Natëtëngëd Tung Pagparaklërën Ni Jesus Tung Siudad Ang Jerusalem (11:1-11)
11
1-2 Taa numanyan,
atiing pamanungul da tanira na Jesus tung bukid ang durung ayung pag̓aningën ang olibo ang alëngët-lëngët da tung siudad ang Jerusalem,
may durua nga baryuan ang nag̓apalëngtan nira ang paggug̓uuyan tung Betpage may Betania.
Numanyan nanuw̓ul da ti Jesus tung durua nga tauan ang nag̓apangugyatan nang mag̓aning,
“Ala,
mangayamu ra kanay tung baryung atii tung tukawan ta.
Kung kumaw̓utamu ra nganing asan,
ya rang lag̓i ay mapanawan mi yang sasang asnung sinday pa ang yag këkëdkëd ang inding pisan nag̓asaay-saayan ta tau.
Ya ray badbarën ming guyuran tani.
3 Kung may magbugnu tung numyu ang unyën mi pa yang sinday ang atia,
yamu ra ag̓aaning,
‘Kaministiran ni Ginuu ta.
Kung matapus na ra nganing ta paggamit,
ipabalik na ra kang lag̓i asan tung numyu,’”
mag̓aning ti Jesus tung nira.
4 Purisu dayun da ka man ang namagpanaw yang duruang atia.
Pagkaw̓ut nira tung baryu,
may sasa ka man ang sinday ta asnung naita nira duun tung karsadang yag këkëdkëd tung purta yang sasang balay.
Pagkatapus,
dayun da nirang binadbad.
5 Atiing pag̓abadbad da nira,
binugnu ra yang dumang këmdëngan asan ang inaning,
“Ëëy,
ay tia?
Ayw̓a nag̓abadbad mi tiang sinday?”
6 Dayun dang nansituw̓al yang duruang atia ta maning ka tiing ipinaëtad ni Jesus tung nira.
Purisu tinugtan da yang namagbugnu ang ipinaguyud.
7 Pagkatapus dayun dang ginuyuran nira yang sinday duun tung ni Jesus.
Pagkaw̓ut nira,
dayun dang inapilaan nira yang mga panlamig nira ang pagkatapus dayun da kang sinaayan ni Jesus.
8 Numanyan yang pagsaay na tung asnu,
durung mga taung namagpakigluyug dang namagpaita yang paggaralangën nira tung anya.
Yang duma ya ray namagluas yang mga panlamig nirang ipinamëklad tung karsadang magpanawan yang asnu.
Yang duma ya ray namaglampang ta mga paklang tung mga kabiw̓init-binitan ang ya ra kay ipinamëklad nira tung karsada.
9 Numanyan yang duma pamagtukaw tung ni Jesus,
yang duma pamag̓uri.
Sigi ilëm yang pagkëkëndalën nirang pamansianing,
“Salamat!
Pakaayënën da kang pirmi yang Dios yang pag̓atuw̓ul nang naang magpalua yang paggaraëmën na!
10 Paktëlën na ra ka ta mupia yang paggaraëmën na tung yatën ang yay magkapariu ka tung paggaraëmën ni Adi David ang kinaampu ta atiing tukaw!
Salamat tung Dios duun tung kaabwat-abwatan,”
mag̓aning.
11 Taa numanyan pagpaklëd ni Jesus tung siudad ang Jerusalem,
dayun dang minangay duun tung pagtuuan ang pinakalusu ang nagpaklëd tung palayas na.
Pagpaklëd na,
nanëlëng-tëlëng da tung tanan ang pagkarainabu duun.
Pagkatapus ta pagpaniid,
kumus apun da,
dayun dang luminuang nagbalik duun tung Betania,
kasiraan da ka tanira yang mga tauan na.
May Ayung Pag̓aningën Ang Igus Ang Magbitalaan Ni Jesus (11:12-14)
12 Taa numanyan,
pangayag ang timpranu,
atiing pagliit na duun tung Betania ang pagbalik da tung siudad,
ya ra nga suw̓uk.
13 Atii tung tukawan,
may nabandaw nang ayung pag̓aningën ang igus ang durug rabung yang daun na.
Purisu ya ray inangay na ang basi pa ilëm may mapakinaw̓angan na.
Piru kaw̓utan na,
andang pisan ay burak na,
kung indi,
pulus ilëm mga daun.
Yang ipinagpalëngët na tung igus ang atia,
maskin bëlag̓an pa yang uras ang igbururak yang kadaklan ang mga igus,
kumus may mga daun na,
kalaum nang burakan daa.
14 Numanyan dayun na rang itinuluy tung malain yang ayung atiang inaning,
“Maayën pa rin ang india ra ilëm mamurak ang uman,”
mag̓aning.
Yang ibinitala nang atia,
nagngël ka yang mga taung atiang nag̓apangugyatan na.
Yang Pagpalayas Ni Jesus Tung Mga Nigusyanti Tung Palayas Yang Pagtuuan Ang Pinakalusu (11:15-19)
15 Taa numanyan,
pagkaw̓ut nira na Jesus duun tung Jerusalem,
ti Jesus tanya dayun dang nagpaklëd tung palayas yang pagtuuan ang pinakalusu.
Pagpaklëd na,
dayun dang nagpalayas tung mga manigpaalang ta mga garamitën tung pagparadasag̓ën,
pati yang pamangalang tung nira nagkaraumid da ka ta palayas na.
Asta yang mga lamisaan ang atiang pinampabtangan ta mga kuartang nag̓ipagpabailu tung mga tau,
pinamaliskad na ra,
asta yang mga kakarungan yang mga manigpaalang ta mga kalapati,
ya ka.
16 Dispuis indi na ra ka tinugtan yang duma ang mamagsakan ta mga ëkël-ëkël nira ang ya ra ilëm din agpamanggëtës asan tung palayas ang mamansiulik.
17 Numanyan dayun dang nagpasanag tung mga tau ang mag̓aning,
“Bëlag ba ang may inaning yang Dios ang napabtang tung kasulatan ang yang balay unung naang pag̓atiniran na,
dapat unu ang yay pag̓ampuan tung anya yang tanan ang mga nasyunb?
Piru ay pa w̓a?
Ta numyu,
binwat mi ra ilëm ang kuinta lëyang ang pantalukan ta mga tulisan ay natëtëngëd taa ra mismu agpandayaay mi yang mga tauc!”
mag̓aning.
18 Numanyan may mga paring arabubwat ta katëngdanan asan ang pamamati,
kasiraan da ka tanira yang mga sag̓ad.
Anday dumang nag̓atima nira,
kung indi,
ang ay pa ag̓aring mapaimatay nira ti Jesus.
Ay pamangimun da ta mupia tung anya ay natëtëngëd tung mga sakëp nirang atiang buntun ang pamaninluan da ta mupia tung nag̓itulduk na tung nira.
19 Taa numanyan atiing law̓ii ra,
ya ra kay paglua na Jesus tung siudad.
Yang Itinulduk Ni Jesus Natëtëngëd Tung Ustung Pagtaralig̓ën Tung Dios (11:20-25)
20 Taa numanyan,
atiing pangayag dang timpranu ang pamagtaklib da rin na Jesus duun tung ayung atiing itinuluy na tung malain,
naita ra nira ang atia pala nanlumpayëng dang luw̓us asta duun tung mga lamut na.
21 Ya ra kay pagkadëmdëm ni Pedro kung unu pay ipinag̓aning ni Jesus tung ayung atia.
Purisu dayun dang nagpasapët tung anyang mag̓aning,
“Rabbi,
uay,
atia ra yang igus ang itinuluy mu tung malain.
Nanlumpayëng dad!”
22 Mag̓aning ti Jesus ang nagtimalës tung nira rang tanan,
“Kaministiran ang magtalig̓amu ta ustu tung Dios.
23 Iugtulu tung nuyu yang kamatuuran,
kung tinu pay mag̓ingaluk tung Dios ta sasang durug liwage tung pag̓intindi na ang anday dua-dua yang isip na,
kung indi,
may pagtalig na rang lag̓i ang talagang mainabu ra tiing nag̓aingaluk na,
yang taung atia,
yay pakdulan yang Dios.
24 Purisu ya ra kay nag̓ipag̓aningu tung numyu ang kung unu pay ingalukun mi tung Dios,
magtalig̓amu rang lag̓i ang naëklan mi ra atiang nag̓aingaluk mi ang pagkatapus magkamaningan da ka man tia.
25-26 Ig dispuis pa,
kung këmdëngamu ra nganing ang mag̓ampu,
kung may nagbuat ta kasalanan tung numyung ya ray paglainan ta isip mi tung anya,
patawarën mi rang lag̓i bakluamu ra magdayun ang mag̓ampu.
Ay kung patawarën mi,
patawarënamu ra ka yang Ama mi duun tung langit tung mga paglalampasën mi tung mga katuw̓ulan na,”
mag̓aning.
Yang Pag̓usisa Yang Mga Pamagpakigmaëpët Tung Ni Jesus Natëtëngëd Tung Katëngdanan Na (11:27-33)
27 Taa numanyan,
namansikaw̓ut si na Jesus duun tung Jerusalem.
Numanyan atiing pagparanaw-panawën na duun tung palayas yang pagtuuan ang pinakalusu,
may namagpalëngët da tung anyang mga paring atiang arabubwat ta katëngdanan may yang mga pamagpakigmaëpët tung banwa.
28 Dayun da nirang inusisang inaning,
“Ëëy,
ay pa ngaëklay mu yang katëngdanan ang yawa magbuat yang mga maning tia taa tung pagtuuan tang naang pinakalusu?
Tinu pay naglug̓ut tung nuyu?”
29 Mag̓aning ka ti Jesus ang nagtimalës,
“Ëlat kanay,
kung mga sarang tung numyu,
may sasa kang talimaanënu rin tung numyu.
Kung matuw̓al mi,
ay tuw̓alënamu ka yëën kung ay pa liit yang katëngdananung pagbuat ta mga maning tia.
30 Abir,
ay pa w̓asu liit yang katëngdanan ni Juan ang nagpamënyag tung mga tau?
Tung Dios manliit u tung tau ka ilëm?
Ala,
tumuw̓alamu ra.”
31 Pagkagngël nira tia,
dayun dang nag̓aralas-alasan ang mag̓aning,
“Unu pa w̓asu ay maayën ang ituw̓al ta?
Kung aningën ta ang tung Dios manliit yang katëngdanan ni Juan,
muya suliliënita si anyang talimaanën ang ayw̓at indiita ra nanangëd tung anya.
32 Piru kung aningën ta ang tung tau ka ilëm manliit yang katëngdanan na,
atiay maliwag,”
mag̓aning.
(Yuung ti Marcos ang nagsulat,
may yëën kang isalëët ang ipasanag.
Yang pinangamanan nira ya ra yang mga taung atiang buntun ay yang pagtërëlëngën nirang tanan tung ni dipuntu Juan tanya talagang sasang tinuw̓ul yang Dios ang magpadapat yang bitala na.)
33 Purisu numanyan tinuw̓al da ilëm nira ti Jesus ang,
“Inay,
indi ilëm nag̓askëan yamën.”
Mag̓aning si ka ti Jesus ang nagtimalës,
“Tay kung maning tii,
indiaw ra ka mag̓ugtul kung ay pa liit yang katëngdananung pagbuat ta mga maning tia,”
mag̓aning.