Nag̓apapagkumpalar Ni Jesus Yang Anyang Pag̓ërëkëlën Tung Mga Tau May Yang Pag̓ërëkëlën Yang Duma Tung Mga Kinasakpan Nira (10:1-21)
10
Taa numanyan,
nagpadayun da ti Jesus yang pagparasanag̓ën na tung nirang mag̓aning,
“Iugtulu tung numyu yang kamatuuran,
kumpurming tinu pay indi pag̓usuy tung purta ang para magpaklëd tung pag̓ëlkan yang mga karniru,
kung indi,
duun da ilëm magtakwal tung binit na,
ya ra yang sasang takawan ubin tulisan pa.
2 Piru yang pagpaklëd tung purta,
ya ra mismu yang manig̓asikasu tung mga karniru.
Jesus the Good Shepherd (Juan 10:1-21)
3 Yay papaklërën yang purtiru.
Asta yang mga karniru pamamati tung busis na ig yang mga karniru nang sadili ya ray nag̓aguuyan na,
anya-anyang aran,
sinagguuyay na.
Pagkatapus,
pangkëlan na ra ka duun tung lua.
4 Kung mapangkëlan na ra nganing duun tung lua,
tanya ray pagtukaw tung nira ang yang mga karniru na mamagnunut da ilëm tung anya,
ay natëtëngëd nag̓ailala nira yang busis na.
5 Indi ra ka tia mamagnunut tung duma,
kung indi,
ya rag panlaksuay nira,
natëtëngëd indi nag̓ailala nira yang busis na,”
mag̓aning ti Jesus.
6 Ya ray sasang pananglit ang ipinagngël na tung nira,
piru indi ilëm naintindian nira yang linëgdangan na.
7 Kapurisu dayun na rang sinugpatan yang bitala nang mag̓aning,
“Iugtulu tung numyu yang kamatuuran,
yuu yang kaalimbawaanu,
maning pa tung purtang paraklëran kag luluaan yang mga karniru.
8 Yang kadaklan ang namagtukaw tung yëën ang namag̓ambu ang tanira unu ay mga manig̓asikasu tung mga karniru,
yang kaalimbawaan nira pariu tung mga takawan ubin tulisan pa natëtëngëd tung subrang panlëpës nira tung kaayëpan nira.
Piru,
indi ra pinamati yang mga karniru.
9 Ultimu ilëm yuu yang maning pa tung purta tung turil yang Dios.
Kung tinu pay magpaklëd tung yëën,
bilang tung yëën italig̓ay na yang sadili na,
ya ray tapnayën yang Dios.
Maskin ay pa manganing,
may paglimëngan da yang isip nang pirmi ang katulad ka tung mga karnirung nag̓apadag̓ën-dag̓ënan ta maayën yang manig̓asikasu tung nira.
10 Piru yang sasang takawan tanya,
anday dumang nag̓ipagpalëngët na tung turil,
kung indi,
manakaw ra ubin mandistrusu rang mangimatay tung mga karniru.
Piru ta yëën,
yang inangayu taa ay ug̓ud paëyanganu yang mga karniruu ta ipagpangabui nirang baklu ang yang klasi yang pagpangabui nira,
anday magdëëg.
11 “Yuu yang kaalimbawaanu,
maning pa tung sasang maayën ang manig̓asikasu tung mga karniru.
Ay kipurki yang maayën ang manig̓asikasu maskin pa yang sadili na,
ipabalaw̓ag na pa tung malain arangan da ilëm tung mga karniru na.
12 Piru yang sasang taung pagpatëngëd ilëm ang bëlag̓an analadung manig̓asikasu,
yadwa pa bëlag̓an kang anyang sadili yang mga karnirung nag̓asikasuën na,
kung maita na ra nganing yang kirung talunun ang pagpalëngët,
butwanan na ra ka ilëm yang kaayëpan ang magpalaksu.
Kapurisu yang dangatën na,
pagustu ra ilëm ta pagpanëkëb yang kirung talunun tung mga karniru ang asta magkarawasak da ilëm yang kaayëpan.
13 Ay ya pa ag̓ari,
tanya pagpasuul ilëm.
Anday panganugun na tung mga karniru.
14 Piru yuu yang kaalimbawaanu,
maning pa tung sasang maayën ang manig̓asikasu.
Nag̓ailalaw yang mga karniruu ig nag̓ailalaaw ka nira.
15 Katulad ka tung ni Ama ang nag̓ailalaaw anya ig nag̓ailalaw ka tanya,
ya kay kaalimbawaan yang pag̓irilalaan yamën yang mga karniruu.
Maskin pa yang sadiliu,
ipabalaw̓ag̓u pa tung malain arangan da ilëm tung mga karniruu.
16 Kidispuis pa,
may dumang mga karniruu ang bëlag̓an pa sakëp taa tung turil ang naa.
Dapat ang ya ra kay pangkëlanung ipaklëd.
Kung magngël da nganing nira yang busisu,
pamatiënaw ra ka nira.
Kapurisu yang dangatën na,
magyari rang sa nga kaayëpanan da ilëm tanira ang sasa kay manig̓asikasu tung nirang tanan.
17 Yang nag̓ipaggëgma ëngëd ni Ama tung yëën ang buluntarung magpapirinda yang linawaw tung kalainan ug̓ud maëklanu si kang uman.
18 Bëlag̓an ang mag̓aning ang may mag̓ëkël tung linawaw,
ang indi,
buluntarung ipapirinda.
May pudirung magpapirinda,
may pudiru kang maëklanu si kang uman.
Ay ya ra kay itinuw̓ul ni Ama tung yëën,”
mag̓aning ti Jesus.
19 Pagkatapus tia,
yang mga taung pamamati ang may mga katëngdanan,
nagdurua rang parti yang pagpabëtang nira tung ni Jesus natëtëngëd tung mga ibinitala nang atia.
20 Yang kadaklan pamansianing ang,
“Abaa,
pag̓aëkël-ëkëlan ilëm ta dimunyu tia!
Ayw̓at ya ray saptën mi tia?”
21 Piru may dumang pansianing,
“Kung pag̓aëkël-ëkëlan ta dimunyu,
indi ra mapagbitala ta maning tia.
Ayw̓a,
yang sasang dimunyu,
mapagpamuskad pa tung mata yang mga buday?”
mag̓aning.
Nag̓alalangan Da Yang Mga Pamagpakigmaëpët Ti Jesus Ang Magprangka Tung Nira Natëtëngëd Tung Pagkabëtang Na (10:22-42)
22 Taa,
simanyan,
tung pira pang kaldaw,
kinaw̓ut da yang uras ang nag̓ipagsilibra yamën ang mga Judio yang Pistang Nag̓ipagdëmdëm Tung Pagpabinlisiun Tung Dios Yang Pagtuuan Tung Anyang Pinakalusu.
Yang uras ang atii tiglamig.
Jesus accused of blasphemy (Juan 10:22-42)
23 Simanyan ti Jesus pagpanaw-panaw ra duun tung binit yang pagtuuan ang atia ang may maninga intabladung paggug̓uuyan ang intabladu ni Adi Solomon.
24 Simanyan,
tinaripukpukan da yang mga pamagpakigmaëpët ang pinabalitëktëkan nira ta maayën ang mag̓aning,
“Indiami ra papagdua-duaën mu.
Magprangkaa ra ilëm kung yawa matuud ang pag̓aningën ang Cristo.”
25 Mag̓aning ti Jesus ang minlës,
“Inugtulanamu ra kang lag̓i yëën,
piru indiamu pa ka ëngëd panangëd.
Yang mga buat-buatung naang nag̓ipagpalapusu ang lug̓ud tung katëngdanan ang naang ipinakdul ni Ama tung yëën,
ya ray pagpailala tung yëën kung yuu tinu pa.
26 Piru yamu,
indiamu ka ëngëd panangëd tung yëën,
ay natëtëngëd bëlag̓anamu mga karniruu.
27 Ay yang mga karniruu,
pamagpamati tung busisu.
Nag̓ailalaw ka tanira ig pamagtuman ka yang kalëlyag̓anu.
28 Dispuis yang nag̓ipakdulu tung nira ya ra yang ipagpangabui nirang baklu ang yay pagnatisan nirang asta tung sampa.
Kapurisu indi ra ëngëd madayunan ang mablag tung Dios ang asta tung sampa.
Kidispuis pa indi ra ka ëngëd makalaw ta duma tung kalimaw.
29 Sipurki tanirang tanan ang ipinagtalig ni Ama tung yëën ang para panapnayënu,
yay pinakamaal tung tanan tung pagtërëlëngën na.
Purisu,
indi ra ka tia makalaw ta duma tung kalima na.
30 Ay yami ni Ama pagsinasaayami,”
mag̓aning.
31 Pagkadngël da tia yang mga pamagpakigmaëpët,
dayun sing namamisik si ta batung ibatu si rin nira tung anyang imatayëna.
32 Mag̓aning ti Jesus tung nira,
“Ëlat kanay,
durung nagkarabuat-buatanung matitinlu ang ipinagpaitaw tung numyu ang ya ra kay ipinabuat ni Ama tung yëën.
Unu pang buat-buatayu ang nag̓ipagpakulain mi tung yëën ang yuu rag bantaay ming batuën?”
33 Mag̓aning tanirang namagtimalës,
“Bëlag̓an natëtëngëd tung mga nagkarabuat-buatan mung matitinlu yang ipagpamatu yamën tung nuyu,
ang indi,
natëtëngëd ya rag tiwakaway mu yang pagkadios yang Dios!
Kipurki yawa sasang tau ka ilëm ang pagkatapus pag̓ambua pa ka ëngëd ang yaway Dios!”
34 Mag̓aning ti Jesus ang nagtuw̓al,
“Indi w̓a may sasang napabtang tung kasulatan ang yay nag̓ikadëngëg ming sulipëtamu ang may mga taung inaning nang may pagkadios nirab?
35-36 Nag̓askëan ta ka ang kumpurming unu pay inaning tung kasulatan,
indi puiding baliwalaën.
Purisu kung yang mga taung atiing pinamiaran nang mamag̓usgad tung mga kaarumanan nira ya pa ag̓aningay nang may pagkadios nira sigun tung katëngdanan nirang atia,
ayw̓a,
magkatama w̓asu ang ta yuung pinilik nganing ni Amang ipinaangay taa tung kaliw̓utan,
yuu pag bangdanay ming pagtiwakawaw tung pagkadios na atiing pag̓aningung yuu ka man yang pag̓aningën nang Ana Na?
37 Kung alimbawa indiaw pagbuat yang mga bag̓ay ang nag̓ipabuat ni Ama tung yëën,
maskin indiaw ra panangdën mi.
38 Ug̓aring,
kung pagbuataw ka man yang mga maning tiang bag̓ay,
maskin indiamu ra kanay manangëd agkali tung bitalaw,
basta manangëramu ra kanay ilëm tung mga binuat-buatanu,
ug̓ud asan da ngaskëay ming asta mabilug̓an mi ra ka ëngëd ang ti Ama yay pagpakigsasa ka man tung yëën ig yuu kay pagpakigsasa tung anya,”
mag̓aning.
39 Atii,
tinag̓aman si rin nirang dinëëp,
piru nagpalias dang nagpapuklut tung mga kalima nira.
40 Taa numanyan,
pagkainabu tii,
ti Jesus dayun dang nag̓angay duun tung subang atiang pag̓aningën ang Jordan ang pagkatapus nagpatindak si duun tung pinamënyag̓an ni Juan tung mga tau atiing primiruc.
Duun ka nagtinir.
41 Numanyan durung mga taung namansiangay ra duun tung anya.
Namag̓araning-aningan da tanirang mag̓aning,
“Ti Juan indi napagpalapus ta mga pruiba,
piru yang kumpurming sinambit na natëtëngëd tung taung naa,
talagang nagkamatuud da,”
mag̓aning.
42 Purisu,
duru rang namagtalig yang mga sadili nira tung ni Jesus duun tung banwang atii.