Yang Pag̓usisa Yang Mga Pamagpakigmaëpët Tung Ni Jesus Natëtëngëd Tung Katëngdanan Na (20:1-8)
20
Numanyan may sasang kaldaw ang ti Jesus duun tung pagtuuan ang pinakalusu pagturuldukun tung mga tau ig nunut da ka ta pagparakaw̓utun na natëtëngëd tung paggaraëmën yang Dios kung ya pa ag̓aring mapalg̓uran da nira.
Numanyan limput da yang mga paring arabubwat ta katëngdanan may yang mga sag̓ad,
pati yang mga pamagpakigmaëpët tung banwa nira.
Lucas 20:1-19
2 Mag̓aning tung anya,
“Ëëy,
iugtul mu ra tung yamën kung ay pa ngaëklay mu yang katëngdanan ang yawa magbuat yang mga maning tia taa tung pagtuuan tang naa?
Tinu pay naglug̓ut tung nuyu?”
3-4 Ag̓aaning ka ti Jesus ang nagtimalës,
“Ëlat kanay,
kung mga sarang tung numyu,
may talimaanënu rin tung numyu.
Naang pagbërënyag̓ën ni dipuntu Juan tung mga taung pamanligna tung mga kasalanan nira,
ay pa liit yang katëngdanan na?
Tung Dios manliit u tung tau ka ilëm?”
5 Atii,
pagkagngël nira,
nag̓aralas-alasan dang mag̓aning,
“Unu pa kaya ay maayën ang ituw̓al ta?
Kung aningën ta ang tung Dios manliit yang katëngdanan ni dipuntu Juan,
muya suliliënita si anyang talimaanën ang ayw̓at indiita ra nanangëd tung anya.
6 Piru kung aningën ta ang tung tau ka ilëm manliit,
muya taraw̓anganita ra ta pamatu yang mga taung naang imatayën,
kipurki yang pagtërëlëngën nira tung ni dipuntu Juan tanya talagang sasang tinuw̓ul yang Dios ang magpadapat yang bitala na,”
ag̓aaning.
7 Purisu numanyan anday dumang natuw̓al nira,
namanginay ra ilëm.
8 Mag̓aning si ka ti Jesus ang nagtimalës,
“Tay kung maning tii,
indiaw ra ka mag̓ugtul tung numyu kung ay pa liit yang katëngdananung pagbuat ta mga maning tia,”
mag̓aning.
Yang Mga Pamagpakigmaëpët Nag̓ipananglit Ni Jesus Tung Mga Agsadur May Tung Mga Manigpakdëng Ta Balay (20:9-19)
9 Pagkatapus numanyan,
anday dumang naisipan ni Jesus,
dayun dang nagpagngël ta sasang pananglit tung mga taung atiang pamamati ang mag̓aning,
“Numanyan may sasang tau ang may tanëk nang pinagluakan na ta panay ubas.
Pagkatapus ipinasikasu na tung mga agsadur na.
Pagkapiar na tung nira,
dayun dang nagliit ang minangay duun tung dumang banwa ang duun da nagtinir ta mabuay.
10 Numanyan pagkaw̓ut da yang kutitsya na,
nagtuw̓ul da tung sasang turuw̓ulun nang mangay duun tung mga agsadur na ang para ëklan na ra yang kaparti na tung patëbas.
Numanyan pagkaw̓ut yang turuw̓ulun na duun,
anday dumang binuat yang mga agsadur tung anya,
pinagtag̓aman da nira ta palu.
Pagkatapus pinabalik da ilëm nira ta paisanu.
11 Utru si,
pinaangayan si yang may prupidad tung sam bilug ang turuw̓ulun na.
Pagkaw̓ut na,
pinagtag̓aman da ka yang mga agsadur ta palung inëyak.
Pagkatapus pinabalik da ka ilëm nirang paisanu ang andang pisan ay ëkël na.
12 Mag̓uman,
may turuw̓ulun nang pangyaklu ang ipinangay na duun.
Pagkaw̓ut na,
pinagtigbak nira ta mupia ang pagkatapus ibinalilang da ka ilëm nira duun tung lua yang kaubasan.
13 Numanyan pagkabalita yang may tanëk,
napag̓isip da ang mag̓aning tung sadili na,
‘Unu pa kayay maayën ang buwatënu?
Maayën pa siguru,
yang anaung naang nag̓agëgmaanu ta duru,
ya si ay tuw̓ulunu ang mangay duun.
Basi pa ra ilëm ang ya ray galangën nira.’
14 Numanyan pagkabandaw ra yang mga agsadur tung ana nang magkakaw̓ut da,
namagkërësën dang namagparaig̓u ang mag̓aning,
‘Naa pala,
taa rag panganing yang manubli tung kaluakan ang naa.
Maayën pa,
imatayën ta ra ilëm ug̓ud yatën da yang surubliën na ra rin ang naa,’
ag̓aaning.
15 Purisu numanyan dayun da ka man nirang dinëëp ang ginuyuran duun tung lua yang kaubasan ang inimatay.
Ta,
unu pa w̓asu ay buwatën yang may prupidad tung mga agsadur na?
16 Iugtulu tung numyu,
anday dumang buwatën na,
angayën na ra ilëm ang pangimatayën.
Pagkatapus yang kaubasan na,
ipaagsa na ra ilëm tung duma,”
ag̓aaning.
Numanyan naang pamamati,
pagkaintindi nira yang linëgdangan yang pananglit ang atia,
dayun dang namansituw̓al ang mag̓aning,
“Bëlëk ëëy!
Indi ka tia siguru kunsibirën yang Dios!”
17 Numanyan pagkagngël ni Jesus yang balës nira,
baklu nagpadayun ang nagpaintindi yang gustu nang ianing,
tinëlëngan na ra kanay tanira.
Pagkatapus mag̓aning tung nira,
“Tay kung tama yang numyung atia,
ay pa ag̓ari yang pag̓intindi mi tung sam bilug pang pananglit ang naang napabtang tung kasulatan ang may batu unung pinasag̓i ang ya ray pinangindian yang mga manigpakdëng yang balay ay anda unu ay kuinta na,
ang pagkatapus ya pa ka ëngëd unu ay nagluang pinakaimpurtanting batung paniëlan yang lëbat yang intirung balaya?
18 Utru si kung tung dumang batu ipananglitayu ang katulad ka tung napabtang tung kasulatan,
kung tinu pa unu ay mabugsu ang tëmpa tung batung naa,
asan da ilëm unu nga barik-barikay.
Dispuis,
kung tinu pa unu ay mabugsuan na,
pulbus da unung pisan,”
ag̓aaningb.
19 Numanyan yang mga sag̓ad tung mga urdinansa may yang mga paring arabubwat,
pagkagngël nira yang mga pananglit ang atia,
tinag̓aman da rin nirang dëëpën dang lag̓i ti Jesus tung uras ang atia.
Ay pa ag̓ari,
durung kasilag nira tung anya,
ay nasiman da nira ang taniray nag̓apatëmëngan na tung mga pananglit ang atiang ibinitala na.
Kasu ilëm may pangamanan nira tung mga taung atiang buntun ang pamagpauyun tung ni Jesus.
Ti Jesus Nag̓atag̓aman Ang Papanuw̓alën Ta Kamali Natëtëngëd Tung Pagbalayarën Tung Gubirnu (20:20-26)
20 Kapurisu numanyan anday dumang binuat yang may mga katëngdanan ang atia,
namagbantay ra ilëm ta këtat ang para matinlung ipagpadëëp nira tung anya.
Purisu namanuul da tung mga tau ang para mamagpasëën da ilëm ang mamagpatulduk tung anya ang basi pa ra ilëm madëëpan nira ta kamali tung pamitala na,
ang para may mapadatëlan yang namanuw̓ul tung nirang mamagdimanda tung ni Adi Herodes.
Lucas 20:20-26
21 Kapurisu numanyan yang mga taung atiing pinanuulan,
namagpalëngët da tung ni Jesus.
Primiru pinagtag̓aman da nira ta buladas ang pinagdayaw-dayaw ang inaning,
“Amëëy,
nag̓akdëkan da yamën ang yang mga nag̓itulduk mu tung mga tau natëtëngëd tung Dios purus tama.
Dispuis tung pagparadapatën mu ta bitala tung nira,
anday pinilikan,
kung indi,
pagturuldukuna yang kamatuuran kung unu pay kalëlyag̓an yang Dios ang yay dapat ang tumanën nira.
22 Kung mga sarang tung nuyu,
may talimaanën din yamën tung nuyu.
Naang mga balayaran ang naang pag̓ipagawad ni Adi Cesar tung yatën ang mga Judio,
uyun w̓asu tung mga katuw̓ulan yang Dios ang ita manggawad u balaw̓ag?”
mag̓aningc.
23-24 Piru kumus nadëëp dang lag̓i ni Jesus yang manyu nira,
napag̓aning da tung nira ang,
“Ipatëlëng mi ra kanay tung yëën yang sam pidasung kuarta.”
Pagtëlëng na,
dayun dang nagtalimaan tung nira,
“Ninu pang itsyuraay ang nabtang taa tung nigal ang naa?
Ninu pang aranay ang namarka taa?”
Mag̓aning ka tanirang namansituw̓al,
“Ni Adi Cesar.”
25 Mag̓aning ka ti Jesus ang nagtimalës,
“Ig disir,
yang kumpurming ipinasuad ni Adi Cesar tung pagkabëtang na,
ya iintrigaay ta tung anya,
pati yang kumpurming ipinasuad yang Dios tung sadili na,
ya ka iintrigaay ta tung anya,”
mag̓aning.
26 Purisu indi ra nasarangan nira ti Jesus ang papagkamaliën tung pamitala na ang para ya ra rin ay ipagpakulain tung anya yang mga taung pamamati.
Kung indi,
kumus dinëëg da yang pagkabërëng nirang duru tung itinuw̓al nang atia tung nira,
namagpaëkmëng da ilëm.
Ti Jesus Nag̓atag̓aman Da Yang Mga Saduseo Ta Sug̓a Natëtëngëd Tung Mga Patay Kung Mabui Si Kang Uman (20:27-40)
27 Taa numanyan,
yang namagdasun ang namagpalëngët tung ni Jesus,
ya ra yang mga pamagmangulung mga kinasakpan yang sasang partidung nag̓aranan tung mga Saduseo.
Yang nag̓apaktëlan nirang nag̓itulduk tung mga tau ay yang mga tau unung mga patay,
indi ra unu magkarabui si kang uman.
Lucas 20:27-47
28 Numanyan mag̓aning tanira tung anya,
“Amëëy,
may sasang urdinansang isinulat ni Moises ang ibinutwan na tung yatën ang kung mapatay unu yang sasang laliing kasawaan piru anda pay ana nira,
yang putul nang kadasun na,
ya unu ay dapat ang ipulin tung ni ipag nang nabalu ug̓ud kung maana tung anya,
mapabtang dang ana yang putul nang napatay.
29 Ipabëtang ta may pitu nga laliian ang magpurutul.
Yang pangulu nangasawa tung sasang baw̓ay ang pagkatapus napatay ang indi naana.
30 Numanyan yang putul nang nagdasun tung anya,
ya si kay ipinulin ang ipinakasawa tung ni ipag nang nabalu.
Ya ka,
napatay ka ang indi ka naana.
31 Pati yang putul nirang pangyaklu,
ya ka,
ang asta ra ilëm tung yapitu.
Luw̓us dang nagkarapatay ang andang pisan ay naana tung nira.
32 Pagkatapus tung kauri-urian da,
pati yang baw̓ay,
napatay ra ka.
33 Ta,
ag̓aaninga ka ang yang mga taung nag̓apatay mabui si kang uman.
Kung matuud ang yang pitung atiang magpurutul pati yang baw̓ay pabungkarasën yang Dios tung uri,
abir,
tinu pa w̓asu tung nira ay magnatis ang may kasawa tung baw̓ay ang atia,
sindu parariung nangasawa-kasawa ra tanirang pitu tung anya?
Abir,
kung unu pay matuw̓al mu asan,”
ag̓aaning.
34 Mag̓aning ti Jesus ang nagtuw̓al,
“Simanyan tung panimpung naa,
pagkarasawaan ka man yang mga tau.
35 Piru kumpurming tinu pang laliiay ubin baw̓ay ang binilang da kang lag̓i yang Dios ang magkabag̓ay ang magpalg̓ud tung panimpung baklu ang ya ra kay uras ang ipagpabungkaras na tung nira,
tanira yay indi magkarasawaan ang uman.
36 Ministir pang magkarasawaan ay indi ra ëngëd mapatay ang uman natëtëngëd mamanulad da tung mga angil ang anday kamatayën.
Bilang mga ana ra ka man yang Dios ang analadu gatëd pinagpabungkaras na ra nganing ang banal da.
37 Dispuis pa kung natëtëngëd tung pagpabungkaras yang Dios tung mga patay tung uri ta kaldaw ang yay midyu maliwag ang panangdën mi,
maski nganing ti Moises mismu ang yay panalig̓an mi,
nagpakdëk da nganing ang talagang yay buatën yang Dios.
Duun mi bëklaray tung isinulat na natëtëngëd tung naita nang palumpung ang atiing nag̓apuy ang pagkatapus indi ra ka nasiruk.
Ya ray uras ang ipinagpailala yang Dios tung anya ang tanya unu ti Yawi ang yay Dios ang may mga tauan tung mga kinaampu nang na Abraham ni Isaac may ni Jacobd.
38 Yang Dios tanya anday mga tauan nang patay,
kung indi,
pulus bui.
Ay kipurki yang tanan ang mga tauan na,
luw̓us bui tung anya ig pati nganing mga tinanguni nira,
damayën na ra kang buiën si kang uman tung uri,”
ag̓aaning duun ti Jesuse.
39 Numanyan may mga taung mga sag̓ad tung mga urdinansa asan ang pamamati.
Pagkagngël nira yang ipinamarik ni Jesus tung katadlëngan yang mga Saduseo,
dayun dang inaning nira ti Jesus ang,
“Amëëy,
talagang puirti yang pangatadlëngan mung atia,”
ag̓aaning.
40 Nangapagbitala ra ta maning tia,
ay naita ra nira ang yang mga Saduseo namampaluw̓ay ra ilëm ang indi ra namagpalangaas ang mamagpakigsug̓ang uman tung anya.
Nag̓apaisip Ni Jesus Yang Mga Sag̓ad Kung Unu Pa Ëngëd Ay Pinanliitan Yang Pag̓aningën ang Cristo (20:41-44)
41 Kapurisu simanyan,
anday dumang binuat ni Jesus,
yang mga sag̓ad ang atia,
ya ray tinalimaan nang inaning,
“Naang pag̓aningën ang Cristo,
ya pa ag̓aring ag̓aningën yang duma ang tanya kanubli ka ilëm ni Adi David?
42-43 Ti Adi David nganing mismu aparti yang anyang pagpabëtang tung anya.
Kipurki may isinulat na tung librung atiang pag̓aningën ang mga Karantaën ang maning taa yang bitala naf.
‘Yang Ginuuu pinag̓aning da ni Yawi ang kumarung da kanay unu tung tëpad na tung tuu ang asta pamirdiën na unu yang pamagkuntra tung anya ang asan da ka unu ipampabtangay na tung tarampakan yang kakay na.’
44 Ta,
tëlëngan mi.
Yang pag̓aningën ang Cristo duun da sambitay ni Adi David ang Ginuu na.
Ya pa ag̓aring magyaring kanubli na ka ilëm?”
mag̓aning.
Nag̓apaamanan Ni Jesus Yang Mga Tauan Nang Indi Ëngëd Mag̓usuy Tung Ug̓ali Yang Mga Sag̓ad (20:45-47)
45 Numanyan may bitalang ipinagngël ni Jesus tung mga taung atiang nag̓apangugyatan na ang nagngël ka yang kadaklan ang pamamati.
46 Ag̓aaning tung nira,
“Mangamanamu ang indiamu ëngëd mag̓usuy tung ug̓ali yang mga taung naang mga sag̓ad tung mga urdinansa ay yang pag̓asikad ëngëd nira ang tanira dayawën ta mga tau.
Katulad da asan tung panggawi-gawi nira ang yang aw̓ël nirang atiang langkuy,
pirmi ra ilëm ang nag̓ipabëka nirang nag̓ipasapët tung mga tau.
Ig kung mamasyar da nganing tung mga plasa,
duru kang kalëlyag nirang kumustaën ta mga taung galangën ta maayën ang tanira darakulu ka man ang mga tau.
Pariu ka ta laksu kung mamagsimba ra nganing tung mga pagsaragpunan.
Yang pilikën nirang karungan,
ya ra yang nag̓itig̓ana tung darakulung mga tau ang mas abwat ta pagkabëtang tung nira.
Ubin tung mga punsiun man,
ya ka.
Pilikën nira yang pinakamatinlung karungan.
47 Dispuis pa masyadung magpanlëpës tung mga baw̓ay ang mga balu ang para yang mga ganadus nira mapiar da tung nira.
Pagkatapus ang para manalig da yang isip yang balu,
papagmuug̓un da ilëm nira yang pag̓arampuën nira.
Purisu yang mga taung mga maning tia,
asan da nga dulangay nirang nga dulangay yang kalëlëbatën yang sintinsia ang ipakdul tung nira,”
mag̓aning.