Yang Pag̓apatay Ni Lazaro (11:1-16)
11
Simanyan may sasang taung paglaru ang yang aran na ti Lazaro.
Duun agpag̓istar tung Betania,
kasiraan da ka tanira yang mga putul nang na Marta ni Maria.
2 Naang ti Mariang naa,
tung uri ya ray nagbukbuk ta paamut tung kakay ni Ginuung Jesus,
ang pagkatapus tinarapuan na ra ka yang bua naa.
Yay may putul tung ni Lazarong atiang paglaru.
Jesus raises Lazarus (Juan 11:1-57)
3 Simanyan,
yang binuat yang may mga putul,
pinatuw̓ulan da nira ti Jesus ang mag̓aning,
“Ginuu,
ti ungkuy mung nag̓amaal mu paglaru.”
4 Pagkadngël ni Jesus yang balitang atia,
napagbitala rang mag̓aning,
“Yang laru ni ungkuy ang atia,
yang pakaw̓utun na ëngëd,
bëlag̓an kamatayën,
ang indi,
asan da nga padëngëg̓ay yang Dios ug̓ud pati yuung pag̓aningën nang Ana Na,
asanaw ra kang mapadëngëg̓an,”
mag̓aning.
5 Durung pagmaal ni Jesus tung ni Marta duruang mag̓ari pati tung ni Lazaro.
6-7 Ug̓aring pagkabalita na ang ti Lazaro paglaru,
nagpataklib pa ta duruang kaldaw duun tung lugar ang atiing pag̓atiniran na bakluami ra aningay nang nag̓apangugyatan na ang,
“Amus ta ra,
magbalikita ra duun tung Judea,”
mag̓aning.
8 Mag̓aningami kang nagtimalës,
“Ëlat kanay,
Rabbi,
indi pa ka ilëm nag̓abuay,
nag̓abalakana ra yang mga pamagpakigmaëpët ang batwën ang pagkatapus numanyan,
gustu mu pa ka ëngëd ang magbalik duun?”
9 Mag̓aning ti Jesus ang nagpananglit,
“Ta,
indi,
tung sëlëd sang kaldaw ang mag̓apun,
may sampuluk may duruang uras?
Kapurisu basta kaldaw pa yang ipagpanaw ta,
indiita ra malambëg tung ikalain ta ay ya pag pasikaray ta yang masadlaw ang pag̓ipakdul yang kaldaw.
10 Piru kung law̓ii ra yang ipagpanaw ta,
muya malambëg̓ita ka man tung ikadiadu ta ay anda ray masadlaw ang mapasikaran ta,”
mag̓aning.
11 Maning tia yang ipinananglit ni Jesus.
Pagkatapus dayun na rang sinugpatan yang bitala nang mag̓aning tung yamën,
“Ti ungkuy tang Lazaro pag̓ëlkën da.
Angayënu rang puawën.”
12 Mag̓aningami kang nagtimalës,
“Ginuu,
kung pag̓ëlkën da,
intunsis,
magmaayën da.”
13 Ya ray itinuw̓al yamën ay yang kanisip yamën ang yang gustu nang ianing ëlëk ang bui.
Piru yang linëgdangan yang bitala na ay ti Lazaro patay ra.
14 Kapurisu numanyan,
ya ray ipinagpalw̓aw na tung yamën ang mag̓aning,
“Ti Lazaro patay ra.
15 Pagpasalamataw ngani ang yuu anda duun tung uras yang ikinagmatay na.
Kipurki mas maayën tung numyu,
ay mas pang magbakëd yang pagtaralig̓ën mi tung yëën.
Ala,
amus ta ra,
mangayita ra duun tung anya,”
mag̓aning.
16 Pagkadngël tia ni Tomas ang atiang paggug̓uuyan yamën tung ni Kampi,
mag̓aning tung yamën ang mga aruman na,
“Amus,
magnunutita ra ilëm tung anya.
Sibaya kasiraanita ra kang imatayën,”
mag̓aning.
Nag̓ipagpailala Ra Ni Jesus Ang Tanya Yang Pangapunglan Yang Pagparabungkarasën Tung Mga Taung Patay (11:17-27)
17 Simanyan,
pagkaw̓ut yamën na Jesus duun tung Betania,
nabalitaan da yamën ang ti Lazaro ëpat dang kaldaw duun tung lëyang ang pinanlug̓uran tung anya.
18 Yang lansangan ang atiang Betania,
alëngët ilëm tung Jerusalem,
mga tulu ilëm ang kilometro yang distansia na.
19 Purisu durung mga Judiong tag̓a Jerusalem ang namansiangay ra duun ang para mamaglinga-linga tung na Marta durua ni Maria natëtëngëd tung ari nirang napatay.
20 Simanyan pagkabalita ni Marta ang ti Jesus asan da magkakaw̓ut,
dayun dang nagpakigbag̓as tung anya.
Piru ti Maria tanya nagpabutwan da ilëm tung balay.
21 Simanyan,
pagbag̓as ni Marta tung ni Jesus,
dayun na rang inaning ang,
“Aay Ginuu,
kung taawa ilëm,
indi ra rin napatay yang ariu.
22 Piru nag̓askëanu ka,
maskin simanyan ang yang kumpurming ingalukun mu tung Dios,
ipakdul na tung nuyu.”
23 Mag̓aning ka ti Jesus tung anyang minlës,
“Magbungkaras yang ari mung atia.”
24 Mag̓aning ti Martang minlës,
“Ag̓askëanung magbungkaras tung uri ta kaldaw,
tung uras ang ipagpabungkaras yang Dios tung mga taung nagkarapatay ra.”
25-26 Mag̓aning ti Jesus ang minlës,
“Yuu yang pagpabui si kang uman tung mga patay.
Kumpurming tinu pay magtalig yang sadili na tung yëën,
maskin mapatay,
mabui si ka ëngëd ang uman.
Yuu ka yang pagpaëyang tung mga tau ta ipagpangabui nirang baklu.
Kumpurming tinu pay pinaëyanganu ëkël tung pagtalig na tung yëën,
indi ra ëngëd magbëlag̓an tanira yang Dios ang asta tung sampa.
Ta,
nag̓apanangëd mu tia?”
27 Mag̓aning ti Martang tuminuw̓al,
“Ëë,
Ginuu.
Yuu panangëraw kang lag̓i ang yawa yang pag̓aningën ang Cristo,
bilang yang pag̓aningën ang Ana Yang Dios ang ya ra kang lag̓i ay pinangakuan nang mangay taa tung kaliw̓utan,”
mag̓aning.
Yang Pagpabungkaras Ni Jesus Tung Ni Lazaro (11:28-44)
28 Pagkaaning na tia,
dayun dang minulik tung balay ang nagbaw̓alitaën da tung ari nang ti Maria.
Mag̓aning tung anyang pag̓alas-alas,
“Ti Ginuu ta,
taa ra,
nag̓ipaguuya ra nganing anya.”
29 Pagkadngël ni Maria tia,
kali-kali rang kumindëng ang minangay duun tung anya.
30 Ay ti Jesus tanya,
indi pa ag̓akaw̓ut tung baryu.
Duun pa tung pinagbag̓atan nira ni Marta.
31 Taa,
simanyan yang mga Judio asan tung balay ang pamaglinga-linga tung ni Maria,
pagkaita nira tung anyang kumindëng tung makaling luminua,
dayun da nirang sinikad.
Ay yang kanisip nira,
mangay duun tung pinanlug̓uran tung ari na ang para duun si magtarangitën.
32 Taa,
simanyan,
pagkaw̓ut ni Maria duun tung ni Jesus,
pagkaita na tung anya,
ya ra nga luud tung pinagtalungaan nirang durua.
Mag̓aning tung anya,
“Aay Ginuu,
kung taawa ilëm din,
indi ra napatay yang ariu,”
mag̓aning.
33 Numanyan pagtëlëng ni Jesus tung anyang pagtarangitën da asta yang mga Judiong atiang namanikad da tung anyang pamagtarangitën da ka,
dayun dang pinagsampian ta kapupungawën nang duru ang nunut da ka ta paglain yang isip na natëtëngëd tung kamatayën ang pirmi ra ilëm ang magdërëëg̓ën na yang mga taung magpakdulan ta kunsimisiun ang duru.
34 Diritsyung nagtalimaan tung nira,
“Ay pa ipalg̓uray mi?”
Mag̓aning tanirang nansituw̓al,
“Taniita,
Amëëy,
para maita mu.”
35 Atii,
dayun dang nag̓intra tangit ti Jesus.
36 Mag̓aning yang mga Judiong pamagpaniid,
“Ta,
tëëd mi tia.
Durung gëgma na tung anya.”
37 Ug̓aring yang duma namag̓araning-aningan dang mag̓aning,
“Ta,
indi,
yang taung naa ya ra yang napagpabuskad yang mata yang sasang buday?
Ta,
indi,
kung taa pa rin,
kinayanan na ra ka ti Lazarong pinamaayën ug̓ud indi ra rin madayunan ang mapatay?”
mag̓aning.
38 Numanyan,
pagpalëngët ni Jesus tung lëyang ang atiang pinanlug̓uran tung patay,
inampayan si ta kalalainën ta isip nang duru natëtëngëd tung kamatayën.
Yang lëyang ang atii may takëp nang batung dakulung binilug tung purta na.
39 Kapurisu ti Jesus,
dayun dang nagkalalangan tung nirang mag̓aning,
“Ipalig̓id mi ra kanay tiang batu tung binit,”
mag̓aning.
Ug̓aring naang ti Martang naang may putul ang napatay,
ya ray nabngang mag̓aning,
“Abëë,
Ginuu,
duru rag buyu!
Yaëpat dang kaldaw numaan yang ikinagmatay na!”
40 Mag̓aning ti Jesus tung anya,
“Ta,
indi,
inaninga ra yëën ang basta magtalig̓a ra ilëm tung yëën,
may maita mung sasang ikadëngëg yang Dios?”
mag̓aning.
41 Kapurisu numanyan,
yang batu,
dayun da nirang ipinalig̓id.
Pagkatapus,
tuminingara ti Jesus ang nag̓ampu ang mag̓aning,
“Ama,
pagpasalamataw tung nuyu,
natëtëngëd pinamatiaw ra nuyu.
42 Kung tung bag̓ay,
nag̓askëanu ang pirmiaung agpamatiën mu.
Ug̓aring ya ag̓ipagngëlayu ilëm tia natëtëngëd tung mga taung naang buntun ang pamamati ug̓ud mamanangëd da ang yawa yang nagtuw̓ul tung yëën ang mangay taa tung kaliw̓utan,”
mag̓aning.
43 Pagkaaning na tia,
dayun dang nagkëndal ang mag̓aning,
“Lazaro,
magluaa ra tani!”
44 Pagkatapus,
ti Lazaro tanya,
diritsyu ra ka man ang naglua.
Yang tinanguni na,
putus ang pisan ta aw̓ël ang atiang isinaw̓ëd-saw̓ëd tung anya atiing baklu ipinalg̓ud nira tung lëyang,
pati kalima,
pati kakay.
Asta kulu na putus pa ka ta panyu.
Atii,
nagkalalangan si ti Jesus tung mga tau,
“Ala,
uw̓aran mi ra tia ti Lazarong papanaw-panawën!”
Natëtëngëd Tung Pinakaw̓ut Yang Pruibang Atia Tung Pag̓irintindiën Yang Mga Tau (11:45-54)
45 Simanyan yang mga Judiong atiang namanikad da tung ni Maria,
naita ra nira mismu yang binuat ni Jesus ang atia.
Purisu kadakël dang namagtalig tung anya.
46 Piru yang duma,
ya ra mamansibalik tung mga Pariseong namag̓ugtulun kung unu pay binuat ni Jesus.
47 Kapurisu,
tung uras ang atii,
yang mga Pariseo,
asta yang mga paring arabubwat,
namagpasagpun da tung tanan ang mga usgadung pinakalandaw tung banwa ang paggug̓uuyan nirang Sanedrin.
Namagkërësën da tanira ang mag̓aning,
“Ta,
ya ra ilëm ag̓ari kaya taa yang buatën ta?
Ay yang taung atia,
kadakël da ka man yang mga pruibang nagkarabuat-buat na!
48 Ay kung paw̓ayaan ta ra ilëm tia,
yang mga kinasakpan ta,
luw̓us dang mamanangëd tung anya.
Yang dapat ang pangamanan ta asan ang muya mabalitaan da yang gubirnu duun tung Roma ang itang mga Judio taa may dumang paggaëm tung yatën.
Anday dumang buatën nira,
kuatanita ra ilëm nira tung puistu ta,
pati yang pagtuuan tang sagradu gëw̓aën da ka nira asta yang nasyun tang Israel,
diaduën da ka nira!”
49 Simanyan,
yang aruman nirang sam bilug ang nag̓aranan tung ni Caifas ang yay paring pinakalandaw tung uras ang atii,
ya ray nagbitalang mag̓aning,
“Naa pala,
anda pa kay kaliw̓utan mi!
50 Ayw̓a,
indi mi nag̓aintindian ang mas maayën para tung numyu kung may sasang taung ipatumbas ang para tung ikaayën yang mga tau kay tung madiadu pa yang intirung nasyun ta?”
mag̓aning.
51 Naa pala,
yang inaning ni Caifas ang atia,
bëlag̓an ilëm liit tung sadiling isip na,
kung indi,
ëkël tung katëngdanan nang tanya yang paring pinakalandaw tung takun ang atii,
napag̓ula ra ang indi ra ilëm buay,
magpakugmatay ra ti Jesus ang para tung ikaayën yang nasyun yamën ang mga Judio.
52 Piru tung pagkamatuud,
bëlag̓an ilëm yaming mga Judio ay pakugmatayan na,
kung indi,
pati yang mga tag̓a duma-rumang nasyun ang pamag̓istar tung duma-rumang banwa,
ug̓ud kumpurming tinu pa tung nira ay buatën yang Dios ang mga ana na,
ya ray papagsarasaën nang tanan ang maning pa tung san tuug da ilëm.
53 Kapurisu,
mag̓impisa tung kaldaw ang atii,
namagsaranyug da yang mga pamagpakigmaëpët ang ti Jesus ipaimatay ra nira.
54 Purisu,
simanyan,
ti Jesus indi ra nagpaita-ita duun tung Judea,
ang indi,
nagliit da ilëm ang nanganing duun tung lansangan ang Efraim ang alëngët da ilëm duun tung banwang kapas.
Duun da nagtinir,
kasiraanami ra kang nag̓apangugyatan na.
Ti Jesus Nag̓amalungan Da Yang May Mga Katëngdanan Ug̓ud Mapadëëp Nira (11:55-57)
55 Simanyan,
indi ra ilëm buay,
kaw̓utun da yang pistang nag̓ipagsilibra yamën ang mga Judiong pag̓aningën ang Taklib.
Purisu durung mga taung duun mamanliit tung mga kabiw̓init-binitan ang namagpakigluyug-luyug dang namagturungulan duun tung Jerusalem.
Ay mamagturumanën da ta mga urdinansang sinambit tung kasulatan ang para simpan dang tanirang mamagsilibra yang pista.
56 Numanyan,
durung sagyap nira tung ni Jesus kung ay ra.
Tung pagsaragpun-sagpun nira duun tung pagtuuan ang pinakalusu,
maning taa yang kërësën nira:
“Ta,
unu pa tung numyung pagpamalad?
Dua-dua ra sigurung magpasakëp pa taa tung pista,
anu?”
57 Ay ya pa ag̓ari,
namagkalalangan da yang mga paring atiang arabubwat may yang mga Pariseo ang kung tinu pay masiplat ang ay ra ti Jesus,
dapat ang mag̓ugtul tung nira ug̓ud mapadëëp nira.