Nag̓apaamanan Ni Jesus Yang Mga Tau Natëtëngëd Tung Sistima Yang Mga Pariseo May Yang Mga Sag̓ad (23:1-36)
23
Pagkatapus tia,
dayun dang nag̓intra pasanag ti Jesus tung mga taung atiang buntun pati tung yamën ang nag̓apangugyatan na.
2 Mag̓aning tung yamën,
“Naang mga sag̓ad pati naang mga Pariseo,
may katëngdanan ka man nirang mamagbaradbarën yang mga katuw̓ulan yang Dios ang atiang ibinutwan ni Moises tung nasyun tang Israel.
3 Purisu magkabag̓ay kang usuyun mi yang nag̓ipatuman nira tung numyu,
basta magkatunu tung intinsiun yang Dios ang may mga katuw̓ulan.
Piru yang mga sistima nira indi mi ilëm suarën.
Ay ya pa ag̓ari,
maskin nag̓atuldukanamu nira kung ya pa ag̓ari yang pagturumanën mi yang mga katuw̓ulan ang atia,
piru tanira mismu indi ka nganing pamagtuman.
4 Pamag̓iksir tung mga tau ang mamagtuman yang sari-saring mga urdinansa ang durug liwag ang tumanën ang pagkatapus,
kung tung mga sarakanën pa,
indi ka ëngëd mamagtaw̓ang ta sakan,
maskin tung madëën yang mga kalima nirang mamagduul.
5 Dispuis pa,
maskin unu pay nag̓abuat nira,
yang pag̓asikad ëngëd nira ang tanira dayawën ta mga tau ang durug katinuuën tung Dios.
Katulad da asan tung mga sag̓upit-sag̓upita ang atiang bërëbtangan yang mga katuw̓ulan ang nag̓itagkës nira tung mga kikilayën nira ubin tung mga brasu nira ang ya rag padarakulay nira ang para mas malpës ang maita ta mga tau.
Pati yang mga mabiw̓ilug-bilugb ang atiang nag̓itakëd nira tung sidsirën yang mga aw̓ël nirang atiang lagwas,
ya ka,
ya ra kag padarakulay nira.
6 Sasa ra ka tung ug̓ali nirang mamagpasakëp tung mga punsiun.
Yang kakarungan ang pinakamatinlu,
ya ray pilikën nira.
Pariu ka ta laksu kung mamagsimba ra nganing tung mga pagsaragpunan.
Yang pilikën nirang karungan,
ya ra yang nag̓itig̓ana tung darakulung mga taung mas abwat ta pagkabëtang tung nira.
7 Sasa ra ka tung ug̓ali nirang pamasyar tung plasa.
Durung kalëlyag nirang tingaraën ang saluduën ta mga taung aningën ang Rabbi.
8 Piru ta yamung kumpurming mga tauanu,
indiamu magsikad ang aningënamu pa ta mga taung Rabbi ang katulad ka tung pag̓asikad nira.
Ay kipurki sam bilug ilëm yang pagturuldukun tung numyu ig pariu-pariuamu ka ilëm ta pagkabëtang ang maning pa tung magpurutulamu.
9 Dispuis dapat ang anday tag̓a taa ka ilëm tung katanëkan ang ya ray tingaraën ming pinakaama mi ay kipurki sam bilug ilëm yang nagyari rang Ama mi ang ya ra ka man yang duun tung langit.
10 Dispuis pa,
dapat ang indiamu ka magsikad ang aningënamu pa ta duma ang pagmangulu ang katulad ka tung pag̓asikad nira.
Ay kipurki sam bilug ilëm yang sarang magmangulu tung numyu.
Anday duma yuu ra taang pag̓aningën ang Cristo.
11 Kung tinu pay pag̓atëlëngan ang landaw tung numyu,
ya ray dapat ang manirbian tung numyung kadaklan ang maning pa tung sasang turuw̓ulun mi ka ilëm.
12 Kumpurming tinu pay pagpaabwat tung sadili na,
ya ag̓iparanëkay yang Dios ig kung tinu pay pagparanëk tung sadili na,
ya ag̓ipalandaway na.”
May Pitung Bag̓ay Ang Nag̓apanganugunan Ni Jesus Tung Mga Sag̓ad May Tung Mga Pariseo (23:13-36)
13-14 “Aay,
yamung mga sag̓ad pati mga Pariseo ang pagpakaayën-ayën ilëm,
kanugunamu ay kipurki ya ra ag̓ilipat-lipatay mi yang mga tau ang para indi ra nira matultulan kung ya pa ag̓aring magpalg̓ud tung palaksu yang paggaraëmën yang Dios.
Ay ya pa ag̓ari,
ta yamu,
indiamu ka ëngëd malëlyag ang magpagaëm tung anya,
pati tanirang pangalëlyag da ka rin,
ya ra kag papaëntëray mi.
15 “Aay,
yamung mga sag̓ad pati mga Pariseong pagpakaayën-ayën ilëm,
kanugunamu ay kipurki ya rag salairay mi yang maskin ay pang banwaay ang basta may makumbinyu ming maglaktëd tung rilyun mi,
maskin sa nga tauan da ilëm.
Ang pagkatapus kung magpakumbinyu ra nganing tung numyu,
nag̓isalid mi yang mga ug̓ali mi tung nira ang asta mas pang magkabag̓ay ang manampët duun tung impirnu kay tung numyu.
16 “Talagang kanugunamu.
Pagturuldukanënamu ka man tung mga tau piru yang kaalimbawaan mi maning pa tung sasang buray ang indi matultul ta dalan.
Ay kipurki yang nag̓itulduk mi tung nira maning taa.
Kung manumpa ra nganing tanira,
basta yang sambitën nira ya ka ilëm yang pagtuuan tang pinakalusu,
maskin indi ra ubligarën nira.
Piru kung yang sambitën nira ya ra yang mga garamitën ang atiang mga bulawan ang duun agbëbtang tung kaklëran yang pagtuuan tang atia yay mainambit nira,
ay talagang ubligadu tanirang magtuman yang nabitalaan nira.
17 Abaa yamu,
yang kaalimbawaan mi bëlag̓an ilëm ang maning pa tung mga burayamu,
kung indi,
pati yang laksu yang pag̓irisipën mi,
baliskad ang pisan.
Ayw̓a,
kanisip mi ang mas sagradu yang mga garamitën ang atiang mga bulawan kay tung pagtuuan tang pinakalusu?
Indi ka ëngëd magkatama tia,
kipurki sagradu ka man ilëm nganing yang mga garamitën ang atia gatëd asan da ka man agbëbtang tung pagtuuan ang atia.
18 Dispuis yang sam bilug pang nag̓itulduk mi tung mga tau ay kung manumpa ra nganing tanira,
basta sumpaan nira yang nabitalaan nira tung midyu lamisaan ang atiang darasag̓an ta mga ayëp ang magëw̓a pa rin kung bëlag̓an matuud yang bitala nira,
maskin indi ra nira matuurun yang nabitalaan nira.
Piru kung sumpaan nira tung ayëp ang asan da nag̓idasag̓ay,
dapat kang tumanën nira yang nabitalaan nira.
19 Abaa yang kaalimbawaan mi talagang maning pa tung mga burayamu ka man ang matuud.
Ayw̓a kanisip mi ang mas sagradu yang ayëp ang atiang nag̓idasag kay tung midyu lamisaan ang atiang darasag̓an tung anya?
Indi ka ëngëd magkatama tia,
kipurki sagradu ka man ilëm nganing yang ayëp ang atiang nag̓idasag gatëd duun nag̓idasag̓ay tung midyu lamisaan ang atia.
20 Kapurisu yang magkatama ang dapat din ang itulduk mi tung mga tau ay maning taa:
yang sasang tau kung sumpaan na yang nabitalaan na tung midyu lamisaan ang atiang darasag̓an,
bëlag̓an ilëm asan magsumpaan na,
kung indi pati tung ayëp ang nag̓idasag asan,
damay ra ka.
21 Pariu ka ta laksu kung sumpaan na yang nabitalaan na tung pagtuuan tang pinakalusu,
bëlag̓an ilëm tung pagtuuan ang atia magsumpaan na kung indi pati tung Dios ang asan agpagtinir,
damay ra ka tung panumpa na.
22 Ya kay laksu na kung sumpaan na yang nabitalaan na tung langit.
Yang nag̓asumpaan na ya ra mismu yang maning pa tung pagkarungan yang Dios.
Ig disir,
pati tanya mismung pagkarung asan,
damay ra ka tung panumpa nang atia.
23 “Ay yamung mga sag̓ad pati yamung mga Pariseo,
midyu tung pagpakaayën-ayënamu ilëm.
Kanugun yang pagkabëtang mi tung uri,
ay kipurki maski nganing yang mga luak ming gërëg̓ësyëng pisan ang ya ilëm ag̓ipasaburay mi tung mga sëra mic,
ya pay panëpët-sëpëtën ming pamatëng-patëngën ta sam puluk ang parti ang para yang sam parti ya ray nag̓ibuluntad mi tung Diosd.
Ang pagkatapus yang nag̓ipatuman ëngëd yang Dios tung numyu ang yamu ra rin ay magbuat ta magkatama tung mga masigkatau mi ig ang yamu ra rin ay mag̓ildaw tung nira ig ang yamu ra rin ay mag̓ing matalig̓an ang pisan yang mga aruman mi,
ya pay nagbaliwalaën mi.
Dapat da rin ang ya ëngëd ay pabilug̓an ming tumanën atiang may mga timbang na ang indi mi ka paw̓ayaan yang pagparartiën ming atia tung Dios ta yasampuluk ang parti.
24 Pagmaranguluënamu ka man tung mga tau,
piru yang kaalimbawaan mi yamu talagang maning pa tung sasang buray ang indi matultul ta dalan.
Ay tung pagpanëpët-sëpët ming atia maning pa tung nag̓asaraan mi yang mga uw̓ud-uw̓ud ang nag̓alakët tung igmën mi,
ang pagkatapus yang maning pa tung mag̓akamilyug kadakul,
ya ray nag̓iklën mi!
25 “Ay yamung mga sag̓ad pati yamung mga Pariseo,
midyu tung pagpakaayën-ayënamu ilëm.
Kanugun yang pagkabëtang mi tung uri,
ay kipurki duruamug kasinulipëtën tung pagrilimpiuën mi tung mga tasa mi may tung mga pinggan mi sigun tung mga riglamintung atiang pinanubli mi tung mga kinaampu ta ang yang kanisip mi ya ray mauyunan yang Dios tung numyu.
Piru yang paklëd nirang mga pamangan ubin irinëmën,
duun da ilëm ngaëklay mi tung pagpanlëpës mi tung duma ang kuw̓ali panalënsënamu.
26 Abaa yamung mga Pariseo,
talagang maning pa tung mga burayamu ka man ang matuud!
Yang tukaw ang dapat limpiuën mi ya ra kanay yang nag̓abtang tung mga kinaisipan ming mga maning tia ug̓ud pati mga ubra-ubra mi asan da ka mag̓ing limpiu ka.
27 “Ay yamung mga sag̓ad pati mga Pariseong pagpakaayën-ayën ilëm,
kanugun yang pagkabëtang mi tung uri ay kipurki yang kaalimbawaan mi yamu maning pa tung mga pantiun ang pininturaan ta kulit.
Matinlu ka man ang tëlëngan tung sagpaw piru tung adalëm punuk ang pisan ta mga duli ta mga tau ubin mga tinanguni nirang rusdak da.
28 Maning kang pisan tia tung numyu.
Tung sagpaw pag̓atëlënganamu ta mga tau ang maraayënamu,
piru tung adalëm durug kaligna yang nag̓aëyang asan tung mga kinaisipan mi.
Punuk ang pisan ta pagtirimaën mi ta mga malalain ang nunut da ka ta pagpakaayën-ayën ming masyadu.
29 “Ay yamung mga sag̓ad pati mga Pariseong pagpakaayën-ayën ilëm,
talagang kanugunamu.
Buat na pa durung pagmaal mi tung mga manigpadapat yang bitala yang Dios ang tukaw may tung mga kaarumanan ka nirang matinumanën tung nag̓auyunan yang Dios.
Ay yang mga lëyang ang atiang pinanlug̓uran tung nira nag̓apakdëngan mi nganing ta matitinlung mga pantiun ig yang mga pantiun ang atia,
ya kay nag̓apaisa-isaan mi ka ta mga dikurasiun.
30 Ag̓aningamu ka ang kung yamu natau rang lag̓i tung uras ang atiing bui pa yang mga kinaampu mi,
indiamu ra ka rin nagpasanyug tung nira ang nagpangimatay tung mga manigpadapat ang atii.
31 Purisu tung bitala ming atia ya ra kay pangamin mi ang talagang mga irinsiamu ka man yang namangimatay tung mga manigpadapat ang atii.
32 Ig disir bag̓ay ang pisan tung numyung magsug̓ut tung mga irinsia ming atia ang yamu ray magtapus yang naimpisaan nirang mga kinaampu mi.
33 Yang kaalimbawaan mi,
yamu maning pa tung mga iraw ang durug katraidur!
Kanisip mi malibrian mi pa yang sintinsia yang Dios ang duunamu ipaangayay na tung impirnu?
34 Purisu ang para matuungamu tung nabitalaan ming atia,
yang buatënu ta yëën,
paangayanamu ra ka yëën tung mga tauanung mga manigpadapat yang bitalaw ang yay matakung magparasanag̓ën tung mga tau.
Ang pagkatapus anday dumang buatën mi tung nira,
yang duma ya ipaimatayay ming ipalansangay tung krus,
yang duma ya paburdunay mi duun mismu tung mga pagsaragpunan mi ang pagkatapus ya panrutus-rutusay mi tung maskin ay pang lansanganay ang pagpalibrian din nira.
35 Ya ray buatënu ug̓ud yamu ëngëd ay matëngëran yang kamatayën yang tanan ang mga taung atiing pinangimatay ang tukaw ang anday binuatan nirang malain,
mag̓impisa pa tung ni Abel atiing primirung pisane ang asta ra ilëm tung kauri-urian da ang tung ni Zacarias ang ana ni Baraquias ang yay inimatay tung pagtuuan ang pinakalusu.
Duun pa ka man mismu imatayay tung pag̓ëlaan yang karakulan na may yang midyu lamisaan ang atiang darasag̓an ta mga ayëpf.
36 Iugtulu tung numyu yang kamatuuran,
yamung mga masigkanasyunu numanyan tung panimpung naa,
tung numyu ëngëd dilëmay yang kamatayën nirang tanan,”
mag̓aning.
Nag̓ipanangit Ni Jesus Yang Mga Tag̓a Jerusalem (23:37-39)
37 Numanyan pinadayun ni Jesus yang nag̓abitala nang mag̓aning,
“Ay yamung mga tag̓a taa tung siudad ang naang Jerusalem,
kanugun yang pagkabëtang mi tung uri.
Kipurki kada paangayanamu yang Dios tung mga manigpalatay yang bitala na,
ya ra ilëg batuway ming imatayay.
Pira-pira rang bisis ang gustuu rin ang managpun tung numyu ang katulad ka tung manung inayën ang pag̓ayupup tung mga butu na,
piru indiamu ra ka ëngëd nalëlyag.
38 Naa w̓a yang dapat ang isipën mi.
Yang siudad ming naa ang tag̓isip mi indi maunu pa,
paw̓ayaan da ilëm yang Dios ang ilug̓ut tung kadiaduan.
39 Sanu pa indiamu aningënu ay kipurki iugtulu tung numyu,
indi ra ilëm buay,
indiaw maita ming uman ang asta kaw̓utun da ilëm yang uras ang ipag̓ilala mi ka ëngëd tung yëën ang ustu ang nunut da ka ta pag̓ingaluk mi tung Dios ang yuung pag̓atuw̓ul nang mag̓ërëkëlën yang kagaëman na,
pakaayënënaw rang pirmi anya,”
mag̓aning duun ti Jesus.