang uman?
13 Ay kung matuud tia,
ig disir,
pati nganing yang pag̓aningën ang Cristo indi ra ka rin nabui si kang uman.
14 Ig kung indi ra ka man nabui si kang uman tanya,
ig disir,
anda ka rin ay kapulutan na yang nag̓ipagpakaw̓ut yamën,
pati yang pagparanangërën mi ya ka rin.
15 Pati yami nganing,
nasëëkanami ra rin ang mga bukliënaming nagpaingmatuud natëtëngëd tung binuat yang Dios,
ay kipurki pinagpaingmatuuran da yamën ang binwi na si kang uman yang pag̓aningën ang Cristo,
ang pagkatapus atii pala,
anda ka,
kung matuud ang indi ra mabui si kang uman yang mga patay.
16 Ay kung matuud tia ang indi ra mabui si kang uman yang mga patay,
intunsis pati yang pag̓aningën ang Cristo indi ra ka rin nabui si kang uman.
17 Ig kung indi ra ka nabui si kang uman tanya,
ig disir,
andang pisan din ay pinakaw̓ut atiing pagtalig mi yang mga sadili mi tung anyang nagpatapnay.
Turuw̓alën mi pa ka ëngëd din tung Dios yang mga kasalanan mi.
18 Pati yang mga putul tang nagtalig tung ni Jesu-Cristo ang pagkatapus nagkarapatay ra,
nangapasubu ra ka rin tung kadiaduan ang anda ëngëd ang pisan ay katapus-tapusan na.
19 Pariu ka tung yatën ang mga bui pa,
kung alimbawa yang nag̓atalig̓an ta tung ni Jesu-Cristo may taw̓ang na ilëm taa tung kaliw̓utan ang naa ang pagkatapus anda ra rin ay mapakbat ta tung anya tung uri,
intunsis tung tanan ang mga tau,
ita ra ëngëd din ay pinakakaildaw.
20 Piru yang matuud,
ti Jesu-Cristo binwi si ka man ang uman yang Dios,
ig tia yay maning pa tung paray ang tukaw ang inayëg ang yay pruiba ang may magdarasun pa kang ayëg̓ën bilang yang mga patay mangasug̓ut dang pisan tung anyang pamuiën si kang uman yang Dios.
21 Ay kipurki kumus may kamatayën ëkël tung sasang tau,
may pagkabui si kang uman ëkël ka tung sasa kang tau.
22 Ay katulad ka ang yang tanan ang mga tau nag̓apatay ëkël tung pagsasaan nira ni Adan,
ya ka ang yang kumpurming may pagkinapulitay ra nira ni Jesu-Cristo,
pamuiën si kang uman yang Dios ëkël ka tung anya.
23 Ug̓aring ilëm may anya-anyang timpu ang ipinagtipu yang Dios.
Ti Jesu-Cristo tanya,
ya ray pinakatukaw ang nabui si kang uman.
Yang mga taung tanyay may anya tung nira,
baklu ra mangabui si kang uman,
kung kaw̓utun da nganing yang uras ang ipaglëkat na.
24 Atia,
kumaw̓ut da yang pagtapusan yang panimpung naa.
Ya ra kay uras ang ipampalagpak na rang pisan yang tanan ang may mga kagaëman,
maskin mga taung pariu tung yatën,
maskin mga taung indi nag̓aitang nag̓apanuw̓ul ni Satanas,
maskin unu pang klasiay,
maskin unu pang këtëlay,
luw̓us dang pirdiën na.
Pagkatapus tia,
iintriga na ra tung ni Ama nang Dios yang pinakaw̓ut yang paggaraëmën na ang kumplitu rang pisan.
25 Ya ra kay nag̓atëngëran na ang tanya dapat ang magpadayun tung paggaraëmën nang asta mapampabtang da yang Dios tung tarampakan yang kakay na yang tanan ang mga kasuay nah.
26 Yang kauri-urian ëngëd ang kasuay nang pirdiën na,
ya ra taang kamatayën.
27 Talagang mainabu ra tia ang katulad ka tung sasang inula natëtëngëd tung anyang nabtang tung kasulatan ang yang tanan unung mga bag̓ay,
luw̓us unung ipabtang yang Dios tung tarampakan yang kakay nai Ug̓aring atiing pag̓aning na ang yang tanan ang bag̓ay luw̓us ang ipabtang na tung pudir na,
simpri masadlaw ka ang puira pa asan yang magpabtang.
28 Atia,
kung mapabtang da nganing yang tanan ang bag̓ay tung pudir ni Jesu-Cristo,
tanya mismung Ana magpabtang da tung sadili na tung pudir yang Dios ang yay nagpabtang yang tanan ang bag̓ay tung pudir na ug̓ud yang Dios,
ya si ay pamilug̓an nirang tananj.
Nag̓asambit Na Yang Tulu Pang Katadlëngan Na (15:29-34)
29 Kung bëlag matuud yang nag̓ipag̓aningung atia,
unu pay kapulutan yang pag̓urubraën yang duma asan tung numyung pagpabënyag si kang uman ang para magsali unu tung nagëgmaan nirang napatay ra?
Kung talagang matuud ang yang mga patay indi ra buiën si kang uman yang Dios,
ayw̓at salian pa nirang magpabënyagk?
Kung bëlag maning tia yang pag̓intindi nira,
ayw̓a magbuat pa ta maning tia?
30 Pati yami mismung pagpaturuw̓ulun tung ni Ginuu ta tani,
unu pay pulut nang pirmiaming panalaytay tung buang pukis kung indiami buiën si kang uman yang Dios tung uri?
31 Pariu ra tung yëën,
kaldaw-kaldaw gësyëaw ilëm mapbës tung kamatayën.
Talagang matuud tia,
mga putulu.
Katulad tung nag̓asiguru mi tung yëën ang agsadyaanaw ta duru sigun tung pag̓imaklu ni Ginuu tang Jesu-Cristo tung mga isip mi,
masiguru mi ra ka ang yang nag̓ianingung atia,
talagang matuud.
32 Tan taang tinaraw̓anganaw ra ta mga taung durug karaisëg tani tung Efeso,
kung alimbawa,
inusuy ra ilëm yang pag̓irintindiën ta kadaklan ang mga tau ang yang mga patay indi ra mabuing uman,
indiaw ra ilëm din nag̓agwanta tung kalbatan ang atii,
ay tutal tung uri ta kaldaw,
anda ka ilëm din ay pakaw̓utunu.
Kung matuud ang yang mga patay indi ra mabuing uman,
mupia pa,
mag̓usuyaw ra ilëm tung bitala ta duma may ruma ang mintras buiita pa unu,
magpapsawita ra ilëm unu tung kumpurming unu pay nag̓iblën yang linawa tang panganën kag inëmën.
Tutal muya unu,
andamal ilëm,
mapatayita ra ka ilëml.
33 Ustu ra tiang pagpadaya mi tung bëlag̓an matuud.
Pamaridëngdëngan mi ta mupia yang sasang bitala ta mga mamaëpët ang kung magpakigbarkadaita unu tung mga taung mga malain,
pati ita unung matinlu ka rin ta ug̓ali,
asanita ra ka unu nga saliray ta malain ang kinaisipan.
34 Magpamanmanamu ra yang mga isip mi.
Ustu ra tiang pagpakasalak mi.
Kipurki may dumam asan tung numyu ang midyu anda pay naërëm nira tung kalëlyag̓an yang Dios.
Atia nag̓asambitu ilëm ug̓ud asanamu ra ngaëyangay ta ëyak mi.
Yang Pagpasanag Ni Pablo Natëtëngëd Tung Pagkabëtang Yang Tinanguni Yang Sasang Patay Kung Pabungkarasën Da Nganing (15:35-49)
35 Piru ëlat kanay.
Muya may duma asan ang gustu nang magsulingaag tung yëën ta maning taa:
“Piru ya pa ag̓aring mabui si kang uman yang mga patay?
Ayw̓a,
unu pang pagkabëtangay ta tinanguni nirang maglua?”
ag̓aaning.
36 Abaa,
kabus-kabusa!
Maskin yawa,
nag̓askëan mu ra ka ang indi mukngil yang binik ang nag̓itampëk,
kung indi,
madunut da kanay tung tanëk ang maninga patay ra.
37 Dispuis yang nag̓itampëk mung atia tung tanëk bëlag̓an yang intirung luak,
kung indi,
sasang binik na pa ka ilëm,
kung binik ta trigu ubin maskin unu pang binikay.
38 Ang pagkatapus yang Dios yay magpakdul tung binik ang atia ta pagkabëtang nang kumpurming unu pay nalëlyag̓an na kang lag̓i atiing primirung pag̓imu na tung tanan ang bag̓ay.
Bilang anya-anyang binik sinagpakdulay na ta anya-anya kang pagkabëtang.
39 Maskin nganing yang may mga linawang pinag̓imu na,
bëlag̓an kang pariu-pariu yang isi yang mga tinanguni nira,
kung indi,
may nira-nira kang isi,
mag̓ing tau,
mag̓ing ayëp,
mag̓ing lamlam,
mag̓ing ian man.
40 Dispuis may mga bag̓ay ang inimu yang Dios duun tung langit.
Ig taa ka tung katanëkan ya ka.
Piru aparti ka yang katinlu nang tëlëngan yang tung langit kay tung katanëkan.
41 Yang kaldaw may sadili nang sadlaw,
yang bulan may anya ka,
yang mga dumakël may nira ka.
Maski nganing yang mga dumakël,
aparti-aparti ka yang nira-nirang sadlaw.
42 Maning ka tia tung mga tinanguni yang mga patay kung buiën si ka nganing yang Dios ang uman.
Ay yang tinanguni nirang nag̓itampëk tung tanëk madudunut.
Yang tinanguni nirang pabungkarasën yang Dios indi ra ëngëd madudunut ang asta tung sampa.
43 Yang nag̓itampëk sayud ang tëlëngan;
yang pabungkarasën yang Dios,
duru rang pisan agkatinlu;
yang itinampëk maluw̓ay rang pisan;
yang pabungkarasën yang Dios duru rag puirsa.
44 Yang nag̓itampëk pastikular ka ilëm ang tinanguni ang bag̓ay ka ilëm taa tung kaliw̓utan ang naa.
Yang pabungkarasën yang Dios ispisial dang pisan ang bag̓ay rang pisan tung kaliw̓utan ang baklu.
Kung may tinanguning bag̓ay ka ilëm taa tung kaliw̓utan ang naa,
ig disir may tinanguni kang bag̓ay ra kang pisan tung kaliw̓utan ang baklu.
45 Pariu ka tung sasang bitalang napabtang tung kasulatan ang ti Adan unung yay primirung tau,
inimu yang Dios ang may kabui nang pastikularn.
Yang pag̓aningënung panguring Adan,
ya ray nagyaring ultimung manigpaëyang ta ipagpangabuing baklu ig ultimung manigpabungkaras tung mga patayo.
46 Ug̓aring ilëm bëlag̓an ang yay pagtukaw yang tinanguni tang atiang magkabag̓ay rang pisan tung kaliw̓utan ang baklu,
kung indi,
yang tinanguni tang naang pangkaliw̓utan da kanay ay pagtukaw baklu ra ipaluaay yang tinanguni tang bag̓ay rang pisan tung kaliw̓utan ang baklu.
47 Ay ya pa ag̓ari,
yang tinanguni yang primirung tau tanëkanën ay apuk yang ginamit yang Dios ang nag̓imu tung anya.
Piru yang tinanguni yang sam bilug,
langitnanën natëtëngëd pinabungkaras da yang Dios.
48 Kung ya pa ag̓ari yang pagkabëtang yang tanëkanën ang atii,
asan da ka nasug̓ut yang kumpurming tanëkanën ka.
Ig kung ya pa ag̓ari yang pagkabëtang yang langitnanën ang atii asan ka masug̓ut yang kumpurming pabungkarasën na ang yang mga tinanguni nira ipampabag̓ay na ra kang pisan tung langit.
49 Kapurisu kung ya pa ag̓ari ang ita nasug̓ut tung pagkabëtang yang tanëkanën,
tung uri,
ya ra kay masug̓ut ta yang pagkabëtang yang langitnanën.
Pagpasanag Ti Pablo Ang Tung Uri, Itang Mga Tumatalig Siguradung Papandëëg̓ënita Ra Yang Dios Tung Kamatayën (15:50-57)
50 Yang gustuung ianing tia,
mga putulu,
yang tinanguni tang naang pastikular ka ilëm indi ra ëngëd maimung malg̓ud tung kaliw̓utan ang baklu ang yay tukurun yang Dios tung uri.
Ay yang madudunut indi ra ka ëngëd maimung malg̓ud tung anday kadunutan.
51 Naa w̓a,
iugtulu ra tung numyu yang sasang nag̓aëgtëman pa rin yang Dios ang tukaw ang numanyan da ilëm ipabunayag̓ay na tung yëën.
Ta yatën ang mga tumatalig,
bëlag̓an ang mag̓aning ang itang tanan luw̓us dang magkarapatay.
Piru itang tanan,
patay bui,
luw̓us da ka ëngëd ang pangimakluën yang Dios yang mga tinanguni ta.
52 Atia,
kalit ilëm ang mainabu tung yatën.
Maning pa tung sang kilab ilëm ta mata.
Dërëngan dang magtunul yang sasang turumpita ang ya ray pangultimung pagtunul na.
Ay kipurki kung magtunul da nganing tia,
yang mga kaarumanan tang mga tumatalig ang nagkarapatay ra,
pampabungkarasën da yang Dios ang mga banal dang pisan.
Pati ta yatën ang mga bui pa tung uras ang atia,
dërënganita ra kang pangimakluën yang Dios ang pampabanalën.
53 Ay ya pa ag̓ari yang mga tinanguni tang naang nag̓adunut dapat ang mapaklian ta indi madunut,
ig yang tinanguni tang naang may kamatayën na dapat ang mapaklian ta tinanguni tang anday kamatayën na.
54 Kung yang tinanguni tang naang nag̓adunut mapaklian da nganing ta indi madunut,
kung naang may kamatayën na mapaklian da nganing ta anda ray kamatayën na,
ya ray uras ang magkamatuuran da yang sasang bitalang napabtang tung kasulatan ang mag̓aning,
“Pirdi ra yang kamatayën!
Pinapandëëg̓ita ra tung anyap!”
55 Pati yang sam bilug pa ang napabtang ka asan ang mag̓aning,
“Ta,
aria rang kamatayëna?
Yang pagpandëëg mung pirmi tung yamën,
ay ra?
Aria rang kamatayëna?
Yang dalit mung atiang nag̓ipagpandali mu ra rin tung yamën,
ay ra?”
mag̓aningq.
56 Anday dumang natëngëran na ang ita daraliyën ta kamatayën,
kung indi,
ya ra taang pagpakasalak ta.
Dispuis anday dumang pagpalbat tung pagpakasalak ta,
kung indi,
ya ra yang mga katuw̓ulan yang Dios ang yay sasang pitik ang pag̓atëlëngan nang indi ta kayanan.
57 Piru simanyan duru rang pisan agkadakul yang pagpasalamat ta tung Dios,
ay natëtëngëd tung uri,
siguradung ita ra kay papandëëg̓ën na tung kamatayën,
ëkël tung pagpakugmatay ni Ginuu tang Jesu-Cristo may tung pagbungkaras na.
Yang Lagpakan Yang Nag̓ipasanag Ni Pablo (15:58)
58 Kapurisu,
mga putulung nag̓amaalu,
indiita ra ilëm magpaluw̓ay tung pagturumanën ta yang kalëlyag̓an yang Dios,
kung indi,
magpakatëntënita.
Padërëpan ta rang pirmi yang kumpurming nag̓ipaubra ni Ginuu ta tung yatën.
Kipurki nag̓askëan ta ra ang yang pagpakabëdlay tang pagpatuw̓ul tung anya,
may pakaw̓utun na ka ëngëd tung yatën ang durung pisan agkatinlu.