Yang Mga Pamagpakigmaëpët Nag̓ipananglit Ni Jesus Tung Mga Imbitasiun Tung Kumbira Ang Namamatuy-patuy Ra Ilëm (22:1-14)
22
1-2 Atii,
nagbitala si ti Jesus ang duun si ipapanaway na tung sasang pananglit ang maning taa.
“Yang palaksu yang paggaraëmën yang Dios tung mga tau maning pa tung sasang kumbirang pinundar ta sasang adi para tung ana nang pangasawa.
3 Numanyan nanuw̓ul da yang adi tung mga turuw̓ulun na ang panawag̓ën da nira yang mga taung pinag̓imbitar na ra kang lag̓i ang para mamampasakëp da tung kumbira na.
Piru anda ray gustu nirang mamampasakëp.
4 Purisu numanyan nanuw̓ul si tung mga turuw̓ulun nang duma ang mag̓aning,
‘Balikan mi sing panganingën yang mga taung atiang pinag̓imbitaru ang simpan da yang mga palanganën.
Ipinagpaimatayu ra nganing yang mga turuu pati mga sinday ang pinampatambëku.
Purisu yang tanan ang bag̓ay,
simpan dang mapakinaw̓angan nira.
Purisu mamampasakëp da ilëm,’
mag̓aning.
5 Piru ya ra ilëm mamamatuy-patuy.
Namagpadayun da ka ilëm tung nira-nirang nag̓intindiën.
Yang sam bilug ya ra ngangay duun tung kaluakan na,
yang sam bilug duun da ilëm nag̓intindi tung nigusyu na.
6 Yang duma ya ra dëëpay nira yang mga turuw̓ulun yang adi ang pinagtaraw̓angan nira ta palu ang asta nagkarapatay ra ilëm.
7 Numanyan pagkabalita yang adi,
durung kasisilag̓ën na.
Anday dumang binuat na,
nanuw̓ul da tung mga sundalu na ang pangimatayën da ilëm nira yang mga inimbitasiun nang atia ang namangimatay tung mga turuw̓ulun na.
Pati siudad nira itinuw̓ul na ka tung mga sundalu na ang ya ray palalaw̓an nira ta apuy ang sirukun.
8 Pagkatapus ginuuyan na si yang mga turuw̓ulun nang duma ang inaning,
‘Tëlëngan mi,
simpan da yang tanan ang bag̓ay tung kumbiraw,
piru yang mga taung atiang pinag̓imbitaru,
bëlag̓an bag̓ay pala ang irimbitarën.
9 Purisu numanyan magluaamu ra tung mga karsadang pagtaripukpukan yang mga tau ang yang kumpurming magkarabag̓as mi ya ray pangimbitarën ming mamampasakëp da tung kumbira,’
mag̓aning.
10 Purisu dayun da ka man ang namansilua yang mga turuw̓ulun nang atia tung mga karsada.
Yang kumpurming nagkarapanawan nirang mga tau,
ya ray pinangimbitar nirang mamampasakëp,
maskin maraayën maskin malalain ta mga ug̓ali.
Ya ray pinagsagpun-sagpun nirang pinangkëlan duun tung may kumbira ang asta punuk dang pisan ta tau yang palasiu yang Adi ang pagkumbiraan.
11 “Numanyan nagpaklëd da yang adi ang para pangumustaën na ra yang mga imbitasiun na.
Unaw̓is may naita nang sam bilug ang naa pala indi ra napagsuut ta aw̓ël ang igsarakëp tung kumbira.
12 Purisu dayun na rang binugnu ang inaning,
‘Ungkuy,
ba tia?
Ayw̓a nagpalangaasa ra ka ilëm ang nagpaklëd taa ang naa pala india ra ka nagsuut ta aw̓ël ang igsarakëp tung kumbira?’
Piru indi ra ëngëd nag̓iw̓ëk-iw̓ëk yang taung atia.
13 Numanyan diritsyu rang nagkalalangan yang adi tung mga turuw̓ulun na ang mag̓aning,
‘Ala,
gapusun mi ra ilëm yang taung atia tung kalima may kakay ang iplëk tung lua duun tung makiklëp.
Duun da ipaugpuay mi tung mga taung pamagtarangitën ang pamagkarëtkët yang mga isi nirang pamagpapinitinsia,’
mag̓aning duun yang adi.”
14 Numanyan pagkatapus yang pananglit ang atia,
dayun dang sinugpatan ni Jesus yang bitala nang mag̓aning,
“Ay ya pa ag̓ari,
durung taung nag̓aimbitar yang Dios ang magpagaëm ang bug̓us tung anya,
piru malaka ka ilëm yang nag̓apilik na,”
ag̓aaning ti Jesus.
Ti Jesus Nag̓atag̓aman Yang Mga Pariseong Papagmintiraën Tung Panuw̓al Na Sigun Tung Balayaran Tung Gubirnu (22:15-22)
15 Taa numanyan yang mga Pariseong naang pamagtimang mamagpadëëp tung ni Jesus,
namagpaag̓ës da kanay ang namag̓urunta-untaan kung ya pa ag̓aring mapamintira nira ti Jesus tung panuw̓al na tung mga talimaan.
16 Purisu yang binuat nira,
yang mga taung nag̓apangugyatan nirang duma may yang mga partidu ni Adi Herodes ang duma,
ya ray pinanuw̓ul nirang mamagpalëngët tung ni Jesus ang para mamagtalimaan tung anya.
Numanyan tung pagkaw̓ut nira tung anya,
dayun da nirang pinagtag̓aman ta buladas ang inaning,
“Amëëy,
nag̓akdëkan da ka yamën ang yawa anday bukli,
kung indi,
pagturuldukuna yang kamatuuran natëtëngëd tung kalëlyag̓an yang Dios ang yay dapat ang tumanën ta mga tau.
Dispuis tung pagparadapatën mu ta bitala tung nira,
anday pinilikan,
kung indi,
pariu-pariu yang pagtërëlëngën mu tung nira maskin unu pay pagkabëtang nira.
17 Purisu gustu ka rin ilëm yamën ang makdëkan kung unu pay pag̓intindi mu tung prublimang naa.
Uyun basu tung katuw̓ulan yang Dios ang ta yatën ang mga Judio manggawarita pa yang nag̓ipagpagawad ni Adi Cesar tung yatën u kuntra?
Ya gawaray ta u indi?”
mag̓aninga.
18 Numanyan kumus nag̓adëëp dang lag̓i ni Jesus yang nag̓atima nirang atiang malain,
dayun na rang tinuw̓al ang inaning,
“Yamung pagpakaayën-ayën ilëm,
yang gustu mi tag̓amanaw ra numyung tuungun!
19 Abir ipatëlëng mi ra kanay tung yëën yang nigal ang atiang sam bilug ang nag̓ipagpabayad yang gubirnu,”
ag̓aaning.
Purisu dayun da nirang ingkël ta kuartang nigal.
20 Pagkatapus dayun dang nagtalimaan ti Jesus tung nira ang mag̓aning,
“Ninu pang ityuraay ang nabtang tung nigal ang naa?
Ninu pang aranay ang namarka taa?”
21 Mag̓aning ka tanirang namagtuw̓al,
“Ni Adi Cesar.”
Mag̓aning ka ti Jesus ang nagtimalës,
“Yang kumpurming ipinasuad ni Adi Cesar tung pagkabëtang na,
ya iintrigaay ta tung anya,
pati yang kumpurming ipinasuad yang Dios tung sadili na,
ya ka,
iintrigaay ta ka tung anya,”
mag̓aning.
22 Pagkagngël da nira tia,
durung pagkabërëng nira.
Purisu dayun da ka ilëm ang namamutwan tung anyang namagliliitan da.
Ti Jesus Nag̓atag̓aman Da Yang Mga Saduseo Ta Sug̓a Natëtëngëd Tung Mga Patay Kung Mabui Si Kang Uman (22:23-33)
23 Tung kaldaw kang atii,
may mga Saduseo ang ya si kay namagpalëngët tung ni Jesus.
Yang mga taung atia indi pamanangëd ang yang mga patay mabui si kang uman.
24 Numanyan mag̓aning tanira tung anya,
“Amëëy,
may sasang urdinansang ibinutwan ni Moises tung yatën ang yang sasa unung lalii kung mapatay ang anda pay ana na,
yang putul na unu yay dapat ang ipulin tung ni ipag nang nabalu ug̓ud kung maana tung anya,
mapabtang dang ana yang putul nang napatayb.
25 Ipabëtang ta may pitu nga laliian ang magpurutul.
Yang pangulu nangasawa tung sasang baw̓ay ang pagkatapus napatay ang indi naana tung kasawa na.
Pagkatapus yang putul nang duminasun tung anya ya ray ipinulin ang ipinakasawa tung ni ipag nang nabalu.
26 Numanyan maning ka tia yang nainabu tung anya pati tung pangyaklu nira ang asta ra ilëm tung nirang kadaklan ang magpurutul.
27 Pagkatapus tung kauri-urian da,
pati yang baw̓ay napatay ra ka.
28 Ta,
kung matuud yang numyung atia ang yang mga patay mangabui si kang uman,
abir,
kung kaw̓utun da nganing yang uras ang atia,
tung nirang pitung magpurutul,
tinu pa w̓asu ay magnatis ang may kasawa tung baw̓ay ang atia,
sindu parariung nangasawa-kasawa ra tung anya?
Abir kung unu pay matuw̓al mu?”
29 Mag̓aning ka ti Jesus ang nagtuw̓al,
“Ta,
indi,
asanamu rag pagkamali sigun ang indi mi ilëm nag̓amarësmësan yang napabtang tung kasulatan pati yang kagaëman yang Dios kung unu pay masarangan na,
ya ka,
indi mi ka ilëm nag̓amarësmësan.
30 Ayw̓a indiamu aningënu kipurki kung kaw̓utun da nganing yang uras ang yang mga patay pampabungkarasën da yang Dios,
indi ra magkarasawaan ang uman,
kung indi,
mamanulad da tung mga angil duun tung langit ang indi kang lag̓i pagkarasawaan.
31-32 Dispuis pa kung natëtëngëd tung pagpabungkaras yang Dios tung mga patay tung uri ta kaldaw ang yay midyu maliwag ang panangdën mic,
ayw̓a,
indi mi ra ka nabasa tung kasulatan yang sasang ipinaskë yang Dios tung numyu ang tanya unu yang Dios ang may mga tauan tung na Abraham ni Isaac may ni Jacobd?
Yang Dios tanya anday mga tauan nang patay,
kung indi,
buing tanan.
Pati nganing mga tinanguni nira,
damayën na ra kang buiën si kang uman tung uri,”
ag̓aaning duun ti Jesus.
33 Numanyan pagkagngël yang mga taung atiang buntun yang itinuw̓al ni Jesus ang atia,
nangabërëng da ta mupia tung palaksu yang pangatadlëngan na.
Nag̓atag̓aman Si Yang Mga Pariseo Ti Jesus Ta Pagtuung (22:34-40)
34 Numanyan yang mga Pariseong naa,
pagkabalita nira ang yang mga Saduseo anday natuw̓al nira tung pangatadlëngan ni Jesus,
namagsaragpun sing namag̓urunta-untaan kung unu pay dumang rimidyung sarang mabuat nira ang para mapamintira nira ti Jesus tung panuw̓al na.
35 Purisu simanyan may sam bilug tung nirang sag̓ad tung mga urdinansa ang ya si ay nagpalëngët tung ni Jesus ay gustu nang talimaanën ang basi pa ra ilëm ang matuung na.
36 Ag̓aaning tung anya,
“Amëëy,
kung maimu ilëm,
may talimaanënu rin tung nuyu.
Tung tanan ang mga katuw̓ulan yang Dios ang napabtang tung kasulatan,
ay pay kalandawan na ëngëd?”
37 Mag̓aning ti Jesus ang tuminuw̓al,
“Yang pinakalandaw ya taa:
‘Pabuyukan mi ta gëgma mi ti Yawi ang yay Dios ang may anya tung numyu.
Yang paggërëgmaën mi tung anya dapat ang tëdëk ang pisan tung mga kinaisipan mi ang indi ka magtënakan.
Ya ra kay papruibaan mi tung tanan ang mga buat-buat mie.’
38 Atia yay katuw̓ulan ang pinakalandaw tung tanan.
39 Dispuis may sam bilug pang mag̓atu ka ang maning taa:
‘Gëgmaan mi yang aruman mi ang katulad ka tung paggërëgmaën mi tung sadili mif.’
40 Asan da maniël tung duruang atia yang kadaklan ang mga katuw̓ulan ang ibinutwan ni Moises tung yatën pati yang kadaklan kang ipinagpadapat yang mga manigpalatay yang bitala yang Dios ang tukaw,”
mag̓aning.
Nag̓apaisip Ni Jesus Yang Mga Pariseo Kung Unu Pa Ëngëd Ay Pinanliitan Yang Pag̓aningën Ang Cristo (22:41-46)
41-42 Taa numanyan kumus indi pa pamagbërëlag yang mga Pariseong atia,
ti Jesus tanya,
ya si ay nagtalimaan tung nirang mag̓aning,
“Unu pay pag̓intindi mi tung pag̓aningën ang Cristo?
Ninu pang kanubliay tanya?”
Mag̓aning tanirang namansituw̓al,
“Tanya kanubli ni Adi David.”
43-44 Mag̓aning ka ti Jesus ang nagtimalës,
“Ayw̓a kaya yay sinambit ni Adi David ang Ginuu na?
Kipurki may sasang ipinaula yang Espiritu Santo tung anya ang maning taa yang napabtang tung kasulatan:
‘Yang Ginuuu pinag̓aning da ni Yawi ang kumarung da kanay unu tung tëpad na tung tuu ang asta pamirdiën na unu yang pamagkuntra tung anya ang asan da unu ipampabtangay na tung tarampakan yang kakay nag.’
45 Kung tanya sinambit nganing ni Adi David ang Ginuu na,
ya pa ag̓aring magyaring kanubli na ka ilëm?
Unu pa w̓asu tung numyung pag̓intindi?”
mag̓aning.
46 Atii andang pisan ay natuw̓al tung ni Jesus may san tag̓a.
Purisu mag̓impisa tung kaldaw ang atii,
anda ray napagpalangaas ang nagtalimaan pang uman tung anya.