2 Pagkatapus,

may sasang baw̓ay ang balu ang durug liwag yang pakabëtang na ang yay nagpalëngët tung alkansiang namugsu ta nigal ang duruang bilug ang pagbaluran ta pinakabaratu.

3 Pagkaita ni Jesus,

dayun dang nagbitala tung mga tau,

“Tëëd mi tiang balung maliliwag̓ën!

Iugtulu tung numyu yang kamatuuran,

kung timbangën yang Dios,

mas dakulu ta kantidad nakaang ibinugsu na kay tung tanan ang nakaang ipinamugsu nirang kadaklan.

4 Ay ya pa ag̓ari,

yang kaalimbawaan yang ipinamugsu nira,

maning pa tung ya ra ilëm yang kinalis nira tung gantangan ang nagsubra.

Piru tiang balu,

maskin anggan da ilëm yang kuarta nang nag̓itig̓ana na ra rin tung pagpangabui na,

luw̓us na ra ilëm ang ibinugsu,”

mag̓aning.

5 Numanyan yang mga tauan ni Jesus ang duma pamagkërësën-kësën da natëtëngëd tung pagtuuan ang atiang pinakalusu.

Pamaninluan dang pamagtëlëng tung mga batung darakulung malinang-linang ang tinambi-tambi tung padir na may tung mga pasadyang ipinamuluntad ta duma may ruma ang ipinadpët asan.

6 Mag̓aning ti Jesus ang nagngël yang kërësën-kësën nira,

“Kung natëtëngëd tung mga bag̓ay ang atiang mag̓atëlëngan mi numanyan,

may uras ang kaw̓utun ang yang mga batung atiang darakulung pinasag̓i ang tinambi-tambi asan,

anda rang pisan ay mabutwan pang magsarampaw-sampawan,

kung indi,

luw̓us dang magkarapanpan tung tanëk,”

ag̓aaning.

7 Pagkagngël nira tia,

dayun dang namagtalimaan tung anyang mag̓aning,

“Amëëy,

sanu pa w̓asu magkamaning da ta maning tiang nainambit mu nungayna?

Unu pang pruibaay ang sarang matandaan yamën ang alëngët dang kumaw̓ut?”

ag̓aaning.

8 Ag̓aaning ti Jesus ang nagtimalës,

“Mangamanamu ta mupia ang para indiamu madayaan ta dumang mapatalang.

Kipurki durung maglua ang mag̓ambu ang tanya unu ya ray yuung pag̓aningën ang Cristo.

Aningënamu ka anya ang kinaw̓ut da unu yang uras ang ipagpalua na unu yang paggaraëmën na.

Piru ta numyu indiamu ëngëd magpaëkël ta kulu ming magpanunut tung mga taung mga maning tia.

9 Dispuis,

kung mabalitaanamu ra nganing natëtëngëd tung mga gira ubin mga gulu,

indiamu ilëm magpakataranta.

Ay kipurki yang mga bag̓ay ang atia,

dapat ang magkarainabu,

piru indiamu maglaum ang yang magdasun,

ya ra yang uras ang ipagtapus yang Dios tung panimpung naa.”

10 Mag̓aning ti Jesus ang nagsugpat yang bitala na,

“Nasyun may nasyun magbaratukan.

11 Dispuis may magpanaw ang mga yëgyëg ang maktël tung duma-rumang banwa pati mga panuw̓uk ya ka,

asta mga dilikadung mga laru dumalpët ka tung mga tau ang maninga panilig.

Dispuis pa may mga pruibang maktël duun tung langit ang maita yang mga tau ang ya ray ëldan nirang ipagpangërël ta duru.

12 Piru baklu magkarainabu yang mga bag̓ay ang atia,

dëëpënamu ra ta mga taung papinitinsiaën.

Idimandaamu ra ka nirang ipabista tung mga pamagmaëpët-ëpët duun tung pagsaragpunan nira ang pagkatapus ipakalabusamu ra nira.

Ang kaisan guyuranamung patalungaën tung mga adi may tung mga gubirnadur natëtëngëd ilëm tung yëën ang nag̓akëgngan mi.

13 Asanamu ra nga pakdulay ta lugar ming magpaingmatuud tung nira natëtëngëd tung nag̓askëan mi natëtëngëd tung yëën.

14 Yang ipabtang mi rang lag̓i tung mga isip mi ang indiamu magsuma-suma ta mga katadlëngan mi bakluamu manalunga tung nira.

15 Anday ministir ming magsimpan ta maning tia,

ay kipurki yuuy magpainunuku tung numyu ta matinlung ipanuw̓al mi tung pamagkuntra tung numyu ang inding pisan masarangan nirang barikën.

16 Dispuis,

maski nganing yang sadiling mga ginikanan mi,

sadiling mga putul mi ubin yang may mga kaampiran tung numyu,

pati mga ungkuy mi,

ya pay mamagdimanda tung numyu tung katalungaan yang mga usgadu ig may duma pa asan tung numyu ang ipaimatay pa nira.

17 Dispuis dëmtanamu ra ka ta maskin tinu pang tauay arangan da ilëm tung yëën ang nag̓akëgngan mi.

18 Piru maskin imatayënamu nira,

indi ra maunu pa yang kaampiran mi tung Dios^b.

19 Kung magpatëntënamu yang mga isip ming magpadayun ka ëngëd tung pagtaralig̓ën mi tung yëën,

maskin imatayënamu pa,

asan da nga siguruay mi yang kaampiran mi tung Dios ang asta tung sampa magsarapënanamu ra.

20 “Piru kung maita mi ra nganing yang siudad ang naang Jerusalem ang magkulungun da ta mga sundalung buntun,

ya ray pruibang tandaan mi ang makali rang magëw̓a.

21 Pagkaw̓ut yang uras ang atia,

kung tinu pay pagtinir tung sinakëpan yang Judea,

kaministiran ang magpalaksu rang lag̓i duun tung kabukiran.

Kung tinu pay kaw̓utan na taa tung siudad ang naa,

kaministiran ang maglua rang lag̓i.

Kung tinu pay kaw̓utan na tung lua yang siudad,

kaministiran ang indi magpaklëd ang para magpakubri,

ang indi,

magpalaksu ra ka.

22 Kipurki tung uras ang atia,

ya ray uras ang ipagbalës yang Dios tung nasyun ang naang Israel natëtëngëd tung mga kabuat-buatan nira.

Ay magkamatuud da ka ëngëd yang tanan ang napabtang tung kasulatan ang natëtëngëd tung nira.

23 Kanugun yang pagkabëtang yang mga baw̓ay ang pamagmalbat may yang mga talaana tung uras ang atia.

Kipurki durug liwag yang pinitinsiang magkaw̓ut tung banwang naa.

Talagang parusaan da ka ëngëd yang Dios ta mupia yang nasyun ang naang mga Israel.

24 Yang duma panibatan da ilëm ta sabling pangimatayën.

Yang duma,

pandëëpën da ilëm ang pangguyuran duun tung maskin ay pang banwaay tung bilug ang kaliw̓utan.

Asta yang siudad ang naang Jerusalem,

këmkëmën ta duma-rumang nasyun ang ya ray magsurubli-subli ang mamaggaraëmën ang asta kumampus da yang uras ang itinug̓ut yang Dios tung nira^c.

25 “Dispuis pa,

tung uri ta kaldaw,

may mga pruibang makakaëlëd ang magkaraita tung kalangitan.

Duun maita tung kaldaw,

tung bulan,

may tung mga dumakël.

Dispuis tung katanëkan,

durug kagulu ay natëtëngëd yang tanan ang mga tau,

maskin unu pang nasyunay,

mangataranta rang mamag̓iwalëg ta mupia.

Ay yang pagkurian ta pag̓isip nira,

ya ra yang tëëb natëtëngëd tung lakun ang pamag̓ëyang ang bëlag dang patinumas yang kadarakul nira.

Kung mamuka ra nganing,

pamngël yang mga talinga nira natëtëngëd tung dinag̓unu.

26 Purisu panluluw̓ayan da ilëm tanira tung ëlëd nirang pamag̓ëlat tung kalainan ang magdarangat tung kaliw̓utan.

Ay kipurki yang tanan ang bag̓ay tung kalangitan papagwaldang-waldangën da yang Dios tung dating pagkarabëtangën nira.

27 Kung magkarainabu ra nganing tia,

yuung pag̓aningën ang Maninga Tau maitaw ra yang mga tau ang yuug sasaay tung panganud ang paparanëk ang yuu ra kag dawalay nirang duru rag kasusulaw yang pagkabëtangung paggaraëmën.

28 Purisu ta numyung mga tauanu,

kung mag̓impisa ra nganing ang magkarainabu ra yang mga pruibang atiang nag̓ianingu,

indiamu magpaluw̓ay,

kung indi,

magpakasadyaamung pagpakbat tung yëën,

ay alëngët da yang uras ang ipagpalibriu tung numyu,”

mag̓aning.

29 Numanyan dayun dang nagsugpat ti Jesus tung nira ang nagpagngël ta sasang pananglit ang mag̓aning,

“Isipën mi ra kanay yang ayung igus ubin maskin unu pang ayuay.

30 Kung maita mi ra nganing ang panguruk da,

maskëan mi ra ang makali rang kumaw̓ut yang tagkinit^d.

31 Maning ka tia tung numyu.

Kung maita mi ra nganing yang mga bag̓ay ang atiang nagkarasambitung pagkarainabu ra,

maskëan mi ra ka ang alëngët da yang uras ang ipagpalapus da ëngëd yang Dios yang paggaraëmën na tung bilug ang kaliw̓utan.

32 Iugtulu tung numyu yang kamatuuran,

baklu ra magkarapatay yang kadaklan ang mga masigkanasyun ta simanyan,

kung magkarainabu ra yang tanan ang atiang inulaw ta nungayna.

33 Matunaw yang kalangitan may yang kaliw̓utan,

piru yang kumpurming nag̓ibitalaw indi ra ëngëd ang pisan matunaw.

34-35 “Ug̓aring ta yamung mga tauanu,

kaministiran ang insapuën ming pirmi yang mga sadili mi.

Indiamu ëngëd magpakalingat tung pagpakasadyang subrang pagpabuu.

Pati yang pagpangabui mi tung kaliw̓utan ang naa,

indi mi ka paliw̓ëg̓an ta mga kulu mi.

Muya kaw̓utanamu ra yang uras ang atiang makakaëlëd ang bëlag̓anamu riparasiun ang yang kaalimbawaan na maning pa tung sasang balatik ang inali ra ilëm ang mëyas.

Kipurki yang tanan ang mga tau tung sagpaw yang kaliw̓utan,

luw̓us ang mangasapul tung uras ang atia.

36 Purisu pirmiamu rang riparasiun ang nunut da ka ta pag̓arampuën mi tung Dios ang paktëlënamu ra ëngëd anya ug̓ud kayanan ming agwantaën yang tanan ang mga bag̓ay ang atiang magkarainabu ang indiamu ra ka ëngëd mamalpas tung yëën.

Ay kung maagwantaan mi ra tia,

anda ray ikaëyak ming manalunga tung yëën ang yuu ka man yang pag̓aningën ang Maninga Tau,”

mag̓aning.

37 Numanyan kaldaw-kaldaw pagparakaw̓utun ti Jesus tung mga taung pamamati tung anya duun tung pagtuuan nirang atiang pinakalusu.

Kung law̓ii ra nganing,

ya ray paglua na tung siudad ang para mangay duun tung tinënaran yang bukid ang atiang durung mga ayung pag̓aningën ang olibo,

ay duun nag̓aëlëk.

38 Dispuis,

yang mga tau,

timpranu pang pisan,

duun da pamagtaragbu tung anya tung pagtuuan ang atia ay natëtëngëd durung kalëlyag nirang mamagpamati tung anya.